2Sa 2 | XteSC | STEP | Ware yambulanun ton konum maramu dingeda, Dauddi Allah er si Yahweh tep asipetepu, “Ne nai Allah, Yehuda yala mutu dinin, tenpu mutu ton nimi ati donai betene do?” pepu. Upepupa, Allah er si Yahwehdi Daud tep, “Benkurume,” pepupa, Dauddi, “Dan mutu betene do?” pepra asipetepupa, Allahdi, “Hebron mutu benkurume,” pepu.

2 Samuel 2

Dauddi Yehuda yala neng mutu deiyo ngebo kepu upu

1 Ware yambulanun ton konum maramu dingeda, Dauddi Allah er si Yahweh tep asipetepu, “Ne nai Allah, Yehuda yala mutu dinin, tenpu mutu ton nimi ati donai betene do?” pepu. Upepupa, Allah er si Yahwehdi Daud tep, “Benkurume,” pepupa, Dauddi, “Dan mutu betene do?” pepra asipetepupa, Allahdi, “Hebron mutu benkurume,” pepu. 2 Upepu pangeda, Daud er nerapu butene, Yisreel yala ner er si Ahinoam cap, tonda Karmel mutu ner er si Abigail cap, doupra beu. Abigailda, Nabal er ner kuramupane Nabal depupa, Dauddi dopu ner ake. 3 Ukupu dingeda, Daud er nyapu bung cap, tonda er melimna neng sun nerapu, nyapu yuma cap, Hebron mutu neitamai ati dorami nimi mutu bena pio dakurami.

4 Konum bei pangeda, Yehuda yala neng yaidi, Daud tep upepi. “Kanda Yehuda yala neng, nun deiyo ngebo kepkamsereme,” pepra, adipapu wepra deipi. Konum kupi dingeda, amenda taru yuk nengdi Daud tep upepi. “Yabes-Giliad mutu nengdi, Saul depmarpa konum peipi,” pepra lap pepipa gekepu. 5 Daud konum gekepu dingeda, ‘Yabes-Giliad mutu nesala tep upu dokotepkamane,’ tenepudi, er nyapu wepra deipudi, upepu. “Yabes-Giliad mutu bemumdi upepkurume,” pepu. “Sundi pio telep pel doprumada, sun deiyo ngebo Saul depmarpa, er nong dopra peiprum ngeda, pio telepe pepsene. Ukupruma tep nengeda, Allahdi sun tep, ‘Ila kange deipseredi, pio telep kupra deipseredi, ila maton dopkamsere’ tenen, Allah moropkusene,” peipu.

6 Aupu ton peipu. “Ange tep nengeda, Allahdi sun tep ila bicau teneredi, tamna gum dipapu pio melimkamser topu, ne peda ila bicau tenesenedi, pio melimkamsene. Ada sundi nun deiyo ngebo Saul peipruma tepa. 7 Ukutaru dipapu, kange eremna gum dipapu, sun nai bo Saul depka peda, puto weik kupra kumumdi, kware pio gum dipapu, kika deipra telep kupra kunkamrume. Sun nai bo Saul depka cadi, sun Yehuda yala nengdi ne tep, ‘Nun deiyo ngebo pio kunkamserume,’ pepra konum wepra deipneidi, Yehuda mutu deiyo ngebo konum keipmanenge. Ukupra pepneipa kunkamne,” Dauddi peipupa, er nyapudi Yabes-Giliad mutu neng tep perbeipa gekepi.

