2 Samuel 16

Daud cap, Siba cap, antapdarei upu

1Dauddi, amutu pasikne ukupu dinipronmaupa, tenpu ngebo er si Siba epu. Sibada, ‘Daud cap antapkanem’ tenen, aca kunmau. Angebo Sibada, Mefiboset er pel melimna ngebo kuramu. Erdi duyanmau kecada ake. Keledai bisam weik duyau. Tonda bunga weik kipra ateng koupdongopudi akeledai bisam deiki deipmau kecada, roti kwaneng denge dua ratus cap, tonda anggur du gelal sepunge di kue keteneipinge cap, co du er si ara di kue keteneipinge denge weik seratus cap, anggur me dikdongopu keca tenpu ton keteneipu. Akeca yuma konum kipdongoprapudi keteneipmauadi akeledai deiki deipra duyau.

2Sadokdi akeca duyanmau pangeda, Raja Daud epudi, tamupra Siba tep asipetepu. “Akeca yumada ware keca deiyo tep duyanmarem do?” pepu. Upepu pangeda, Sibadi tamupra Raja Daud tep pepu. “Gume, kan nyapsilip puto boun kuprepa, keledai bali deiki welepra bukmengedi, betenge. Tonda, akeledai deiki kipra gerekman kecada, kan cap, kan jen neng cap, kan tara neng yuma cap, akeca jenkamruma tep duyanmasene. Tonda anggur du meda, me putapre nengdi jenkamenga tepa. Ada jena telepe cadi, orkatuai mutu bena kunkamrum taru, puto boun kuprepa, men benmanto kupre neng jenkamenge. Jepmengopda, sun puto kange di kupkamre ja,” Sibadi pepu.

3Upepupa Raja Dauddi, “Kan deiyo ngebo Sauldi deipu mi dinin, angebodi deipu mi er si Mefibosetda, dan kurur do?” Upepu pangeda, Sibadi tamupra pepu. “Erda Yerusalem mutu tupa kunmare. Ada mesum tep gume. Deiyoda, erdi utenepmare, ‘Atumida, Israel nesala bisbisa kapmengedi, ne nai bodi pumun taru taleamu mutu cap, taleamu nesala yuma cap, ne tep tamupra karepkamanenge,’ tenepmardi Yerusalem mutu kunmare,” Sibadi Daud tep pepu.

4Sibadi upepu pangeda, Dauddi tamupra, Siba tep pepu. “Ange tep nengeda, ukutaru akeca yuma, Mefiboset er taleamunge yumada, karepkena cadi, kanyepu kupkamkere,” pepu. Upepupa, Sibadi tamupra, “Uo naio, kan gispal dopkene,” pepra, Daud er gisal dona tep, Siba er giso genepdongopudi, tuai dinmau. “Ne putanere ngeda, kandi ne tep, ‘Telepe,’ tenepra ne tep kange deipnetume. Ukupmempa, kan amutarapu kepnedi, kan teppu pel donkamkene. Kanda ne deiyo ngebo Raja kurume,” Sibadi Daud tep pepu.

Simeidi Daud tep, ‘Ikine kupkur’ tenen, widongon upu pepra, Daud deiki deipka tep upu

5Ataruda, Daud adipapu Bahurim mutu damai beu taruda, nimi ton Gera er mi Simeida, Saul er tara nengdi deipi ngebo cadi, angebo Daud damai yaudi, Daud tep mali upu pepra weika di wipdongopu. Ada, ‘Ne pepne upu deiki di, er nong deiki ikin weik kupkamre’ tenen, mali upu pepra wipdongopu. 6Uda, Daud banmau taruda, er pel dona deiyo neng cap, er jen talen neng cap kikiman banmai. Banmai taruda, er jen talen nengda er banmauai dana-dana tara keprapidi, sun nai bo neitamai deiprapidi dopgiriki. Ukupra banmai dinino, Simeidi, balila weik kupka cadi, gel doprapudi, Daud cap, er pel don neng cap, sun nong deiki, gel dokotepmau.

