2 Samuel 18

Absalom popra bisipipa depu upu

1Ataruda Dauddi, er cap kurami jen talen neng yuma bupra tekipane, sun giso yuma dipetepu. Dipetepudi sun jen talen neng, ila deiyo neng kemna tep, ton ngeda wepra deipupa, anengda jen talen neng seribu talepi. Ton ngeda wepra deipupa, anengda jen talen neng seratus talepi. 2Ange konum ukupu dingeda, Dauddi nimi menmena mepra gonga kepra mar podarban neng yuma bokra, weneri gung deipu. Ton gungda, Yoabdi deiyo ngebo kepu. Ton gungda, Zeruya er mi Abisai, Yoab er weit bodi deiyo ngebo kepu. Ton weneri gungda, Gad yala ngebo er sida Itaidi deiyo ngebo kepu. Ukupra ketenepra deipu dingeda, Raja Dauddi er jen talen neng yuma tep pepu. “Sunpu pio men tapkusene. Ne cap, sun cap nun podan neng tep, kikiman porbenkamepe,” pepu.

3Upepu dinin, ajen talen neng yumadi tamupra pepi. “Gume naio, kan cap, porbanaida bana gume. Ukupmanto, nun podan nengdi, popbisipsengepa, nun tapra bura saka bepe pangeda, nun podan nengdi, nun tali neng tep, ‘Anengda mambule,’ men tenepkamenge. Tonda, nun yuma neitamai bokra, weik depmepeya peda, sundi, ‘Angeda mambule,’ men tenepkamenge. Dinino, nun nai bo kan tenpu ngebopu dinin, kan depmemnyopda, nimi denge sepuluh, 10 ribu neng derameng utopu kurema tep, ila mambul kange dounkamepe. Ange tep, nun kangeda, pio telep ngeda, amutu kunmaremai dipu, nun tep melipkamsereme. Nun cap kikiman porbana gume,” pepi.

4Upepi pangeda, sun deiyo ngebo Raja Dauddi tamupra pepu. “Telepe sundi, ‘Ange telepe,’ tenepmaruma utopu ne peda ukupkamne. Sunda beso,” pepu. Upepu dingeda, erda akati arum domyai bura tara beilya buplan damai bena tekra dinmaupane, sun jen talen neng yumada, dengeda nepra tekmaidi gupra banmaiyada, ton gungda seratus di banmai. Ton gungda seribu di banmai. Ange utopu agung ton, agung ton weika di bura banmai. 5Benkoi taruda, sun deiyo ngebo Raja Dauddi Yoab cap, Abisai cap, Itai cap tep pepu. “Ne mi Absalom tep nengeda, meteka pe dila ton dodongona pio gume. Yu kupserepa di potamna gume. Ada, ne kange mun kupnerura tep pepsene,” pepu. Upepu pangeda, ajen talen neng yumada, Dauddi sun deiyo neng tep pepu upuda. Sun jen talen neng yumadi gekepi.

6Ukupi dingeda, Daud er nyapu sun jen neng yumada, Israel neng porbana tep, bei. Sun podanmai mutu sida Efraim mutu dinin, co palpal bura mutu podarbei. 7Ataruda Daud er jen talen nengdi, Absalom er tara neng, Israel yala nengda, pio weika di poptapi. Tek sisi atenpu tumi popipa depi neng yumada, denge weik dua puluh ribu neng (20.000) poptapipa depi. 8Amutu neitamai yumada atumi di podanmai. Mar podanmaiyanen nimi yambulanun depipa, amutu co palpal neitamai di nimi pio weike depi. Tonda, Daud er jen talen neng, sun parang ya di nimi yambul weik popi dinin, aco palpal neitamai depi ngeda nimi pio weike depi.

