2 Samuel 19

Raja Daud, er mi Absalom depka tep engepupa, Yoabdi wenepu upu

1Raja Daud, er mi Absalom popipa gekepka tep nengeda, Raja Dauddi er mi tep mali kange douprapudi engenmau. Engenmau ngeda, yuk nengdi Yoab tep lap perbeipa, Yoabdi kael kepu. 2Atumida, Raja Daud er tara jen talen neng yumadi gekepi. “Nun nai Raja Dauddi, er mi Absalom depmaua tep, ila di engenmau. Er mi popmaipa depka cadi, er nai Daud ila di engenmaue,” penmaipa, gekepi. Ange tep nengeda, sun podan neng, Israel neng tep konum popbisipmai dinin, atumi deiki dipapu, Daud er jen talen neng yumada, dipru ikin kupupa, sun peda mali kange doupmai.

3Ukupi dingeda, ajen talen neng yumada ali weik kupu. Ukupmantoda, jen talen neng sun podan taru kware kuprepa, sepdaro bura saka bengopda, ali dangmengtopu kupudi, mali kange doupra ali weik kupu. Atep nengeda, Yerusalem ati arum tamupra benmai taruda, adipapu tali dimpepra sun yuk-yuk ati tamupra inimbei. Ada inipra badonmaiyanen, sun ati yuk-yuk bendopi. Angeda tali tep gume, ila ngebo er mi tep engenmaua tep, ali kupmaupa inipra bei. 4Raja ngebo Dauddi er urasin genepdongoprapudi, ila di engenmaudi, “Uo, ne mi, ne mi Absalom, Absalom warya tep do?” pepra engenmau.

5Ataruda, jen talen neng, sun deiyo ngebo Yoab, Raja Daud ati beudi pepu. “Atumida kan jen talen neng yuma tep, mali kupmaumpa, ali dangmange. Ajen talen nengdi, kan podan neng, Israel neng tep popbisipmaiya deiki di, lyepmasenge. Ada, kan cap, kandi deiamum nyapu cap, ner nyapu cap, tonda kan nerapu yuma cap, lyepropmasei dinin, kandi engenmarema deiki di, ali dakra deipsereme,” peprapudi, Daud tep wenepu.

6Upepudi aupu ton pepu. “Kanda ware keca deiyo tep do? Naio, yuk nengdi kan tep, ‘Nun songe,’ tenekenung nengda, kandi aneng tep, telepe tenepra, bicau tenerume. Dinino, ware neng do yuma, kan tep, tek sisi bicau tenekenung neng yuma tep, kandi aneng tep, ‘Dakwapye’ tenen, song tenerume. Ukupra kurumada, ware keca deiyo tep do?

Ukunmarema deiki di kael kepkene. Ada kan jen talen neng cap, nun jen talena deiyo neng yuma capda, kan dingeda, ‘Sunda dakwapye. Sun aneng yumada mambule gume,’ teneserume. Kan mi Absalom tupa gam kutupa, nunda kan jen talena neng yuma konum depmatepetoda, kandi kange deiptume. Nun konum depmepyopda, Absalom tupa gam kutuopda, kan telepe teneptumdi, kange deiptume. Kandi nun jen talena neng yuma tep, ali dakra deipmaserema deiki di, apepmakena utopu konum kupmasereme. Ange tep nengeda, kandi ange pio betapra tenipkurume,” pepra Yoabdi Raja Daud tep wenepu.

