2 Samuel 13

Amnon cap, Tamar cap tep, pepu upu

1Dauddi deiamu ngebo Absalom, er weit ner sida, Tamar kuramu. Anerda, nimi dona gum di, er yuk kuramu. Erda urasin pio telep ner kuramu. Amnon peda, Daud erdi deipu mi dinin, yuk nerdi deiamu ngebo kuramu. Tonda, Tamar er ninda yuk ner kuramu. Er angebo Amnonda, Tamar tep ‘Uo, aner dopkamne’ tenen, pio mun peramu. 2Ataru neitamaida, Amnonda, ‘Uo aner Tamar cap, nun kikiman mapteneme,’ tenen, pio tenenapu kuramu dinin, ‘Anerda, ne weit ner kurura cadi, erda tek sisi men doptenya tep, ware kuptene do?’ tenenapu kuramu. Tonda, Amnondi Tamar cap kikiman manada pio men kupmanto. Ada, Tamarda nimi dona cap, yuk neng cap, kikiman kuna cap gum ner, erda kaberpu kuramu cadi, ange tep tupa-tupa tenenapu kuramkapudi, Amnon adipapu ikin kange doupudi, er dipru pu jepra kuramu. 3Dinino, Amnon er kabo sisa, tenpu ila kael ngebo kuramnga cadi, mali kuramne keca pio inipra kuna cap, mawa pena upu cap ton weik kuramu. Angebo, er sida Yonadab. Er nai bo er sida, Simea kuramu. Simeada, Daud er dubo kuramu.

4Yonadabdi Amnon tep upepu, “Amnono, kanda, nimi deiyo ngebo Raja er mi kurume. Dinino, kanda ware keca deiyo tep, tumi-tumi yuma tupa tenenapu kumemdi, mali kange doupra kurum do? Kanda ware tenememdi, mali kangepu doupra kurum do?” pepra asipetepu. Upepupa, Amnondi Yonadab tep, tamupra pepu. “Jo, neda ne kabo Absalom, er weit ner Tamar tep, mun penune,” pepu. 5Upepu pangeda, Yonadabdi tamupra Amnon tep pepu, “Angeda kange mun kange dounange gume. Telep ngeda ake. Amnon kan men di mamemnyaipu bena maprapmemdi, pu jenmare nengdi puto boun kuramenga utopu, kuprapmemdi mapkurume. Ukupmempanen, amenda taru kan nai bo yaredi, yana asimkere pangeda, kandi upepkamarume. “Naio, kan tep moropkene. Kandi Tamar tep, ‘Telepe,’ teneptumdi pepnetumpa, erdi ne jen keca doupra yanetue. Doupra yatudi, ne jen jepkamatenyai dipapu, ajen keca duyana daptudi, er buru dipu karepnetupa, nedi jeptene,” pepra moropkurume. Yonadabdi, Amnon tep pepu.

6Upepkopda, Amnon adipapu, ‘Ne nai bodi, ‘Uo, ne mida pu jenmare,’ tenepkamaner’ tenen, pu jen neng kurameng utopu kupra, tamupra ason deikipu mapu. Ukupmaua tep, nimi deiyo ngebo Raja Daudda, kange di tamupra er mi Amnon koripu diryau. Adiryau taruda, Amnondi er nai bo Daud tep upepu. “Naio, kandi ne weit ner Tamar tep, ‘Telepe,’ tenepnetumdi, peipnetumpa, Tamarda ne damai yatudi, yambul jen keca kue yana daptudi, er pe buru di karepnetupa, nedi dopra jeptene,” pepra moropu. 7Upepra moropupa, Raja Dauddi apepmau upu yumada, er ner mi Tamar, er damai pepra deipu. Ada, “Tamar kanda, kan du bo Amnon damai benkurume. Ukupmem dingeda, Amnon er jen keca dapkurume,” peipu. 8Upepupa, Tamar gekepu dingeda, adipapu Amnon er ati bena dinmaupa, Amnonda, er man ason deikipu mapmaupa epu. Ukupkopda, Tamar adipapu, ‘Roti jen keca dapkun’ tenen, roti dana tep deiyo keca, er si adonan, yambulanun dopropu. Dopropu dingeda, er Amnon dinai di, kue dana keca ketenepra deipudi, yambul jen keca, er si kue, Tamardi dapu.