9Ataruda, Absalom er keledai bisam bali deiki bukra bau taruda, dato-dato di Daud er jen talen neng cap, angebo cap antapdai. Ukupipa, Absalom kwar kupupa, keledai bisam deiki sepdaro benmau. Benmauaida, co palpal cadi, Absalom bali deiki bukmau keledai bisam ila co tekamnga iriamu tara wekroupane, Absalom er lyom potong aco teru di gwarepupa, menengapu deripmau. Absalom er keledai bisamda tali sepdaro beu. 10Ukupupa, nimi ton Daud er tara jen talen ngebo epudi, er deiyo ngebo Yoab tep lap perbeu. “Naio arup taruda nedi dinmanupa, Absalomda ila co tekamnga neitamai di er lyom potong di gwarepra deripmaupa epmanue,” pepu.

11Angebodi aupu pepu pangeda, Yoabdi tamupra angebo tep pepu. “Kanda ware keca deiyo tep asuru dipu dinmamum do? Ware keca deiyo tep do, ataru dipapu poptapmatumpa, tuai konum sakmatue. Ukupmatumpa konum depmatuopda, nedi gel uang er sida perak metekanun takol bari, ada sepuluh kepra (10) konum karepmaketene. Tonda, ila puto jen talena deiyoteng derin keca kemamengu utopunge tenpu cap, kan tep karepmaketene,” pepu.

12Upepu dinin, angebodi tamupra Yoab tep pepu. “Gume naio, menmena dipapu gel uang weike seribu perak karepnetuma peda, Raja Daud er mi tep, ne buru deiki men popmatene. Deiyoda, Raja Daud erdi, kan Yoab cap, Abisai cap, Itai cap tep, ‘Ne kange mun kupnerur’ tenen, ‘Ne mi Absalom tep yu di men poptapkamrume,’ peipupa nun yuma amul di gekepmupke.

13Tonda arup taru angeboda konum popmatenyopda, yuk nengdi ne peda popmanetenge. Ukupra popkonetenge taruda, kandi men melipnetume. Naio, kan kaele, ware keca do yuma, Raja Daud, erdi gekerura cadi, er mi konum popmatenyopda, er tek sisi konum gekepmatue. Gekepyopda, ne damai men yatum dinin, kandi, ‘Angebo melipnepa, ne ton poipnenunge’ tenen, ne damai men yatume. Atep nengeda, nedi Daud er mi Absalom men poptapmanue,” pepu.

14Upepu dinin, jen talena deiyo ngebo Yoabdi pepu. “Nedi, ‘Dan taru di angebo porbenkurem do?’ tenen, kan tepapu apio men dinkukene,” peprapudi, lyom co takke tombak weneri doprapudi, Absalom gam di isin tupa kunmaupapu bena, er taram deiki puto di lukra dongopu. 15Ukupu pangeda, Yoab er nyapu jen talen neng takol bari (10) yaidi sun parang ya di yana popipa Absalom depu. 16Ukupipa depkopda, Yoabdi terompet upu weika di pung pepupa, er jen talen neng yuma bulupi. Ataruda, ‘Israel neng popkup’ tenen, dombenmai ngeda, tapipa, Israel neng bendopi.

17Ukupi pangeda, Yoab er jen nengdi Absalom er nong dopra, ereprapidi amutu co palpal neitamai tu pumbon kwamupa apumbonpu dokotepi. Dokotepipa, er nong deiki tarada, ila di gel dokotenmaipane, erepra iteku pangeda, Israel sun jen talen neng yuma adipapu sepdara sun ati yuk-yuk kuramitopu bendopi.