7Wenepudi, aupu ton dukdongopra pepu. “Ange tep nengeda, naio, kan menmena bukromemdi, tek sisi bura tara bememdi, kan nyapu jen talena neng yuma tep, sun dipruai ikin weik tenenmang ngeda, bena boun kepra deipkurume. Ne tek sisi pepkene naio. Kandi sun jen talen neng damai men bememdi, sun tep telep upu men bena pepmemnyopda, ataru dipapu keteng kapul men wengbenapre taruda, aneng yumadi kan tapra bendopkamenge. Nimi tenpu ngebo peda tupa men melipkamkenge, amutu tapra bendopkamenge. Ukupmengopda, ikin pio weik kunkamkere. Pumun taru ikin kupkeunge yumada, yambul mambul pua. Dinino, kan jen talen neng yuma tapungedi, bendopmengopda, angeda ila ikin weik kunkamkere. Aupu yumada, nun nai bo Allah Yahweh, er si deiki di tek sisi pepkene,” Yoabdi Raja Daud tep upepra wenepu.

8Upepu pangeda, Raja Daud gekepudi, adipapu bukrapudi bura beu. Bukra beu dingeda, akati arum bura tara ila beilya buplan damai bena buku. Ukupupa, yuk neng epidi lap perbeipa, er jen talen neng yuma cap, amutu neng yuma cap, Raja Daud damai yana wengyai.

Raja Daud tamupra Yerusalem mutupu beu upu

9Ange konum ukupu pangeda, Israel yala neng, kware kupupa, sun pe ati yuk-yuk tamupra sepdaro bei. Bulupra yakanmaidi Israel neng yala-yala yumadi aupu penmai. “Raja Dauddi nun podan neng yuma tep lyepropseu. Tonda nun podan neng, Filistin yala neng tep popbisipupa, anengdi men taleamsei. Dinino, ukutaruda, Daud er mi Absalom tep kware kupupa, amutu tapra bura saka beupa, amenda taruda, er mi Absalom konum popi.

10Tonda nun dingeda, ‘Absalompu wepra deipmepepa, er dipu nun ila nimi deiyo ngebo Raja kunkamser’ tenen, ereipmapu dinino Daud tara jen talen nengdi Absalom konum popipa depu. Ange tep nengeda, ukutaru warya tep, nun nai Raja Daud tep kapul men upupmepu. Erda ka di tamupra, ila nimi deiyo ngebo Raja kuna tep, men ereipkamep do, ware kupkamep do?” penmai.

11Ange penmaiya tep nengeda, Dauddi Allah er ati pel dona deiyo neng, butene tep upu pepra deipu. Ada Sadok cap, Abiyatar cap tep upu dokotepu.

Sundi Yehuda yala neng, wisi neng tep asipetepkurume. Israel mutu neitamai yuma, Israel neng yala-yala yumadi penge upuda, ne konum gekenune. ‘Raja Daud tamupra er ila deiyo ngebo ati yatudi, nun deiyo ngebo kunkamsere,’ penunga cadi, sun Yehuda yala nengda, ware keca deiyo tep, sika di kurum do? Ne ereipmengepa, Raja ila ngebo kunkamnada, sunda amenda taru keamenge nengpu kunkamrum do, gum do? 12Yuk nengda, ‘Daud ereipmeko,’ pepra konum penung dinin, sunda ne kayapu neng cap, ne pe yala neng cap, tonda ne pe yapi neng kuruma cadi, warya tep sunda amenda neng kepmarumdi, Raja kemna tep, sika dipu tamupra duyankamnerem do?

13Tonda, nimi si Amasa er damai upepkamarume. Raja Dauddi upepkere. “Kanda ne pe yala ngebo kurum do, gum do? Ne tamna ngebo kuruma cadi, nedi pepkene, jen talena deiyo ngebo Yoab er pununa tep, kan wepra ereipkamkene. Tek pepkene, atumi di dipdongopra yuma taru yumada, kanda ne jen talen neng, sun deiyo ngebo kemkamreme. Nedi kan tep ereipkamkene. Ange men kupnyopda, ne nai Allah er si Yahweh ila di wenepkamnetue, pepne,” Dauddi pepu.

