2 Samuel 17

Ahitofeldi, ‘Ukuptene’ tenen, peramu upuda, yuk ngebo Husaidi upu sekdongopka tep, pepu upu

1Ahitofeldi Absalom tep upepu. “Naio, ne tenepmanada, sikton mana gum dipapu, adipapu kandi ukupkurume. Telep ngeda, kandi pepmempa, nimi denge weik, dua belas ribu (12.000) jen talen neng ton wepra keteneipnepa, atumi lukunda neitamai dipapu Daud pona tep warengbetene,” pepu. 2“Ukutaruda, Daud er kange telep men kupmardi, puto boun kupmardi, dabal kupmar taru dipapu, nedi er tep bena warektene. Daud er mangkau kange doupra kunmar taru dipapu betenepa, er kwar kuptue. Ukuptenepa, er nyapu yumada, er taprapmengedi, bura sakra bendoptengepa, sun deiyo ngebo Raja Daudpu poptenye,” pepu.

3“Dinino, Daud er melimna neng yumada, ne deiyo ngebo kan koripu tamupra duyaketenye. Ne deiyo ngebo kandi, ‘Tenpu ngebopu popkamne’ tenen, tenepmuma tep, angebopu popnedi, er tara neng yumada, telep dipapu doupra, kan damai duyatenye,” Ahitofeldi Absalom tep pepu. 4Upepupa, aupu yuma gekepidi, Absalom cap, Israel nesala mutu taleami wisi deiyo neng yumadi, “E, apepmaserem ngeda, telepe pua. Angepu kupkamepe,” pepi.

5Upepi dinin, ‘Telepe,’ tenepya peda, Absalomdi, “Arki mutu ngebo er sida Husai tep, ataru upupmumpa ne damai yankurure. Ukuprepa, nedi asipnepa, er tenenmarenge ton lap pepserepa, nun yumadi gekepkupe,” pepu. 6Ange tep nengeda, Absalom peipupa, Husai upupi pangeda, Absalom damai yau. Yau pangeda, Absalomdi er tep pepu. “Uda Ahitofeldi, nun tep, ‘Ukunkamrume,’ pepra, upu pepmaser ngeda, ware kupkup do? Erdi pepmaser upuda telep do? Er pepmasertopu kupkup do, gum do? Gum dingeda, kandi, ‘Ukuptepya,’ tenepmarem ngeda, lap pepkuserume,” pepu. 7Upepupa, Husaidi Absalom tep pepu. “Gume naio, Ahitofeldi, ‘Ukunkamrume,’ pepmaser upuda, ukutaru telep upu ton men pepmasere. Ange men kupkamrume,” pepu.

8Upepkopda, erdi ton tamupra pepu. “Naio tek sisi kandi konum kael kepmume. Kan nai bo Raja Daud cap, er tara jen talena neng cap, sunda balila, pio puto weik neng kununge. Sunda pio yu tenepra kunmange. Ukupmantoda, beruang nernge do, yua bisam nernge do, erda, nimidi er mi tomopmengepa, gum kupre pangeda, yu weik kuramre utopu, kange doupra kunmange. Mar podana tep, Daud erda ila di kael kepu ngebo kurure. Nimi podana keca yuma weika di kael keamu. Tonda, lukunda taruda, er cap er amutara kunge jen talen neng cap, tonpa men manunge. Er pe yuk mapkamare.”

9“Tek sisi erda ukutaru gel imir pumbon do, yuk bura tara do, nun walwale dinin, dabena inipmare. Er cap er jen talen neng capdi, kan tara neng menmenada poryasengedi, popsengepa, yuk nengdi gekepmengopda, nimi gekenai bena pepmengepa, yuk neng ton gekenkamenge. Upenkamenge. ‘Uo, Raja Dauddi, Absalom tara neng tep, ware kuprap neng konum popmang do? Men nukmanto tep, weika di konum poptapmangdi gawal dakmange,’ penkamenge.”

10“Ange pepmengepa, kan tara jen talen neng, kware pio men kunge neng peda, aupu gekepmenge dingeda, pio mali kange doupra tenimtonapu kunkamenge. Kware weik kupre pangeda, nimi ton ila balila di, itara kepra kuna ngebo peda, singa bura kam kware pio men kuramretopu ngebo peda, adipapu kware kuprepa, dipru bounpu kunkamenge. Ada mesum tep gume. Israel neng yuma kael keami ngeda, ‘Absalom er nai bo Daud, ila puto weik nimi podana ngebo kurure. Tonda, er cap kunge jen talen neng peda, balila deipra kununge’ tenen, konum kael keami. Atep kan tara nengdi, Daud cap, er tara neng cap, poptengopda, Israel nesala yuma kware pio weik kupkamre.”

