2 Samuel 12

Natandi Raja Daud tep, “Ware deiyo tep mali kupmum do?” pepra wenepu upu

1Allah er si Yahwehdi, er upu lap peramu ngebo Natan dopra dokotepupa, Natan Raja Daud damai yaudi, upepu. “Nimi butene neng ton tenpu mutu kuramrei dinin, tenpu ngeboda, isomka ngebo, tenpu ngeboda tali kankan ngebo kuramrei. 2Isomka ngeboda, domba bisam cap, sapi bisam cap, weika di periramu. 3Dinino, kankan ngebo erda, akeca yuma gum dinin, ner domba bisam mi yambulnge tenpu kunuprapudi, peiramupa, er cap, er nyapu cap damai dipapu nepu. Er nyapu cap, tonpa kuramidi, jen tapra karepnepa, ametek ner dombada, nimi nyapu utopu kupra iripra, er ner nyapu utopu kuramudi, er ati pumbonpu adomba bisam cap, er cap kikimanpu damai iripdanamaramrei.

4Tenpu tumi isomka ngebodi tenpu nimi bo ngebo er ati yaupa, ‘Ware domba bisam popra gaipnedi, karepnepa, animi bo ngebo jepkur do?’ tenepudi, er pe domba bisam weik dinin, ange men popu. Ernge men popudi, kankan ngebo, er metek ner domba bisam tenpunge, dopra poipudi, gapra er nimi bo ngebo tep karepupa jepu.” Natandi Daud tep pepu.

5Natan upepupa, Daud aupu gekepudi, isomka ngebo tep ila tulum kupupa, Dauddi Natan tep pepu. “Ne nai Allah gam pio kure ngebo, er si deiki di pepkene. Amali kupmar isomka ngeboda, tek sisi telep ngeda, angebo wenepra poptaptepe. 6Domba bisam nernge popmarada, adipapu punupkamre. Pununa tep nengeda, ue dumbari, 4 kali lipat, co bo weika di karepredi punupkamre. Ange tep nengeda, isomka ngebo kupu ngeda, pio mali kupu. Tonda, akankan ngebo tep, bicau pio men tenepka tep pepkene,” Dauddi pepu.

7Upepu pangeda, Natandi Daud tep pepu. “Arup pepmaken upuda, ukupmanto upu deiki pepmakene. Dinino, aisomka ngebo tek sisi ngeda kan dano,” pepu.

Nun nai Allah, er si Yahwehdi Israel nesala melimserur Allahdi upepkere. “Neda nimi deiyo ngebo Sauldi, ‘Daud popkamne,’ teneramkeu taruda, lyepropkesi. Ne buru deiki di weprapkesidi, ‘Israel neng sun deiyo ngebo kepkamre,’ pepra weipra ereipkesi. Erepra tekeipkesi ngeboda, ne pua. 8Saul taleamu mutu cap, nesala cap, tonda er nerapu gung yuma cap, kan tep kareramkesi. Ukupkesidi, Israel nesala yala-yala yuma cap, Yehuda yala nesala cap, ‘Sun deiyo ngebo kepkamre’ tenen, wepra deipkesi. Ange yuma wepra deipkesi dinin, ‘Angeda metek pua,’ teneramtumtoda, weika di ton cap kareramketene.”

9Ware deiyo tep, ne Allah Yahwehdi peiamkesi upu tep, tulum tenepmumdi, ne upu yaniptapra, ne damai pio mali kupmum do? Akupmumnge yumada, ne kangeda, ‘Angeda pio mali,’ tenekenune. Angepu gum dinin, tonda ukupmumdi, Het yala ngebo Uria ton, kandi peipmumpa, sun Amon yala jen talena nengdi Uria popipa depu. Kandi peipmuma deiki di, angebo popi pangeda, kanda Uria er ner dopra dopmume.

10Ange yuma ukupmumada, kandi ne tep men teka tenepnemumdi, ne upu yanina utopu kupnemume. Ukupmumdi, Het yala ngebo, er si Uria depudi tapu ner dopra, kan ner kepmume. Ange tep nengeda, kan nyapu derinkamrema yumada, yuk nengdi ya doupra popmengepa, denapu kunkamenge. Kandi deipmempa, dadeipbankameng neng yuma neitamaida, yu tenedana cap, ya di podana cap, pio kunkamenge.” Allahdi Raja Daud tep upepra wenepu.