14Ukupu taruda, Yehuda yala nesala yumadi Raja Daud tep, ila kange deipi. Sunda nimi bon tenpu ngebo utopu, er tep kange deipidi er tara kepropi. Ada, sundi er Daud tep, ‘Nun Raja nimi deiyo ngebo kunkamsere,’ tenepidi kange deipidi, er tep upu dokotepi. Sundi upepi, “Raja Daud kan cap, kan jen talen neng yuma cap, nun mutu tamupra yankurume. Nun ila nimi deiyo ngebo, Raja kunkamserume,” pepra upu dokotepi.

Raja Daud beu taruda, nimi si Simeidi menmena Raja damai beu upu

15Yehuda yala nengdi, Daud tep, “Nun mutu tamupra yarume, nun Raja kepkamserume,” pepi. Atep nengeda, Raja Daud adipapu sakotepra banmauanen, Yordan me duman beu. Ake atarupu Yehuda yala nesalada, Raja ngebo dirbana tep Gilgal mutu yai. Ada, ‘Nun deiyo ngebo Raja Daud antapmepedi, dopropmepyopda, nun kikiman Yordan me goupra bankamep’ tenen, yai. 16Ton atarupu Benyamin yala ngebo Gera, er mi Simeida, Bahurim mutu di, sikke gum menmena di Yehuda yala nesala cap yakanmaiyanen, yaudi, Raja ngebo cap, antapdarei.

17Tonda Simei cap, Benyamin yala nesala dengeda seribu neng cap, tonda pumun Raja Saul, er ati pel meliamu ngebo Siba cap, tonda, Siba er nyapu 15 neng cap, tonda, er pel melimna neng 20 neng cap, anesala yuma, Raja Daud kupkamngai, Yordan mekin ataru dipu, sun menmena yana kunmaipa, Daudda amenda tara yau.

18Angeda musum tep men yai. Ada, ‘Ila nimi deiyo Raja Daudda, er nyapsilip yumada, nundi makupmepepa, Yordan me goupra benkamange’ tenen, yai. Tonda, ‘Raja ngebodi er putarepa, pepretopu ange yuma nundi kupkamepe’ tenen, yai. Sun yai taruda, Gera er mi Simeidi, ila nimi deiyo ngebo Raja Daud er gispal dona tep, er damai yaudi, giso tu dipdongopra maramengtopu kupu. Yana genepdongopudi tuai mapu. (Uda, arup taru Daud Yerusalem mutu tapra beu taruda, Simeidi mali upu weik pepra wipdongopudi, Daud yala neng sun nong deiki gel dokotepu).

Dauddi Simei tep dipru karepupa, kange deipu upu

19Angebo Simeidi Raja Daud tep pepu. “Uo ne nai, ne mali kupsinge tep, kanda, ‘Malipu kunkamre,’ tenena yapnememdi, kaukepnerume. Nedi kan damai mali kupsi ngeda, ne konum kaele. Ada Yerusalem benkomem taruda, pio mali kupsi. Dinino, angeda tupa men tenenkamnerume. ‘Ne mali kupsi ngeda lupronkurume’ tenen, moropkene naio. 20Naio ne pio mali kupsi ngeda, ne konum kael kepsidi tapsa tep, angeda kaukepkamnerume, naio. Ukutaruda, kan amutara pel melimna ngebo kunkamne. Tonda, atumida aca yana kupmaken ngeda tali tep gume. Nimi Yusup yala nesalada, amutu weike dakunung dinin, kan amutara pel melipra dona ngebo, menmenange ngeboda ne ce. Nedi menmena kan damai yana, telepe pepmakene,” pepu.

21Upepu pangeda, Zeruya, er mi Abisaidi aupu gekepudi upepu. “Gume, Allah er si Yahwehdi, ‘Ila nimi deiyo ngebo Raja kunkamre’ tenen, wepkeu dinin, angebo Simeidi pumun taru pio mali upu pepra, kan nong deiki widongon upu deipkeue. Ange konum kupka tep nengeda, telep ngeda, adipapu angebo poptaptepe,” pepu.