7Simeidi Daud tep mali kupra widongonmaudi pio mali upu penmau. Tonda, ataru di pepu upuda ake. “Daud kanda beo! Kanda nimi pon ngebo kuruma cadi, kanda pio mali ngebo,” penmau. 8Upenmaudi aupu ton dukdongopra pepu. “Kandi pumun taru taleamseu ngebo Raja Saul, er tara neng weika di poamumpa, nimi yapi weik embeua tep nengeda, ukutaruda, Allah er si Yahwehdi amali kupmumnge tep, walito wenepmakere. Allahdi Saul tep, ‘Raja kunkamre’ tenen, wepra deiamu dinin, kandi, ‘Ne puda Raja kunkamne,’ teneramumdi, Saul tep bisbisa kapmumdi, er yo punupmuma cadi, ukutaru Allahdi wenepkere.

Ada kan wenemna tep, kan taleamum mutu cap, nesala cap, telep keca yuma cap, Allah er si Yahweh akeca dopropkerdi, kan mi Absalom tep konum karepmare. Ange yumada, kan wenemna tep kupkere. Kanda nimi pon ngebo kuramuma cadi, ukutaruda kan wenemna tep, Allahdi kan tep mali kweipmakere,” pepra Simeidi mali penmau.

9Upenmaupa, yuk nimi ton Zeruya er mi Abisaidi Daud tep pepu. “Uo naio. Angebo mali pekere ngeda dano? Erda tali deamre kam utopu ngebodi yana kan tep mali upu pepra kan nong deiki derinmakerdi, wipdongopmaker dinin, naio kandi kaukepmarem ngeda, warya tep do? Kanda nun ila deiyo ngebo Raja kuseruma tep, kandi peipsemempa, neda kan amutara melimna ngebodi, orkunmar ngebo er kum ya sengbenkune,” pepu.

10Upepu dinin, Raja Dauddi Abisai tep pepu. “Gume, Zeruya er nyapu kurum nengda, sun ware keca deiyo tep aupu penmarum do? Sun tenepmarum ngeda, angetopu ne pio men tenenune. Angebo Simeidi ne tep mali upu peipmaner ngeda, dakwapye. Nun walwale, Allah er si Yahwehdi er tep, ‘Daud wenepkamanada, kandi mali upu peipkurume,’ peipmaua di, angebo mali upu penmaner do, gum do? Allahdi angetopu peipyopda, ware ngebodi er tep, ‘Ware deiyo tep mali upu penmarem do,’ pepra upu sektu do? Apepner ngeda, Allahdi do, gum do? Nun walwal cadi, upu apenmana,” Dauddi pepu.

11Upepudi aupu ton cap dukdongopra Abisai cap, Abisai er pel melipra dorami neng cap tep pepu. “Ne pedi deipsi mi, Absalomdi, ‘Ne nai bo Raja Daud popkune’ tenen, putarepa pirirya cadi, angebo Semei, Benyamin yala ngebodi, ‘Daud poptene’ tenen, pio weika di putaprepa, pirinmanere. Dinino, angebo tep, dakwapye. ‘Warya tep er mali kudimemerur do? Ware deiyo keca tep, ne nai Daud tep wipdongonmar do?’ pena gume. Dapenmarye. Ne kangeda, ‘Allah er si Yahwehdi pepra deipupa kunerurae,’ tenepne.

12Tek sisi ngeda, Allahdi peipupa kurur gum daca? Angebodi mali upu ne deiki peipmanerpa, Allah er si Yahwehdi kange mun keca karepnere ngeda, epredi bicau tenepneryopda, amalinge yo pununa tep, telep kupra deipkamner do, gum do? Dinapu kunkamne. Akurpetenerenge punupra Allahdi tamupra telep kupkamner ja, tenepne,” Raja Dauddi pepu.

13Upepkopda Daud cap, er melimna neng cap yuma, adipapu bisi banmai taruda, Simei peda sun banmaitopu sepdara dombanmaudi, amutu ongopra genembanmaudi, sun tep tupa wipdongoprapudi, gel du cap, tu but cap, sun deiki dopbanmaudi, sun tep pio mali upu penmaudi, widongona upu penmau. 14Ukupra kunmaipane, ila nimi deiyo ngebo Raja Daud cap, er nyapu nimi weika di banmaiyanen, Yordan mekin bei dingeda, sun puto boun kupupa men benmanto kupu. Atep aca bena beipye peingmai.