11Upepudi aupu ton pepu. “Ne Allah Yahwehdi tek sisi pepkene. Tulum keca cap, kange mun keca cap yumada, kan pe tara nesala deiki dipapu ikin keca kan nong deiki derinkamkenge. Ukupkengepa, kan pe asuru dinmamemyadi kan damai kure ngebodi, kan nerapu yuma dopra karepnepa, angebodi anerapu yuma, yuk neng dinkamengaipu, keteng komuni kikiman mapkamenge. 12Kan mali kupmum kecada, lukunda neitamai inipra kuramume. Ukupmum dinin, neda kan tep wenemkamkenada, Israel neng kan-kan jenek dinmangai di, mali kupkamkenga deiki di wenemkamkene. Israel neng yumadi epkamenge,” Allahdi kan Daud tep upepkere. Natandi Daud tep pepra wenepu.

13Upepu pangeda, Dauddi Natan tep pepu. “Uo, tek sisi ne konum mali kupsi. Ne nai bo Allah, er si Yahweh tep, pio mali kunune,” pepu. Upepupa, Natandi tamupra pepu. “Allah, er si Yahwehdi kan mali kupmum keca yuma gum kupra deipkeua cadi, wenepkamker dinin, men depkamreme,” pepu. 14Upepudi aupu ton pepu. “Men depkamrum dinin, kandi mali kupmuma deiki di, Allah tep, ‘Nun song’ tenen, yaninge nesala yumadi, nun nai bo Allah tep, ‘Erda talya, puto pio gum ngebo,’ tenenunge. Ange tep nengeda, kan wenemna tep, Batsyeba deipkamker mi depkamre.” Natandi Daud tep pepu.

15Konum pepu dingeda, Natan tamupra er pe mutu tamupra beu. Daud er jen talen ngebo Uria, er ner solu dakmaudi deipmau mi, Allahdi tenepudi karepupa, ila pu jenmau. 16Daud er mi pu dourbeu pangeda, ‘Allah moropnepa, ne mi gam kupkure,’ tenepudi, jen jepne gum, lukunda yuma, er ati neitamai wekra, ason deiki apu mapmaupane bereku. 17Ukupmauanen, ue taru weika di ukupmaupane, er ati kurami neng wisi-wisi neng ayuma bulupra yakanmaidi, “Bukroyo,” penmaipane, sun upu ton men gekenmaudi, “Ne songe, tonda sun cap, tonpa jena men jepkupe,” teneprapudi, tupa penmau. Ukupra tupa kunmauane, ngantan bari (6) tumi kupu.

18Ange mi pu jemaua, komuni yoneitam bari (7) tumida depu. Konum depu pangeda, Daud er pel don nengdi, “Nun kwar tepa, er nai Daud pepkup do, gum do?” tenepra upu taledanmai. “Ange tep nengeda, ami gam kun taru peda, nundi pepne upu Daud men gekepmanto kuramseue. Atep utopu, er mi konum depmar taruda, men gekepkusere. Tonda, ange pepmepyopda, Dauddi ukunmankap er nonge poipdankur do?” pepra, upu taledanmaipa, Raja Daud gekepu.

19Daud, er pel don neng sun pepu amol pum pedongodanmaidi, sisingmaipa, epu. Ange epka tep, bukudi, betapra tenepu. ‘Uo ne mida, konum depmare’ tenen, kael kepudi, ila kange mun kange doupu. Tenepudi, er pel don neng tep asimbeu. “Ange mida konum depmar do?” pepupa, “Naio amida konum depmare,” pepi.

20Upepi pangeda, Daud tu deiki mapmaua bukroudi, me gaku dingeda, nintong telep me likra deipdaudi, potong wepra opkal yuknge punupropu dingeda, Allah Yahweh, er si eremna ati beudi Allah si erepu. Konum kupu dingeda, tamupra er ati yau dingeda, “Ne jen keca duyarume,” pepra moropupa, er melimna nengdi, jen keca duyana karepi pangeda, jena jepu. 21Daud er pel don nengdi sun nai bo Daud tep pepi. “Kan kupmamua deiyoda warya tep kupmamum do? Nun men kael kepmakepe. Ada kan mi gam tupa kunmau taruda, jen jepne gum, lukunda engenapu kupmamum dinin, ami depmarpapu bukura jen jepremnge dano?” pepra asipetepra pepi.

22Upepi pangeda, Dauddi tamupra pepu. “Teka ami gam tupa kunmaupapu, jen jena gum di, si tepra engenmasanen, mapmasi. Ada ‘Allah kael kepneredi, bicau tenepra, Allah er si Yahwehdi, ne mi gam bukeipkamare,’ tenepmasidi kupse,” pepu. 23“Dinino ne mi konum depmara cadi, neda ware keca tep jen jena gum di, si tepra kuptene do? Ukuptenya deiki di, ami tamupra men gam buktue. Ne peda depnyopda, er beuaipu benkamne ja. Utopu ukutaru er peda tamupra ne damai men yatue,” pepu.