22Upepu dinin, Dauddi tamupra Zeruya er nyapu Abisai cap, Yoab cap tep pepu. “Aupu pepmaremtopu kurum nengda, ne tenenetopu pio men tenerume. Atep nengeda, ne cap, sun cap wisipra kikiman kuna gume. Sunda ne podan neng utopu konum kupmarume. Angeda warya tep do? Atumida, ware keca deiyo tep Israel yala neng ton poptepe do? Gume, atumida ne kaele. Ne kangeda, Israel yala nesala yuma tep nengeda, sun ila nimi deiyo ngebo Raja konum kupne, tonda Raja pio kunkamna tep, nimi tenpu peda men popkupe,” pepu.

23Upepka tep, Raja Dauddi kange di ton cap, tamupra Simei tep pepu. “Nedi tek sisi pepkene, kanda ton wenepra men popkamkenge. Ne Raja ngebodi tek sisi pedina upu deiki di konum pepkene,” pepu.

Mefibosetdi Daud damai beu upu

24Tonda Saul er deipu midi, deipu mi Mefibosetda, menmena Daud damai yau. Raja Dauddi Yerusalem mutu tapra beu taru di gonga kepra, Mefibosetda ikin kange doupudi, er opkale me kuna cap, ban potong touna cap, yane me kuna capda, yaprou. Ada, Daud Yerusalem mutu Raja kuramnganen, Absalom tep kware kupupa, Yerusalem mutu tapra, bura benamnganen, ka di tamupra Yerusalem mutupu telep kupra yau taru neitamai yumada, Mefibosetda talipu kuramu. Me kuna cap, me gengna cap gum dipapu yau.

25Ange tep nengeda, Mefibosetdi Raja Daud damai yau tarupu Dauddi asipetepu. “Mefiboset kanda ne bena kunmasi taruda, ne men melipnemumdi, ne cap kikiman men benamnemu ngeda, warya tep do?” pepra asipetepu. 26Asipetepupa, Mefibosetdi pepu. “Naio kanda ne deiyo ngebo kurume. Kan kaele, neda yo mali ngebo cadi, ne yan deiki yanipra men embenmanto ngebo kunune. Atep, kan benkomum taruda, nedi ne pel melimna ngebo tep upepsi. ‘Ne keledai bisam bali deiki bukra Raja Daud cap tonpa benkamneme cadi, akeca yuma keteneipneo,’ pepsi. Upepsi dinin, ne pel melimna ngebo Sibadi mok upu pepneupa, ne keledai bisam men keteneipneue. Kan cap men benamnumunge deiyoda akonum pepkene.

27Tonda, nedi mali men kupsi dinin, angebo Sibadi, mali upu weik ne tep peamkeupa gekepmume. Naio, ne kangeda, kanda Allah er im deiki pel don neng, malaikat utopu, pio mambul ngebo kuruma cadi, kandi, ‘Ukupkamkene,’ tenepnememtopu, angepu kupkamnerume. 28Ne kaele, ne nai Saul, erdi deiamupa, sundi deipdanen, baramyanen deiami neng yumada, kan tep mali kuramya cadi, konum poptapmatume. Atep nengeda, kandi, ‘Aneng yuma cap, Mefiboset cap poptapkune,’ tenesemem dingeda, ange peda telepe pua. Ne nai Raja Daud, menop taru di tali lupra popmanetum dinin, men popnemume.

Tonda, arup taru kandi men popnemum dinin, kan bicau tenepnemumdi, ‘Ne cap nati pumbon kikiman jenkamneme,’ pepnemumdi, go karepnemume. Atep nengeda, nedi kan tep ka di ton cap tenpu keca peda, men moropkamakene,” Mefibosetdi Raja Daud tep pepu.