9Ange konum dapra sengpepu dingeda, Tamar adipapu kue dapmaunge, pala keca deiki, piring utopunge dopra, ‘Amnon jepkur’ tenen, akue lukra jena tep ketenepra deipu. Dinino, Amnondi adapmau jen keca kueda, men jepu. Atep Amnonda, erdi, er melimna neng tep pepu. “Ne ati pumbon kunmarum neng yuma tep, bura tara benkurume. Nimi yumada, aca di gopra, yukai bendopkurume,” pepupa, gekepidi, sun yuma bendopi. 10Anesala yuma akati neitamai di gopra, yukai bei taruda, Amnondi Tamar tep pepu, “Ukutaru kandi dapmarem jen keca kueda, ton nge dopra, ne manunaipu duyankurume. Duyamemdi, ne yana karepnemempa, jepkune,” pepu. Upepupa, Tamardi Amnon peputopu kupu. 11Dinino ataruda, Tamardi akue doprapudi, Amnon damai bena akeca karepterepu taruda, Amnondi akaber ner tep talepudi pepu, “Ne weit nero, ukutaruda, kanda ne weit ner ne damai yamempa, ne cap kikiman mapkuneme,” pepu.

12Upepupa, anerdi tamupra pepu, “Uo ne dubo, ukunada pio meme. “Ne dubo kandi, ‘Ne tenena gumnge, angepu kuptene’ tenen, pio palenada gume. Sun Israel yala nesala yumada, autopu mali kunange ton, pio men kununge. Atep kandi, ‘Puto di talepkenedi, mali kupra deipkukene. Atep, ‘Nun kikiman mapkamaneme,’ tenenmanerem ngeda, yapkurume, ne dubo. Ange kunada, pio mali weik cadi, ange utopu ngeda, nun Israel nesaladi tek sisi men kuptepe,” Tamardi pepu.

13Tonda, aupu ton pepu. “Autopunge kupnemem pangeda, neda pio malito kweipnememnyopda, neda dan cei bena iniptene do? Men kuptene. Tonda, kan peda, sun Israel nesala yumadi, ‘Uo, er Amnonda, konum ila mali kupmar ngebo,” pepra, yap-yap penkamkenge. Atep telep ngeda, kandi nun nai bo Raja tep moropkurume. Upepmem pangeda tek sisi nun nai bo Raja, erdi kan tep, ‘Gume’ men pepkamkere. Ne kangeda, erdi, “Jo, anerda kan dopkurume,” pepkerepa dopkamnereme. Gum dingeda, pio gume,” Tamardi pepu. 14Tamardi upepu dinino, Amnondi Tamar penmau ngeda, men gekepudi, Amnon erda puto weik ngebo cadi, Amnondi er weit ner, er nong puto di talepdongoprapudi, er tenepmautopu, mali kupra deipudi, upula nyaku.

15Amnondi, ange konum kupkopda, erdi Tamar tep, adipapu, ‘Erda ne songe’ tenen, yu weik kupu. Kapul taruda, Amnondi Tamar tep kange deiamudi, mum peramu dinin, erdi er weit ner tep, konum mali kupra deipu taruda, adipapu, ‘Ne songe’ tenen, yu weik kupu. Ukupka tep, Amnondi er weit ner Tamar tep, “Kanda adipapu beo,” pepu. 16Upepu dinin, Tamardi Amnon tep tamupra pepu. “Uo ne dubo, kandi ware keca tep ange kupkunerem do? Kandi ne tep konum mali kupmanerem ngeda, tek sisi ila mali kweipmanereme. Dinino, ne dubo kandi, ne tep enepronememnyopda, kandi ange kupkamremada, tek sisi ila malinge kupkamnereme. Arup ngeda, yambul mali dinin, angeda pio mali weik keca,” pepu. Upepu dinino, Amnondi Tamar pepu upuda, moupra men gekepu.