11“Ange tep nengeda, nedi kan tep upepkene. Kandi pepmempa, Israel yala nesala, dan yala neng do yuma bulupkamenge. Ada, Dan yala neng sun mutu di, adinen dukdongopra, Bersyeba mutu ton, aneitam mutu yuma, nimi pio weika di kan damai bulupkamenge. Ada meteka di gume. Angeda, laut mokon pirman me wenenga pio weik, men nukmanto kuramretopu, nimi weika di bulupkamenge. Ukupmengopda, ne nai kan pedi, gonga kepra, mepra bamempa, nundi melipkepepa tonpapu bepidi, Daud cap, er tara neng cap yumada poptepe.

12Ange kupmumnyopda, nun yuma bepedi Daud tep bena enmapyane, dan cei kunmarepa epmepyopda, Daudda mangkau kange doupra kunkamara cadi, bena warekra popkamape. Ukupmantoda, mo puru daksakapredi, tuai saka dourbaramre utopu kupkamape. Ada, er cap, er tara neng cap kunge mutu yuma, tenpunge peda tamna gum di, er tep enmapyane, epmepyopda, darapra porbenkamepe. Ukupmepedi tenpu ngebo peda, er cap, er nyapu cap, ton men bura saka benkamenge. Ayumada poptapra gawal dangkamepe.

13Tonda, Daud tep nundi bena, ‘Warekra popkup’ tenen, kupepa, er cap, er tara neng yuma capdi, kurapra bengedi, adine gopra, ‘Inipra kunkamep’ tenen, yuk mutu ila ati arum donga kuramenga neitamai bena wekroreya peda, nun tara Israel nesala yumadi, ila tapu doupra dubepedi, amutu ati arum domenge yuma cap, akati gel beilya ongopgenepra wiaminge capda, atapu di gerekra gipdaropmepedi, dopra mening damai kwamre ban mutuaida, agel yuma dokotepmepedi, melman bisi damai deiptapkamepe. Ukupmepe pangeda, amutu ati cap, gel beilya cap, tenpunge peda men tapkamepe. Yuma gipra loktapkamepa cadi, tenpu ati pe, tenpu gel pe, tenpu ati dela co peda, men tapkamepe. Yuma loktapmepepa gum kupkamre.” Husaidi Absalom tep pepu.

14Aupu pepka tep nengeda, Absalom cap, Israel yala nesala talepra kurami deiyo neng cap, aupu gekepi dingeda, Husai tep upepi. “Ahitofeldi peipseu upuda, yambul telep kupmau dinin, kanda Arki yala ngebo Husaidi pepmaserem upuda, pio telep kurure. Atep, angepu kunkamepe,” pepi. Uda, anengdi Husai upu gekepinge deiyoda ake. Ahitofeldi pepmau upu tek sisi telep kupu dinino, Allah er si Yahwehdi, ‘Gume, Absalom tep, kange mun keca weik karepnepa, ila ikin keca weik dopropkamre’ tenen, Absalom cap, er tara jen talen neng cap tep, sun kange tamoipu. Husai pepmau upuda, mali upu pepmau dinin, Allahdi sun kange tamoipupa, anengdi, ‘Husai pepmau ngeda telepe,’ tenepidi, er upupu gekepi.

Dauddi, Mahanaim mutu beu upu

15Apepunge tep, Allah er si eremna ati pum pel dona deiyo neng Sadok cap, Abiyatar cap tep Husaidi perbeu. “Ukutaruda Ahitofeldi, ‘Ukupkurume, ukupkurume,’ pepra Absalom cap, Israel yala nesala ila deiyo neng cap tep pepmau dinin, nedi pepmanu ngeda, ‘Er pepre ngeda gume, tek sisi sun kupkamrum ngeda, ange cap, ange cap pua,’ pepmasidi, Ahitofel pepmau upu sekdongopsi.

16Nedi yuk upu pepsipa, angepu kunkamenga cadi, sundi nimi doproipmumpa, anengda menmena Raja Daud damai lap perbenkamenge. Raja Daud tep upepkurume. ‘Naio, nimi men kunge mutu katawai mutu neitamaida, nimidi me goupra baramengai men mapkamarume. Ange gum dinin, adipapu ame goupra, ortara sepdara bankamarume. Ange men kupmumyopda, Absalom tara jen talen nengdi, kan damai yangedi, kan cap, kan kikiman kunge jen talen neng cap yuma, poptapmengedi gawal dakamenge.’ Upepkamrume,” pepu.

17Aupu pepu tarupu, Yonatan cap, er kabo Ahimaas capda, mutu si En-Rogel mutu kunmarei. Yuk nengdi, utenepi. ‘Tenpu pel melimna ner wepra doproipmepepa, anerdi, Yonatan cap, Ahimaas cap tep, upu kai perbere pangeda, Yonatan cap, Ahimaas capdi, Raja Daud damai kai upu lap perbenkamarenge,’ tenepi. Ada sun butene nengda, Yerusalem mutu neitamai tali lupra men beretenge. Deiyoda, ‘Akati arum domyai wengrengepa, yuk neng epmengedi, Absalom lap perbenung,’ tenena tep, akati arum neitamai men benmanto kupmarei.

