2 Samuel 14

Absalomda Yerusalem mutu tamupra yaua tep, seki upu

1Raja Dauddi, Absalom tep, pio tupa teneramu. Ateneramu ngeda, nimi si Zeruya, erdi deipu ngebo, er si Yoabda, konum kael keamu. 2Ange tep nengeda, Yoabdi nimi doproipupa, ila kael ner tenpu, Tekoa mutu kuramngai beidi, er bena doupra, Yoab damai tamupra yai. Aner doupra yaipa, Yoabdi aner tep upepu. “Anero kanda, nimi depmare ngebo tep, tenenmangedi, pio tenepra kuramengtopu, kupkamrume. Tonda, depmare ngebo tep, bicau tenepmengedi, kenengameng opkalpu, kenengdiramengtopu kenekamarume. Tonda ner tenpu, er pio kange deiamre ngebo, deamrepa, engeramredi kuramre kamo utopu, kan peda utopu kange doupkamarume. 3Ukupmemnyopda, “Kan adipapu nimi deiyo ngebo Raja Daud, er damai bememdi, bena upepkamarume. Ukupra-ukupra penkamarume,” peprapudi, erdi pepkamaker upu yumada, adipapu Yoabdi, aner gekenai tep, pepra deipupa, anerdi gekepu.

4Ukupu pangeda, aner adipapu nimi deiyo ngebo, Raja Daud damai beudi, gutam tu dipra gispal dopudi, anerdi upepu, “Ne nai kanda, ne ila nimi deiyo ngebo kuruma cadi, kandi ne melipkunerema tep, aca di yana moropkene,” pepu. 5Upepupa, nimi deiyo ngebo Raja Dauddi, tamupra aner tep upepu, “Kanda ware keca putapmakerpa pepnerem do?” pepra asipetepu. Asipupa, anerdi tamupra upepu, “Gume naio, neda tali solu ner kunune. Tonda, tali kan-kan ner kununa cadi, ne domsi ngeboda konum depu,” pepu. 6Upepu dingeda, aupu ton dukdongopra pepu. “Ne nyapuda, sal butene deiamsi. Ukuamsipa dakuramreianen, ue tenpu tumida, bura tara dabena podanmarei. Apodanmarei taruda, nimi yuk nengdi melipra men bukra deipmanto cadi, tenpu ngeboda, er kabodi popupa, depu.

7Atep ukutaruda, ne deiyo ngebo, kan amutara pel dona nerpu kununa cadi, ne tamna nesala yumadi, ne deikipu ikin keca derinenunge. Ada, ne midi er kabo popupa, depu ngebo tep, er yo pununada, ne tara nengdi upenenunge. Ada, “Kan mi er kabo gam kure ngebo tep, kandi nun karepsemempa, er peda kwangdana tep, wenepra popmepepa, depkamre,” penenunge. Upenenunga tep, ne mi dopra, sun anesala karepnepa, popmengopda, ne solu tapnengepa, ne yukpu kunada, ne dabale. Angeda ne songe. Tonda, ne kan amutara pel dona nerdi, ne domsi ngebo er yala deipgerekdanen banange tep, ‘Yo punupkamenge,’ tenepsi ngeda, sundi ‘Gum kupra deipkamepe,’ tenenunge. Ada, nedi deipsi sal nyapu yuma popmengopda, ‘Ne domsi ngebodi deiamu nyapu yuma cap, sundi deipgerekdanen banange yumada, gum kuprur’ tenen, moropkene,” pepu. 8Upepupa, nimi deiyo ngebo Rajadi, aner tep upepu. “Kanda, tamupra kan pe ati benkurume. Ange yumada, nedi tenepnedi, kan tep, ‘Ukupkamrume,’ pepra, upu pepra deipkamaken ja,” pepu.