18Uda, Absalom tupa gam kuramu taru di, ‘Ne mi kapul men deipsa tep, ne yo pununa men kunkamnera cadi, ne si gum kupkamner’ tenen, ila lyom gel erepra ikra tekeipu. Agel ikudi tekeipu mutuda, Yerusalem ati arum domyai dinin, keteng yakan tara yambul karenai di ikra deipu. Amutuda, ban mutu kuamupa, amutu nengdi, “Nun ila nimi deiyo ngebo, Raja er kunkamre banai,” perami. Absalomdi, alyom gel ikra deipudi, agel cap amutu cap tep er pe si karepu. Ada, ‘Nimidi ne si tupa tenepkamneng’ tenen, er si karepu. Amutuda, nimidi, “Absalom, er lyom gel deiamu ake,” perami. Agel tep nengeda, nimidi, “Absalom er lyom gelda ake,” penunge.

“Absalom depmare,” pepipa Daud gekepudi engepu upu

19Ange konum kupu pangeda, Sadok er mi Ahimaasdi Yoab tep pepu. “Ukutaruda, kandi telepe pepnemempa, Absalom popmangu keca tep menmena Raja Daud damai perbenkune. Bene dingeda, ‘Allah er si Yahwehdi kan tep lyepmakerdi, kan podana tep poryakaramkei nengda, konum popmange,’ perbenkune,” pepu. 20Upepu dinin, Yoabdi tamupra pepu. “Atarupu aupu perbana gume. Yuk tarupu perbenkamrume. Ila ngebo Raja Daud er mi Absalom popmangpa atumi depmara tep, atumi menmena di aupu men perbenkurume. Yuk tarupu perbenkamrume,” Yoabdi pepu.

21Atarupu Yoabdi nimi tenpu Etiopia ngebo tep pepu. “Akupmarpa epmarem kecada, ila Raja ngebo damai perbenkurume,” pepu pangeda, angebodi er damai genepdongopra gispal dopudi, sepdaro beudi, Raja Daud damai perbeu. 22Dinino, Sadok er mi Ahimaasda tupa mali kange doupra, Yoab damai kange di ton cap tupa perbanmau. “Naio, nedi aupu pepnepa, ‘Ware kupkamneng do?’ men tenenune. Ikin kupneryada peda, ‘Angeda mambule,’ men tenepne. Atep, ukutaru kandi peipnemempa, Etiopia ngebo sepdara banmauai, er amnyo tarada ne amenda sepdara betene,” pepra, tupa-tupa moronmaupa, Yoabdi angebo tep pepu. “Warya tep ange putapkerepa tupa penmanerem do? Aupu pepmemnyopda, amenda maton don keca men doproptume. Aupuda kange mun upu tepa,” pepu.

23Upepu dinin, Ahimaasdi, “Gume, ikin kupnerya peda, ne ton sepra betene,” pepra moropu. Upepra moropupa, Yoabdi, “Jo telepe adipapu sepdara bena perbeo,” pepu. Upepu pangeda, Ahimaas yuk bisi, Yordan mekin barami bisi deiki sepdaro banmauanen, Etiopia ngebo bisipra bendopmau. Ange tep, Ahimaasdi menmena Daud damai beu.

24Daudda, Yerusalem mutu bisi buplan bura tarange cap, ati tarange cap, dana-dana neitamai bukmau. Bukmaudi dinmaupa, er ati pel don ngebo, ‘Ware kupkamser do?’ tenen, kalekra dina deiyo ngebodi akati dela di welepra abuplan deiki bentekra dindeupa, nimi tenpu ngebo ton sepdara yakaupa epu. 25Yau pangeda, akati kalengna ngebo epudi, ila di mali pepra Raja ngebo damai pepu pangeda, Dauddi pepu. “Uo er bon tenpu yanmarada mesum tep gume. Ne kangeda er tenpu yakanmara cadi, kai telep upu peryakanmaser gum daca,” pepu. Upepu taru dipu, ayakanmau ngebo sun damaipu yakanmau.