17Ataru dipu, Amnon er melimna kaber ngebo tep kongpepudi, aupu pepu. “Aner tep doupra bememdi, bura beo, pepmempa beryopda, adipapu ne ati buplan dengna keca di pio dekdongopkurume,” pepu. 18Upepka tep, Amnon er melimamu kaber ngebodi, Amnon peipmautopu, Tamarda enepra dopkotepu. Ukupu taruda, Tamar er adipapu er lyom opkalda buru damai di dipdongopra, nong yuma inimnange keneku. (Uda, menop taru neitamaida, nimi deiyo neng Raja-Raja neng, sun ner nyapu, nimi kapul men domne nerapuda, ato lyom opkalpu kenengamya cadi, Tamarda ange utopu kupra keneku.) 19Akaber ngebodi, Tamar enepra bura dokotepu taruda, Tamar adipapu sikke but dopra, er giso deiki deipu. Ukupudi, er kenekmau lyom opkal, er si jubada, gwelepropu. Ukupudi, aner er buru butene di, er aso deiki lelipdongoprapudi, nimi depmangepa ila di engeramengtopu kupra, engepra banmau.

20Er pe ati tamupra beuopda, dakunmaupane, Absalomdi Tamar epu. Epu dingeda, erdi asipetepu. “Arup taruda, Amnondi kan tep mali kupra deipmakeu do? Er puto dipu upula nyakeu do? Atep nengeda, ne weit ner, angeda lap pena gume. Kanda dim pepra kunkurume. Kandi ton cap ange tepapu pio tupa tenenapu yapkurume. Amnon erda, kan du bo kurura cadi, angeda dakwapye. Atep nengeda, akupkeunge tep, nimi yuk neng geken damaida, lap pio men pepkamrume,” pepu. Absalomdi upepupa, Tamar adipapu dim pepra nimi peda kuna gumai kuna utopu kupra kuramudi, yuk nerapu cap, kikiman kuna gum dipapu, nimidi nerapu tapmengepa, pio ikin kange doupra kurameng utopu, er peda kange yuk bongtona gum di, er dubo Absalom er ati pumbonpu kuramudi, ‘Uo,’ tenenapu kuramu.

21Amenda taruda, akupunge yumada, yuk nengdi lap pepipa, nimi deiyo ngebo Raja Daud konum gekepu. Gekepudi, pio yu weik kupu. Yu weik kupu dinino, erdi er deiamu mi Amnon tep, ‘Wenepra popkune,’ men teneramu. ‘Dakwapye,’ teneramudi, tali dim peprapu kuramu. Deiyoda, Daud er nerdi er mi Amnon menmena taru deiamnga cadi, Amnon tep nengeda, ila di kange deriramu. 22Tonda Absalomda, Amnon pio mali weik kwamunge tep, pio tupa teneramu. Uteneramu cadi, Absalomdi, Amnon tep, upu tenpunge peda pio men peramu. Sun buteneda, upu kikiman men sisingamrei. Deiyoda, Amnon er weit ner Tamar mali kupdongomu ngeda, tupa tenenapu kuramnga tep, yu kupupa, tupa teneramudi, upu tonpa men sisingamrei.

Amnondi er weit ner Tamar mali kweipunge tep, Absalomdi kwang daku atep, seki upu