24Upepu dingeda, Daud er ner Batsyeba tep kange telep kweipu dingeda, amenda taru Batsyeba cap, tonpa maramreia, sal mi tenpu deiprei dingeda, Daud cap, Batsyeba capdi ami si kareprei. Ada Salomo peprei. Tonda, Allah er si Yahwehdi ami tep, bicau tenepudi kange deipu. 25Allah er si Yahwehdi ami tep kange deipka cadi, upu doproipupa, Natan deiki deipu. Natandi, Daud damai bena, “Allahdi upepkere. ‘Kandi ami er si Yediya dopkurume,’ pepra, Allahdi upepkere,” pepra, Natandi ami si lap perbeu. Sun Ibrani upu deiki, er sida Yediya pepka deiyoda, ‘Allahdi angebo tep pio bicau tenerure,’ tenen, penunge. Atep, asi kareprei.

Dauddi Raba mutu dopropu upu

26Ataru neitamaipu, Yoabda, Amon yala nesala, sun ila ati arum doramyada, amutu deiyoipu dopra kurami mutuda, Raba mutu kurami neng tep tupa porbanapu kuramiyanen, amutu kurami nesala yuma popra sirya dakudi, amutu peda dalupra dopropu. 27Atep nengeda, Yoabdi Raja Daud er damai perbana tep, er nyapu ton wepra deipudi, aupu pepra deipu. Ada ake. “Ukutaru ne Yoabdi, ila ati arum, Raba mutu dopra kunung nesala konum poptapmandi, sun me jena tep dopra keteneiamyaida, konum dalupra dopropmane.

28Atep ukutaruda, nimi deiyo ngebo Raja Daud, kandi nun jen talena neng weikanun, akunmang neng yuma bulupra deipmemdi, gonga kepmempa, amutu ati arum dopra kunungai, bemumdi warekra popmumdi, amutu yuma dalupra dopropkurume. Kandi ange men kupmemnyopda, ne Yoab dipapu, amutu yuma dalupra dopropne pangeda, doryankamre taruda, yuk nesaladi, ‘Amutuda, Yoab erdi dalupra dopramu mutu cadi, er sipu pepmepedi, akati arum si tep, er sipu penkamnupe, tenepra pepnung,’ tenena tep pepkene,” pepra, Yoabdi peipu. Upepra deipupa, erdi, ‘Aneng ne upu lap perbenkameng’ tenen, wepra deipu nengdi, aupu doupra, Daud damai bena lap perbei.

29Upepi pangeda, Raja Daud gekepudi, er jen talen neng yuma cap, er mutu nesala weikanun ton cap, adipapu bulupra deipu. Bulupra deipyopda, Raba mutu beidi, amutu kurami nesala yuma tep nengeda, sundi bena poptapidi, amutu peda dalupra dopropi. 30Israel nesala, sun nimi deiyo ngebo Raja Dauddi, Amon yala nesala, sun nimi deiyo ngebo Raja kemna tep, er giso deiki galuramu keca, er si mahkota dopropu. Ukupudi, Daud er giso deikida kenekropu. Amahkota, er petupra derina tep nengeda, emas er ikinda, 35 kilogram dopropudi, ange deiki di ketekepra deiami. Tonda, amahkota deikida, pio kunumna weik telep gel, permata gel peramenge, urasin pio telepnge di ketekepra deipidi, palepra deiaminge kwamu. Tonda, Dauddi amutu kurami nesala yuma poptapudi, sun menop taru taleamidi kurami bung keca, yala-yala yumada, weika di dalupra dopropudi, er pe mutupu tamupra dubeu.

31Ukupu dingeda, nimi deiyo ngebo Raja Dauddi, Raba mutu kurami nesala yuma dopropudi, sun tep ikin pel dimamu. Ada, sunda co cangne keca gergaji cap, tu palina tep, gat besi keca lingkis cap, pikwel cap, tonda co kwemna tep, besi kapak ya cap, karepudi, ‘Akeca doupra, ne pel dona tep melipnemumpa benkupe,” pepra dubeupa, er pe mutupu tamupra bei. Tonda ikin pel ton, “Batu tela utopu ngeda, gel di dopra derina tep, pel donkamrume,” pepra, bena dipupa, ikin pel dorami. Tonda, sun amutu kurami nesalapu gum dinin, Amon yala nesala kurami mutu-mutu yuma neitamai kurami nesala peda, ‘Batu tela utopunge ketkemna pelpu donkameng’ tenen, ikin pel dilamupa, apelpu dorami. Apel dipupa, dopi pangeda, Daud cap, er jen talen neng cap, sun yumada, adipapu tamupra sun pe mutu Yerusalem mutupu bei.