Husai cap, Ahitofel cap, Absalom damai yareidi, peprei upu

15Tonda atarupu dinin, Yerusalem mutu neitamai di, Absalom cap, Israel nimi weike cap banmaiyanen, Yerusalem ati arum bena weki. Ataruda, Ahitofel er peda utopu melipra beu. Ahitofelda, ada pumun taru Raja Daud tep, ‘Ukupkurume,’ peramudi, er upu melimna ngebo kuramu 16Ataruda nimi tenpu er sida Husai, Arki mutu ngeboda Daud er kabo kuramu. Husaida, arup taru konum keteneipmauadi, Absalom damai beupa epdarei dingeda, Husai ila upu di, “Ne nai, ne putapner ngeda, kanda Raja Absalom gam pio kunkamrume. Ne nai Raja gam pio kunkamrume,” pepu.

17Dinino, Absalomdi tamupra Husai tep pepu. “Raja Daudda, kan kabo sisa kurura cadi, warya tep er cap, melipra men kunmarem do? Kandi ne tep gispal dopmanerema deiki di, kan kabo Daud tep yanina utopu kupmareme. Ange kupmaremada, Daud tep telep kweiprem do, mali kweiprem do?” pepra wenepu. 18Upepupa, Husaidi tamupra Absalom tep pepu. “Gume naio, nun nai bo Allah er si Yahweh cap, Israel neng cap, kan damai kunge neng capdi wepra ereipmeng ngeboda, er amutara buknedi, er teppu melipra kunkamne. Angebo tep pel donkamne.

19Tonda, ware ila deiyo ngebo tep, er amupu kunkamne do? Pumun taruda, ne kan nai bo Raja Daud, er amupu kuramsidi, er sipu erepra er pelpu doramsitopu, kanda er pe mi sisa tep, gispal dopra men melipkamne do? Gume, kanda Raja Daud, er mi sisa kuruma cadi, kan tep gispal dopkenedi, kan amupu kunkamne,” pepu. 20Upepu pangeda, atarupu Absalomdi Ahitofel tep pepu. “Atep nengeda, ukutaru kandi pepseo. Nun kunkamep keca telep ngeda, ware kupra kunkamep do? Kandi tenepmarem ngeda, lape pepseo,” pepu.

21Upepupa, Ahitofeldi tamupra Absalom tep pepu. “Kan nai bodi, ‘Anerapuda ne ila nimi deiyo ngebo ati kalekameng’ tenen, er pe nerapu er ati deipu nerapuda, sun damai bememdi, anerapu cap kikiman mapkurume. Ukupmem pangeda, Israel nesala yumadi, ‘Uo, Absalomdi er nai nerapu upula nyakua tep, er nai bodi, er tep pio song tenepkamre’ tenen, sun kael kepkamkenge. Kael kepkengedi, ‘Er nai bo cap, podan neng kepropdanamreiyada, ukutaru konum denepropdanmarenge,’ tenepmengedi, kan cap kunge nesala yumada, puto weik ton cap kepkamenge,” Ahitofeldi pepu.

22Upepu pangeda, Absalomdi nimi doproipupa, sundi, Raja ila ngebo ati deiki tara banai dominge deiki di, opkal bol di doupra dodin tenda ati deipi. Deipi pangeda, amutu nesala weika di dinmai tarupu, Absalomdi er nai bo nerapu weik doprapudi, yuk-yuk dinin, atenda ati pum, er cap wekrapidi, kikiman marami.

23Uda, ataru-ataru neitamai yumada, upu karena tep deiyo ngebo Ahitofeldi upu peramupa, Daud pe Absalom peda, gekeramreidi, ‘Er pere upuda, pio tek sisi mambule kurura tep, er pere upu gekenapu kunkamepe,’ teneramrei. Ada ‘Ahitofelda, Allahdi pediramre upu utopu upu perure,’ teneramrei.