9Upepupa, aTekoa mutu ner, erdi tamupra Raja tep upepu. “Jo, ne deiyo ngebo, kanda nimi deiyo ngebodi kupkamrem ngeda, ne cap, ne tara nesala cap, ne nai er tara nesala cap, kandi kupkamrumnge tep nengeda, ikin keca akapyopda, nun dipapu dopropkamepe. Ada, ne deiyo ngebo Raja, kan cap, kan tara nesala cap, sunda ikin men dopropkamrume. ‘Ukupkamre’ tenena tep, Allah moronkune,” pepu. 10Anerdi upepupa, nimi deiyo ngebo Rajadi, aner tep tamupra pepu. “Ware ngebodi do, kan damai ton cap mali upu yana pepkeredi, ikin deipkere ngeboda, ne damai doupra yankurume. Ukupmempa, tek sisi erdi ton cap tamupra kan tep men dumyakankamkere. Ne dipapu kan tep kalengkamkene,” pepu. 11Rajadi upepupa, anerdi tamupra, Raja tep upepu, “Ne deiyo ngebo Raja kandi, kan nai bo Allah Yahweh tep, tupa tenemempa, ne midi er kabo popunge tep, ‘Angebo er yapi embeu ngeda, kwang dakamep,’ tenenung nengdi, ne mi tenpu gam kure ngebo popnung tep, moropkene,” pepu. Upepupa, Raja Dauddi tamupra aner tep, “Allah tek sisi gam kuramretopu, ne peda tek sisi upu pepkene. Kan mi er damaida, ikin keca tenpu peda, ton men deipkamenge. Teleppu kunkamre ja,” pepu.

12Upepupa, anerdi tamupra pepu. “Nai, kanda ne nimi deiyo ngebo Raja, kandi, ‘Erda telepe,’ tenepnememyopda, upu ton cap pepkukena tep moropkene,” pepra moropupa, nimi deiyo ngebo Rajadi, “Telepe, kan upu ton akapkere pangeda, pepkunerume,” pepu. 13Anerdi, ton cap tamupra pepu, “Ne deiyo ngebo Raja, kandi arup taru pepmanu keca utopu ngeda, ware deiyo keca tep, ‘Ukupkamne,’ tenepmaremdi, Allah er mawa nesala sun nong deiki ikin keca deipkamserem do? Deiyoda, kandi arup taru apepmanerem upu deiki dipapu, kandi kan pe tep, ‘Mali kupmana cadi, wenepkamnetenge,’ pena utopu pepmareme. Ada, kan mi Absalom tep enepromumpa, bura saka beudi, tupa karen mutu neitamaipu tupa dakure ngeda, nimi deiyo ngebo kandi, ‘Tamupra yarume,’ men pepmuma deiki di, konum mali kupmume. Absalom enepromumpa karenai beu dinin, telep ngeda, angebo dopra, kange di duyatumpa, acapu kunkamtue. Ne deiyo ngebo Raja, ware keca deiyo tep, kandi kan mi enepropmumnya deiki di, Allah er nyapu damai mali kweipmum do?

14Naio, ne tek sisi pepkene. Nun tuai nesala yumada, amenda depropkamepe. Ukupmanto, nunda me tu deiki diksakredi embarepa, amepu kange di ton cap gwepmengedi, tamupra men kidirameng utopu kupkamsere. Dinino, Allah erdi, ‘Anengda, ton poptaptene,’ men tenerure. Ange gum dinin, ware ngebo do yuma, Allah damai tupa men kunge neng, mali kupmengepa, erdi eneprorepa, karenai bena kunge nesala tep nengeda, Allahdi, ‘Uo, ware kuptenepa, anesala yuma ne damai ton tamupra yakankameng do?’ tupa teneserure. Allah er pel doserya deiki di, aneng tamupra duyakankamrure. Atep nengeda, ne deiyo ngebo, kan pedi enepromumpa yuk mutu beu ngeboda, ‘Tamupra yatue,’ peptumopda, er adipapu tamupra kan damai yankamre,” pepu. 15Upepu dingeda, aupu ton pepu. “Neda kan amutara pel donun nerdi, ne deiyo ngebo Raja, kan damai yanmanada, yuk nengdi ne tep, ‘Kandi bena pepkurume,’ pepra, malya penengedi, sundi ikin kemdinenunge. Atep, ‘Uo, sundi wenepnenung’ tenen, ne kware kunune. Kware kweipneipa, neda kan amutara pel donun nerdi moupra tenepetepsidi, ‘Gume, angeda ne deiyo ngebo Raja damai bena pepne pangeda, erdi men tapkamnere. Erdi tek sisi gekepneredi, ne moropkamnetopu kupkamnere,’ tenepmana tep, kan damai yana lap pepkene.

