2 Samuel 15

Absalomdi, ‘Ne nai Raja Daud bisbisa kapnedi, nepuda Raja ereipkamneng,’ tenepudi, kupu keca tep upu

1Amenda taru Absalom Yerusalem mutu neitamai dakuramnganen, amenda taruda, ‘Ne ila ngebo kunkamne’ tenen, jen talena deiyo neng taleami keca er penge tep keteneipu. Ada, kuda bisam cap, kudadi gipra tu deiki embana keca kereta cap, tonda jen talen neng denge pamu bari 50 neng cap, wepra deipupa, sunda er embaramu taruda, sun mepra banmai. Sundi menepra sepdaro banmaipane, er amenda embaramupa, amutu nesala yumadi dirami.

2Tonda ukuramu. ‘Amutu kunge nesaladi, ne tep kange deipkamneng’ tenen, sun tep telep upu peramu. Ange tep nengeda, atumi-atumi yuma, ipna bereng dongon di, Absalom bukda pepra, akati arum domyai ban bisi pirman dinin, ila buplan pari tamna bena tekmana di, amutu neng sun ikin kuprenge tep, ‘Nun deiyo ngebo cap, upu talepkup’ tenen, yakanmai neng yuma tep, asipeteramu. Ada, “Sunda dan mutu neng do?” pepra asipnepa, “Nunda Israel yala nesala dinin, ayala ngebo kunune, nunda amutu neng kunupe,” perami.

3Upepne pangeda, Absalomdi tamupra aneng tep peramu. “E, ne kayapu, sun upu deiyo penkamruma cap, sun putapserenge capda telep dinin, amutu ila nimi deiyo ngebo Rajadi, sun pepkurumu upu gekepnedi upu bokra deipmanto ngebo ton men ketenepra deipka cadi, sun upu men gekepkamsere. 4Dinino, ukupmanto, amutu nengdi, ‘Upu bongdina deiyo ngebo kepsetue,’ tenepnetengedi, deiyo ngebo wepra deipnetengepa, ila ngebo keamtenyopda, sun yuma tep makupsetene. Ada, nimi sun ikin deipdanmatenge kecada, nedi pukam kupra dumsisingepu kuramsetene. Sun upu bongdina deiyo ngebo kupsetene,” peramu.

5Tonda ukuramu. Ware neng do yuma, nimi tenpu ton Absalom damai yaredi, gutam tu dipra er tep yan moropre pangeda, Absalomdi, ‘Angeboda ne tep kange deipnetue’ tenen, buru taleprapudi er gispal dona tep mutupu. 6Ware neng do yuma, sun Israel neng yuma, ‘Raja Dauddi upu bokeipsetue’ tenen, ila ngebo damai yakarami taru yumada, Absalomdi angetopu kuramu. Ukuramnga deiki di, sun Israel neng yumadi, er tep kange deriramidi, ‘Erda pio telep ngebo,’ tenerami. Ukupra teneramidi, Absalom putaramutopu konum kurami. Ada, Absalomdi, ‘Telep ngebo tenepnetenge,’ tenepudi putaramutopu kurami. Ukuramnga deiki di, sun Israel nengdi, Absalom tep, ila di kange derirami dinin, Raja Daud tep nengeda, yambulanunpu kange derirami.

7Absalomdi angepu ukuramnganen, keteng tamun dumbari akonum mapu dingeda, erdi tamupra Raja Daud tep pepu. “Ukutaruda, nedi kan tep lape pepkene. Naio kandi telepe pepnemempa, neda Hebron mutu benkamne. Angeda mesum tep gume. Allah er si Yahweh tep upepsi. “Kan si eremna tep, ‘Ukupkamne,’ pepra pediramsi ngeda, ‘Kupkaman’ tenen, Hebron mutu benkamne.

8Angeda mesum tep men pepne. Neda Siria tara dinin, Gesur mutu kuramsi taru di, nun nai bo Allah er si Yahweh tep upepsi. “Allahdi melipnetupa, Yerusalem mutu tamupra betene dingeda, amenda taru neda Hebron mutu bena, Allah er si erepkamne,” pepsi. Upepra deipsa tep, “‘Ukutaru Hebron mutu betene’ tenen, moropkene,” Absalomdi pepu. 9Upepu pangeda, ila nimi deiyo ngebo Raja Dauddi, “Telepe tali kange doupra dabeo,” pepu. Upepupa, Absalom adipapu Hebron mutu beu.