18Utenepra keteneipmai dinin, ataru peda ukunmareipa, tenpu kaber ngebo ton, sun abutene neng inipmareiyai epudi kael kepu dingeda, adipapu Absalom damai bena lap pepu. Ukupu pangeda, abutene neng adipu sepdaro bereidi, nimi tenpu ngebo ton, er mutu Bahurim, er ati damaida me jena tep kumupra paliamngai pumbon bena wekra iniprei. 19Ukuprei pangeda, Bahurim mutu ngebo er nerdi amokon paliamu tu pumbon deiki tara, pala weik opkal yakra deipu. Deipudi, ‘Akeca pumbon nimi inipmarenge,’ men teneptengedi, ‘Men kael kepkameng’ tenen, jagung du kipra doupmaua di, aopkal deiki gwekembanmaupane, amutu nengdi abutene neng tep men epmanto kupidi, kael men kepi.

20Ukupka tep nengeda, amenda taru Absalom er jen talen neng, aner damai yai dinin, inipmarei neng men epidi asipetepi. “Abutene neng Ahimaas cap, Yonatan capda, dan cei kunmareng do?” pepra asipetepi. Upepi pangeda, anerdi tamupra, “Teka sun ukupu yarei taruda, me goupra ortara pirmanai berei. Atep ukuda ne walwale,” pepupa, amutu yuma aneng butene tep enmaiyanen, men epi dingeda, tamupra Yerusalem mutupu bei.

21Aneng tamupra bei pangeda, Ahimaas cap, Yonatan cap, me tep kumupra paliamyai pumbon inipmareiya bena gupra, adipapu menmena sepdaro berei. Bereidi Raja Daud damai aupu bena peprei. “Ukutaruda Ahitofeldi Absalom tep, kan poryakana tep, ‘Ukuprume,’ pepra upu konum karepu. Atep nengeda, kan menmena me goupra benkurume,” peprei. 22Upepreiya tep, ataru dipapu, Raja Daud cap, er melipra kurami nesala yuma cap, ayuma keteneprapidi, Yordan me goupra ortara bei. Yordan goupra me banmaipane bereku. Tenpu ngebo pe ton, tenpu men tapmai. Yumada, Yordan mekinpu benmai.

23Ukupipa, sun tep, ‘Ukupkurume,’ pen ngebo Ahitofel kael kepu dingeda, ‘Sun tep upu peipmasi ngeda, men gekepnei,’ tenepudi, er keledai bisam deiki bukrapudi, er nyapsilip sun pe kurami atipu beu. Beu dingeda, er kuramu keca yuma cap, er nyapu cap, nerapu cap tep, “Ne taleamsi ngeda aca konum ketenepra deipne,” pepu. Upepudi adipapu tapu gerekdana popdapu. Konum depupa, sundi er nong doprapidi, er nai bo peiamyaipu bena, er nong peipi.

24Ataruda, Daud banmauanen, mutu si Mahanaim mutu damai beu pangeda, Absalom cap, Israel yala neng, er tara keproi nesala yuma capda, Yordan me goupra wengbei. 25Ataruda, Absalomdi, ‘Jen talen neng sun deiyo ngebo keprapredi, nimi doupra bankamre’ tenen, Yoab pununa tep, nimi si Amasa wepra deipu. Amasada, Israel yala ngebo er si Yitra, er mi kuramu. Yitra er ner sida Abigail. Abigailda, nimi si Nahas er ner mi kuramu. Abigail er du ner Zeruya kuramu. Zeruyada, jen talena deiyo ngebo er si Yoab, er nin kuramu. 26Absalom cap, er tara keproi Israel yala nesala yuma capda, Yordan me goupra, ortara wengbei dingeda, Absalom cap, er kikiman kunmai neng yuma cap, sun keana dodin tenda atida, Gilead mutupu bena dopi.

27Daud Mahanaim mutu beu taruda, nimidi er melimna tep, jen keca cap, yuk keca cap duyana karepi. Ada, Nahas er mi Sobi, Raba mutu dinin, Amon yala nesala kuramyai di yau. Tonda, Lodebar mutu ngebo Amiel, er mi Makir cap, tonda Gilead yala ngebo dinin, Rogelim mutu kuramu ngebo er si Barsilai cap, sun aneng yumadi Daud makuna tep yai.

28– 29Sundi Raja Daud cap, er nyapu yuma cap tep, dubei kecada, man keca ason cap, yangdin keca cap, gat tu di betaipi belanga cap, tonda jen keca yalada, gandum cap, jagung utopu keca jelai dapra keteneipinge cap, roti dana deiyo keca tepung cap, meirma cap, kedelei cap, du bi amulye cap, mong mokon cap, domba bisam cap, sapi moum teyung di ketekepmai jen keca cap, akeca yuma douprapidi, ‘Daud cap, er melipra kurami neng yuma cap, sun jenkameng’ tenen, deyai. Ada mesum tep gume, ‘Anesala sun nimi kuna gum mutu, katawai mutu embanmai taruda, jen putana cap, me putana cap, puto boun kuna cap, konum kupmange,’ tenepmaia tep, akeca buluprapidi doupra, Daud tep kareryai.