29Upepupa, Raja Dauddi tamupra pepu. “Gume, upu ton cap men pepkurume, dakwapye. Ukutaruda, kan cap, kan pel dona tep melimna ngebo Siba cap, kan nai bo taleamu wa penai tu yuma, neitamai di bokra dopropkamrume. Erda, neitamainge dopropkamretopu, kan peda neitamainge dopropkamreme. Amsepu dopropkamrerume,” Dauddi pepu.

30Upepupa, Mefibosetdi tamupra Raja Daud tep pepu. “Gume naio, Sibadi awa penai yumada dorona telepe pua. Ada mesum tep gume. Ne doronada mambule gum dinin, ila mambulada, naio kanda pona gum dipapu, telep kupra tamupra nun mutu yanmarema tep, ne kange deipne. Yuk keca ton men putapnera tep, aupu pepkene,” pepu.

Nimi si Barsilai, erdi Raja Daud melipra beu upu

31Ange utopu, nimi ton Gilead yala ngebo er si Barsilai, er kuramu mutu Regelim mutu di, ‘Raja Daud damai benedi, Yordan me goupra melipra beneme dingeda, ‘Telepe daberume,’ pepnyopda, er yukai benkamraida, kange deipra benkamre’ tenen, yau. 32Barsilai er kuramngada, keteng tamun denge weike delapan puluh tahun (80) konum wisi deiamu. Wisi konum deiamu dipapu yaue. Menop taruda, isomka ngebo kuramnga cadi, Raja Daud Mahanaim mutu bura bena kuramu taruda, Barsilaidi pumun taru di Raja Daud er jena tep ketenepra debenamudi karepu.

33Ukupra weika di Raja Daud meliamnga tep nengeda, Raja Dauddi Barsilai tep pepu. “Kao, kandi meliamnemuma cadi, ukutaru kandi ne melipnemempa, nun butene Yerusalem mutu benemedi, nedi kan tep akeca-keca yuma karepkenepa talepra kunkamreme,” pepu. 34Upepu pangeda, Barsilaidi tamupra Raja Daud tep pepu. “Naio telep pepnerem dinin, ne kan pel don ngeboda keteng tamun weika di men kutene. Wisi konum deipsa tep, konum dena damai kupmanera cadi, ware kuna tep nedi kan melipkenepa, Yerusalem mutu benkunem do?

35Angeda mesum tep men pepne. Ne keteng tamunda denge delapan puluh (80) keteng tamun konum wisi deipsa tep, ukutaruda, nedi, ‘Ange telepe, ange mali,’ tenen, tupa betapra kael keptene do, gum do? Tonda naio, ne jen keca cap, me cap peda, akeca jepnyopda, ‘Ange telepe, ange malinge’ tenen, men kael keptenedi men peptene. Tonda, ukutaruda nimi do, nerapu do, telep mut pepmenga peda, telep kupra men gekeptene. Gume naio, ne cap kikiman beteneme dinin, ne wisi deipsa tep, ne mambul keca yuma, kan dipapu melipkamnerema cadi, kan ikin kupkamkere. Angeda, ware keca deiyo tep do? Gume angeda dakwapye.”

36“Tonda naio kandi ne tep, ‘Menenga keca weik karepkamne’ tenena gume. Ne cap, kan cap, Yordan me goupra bisi buma dipu adinor kikiman bankuneme. Weika di men benkuneme. 37Naio, ne moropkene. Neda kan amutara pel don ngebo kunune. Dinino kandi, ‘Telepe,’ pepnememnyopda, neda ne pe mutu tamupra benkamane. Ne mutu dinin, ne ati tamupra benyopda, ne pe mutupu depkamne.

Ukupnepa, ne nong neng, ne nai bo sisa cap, nanin sisa cap, deamreipa peiamyaipu peipkamnenge. Atep, ne ton tenena gum dinin, nedi tenepmanada, aca kunmare ngebo er si Kimham kan amutara pel don ngebo kurure. Kandi, ‘Telepe,’ peiptumtoda, er cap, kan cap Yordan me kikiman goupra beretume. Kandi, ‘Ange kuptene, angebo tep ukupra melipkune’ tenenkamrumnge yumada, er tep melimkamrume,” pio wisi ngebo Barsilaidi Daud tep pepu.