10Beu dingeda, Absalom adipapu ukupu. Ada, ‘Upu menmena inipra perbenkameng’ tenen, nimi weik wepra doproipudi, inimna upu yuma pepra deipupa, gekepidi Israel nesala yala-yala yuma kuramyai kai upu perbei. Erdi peipupa, perbei upuda ake. “Uda, Israel nesala yumada, suling, bung-bung pena keca, er si terompet upu pepmengepa, alelim gekeprumnyopda, adipapu bulupra pepkamrume. ‘Absalomda Hebron mutu yanmara cadi, ila nimi deiyo ngebo Raja kemna tep konum tekmare,’ pepra upepkamrume,” pepu. Absalomdi, aupu pepra deipupa, er nyapu inipra perbei.

11Tonda Yerusalem mutu di nimi denge weike dua ratus neng melipra Absalom cap, Hebron mutu bei. Anengda, Absalomdi tenepu keca men kael kepi. Sunda, ‘Kalya kikiman jepkupa tep upupmasere,’ tenepidi, mangkau kange doupra bei. Absalomdi Hebron mutu kupkamu kecada, sun walwal cadi, sunda tali melipra bei.

12Tonda, ataru peda, Absalomdi Allah er si eremna tep, gam keca popra karenmau taru neitamai di, nimi tenpu ngebo ton er si Ahitofel tep upupupa, er tara nengdi doproipipa, Gilo mutu di tapra Hebron mutu beu. Ada, nimi si Ahitofel, er mutu sisa, Gilo mutu ngebo, ‘Yankure’ tenen, kongpepu. Angeboda, Raja Daud tep, ‘Telep kunada, ukupra, ukupkamrum, ukupkamrum,’ pepra meliamu ngebo kuramu. Angebo kongpepupa, Absalom damai Hebron mutu yau.

Ukupu taruda, Absalomdi, ‘Ne wepra deipnengedi, ereipnengopda, amutu ila nimi deiyo ngebo Raja kutene,’ teneramu ngeda, nimi weik ton, ‘E angeda telepe,’ tenen, tapakra kepbarami. Tonda, ‘Absalom nun deiyo ngebo kupsetue,’ tenerami nesala ton, weik tapakra yakaramipa, nimi weik kupbarami. Ataruda, Absalom er melimna neng pio weik kupbarami.

Raja Daud Yerusalem mutu di bura sakra beu upu

13Ataruda, nimi tenpu ngebo ton upu doupra, Raja Daud damai peryau. “Uo, naio, ukutaruda, Israel neng yumada, Absalom tep kange deipmangdi, er tarapu kepropmange,” pepu. 14Upepu pangeda, Daud gekepudi kware kupupa, Yerusalem mutu kuramidi er pel melipra doramya deiyo neng yuma tep pepu. “Uda, ketenepso. Ukutaruda Amutu di gopra, adipapu yuk mutu benkupe. Deiyoda, Absalom cap, er jen talen neng capdi, menmena domyasengedi, ‘Nun yuma cap, Yerusalem mutu kunge neng yuma cap, parang ya di popra gawal dakusenge’ tenen, pepsene,” pepu. 15Upepu pangeda, er pel melimna nengdi, “Jo telepe naio. Nun nai bo kandi pepseremtopu, ukupkopa tep, nun keteneipmepe,” pepi.

16Ange tep nengeda, ataru dipu gonga kepidi, Raja Daud cap, er ati kurami neng cap, er cap melipra adipapu bei. Nimi weik tara bei dinin, Daud er nerapu ton takol bari (10) nerapu, apu tapra bei. Ada anerapudi er ila nimi deiyo ngebo ati melipra kalengna tep acapu kunmai. 17Ataruda, ila nimi deiyo ngebo Raja Daud cap, aneng yuma cap, ayuma wisipra banmai. Er menmena beupa, sun yuma er amnyo tara melipra bei. Amutu tapra banmaiyanen, akati sirikai yuma karenai banmaiyanen, amenda taruda dimpepidi, tenpu mutu tekmai.

18Ukupi dingeda, Raja Daud atekmaupane, er pel melimna neng cap, er jen talen neng capdi bisipra banmai. Daud er jen talen neng, er damai banmaipane, erdi, ‘Sunda telep kunmang do, gum do?’ tenen, dirpetenmaupa, banmai. Konum bisipra banmai pangeda, tonda yuk yala neng ton sun amnyo tara banmai. Ada, sun Kereti yala neng cap, Peleti yala neng cap, Gad yala neng cap banmai. Sun Gad nengda, sun dengeda enam ratus neng banmai. Anengda, pumun taru Gad mutu di Daud cap yakarami.

19Sun banmaipa, ila nimi deiyo ngebo Dauddi, Gad yala ngebo, er si Itai tep pepu. “Kanda, nun cap bulupra wekmaremada ware keca deiyo tep do? Kan cap, kan yala neng capda, amutu sisa neng, Israel yala neng gume. Sunda sun pe mutu tapra, nimi bo neng ukupu yanmaruma tep, sunda kware kuna gume. ‘Daud cap, er nyapu cap melipra benkamane,’ tenepmaseremada gume. Kanda, tamupra bememdi, ukupu tekra deipmar Raja ngebo Absalom cap melipra kunkamreme. Acapu kunkamrume.