23Keteng tamun butene konum kupu pangeda, Absalomdi, Bahal-Hasor mutu, ada Efraim tara neitamai bukamo. Absalom er pel melimna nengdi, er domba bisam potong touna pel donmaiyanen, gawal daki taruda, ila kailya kalepi. Ukupyopda, Absalomdi er kayapu neng yuma tep, Raja Daud erdi deiamu neng yuma tep, ‘Amutu yankurume,” pepra, kongpepu. 24Absalom adipapu er nai nimi deiyo ngebo Raja Daud damai beudi pepu. “Naio ukutaruda, ne domba bisam potong toun kailya kalepkamana cadi, neda kan amutara kunun ngebodi tenepmanada ake. Nai kan cap, kan amu tara pel dona neng yuma capda, ormutu yamumnyopda, nun kikiman kailya jenkamape,” pepra asipetepu. 25Dinino, nimi deiyo ngebo Raja Dauddi tamupra upepu, “Gume, ne mio, kandi, ‘Sun yuma yankurume,’ pepmaserem ngeda, gume. Ukupmanto nun yuma kan damai yapeyopda, kan ikin kepra deipkunupe,” pepu. Upepu dinin, Absalomdi Raja tep, “Gume naio, sun yumada yana pua. Angeda telepe pua,” pepra, tupa-tupa palepra penapu kunmau. Dinino, Absalom er nai Raja Daudda, men yau. Men yaudi, Daudda Absalom tep, “Telep dipapu domba potong toun taru tep, kaliya dakalepra jepkurume. Ukupmemnyopda, ‘Allahdi telep kweipkamkere’ tenen, moronkamne. Angeda telepe pua,” pepra deipu.

26Upepupa, Absalomdi mawa upu deiki di pepu, “Ange tep nengeda, ne kabo Amnon puda, ‘Telepe,’ teneptumopda, er cap, nun cap kikiman wisipra betepye,” pepu. Upepupane, nimi deiyo ngebo Raja Dauddi, “Gume ne mio, Amnon peda men meliptue. Er cap kikiman men benkamare,” pepu. 27Dinino, Absalomdi tupa morona cap, tupa-tupa palepra penapu cap kunmaua cadi, nimi deiyo ngebo Raja Dauddi, Amnon cap, tonda Raja Daud er nyapu yuk neng yuma peda, ‘Telepe dabetenge,’ tenepudi, ange pepupa, sun yuma, Absalom melipipa bei. Beiopda, Absalomdi jen keca pio telep ngepu dapra keteneipmau. Angeda, sun Raja neng karerameng utopunge ketenepra deipu. 28Ataruda, Absalomdi er pel melipra dona neng tep, “Ukupkurume,” pepu.

Ada sundi moupra kaleka dinmamumpane, Amnon er anggur yu me, kange yawaramre me weikanun jenmaryanen, konum kange yuma yawarapyopda, nedi sun tep, “Adipapu angebo popso,” peipkamasene. Upepsene pangeda, Amnon adipapu poipkamnerume. Atep, sun kwar kuna gume. Ange yumada, ne Absalom dipapu sun tep upepra deipkamsena cadi, ange yumada ne deikipu kupkamnere. Atep ukupkamrume. Ange tep nengeda, sunda kwar tenena gume. Puto di kupkamrume. Tonda, ‘Uo, angebo popkup do? Yapkup do?’ tenena cap deikida, pio gume. Adipapu kupkamrume. Ange yumada, ne Absalom deikipu kupkamnere. Absalomdi, er amutara pel melimna neng tep pepu.

29Absalomdi upepra deipmautopu, er pel melipra dona neng yumadi utopu kupi. Ukupi dingeda, Absalom er upu pepnepa gekepra kun neng yumadi, Amnon poptapi. Popi taruda, nimi deiyo ngebo Raja Daud, er nyapu yuk neng ton, Amnon popi ngeda epi. Epi dingeda, sun aneng yuma, adipapu sun keledai bisam bali deiki bukra yuk-yuk sepdaro bendopi. 30Sun aneng tupa bisi neitamai di tamupra sun pe mutu yakanmai taruda, yuk nengdi, ange yuma tek sisi kuputopu gum dinin, sundi mok upu deiki di Raja Daud tep akupmainge tep pepi. “Uo naio, kan mi Absalomdi nun deiyo ngebo kan nyapu yumada, konum popra gawal dakmare. Tenpu ngebo peda, men tapmare, yuma popmare,” pepra lap pepipa, nimi deiyo ngebo Raja Daud gekepu.