38Upepu pangeda, Raja Dauddi pepu. “Ange tep nengeda, kandi tenepmaremtopu, angebo Kimham doupra benedi, kan tenepmaremtopu, ange yumada er tep melipra kupkamne. Tonda, ware keca do yuma, kan putapkerenge yumada, kandi moropnemempa, nedi tek sisi melipra kupkamkene,” Raja Dauddi wisi ngebo Barsilai tep pepra deipu.

39Upepkopda, anesala yuma Yordan me goupra, ortara mutu banmai. Sun yuma banmaipane, amenda taru Raja Daud er peda sirya benkou taruda, Barsilai tep, ‘Telepe, Allahdi makunkamkere,’ peprapudi, er urasinai mutupra lulakropu pangeda, er pe ati tamupra beu.

Israel neng cap, Yehuda yala neng capdi, nimi deiyo ngebo Raja Daud tep, mali kange doupra pepdai upu

40Ange ukupu dingeda, Raja Daud cap, Yehuda yala neng cap, sun jen talen neng cap, tonda, Israel neng sun jen talen neng neitamaipu cap, aneng yuma Yordan me goupra ortara banmai. Gilgal mutu banmai taruda, nimi ton Kimham cap melipupa, anesala yuma cap, Raja Daud cap, yuma bei. 41Dinino, amenda taruda, Israel nesala denge weika di, nimi deiyo ngebo Raja Daud damai yaidi, er tep pepi. “Nun kayapu Yehuda yala nengda, ware keca deiyo tep Raja Daud kan tep upula dorona utopu kupra deipsei do? Tonda, kandi aneng tep, ‘Telepe,’ pepra napropmumdi, ‘Ne melimna neng kunkamenge,’ pepra kan nyapu cap, kan jen talen neng cap, Yordan mekin di denepra Yordan me goupra yarum do? Sun Yehuda yala nengdi, kan tep, dalupra dorona utopu kepkei. Angeda, nun dabale,” pepi.

42Israel nesaladi upepipa, Yehuda yala nengdi tamupra Israel yala neng tep pepi. “Akupmepu ngeda Raja Daudda, nun yala ngebo sisa kurura tep kupmupke. Sunda ware keca deiyo tep nun deremaserum do? Tek sisa ngeda, Raja ngebodi er keca ton karepserepa, dopra jenmap do? Gume nundi er keca men dopra jenupe. Tonda, er keca neitamai di, ware bunga dopra doupmepudi, ‘Nun keca adano,’ pepmepu do? Gume ange men kupmepu,” pepi.

43Upepipa, sun Israel yala nengdi tamupra Yehuda yala neng tep pepi. “Ukupmantoda, erda Raja nimi deiyo ngebo kemna tep, nunda denge takol bari (10) taru di, ‘Erda nun tara ngebo,’ penupe. Tonda, nundi er tep, ‘Nun yala ngebo sisa kurure,’ weika di peptepe. Sunda yambula dipu aupu peptume. Tek sisi erda nun yala meneng damai ngebo kurure. Ange tep, sun Yehuda yala nengda, ware keca deiyo tep mali upu pepra, nun deiki deipmaserum do? Ware keca deiyo tep sunda nun tep, ‘Sunda tali neng pua,’ tenemumdi, mali kange doupra diserum do? Lumdongona gume. Nunda menmena di gonga kepra, mororamupkanen, Raja Daud ka di tamupra deyai. Sunda amenda tarupu, peprume!”

Israel yala nengdi upenmai dinino, sun Yehuda yala neng sun upu penada, ila puto neng cadi, yu upu weika di penmai pangeda, sun Israel nengdi Yehuda yala neng sun upu men yanipmanto kupi.