20Atep kanda ukupu ambutumi yanmamuma cadi, amutu ton cap men mapmareme atep, ne cap tali embanada dakwapye. Nedi, ‘Dan mutu benkun do?’ tenen, kapul men tenipmana tep, ‘Kan cap benkuneme,’ men pepketene. Ange tep nengeda, ne pe yukpu benkamane. Kanda kayapu neng pepmempa, sun pe mutuda tamupra benkurume. Tonda Allahdi kan cap, kan yala neng cap tep, ‘Allahdi pio men tapkamser dinin, bicau tenepra melimkamser’ tenen, moropkamsene. Atep daberume ne kabo,” Raja Dauddi angebo Itai tep pepu.

21Dauddi upepu dinin, angebo Itaidi tamupra pepu. “Gume naio, tek sisi Allah er pio gampu kurur ngebo. Tonda, kan peda ne deiyo ngebo kuneremedi, tupa gam kurume. Atep naio, kan ila ngebo embankumem pangeda, ne peda kikiman embankamaneme. Neda kan amutara pel melipra dona ngebo kununa cadi, embenemepa, yuk nengdi popnengiopda, dena peda telep pua. Ne putanere ngeda, kan cap bana pua,” pepu. 22Upepupa, Dauddi, angebo Itai tep pepu. “Ange tep ngeda kan cap, kan nyapu cap, nun kikiman bana telepe cadi, kikimanpu benkamepe,” pepu. Upepupa, Gad yala ngebo Itai cap, er amutara neng cap, er nyapsilip cap yuma, Daud er tara neng cap melipra bei.

23Raja Daud cap, er nyapu yuma cap, er jen talen neng cap yuma amutu neitamai banmai taruda, banmaipane amutu neitamai kurami nesala yuma epmai dingeda, ‘Uo nun deiyo ngebo bendopsere’ tenen, ila di engenmaidi mali penmai. Bei dingeda, Raja Daud cap, er cap banmai neng cap, amutu taprapidi, me si Kidron me gouprapidi, Kitron ban ortara bei. Ada me gumai tep, nimi men kurami mutu, katuai mutu banmai.

24Sun yuma Yerusalem mutu tapra banmai taruda, nimi si Sadok cap beu. Tonda, Allah er si eremna ati pel dona deiyo neng, sun pel melimna neng, Lewi yala neng cap banmai. Anengda Allahdi, ‘Ukunkamrume, angeda ton men kunkamrume,’ peiamupa Musa sekeipu upu doupra, co bekin, er sida Peti Perjanjian pumbon deipi keca dopra banmai. Abekin co doupra embanmaidi, acapu Yerusalem damai deipi.

Deipipa, Allah er si eremna ati pum pel dona deiyo ngebo, er si Abiyatardi, Allah er gispal dona tep, gam keca poprapudi, Allah karena tep uku dongopu. Ukupra apel donmaupane, sun Israel nesala yumadi, Yerusalem mutu damai tapra banmai taru neitamai yuma, Abiyatardi, Allah er karen keca karenmau. Sun banmai taruda, Allahdi er upu peiamupa Musa sekeipupa aco bekin pum deipi kecada, men doupra benmai.

25Israel nesala Yerusalem ati damai tapra konum bei pangeda, Dauddi, Allah er si eremna ati pum pel dona ngebo Sadok tep pepu. “Allah pedina upu kidongon co bekin, er sida Peti Perjanjian doupra yanmarumada, tamupra Yerusalem ati arum domyai pumbonpu debeso. Allah er si Yahwehdi telep tenepneredi, makupneryopda, ka di ton cap Yerusalem mutu tamupra duyankamnere. Ukupneryopda, abekin cap, Allah weamu mutu Yerusalem mutu cap, Allah kure ati cap, kange di ton cap dinkamne. Akeca debemumpa, akeca deiamyaipu kupkamre. 26Dinino, Allahdi ne tep kange men deipneredi, ‘Ukunkamrure,’ men tenepneryopda, ange peda telep pua. Allahdi tenepkamnere utopu, angepu kupkamnere. Ne kangeda keteneipmana cadi, ange yuma telep pua.” Raja Dauddi pepu.