Isbosetdi Israel yala nesala sun mutu deiyo ngebo kepka tep, seki upu

8 Saul er jen talena neng, sun deiyo ngebo Nar, ^{▼▼Nar – Yuk Allah upu buku neitamaida, angebo er si tep, ‘Ner’ sekami dinin, nun upu peramep nengdi, wang-wang peprepa, ‘Ada ner seki,’ tenepkameng’ tenen, angebo er si tep, nunda ‘Nar’ sekmepu.} erdi deiamu mida, Abnar kuramu. Er angebodi, Saul er mi Isboset doprapudi, sun tonpa sepdara bereidi, Yordan me goupra, ortara Mahanaim mutu bena kuramrei. 9 Amutu bena kuramrei dingeda, Abnerdi, Isboset tep, ‘Ila nimi deiyo ngebo Raja kunkamser’ tenen, er pedipapu angebo Isboset tep, erepra deipu. Ukupupa, angebo erdi taleamu mutuda ake. Ada, Gilead tara yuma cap, Asyuri yala nesala kurami mutu cap, Yizreel mutu cap, Efraim yala nesala kurami mutu cap, tonda Benyamin yala nesala kurami mutu cap, amutu-amutu yuma neitamai kurami Israel nesala tep, Isboset erdi talepra kuramu. 10 Saul er mi, Isbosetda, dakuramnyanen, keteng tamun 40 tahun konum mapu dingeda, ataru di gonga keprapudi, erdi Israel tara kurami nesala sun deiyo ngebo Raja kepudi, amutu-mutu yuma taleamu. Erda, keteng tamun butene deiki dipapu, nimi deiyo ngebo Raja kepra kuramnganen, amutu talepu. Dinino, Isboset itara kurami nesala tep, nimi deiyo ngebo kuramu taruda, dutara (arah selatan) dinin, iknapi tarada, Yehuda tara neitamai kurami Israel yala nesala, sun puda Daud tara kepropidi, erpu melipra kurami. Ada, sundi, ‘Erpuda, nun ila nimi deiyo ngebo Raja pio kunkamsere,’ tenerami. 11 Atep nengeda, Dauddi nimi deiyo ngebo Raja ^{▼▼Raja Ataruda, sun Israel nesala bokrapidi, yuk-yuk kepropidi, yuk-yuk mutu neitamai kurami. Ton tara Israel nengdi, itara bena kuramipa, sun ila deiyo ngebo Raja Isboset taleamu. Ton tara Israel nengda, dutarada (arah selatan) dapu tara mutu bena kuramidi, sun ila nimi deiyo ngebo Daud taleamudi, Hebron mutu kuramu. Sun yumada, tek sisi Israel yala nesala kurami dinin, mutu yuk-yuk bokrapidi kurami. Itara kurami neng tep nengeda, Israel perami dinin, utara dinin, iknapi tara (arah selatan) kurami neng tep nengeda, Yehuda nesala perami.} kepudi, Yehuda yala nesala talepra, Hebron mutu neitamai kuramu keteng tamunda, ngangtan bari (7) keteng tamun deiki di, atara kurami Israel nesala talepra kuramu.

Israel nesala cap, Yehuda nesala cap, Gibeon mutu bena, mar popdai upu

12 Tenpu tumi Nar erdi deiamu mi Abnerda, Yordan me goupra orketeng yakan tara neitamai di, mutu si Mahanaim mutu di, Yordan me goupra, ortara keteng dangban tara bena, mutu si Gibeon mutu ila ati arum doramya damaipu beu. Erda amutu beu taruda, Isboset er pel melimna tep deiyo-deiyo neng cap melipra bei. 13 Ataru dipapu, tenpu ngebo er si Zeruyadi deiamu ngebo, er mi Yoab cap, Raja Daud er pel melimna neng cap, ila ati arum dopra kuramyaida, Gibeon mutu dam kwamu mokon damai bei. (Amutu Gibeonda, keteng wengban tara bukamo, ada (arah barat). Sun itara kurami neng melimna tep, Abnar cap, er melimna neng cap, sun amokon damai yana kunmaiyaipu bei. Atarupu, sun utamna kurami nesala makuna tep, Yoab cap, Daud er melimna neng cap, amokonpu damai yana kunmaiyaipu bei. Tonda Abner cap, er melimna neng cap yumada, Gibeon amokon deiamngai wekmaiya cadi, sun yumadi epdai. Ukupidi, Abnar cap, er tamna neng cap yumada, amokon deiamngai ortara bulupra weki. Utopu, Yoab cap, er tamna neng cap yumada, amokon atamna ton bulupra weki.