16Ada, ‘Nedi ne Raja deiyo ngebo damai benedi, er gekenai bena pepne pangeda, gekepkamaner ja’ tenen, yana pepmakene. Tonda, erdi ne upu gekepneredi, yuk ngebodi ne gam kure mi tenpu, popmanto kunere ngeda, ‘Ne deiyo ngebo Rajadi lyepropkamaner’ tenen, yana pepmakene naio. Sun anesaladi, ne mi tenpu popmengoda, amenda taruda, ne tara neng yuma amutu neitamai di gum kunkamepe. Ada, ‘Sundi ne mi popra eneprongepa, ne mi cap, ne cap tep, Allahdi er nyapu nun Israel nesala tep karepseu mutu tuda, men dopropmanto kupkamneme,’ tenenune. 17Tonda, ne konum tenepsi ngeda ake. Ada, nimi deiyo ngebo Raja kandi, ne tep, ‘Melipkamkene,’ pepkunem upuda, tek sisi apedina upu pepra deipkunerem ngeda, melipkamnere. ‘Ne dipru kwa dipkamnere,’ tenepsi. Ada, tali tep men pepkene. Ne kangeda, nai kanda, Allah er pel dona neng malaikat utopu ngebo kuruma tep, kanda tek sisi konum kael kepmemdi, ‘Angeda telepnge, angeda malinge,’ tenepmemdi, peserume. Atep kan si eremem ngebo Allah Yahwehdi, tupa kalekra melimkeredi, kan kunkamrumnge yumada, ‘Teleppu kunkamre’ tenen, Allah morokenune,” ATekoa mutu nerdi, Raja Daud tep aupu pepu.

18Anerdi upepupa, nimi deiyo ngebo Raja Dauddi tamupra aner tep upepu, “Nedi kan tep upu ton asipetepkukene. Atep, nedi kan tep asipetepkene upuda, adipapu lap pepkunereme. Tek sisi dumsisi upupu pepkunereme,” pepupa, anerdi, “Jo, neda konum gekepkena cadi, adipapu ne nai Raja, kandi asipetepneo,” pepu.

19Upepupa, nimi deiyo ngebo Raja Dauddi, aner tep, “Yoabdi kan tep, ‘Ukupra-ukupra pepkamrume,’ peipmaker upu yana pepnerem do?” pepra asipupa anerdi pepu, “Teka, nimi deiyo ngebo Raja, kanda tek sisi gam tupa kuruma utopu, ne tek sisi upupu pepkukene. Kanda nun nimi deiyo ngebo Raja kuseruma cadi, kandi, ‘Ange pepkurume, ange kupkurume,’ pepsemem upupu gekepra kunupe. Dana-dana tara men betepye. Yuknge ton men teneptepe. Atep, aupuda men iniptapkune. Tek sisi Yoabdi, ne kan amutara ner tep, ‘Ange kupmem dingeda, aupu bena pepkamrume,’ pepra deipneutopu, nedi yana pepmakene.

20Yoab er tenepudi, ange kupu ada, ‘Ne nai Raja Daudda, aupu gekeptudi, Absalom tep, ‘Ne songe,’ tenerurnge taptudi, kange di telep kange douptue’ tenen, aupu peipneupa yana pepkene. “Kan amutara pel dore ngebo Yoabdi, ‘Ange deiki di ange yumada, telep dipapu gawal dakamep’ tenen, kupu. Dinino, ne deiyo ngebo Raja kanda, Allah er pel don neng malaikatdi, akeca-keca yuma ila di kael keamitopu, kan peda ila kael di peserume. Atep, kandi ware keca do yuma, akupmarenge yumada, kanda moupra kael kemkurume,” anerdi Raja Daud tep pepu.

Raja Daud, er mi Absalom tamupra yaua tep upu

21Uda, Raja Dauddi Yoab tep pepu. “Kandi pepneremnge kupkamana cadi, ormutu bememdi ne mi Absalom epmem dingeda, er cap doupra ne damai yarume.” 22Upepu pangeda, Yoabdi, ‘Ne nai Raja Daud gispal dopkun’ tenen, er giso genepdongopra tuai deiki saku. Ukupu dingeda, Yoabdi, “Naio, ‘Allahdi kan tep telep kupra melipkamker’ tenen, Allah moropkune. Tonda, atumida ne moropmaken keca kupkamrema deiki di, ne konum kael kepne. Ada, Raja Daud, neda kan amutara tali pel don ngebo kunun dinin, kange deipmanerema di, ne moropmaken keca melipra kupkamareme. Angeda konum kael kepne.” Yoabdi pepu.

23Ange tep nengeda, Yoabdi Absalom kuramngai Gesur mutu beu dingeda, Daud er mi Absalom dopra yaupa, tamupra Yerusalem mutu yarei. 24Yareipane, ila ngebo Raja Dauddi Yoab tep pepu. “Nedi ne mi Absalom tep, ne kange men deipmane. Er pe atipu benkure, ne cap nati kuna gume. Absalom men dinkune, tonda erdi ne kamo men dinkunere,” pepu. Raja Dauddi upepka tep nengeda, er mi Absalom, tamupra er pe atipu beu. Ka di ton cap, tamupra ila ngebo Raja Daud damai men yau.