27Atarupu Raja Dauddi dukdongopra, Allah er ati pum pel dona deiyo ngebo Sadok tep pepu. “Kanda amenda kupkamre keca kapul men kupre taru dina ngebo kurume. Kan cap, kan mi Ahimaas cap, tali kange doupra, tamupra telep dipapu sun pe mutu Yerusalem ati arum domyaipu daberume. Tonda, Abiyatar er mi Yonatan cap, sun cap tamupra Yerusalem daberume. 28Neda akunmanedi nimi men kunge mutu ban bisi, me goupra baramengaipu, kalengna cap, gekena cap kunkamna tep, kan peda upu kan damai yarepa gekepmemnyopda, aupu kai pepkamnerem ja,” Raja Dauddi pepu. 29Upepu pangeda, Sadok cap, Abiyatar capdi, Allah pedina upu kidongon co bekin, er sida Peti Perjanjian douprapreidi, ka di tamupra Yerusalem mutupu deberei. Ukuprei dingeda, sunda orpu bena kuramrei.

30Ataruda Daudpuda, er yan kenengna keca sandal kwiriptapudi, er dipru boun kuna tep, er giso galuprapudi, engenmauanen, Zaitun mutu welepra beu. Ukupkopda, er cap melipra banmai neng yuma cap, engenmaidi Zaitun mutu deiki welepi. Tonda sun yuma er nyapu cap, giso galuprapidi, engenmaiyanen, Zaitun mutu welepra bei.

31Uda yuk nengdi Daud tep, “Kan melimna ngebo Ahitofelda, Absalom tara konum keprou. Er cap, kan mi Absalom cap, kikiman kurerunge. Er peda, ‘Raja Daud bisbisa kapkamepe’ tenerure,” pepi. Upepipa, Daud gekepudi, Allah tep moropu. “Ne nai Yahweh, Ahitofel tenepmardi Absalom tep, ‘Ukupkamrume,’ pepkamre ngeda, kandi ange yuma gum kupra deiprumpa, nong men kupkamre. ‘Tali upupu walwal di peptaptupa, kange wang-wang peptue’ tenen, moropkene,” pepu.

32Upepra moropu dingeda, Daud adipapu Zaitun mutu dup deiki beu. Uda amutu deikida, men di Israel neng weik Allah er si erembarami. Amutu deiki beu taruda, nimi ton er sida Husai, ‘Raja Daud antapkaneme’ tenen, kupmau. Husaida Arki mutu ngebo kuramu. Husaida, er opkale gweleptapramaudi, er giso deikida tu sikke but dikra yamuptapmau. Ange yuma kupmaunge deiyoda, er mambul kange doupmaua tep, kupmau.

33Ange tep nengeda, Dauddi angebo tep pepu. Kao kanda ne cap melipra beneme pangeda, ikin keca ne deiki akapkamre. 34Dinino, ne kabo, kandi ne tep melipnetum kecada lape pepkukene. Ada, Yerusalem mutupu tamupra bemem dingeda, Absalom tep bena pepkamrume. ‘Naio, kanda Raja ngebo konum kuruma cadi, kan amutara upu melimna ngebo kupnedi, melimkamkene.

Pumun taru di, neda kan nai bo, er upu melimna ngebopu kuramsi dinin, ange ukuramsitopu ukutaruda, kan amutara upu melimna ngebo kunkamne.’ Upepmempa, Absalomdi, telepe pepkeryopda, er cap kumemdi, ukupra melimkamnerume. Ada, men di ne melimna ngebo Ahitofeldi, ‘Ukunkamrume,’ pepra meliamneutopu, ukutaru Absalom melimkamra cadi, kandi penkamrem upu deiki di, Ahitofel pepkamre ngeda upu sekmempa, gum kupkamre.

35Tonda Allah er si eremna ati pumbon pel don neng butene Sadok cap, Abiyatar cap, sun peda Yerusalem mutu kunkamrenge. Atep Raja Absalom er ati pumbon mambul upu gekepmemdi kael kepmemnyopda, ka di ton abutene neng tep lape pepmem pangeda, ange yuma Sadok cap, Abyatar cap, sun nyapu butene di, kai peryankamnerenge.

36Kandi Sadok cap, Abiyatar cap tep, mambul upu lap pepmempa, kael keprengedi, sun nyapu lap peprengepa, Sadok er mi Ahimaas cap, Abyatar er mi Yonatan cap, sun peda sun nai yapu damaipu kikiman kununga cadi, aneng gekeprengedi, ne damai lap peryankamnerenge. Ada, kandi mambul upu gekepmemdi, ‘Daud lap perbereso,’ pepmem pangeda, sun butene di, ne tep peryankamnerenge. Dauddi, er kabo Husai tep pepu. 37Upepka tep nengeda, Husai gekepudi, ka di tamuprapudi, Yerusalem mutupu bena kunmau. Ukunmaupa, Raja Absalom Yerusalem mutu wengbenkou taruda, antapreidi, akati arum neitamai bena wekrei.