31Upepipa, ataruda nimi deiyo ngebo Raja Daud adipapu tekroudi, er meneng kenekamu opkalda kuriprapudi, gweleptapu. Ada, ‘Uo, ne nyapu yuma depmange’ tenen, dipru karepupa, mambul kange doupu. Ukupu dingeda, Raja Daud adipapu tu deiki mapudi engepu. Nimi deiyo ngebo Raja Daud, er amutara neng yumada, sundi ange epidi, sun peda sun nong deiki kenekami opkal yuma kwiripra gweleptapidi engepi.

32Ukupmai dinino, Raja Daud er weit bo sisa Simeadi deiamu ngebo, er si Yonadabda, nimi deiyo ngebo Raja Daud tep pepu. “Gume, nun deiyo ngebo Raja Daud. Kanda, ‘Uo, ne nyapu yumada, konuma Absalomdi popmarpa, sun yuma depropmange’ tenen, kan Raja Daudda, kange pio tenena cap, kan kwar kunmakera capda, tapkurume. Ne kangeda, er pe Amnon tenpu popmarpa, depmare. Angeda, menop taru Amnondi mali weik kupunge tep, kwang dakmare. Ada ortaru di, ‘Ukupkamre ja,’ konum katuai kupupa tenepmape. Ada, Absalom er weit ner Tamar tep, Amnondi Tamar er nonge deiki mali kupra deiamu taru di dipra, ataru neitamai yuma, Absalomdi ange tupa tenenapu kuramu. Angeda Absalom peda, tupa teneramnga deiki di, ataruda Amnon konum popmare. 33Atep nengeda, ne deiyo ngebo Raja Daud, kandi, ‘Uo, ne nyapu yuk neng yumada, tek sisi konum popmarpa depmange,’ tenena gume. Absalomdi popmarpa, depmare ngeboda, Amnon er tenpua,” Yonadabdi pepu.

34Ange ukupu taru dipapu, Absalom er pe yuk kurapra sepdaro beu. Ataruda, nimi deiyo ngebo Raja Daud, er ati dam kalengamu ngebo, erdi dinmaupa, Horonaim mutu di yakan bisi damai dinin, abukamu mutu gon deiki tara di kwerepra yakanmai neng ton epu. Atara di nimi weik kwereyakanmaipa epu. Akwereryakanmaipa epu dingeda, er angebo adipapu sepdaro, nimi deiyo ngebo Raja Daud, er damai bena lap pepu. 35Uda Yonadabdi aupu gekepu dingeda, Raja Daud tep pepu. “Naio, adiyo, kan nyapuda, akunmange. Ne arup taru, ne deiyo ngebo Raja Daud kan tep, pepmakentopu, ‘Kan yuk nyapu yumada men popmare,’ pepra, lap pepmakeneu nengda adano,” pepu. 36Yonadab upu konum pepra gawal dangdou taruda, nimi deiyo ngebo Raja Daud, er nyapu adipapu, ati pumbon weki. Ukupi taruda, sun yuma gonga kepra engepi. Tonda Raja Daud cap, er upu pepnepa amutara gekerami neng yuma capda, bicau kupupa, sun peda tonpa engenmai.

37– 38Sun yumadi, Amnon popunge tep, engenmai dinin, ataruda Absalom er yuk sepdaro beu. Ada, Raja Gesur mutu bena kuramu. Gesur mutu talepra kuramu ila nimi deiyo ngebo, ada Amihur er mi Talmaidi amutu talepra kuramu. Amutu neitamai beu dingeda, keteng tamun weneri deiki di, amutu kuramu. Ataruda Raja Dauddi, Amnon tep pio tenenapu kuramudi, ikin kange douramu. 39Dinino, aketeng tamun weneri konum kupu pangeda, Raja Daudda Amnon tep, dipru kareamupa engeramnganen, ange gum kupu pangeda, kange di tamupra Raja Dauddi er mi Absalom tep, ila di bicau tenepudi, ‘Uo erda ton cap antapteneme,’ teneramu.