Absalom cap, Daud cap, dukdongopdarei upu

25Ataru neitamaida, Absalompu si eremamya deiyoda ake. Er yan du siri di dipdongopra, potong du sirida, mali keca ton tenpunge peda, men kuamu. Kamo ila telep ngebo kuramupa, Israel nesala yumadi er tepapu kange deipidi, ‘Erda pio telepe,’ perami. Yuk nengda kamo yambul telep kurami dinin, er puda, kamo ila telep ngebo kuramu.

26Tonda angebo er potong tourami, keteng tamun tenpu konum kupu taru yumada, er giso potong ikin weik kuramunge tep, potong toupnepa, ikin tep timbang kemami. Ukuramipa, er giso potong ikinda 2.3 kilogram kupu. Ada Raja ngebodi, ‘Timbangan er ikineda, ukupra kepkamrume,’ peramutopu, er giso potong toupnepa, ‘Ikinda ware kuprap kupre do?’ tenen, timbang kepterepi. Ukupra kuramya cadi, er giso potong toupi ngeda, timbang kepterepipa, ikinda 2 kilo deiki tara 2.3 kilo kupu.

27Angebo Absalom er nyapuda, nimi weneri, ner tenpu deiamu. Er ner mi, er sida Tamar deipu. Tamar nepbaramupa, urasin pio telep ner kuramu. 28Absalomda, keteng tamun butene tupa, Yerusalem mutu neitamai kuramu dinin, ataru neitamai yumada, ila nimi deiyo ngebo Raja Daud damai ton men yanamupa, sun men didaramrei. Absalomdi, er nai bo kamo men diramu. 29Ukuramreiya tep, Absalomdi, ‘Ne upu peipnepa, Yoabda ne nai damai upu perbenetu’ tenen, Yoab tep upupu. Upupupa Yoab gekepu dinin, ‘Absalom upupner ngeda, men gekepra benkune,’ tenepudi, men yau. Men yau pangeda, Absalomdi Yoab tep ton cap, ue butene taru upu peipu dinin, ataru peda Yoabdi, ‘Ne men benkune,’ tenenmaua cadi, Absalom damai men yau.

30Ukupu pangeda, Absalomdi er tali pel melimna neng tep pepu. “Yoab er wai damda, nenge damai pepka tep, sun kaile cadi, sunda bena epmum dingeda, er wa pepra kouramu keca, er sida jelai, konum boloku ngeda, uku dongoptapra yankurume,” pepu. Upepu pangeda, er pel melimna neng beidi, Absalomdi peipmautopu, Yoab er wa neitamai uku dongoptapra yai. 31Ukupi pangeda, Yoabdi Absalom ati yaudi, asipetepu. “Ware keca deiyo tep kan pel melimna neng peipmarempa, ne wai dam uku dongopmaneng do?” pepu.

32Absalomdi tamupra Yoab tep pepu. “Gume angeda tali men kupsi. Deiyoda, nedi kan yakana tep, nimi weik kai peipsipane, kandi ne upu gekena gum di, ne damai men yamuma tepa. Ada mesum tep gume, nedi ila nimi deiyo ngebo Raja Daud damai bana tep wepra deipkenepa, bememdi Raja tep upepkamrume. ‘Kan mi Absalomdi kan tep upepkere. Neda ware keca deiyo tep Gesur mutu di tapra amutu yanman do? Ila telep ngeda, Gesur mutu orpu kuramtene ja’.

Aupuda, Raja Daud tep perberume. Ukutaruda, ‘Raja ngebo epdateneme’ tenen, putapnera tep, er damai lap perbenkurume. Upu kai pepmempa, nedi er damai benepa, Raja ngebodi, ne tep, ‘Erda mali ngebo, mali kupu ngeda ake,’ pepra wenepneredi, ‘Angebo poipneso,’ pepredi, wenepra poptapkamnera peda, telepe pua,” Absalomdi Yoab tep pepu.

33Upepu pangeda, ataru dipu, Yoab gekepudi adipapu Raja Daud damai beu. Beudi, Absalom pepmau upu kai perbeu. Upepu pangeda, ila nimi deiyo ngebo Raja Dauddi, Absalom tep upupu pangeda, Absalom yau. Yaudi, Raja ngebo gispal dona tep, yana giso genepdongopudi tuai dinmau. Ukupkopda, ila deiyo ngebo Rajadi, Absalom tep, “Telepe,” pepra gispal dona tep, mutupu.