26Akati deiki dinmau ngebo adipapu dinmaupa, yuk ngebo ton cap, sepdara yakanmaupa epu. Epu dingeda, angebodi akati buplan dam kalengna deiyo ngebo tep, upepu. “Dipetepo, yuk ngebo ton cap, er yuk dinin sepdara yakanmara adano,” pepu. Upepu pangeda, Raja Dauddi, “Jo, ne kangeda, angebo peda kai telep upu peryakanmasere, tenepne,” pepu. 27Upepupa, akati kalengna ngeboda, ila beilya deiki di dipetepudi ton cap upepu. “Nedi epmanada, menmena yanmau ngeboda, Sadok er mi Ahimaas, er sepdara embaramretopu yakanmare,” pepu. Upepu pangeda, Raja Dauddi, “Teka angeboda telep ngebo yanmara cadi, kai telep upu ton doupra peryanmasere, tenepne,” pepu.

28Upedongomu taru dipapu, Ahimaas ila upu di Raja Daud tep pepu. “Telepe ne nai. Akeca-keca yuma teleppu kurure,” peprapudi gutam tu dipdongopra gispal dopudi, aupu ton pepu. “Ne nai bo Raja Daud, kandi Allah er si Yahweh tep si eremrum Allahda, telepe pepne. Er si erepkamepe. Ne nai bo kan pona tep domyakaramkei neng yumada konum popbisipmape. Nun nai bo Allah Yahwehdi melipseupa, kan podan neng yuma konum popbisipmapdi gawal dakmape,” pepu.

29Upepupa, nimi deiyo ngebo Raja Dauddi asipetepu. “Ne mi Absalom kaber ngeboda, tapmarumpa tupa gam kurur do, gum do?” pepra asipetepu. Upepupa, Ahimaasdi tamupra pepu. “Naio ne walwale. Nun jen talena deiyo ngebo Yoabdi, ‘Kan cap, Raja ngebo er melimna ngebo cap, sundi Raja Daud damai perbenkurerume,’ pepra dokotepmaseu taruda, yakanudi gekenupa, ila upu dingpenmai ngeda, akapmaua dinin, ware keca deiyo tep kunmangudi do, ne walwale,” pepu. 30Upepupa, Raja ngebo Dauddi Ahimaas tep, “Ortara tengbememdi dakunkurume,” pepu. Upepupa, Ahimaas adipapu ortara amnyoi bena teku.

31Atarupu Yoabdi er pel melimna ngebo Etiopia mutu ngebo dopra deipu ngeboda, er ton sepdara yaudi Raja Daud tep pepu. “Naio kanda ne deiyo ngebo Raja kurume. Nedi kan tep pio mambul cadi, telep upu peryakene! Atep, gekepkurume naio. Atumida Allah er si Yahwehdi melipmaseupa, ne nai bo kan pona tep domyakaramkei neng yumada, konum popbisipmape. Nun nai bo Allah Yahwehdi melipseupa, kan podan neng yuma konum popbisipmapdi gawal dakmape,” pepu.

32Upepu dinin, nimi deiyo ngebo Raja Dauddi ton cap, tamupra asipetepu. “Ne mi Absalom kaber ngeboda, tapmarumpa tupa gam kurur do, gum do?” pepra asipetepu. Asipetepupa, amelimna ngebo, Etiopia ngebodi tamupra pepu. “Naio, nun putapser ngeda, sun jen talen nengdi akaber ngebo tep kupmaitopu, kan tep mar pepdanen yakaramkenge neng yuma peda, utopu kuptenge. Angeboda konum poptapmangue,” pepu.

33Etiopia ngebodi, aupu pepupa, Raja Daud ange konum gekepu dingeda, pio mali kange doupudi, akati beilya buplan deiki tara weleprapudi, er alau ati beu dingeda, pio ila di engenmau. Engepra benmau taruda, upenmau. “Uo, uo, ne mi, Absalomo, ne mi Absalomo. Ne mi ware keca deiyo tep do? Telep ngeda, kan dena gum dinin, nepuda kan yo pununa tep ne depmatene. Uo, ne mi Absalomo, Absalomo,” pepra engenmau.