14 Ukupi taruda, Abnerdi, Yoab tep upepu. “Ukutaruda, nun jen talen neng neitamai di, nyapu ton wepra deipmepedi, ‘Dan tara nengdi, ton yuk tara neng tep popbisiptenge do?’ tenen, dipetepkamape. Atep, kan tara neng cap, ne tara neng cap, aca neitamai di wepra deipmepedi, antapra deipmepepa, popdanpetepmengepa, nun dipetepkupe,” pepu. Upepupa, Yoabdi tamupra, pepu, “Jo telepe, acapu popdanpetepkunge,” pepu. 15 Upepdareia tep nengeda, konum weprapidi, Ketenepra deipi pangeda, sun Abner cap, Yoab cap bukmareiai damai banmaidi, amokon damai weki. Sun banmai taruda, ajen talen neng yuma nukidi, sun yuk-yuk dinin, ton tara nengda, amul dam di dutara yuma, dua belas (12) keteneipitopu, ortara neng peda dua belas jen talen neng keteneipi. Atep, Benyamin yala neng kan-kan di, 12 nengda, Sauldi deiamu mi Isboset sun tara tep, ketenepi. Ange utopu, Daud er tara jen talen neng peda, dua belaspu keteneipi.

16 Keteneipi dingeda, ajen talen neng yumadi, atara tekmai nengdi, ortara tekmai neng tep, sun anengda, tenpu-tenpu neng yuma, sun yu parang doprapidi, yuk-yuk giso potongpu talepdana peprapidi, ton ngebodi, ton ngebo tep, er mundu neitamaipu lukdongopdanapidi, sun tonpa adipapu popdapidi depi. Atep, Gibeon mutu damai di ukupidi depya tep nengeda, amutu kurami nengdi, “Amutuda yu parang ya di popdaiya tep, nun upu deiki di, amutu sida, ‘Helkat-Hazurim’ penkamepe,” pepra, si sipeipitopu, ataru peda, amutu si tep asipu tupa penunge. 17 Ange ukupdai pangeda, sun dana-dana tara awekmai jen talena neng yumadi, adipapu atumi neitamai dipu, ataruda yu weik kupdaidi, mar popdai. Ukupmaiyanen, siriyada, Daud er jen talen nengdi, Abner cap, Israel jen talena neng cap yuma tep nengeda, popbisipidi, bisbisa kapi.

18 Ataru dipu, tenpu ngebo er si Zeruya, er nyapu weneri nengda, Gibeon mutu mokon damai popdanmai taruda, sun peda aca kunmai. Zeruya erdi deiamu neng, sun sida ake. Ada, Yoab cap, Abisai cap, tonda Asael cap akunmai. Asael erda, rusa bisam sepdara baramra utopu, pio menmena sepra embaramretopu ngebo kuramnga cadi, pio sepdara embaramu. 19 Ukuramnga cadi, atumi dipu, Abnarda, ‘Uo, anengdi poptapnenunga cadi, lyepdankuna cadi, sepra benkune,’ tenepudi, sepdaro benmaupa, angebo Asaeldi, Abner tep, ‘Angebo tomopkun’ tenen, pio sepdara tupa domnapu kunmaudi, tebalal tara cap, dumsisi tara cap, ‘Yuk bisi ton benkun do?’ tenena gum dipapu, pio tupa domnapu kunmau. 20 Pio dombanapu kunmaupanen, Abnerdi tamupra dipetepudi, upepra asipetepu. “Uo, ne amnyo tara sepdara yakanmarem ngeboda, Asael pekenung ngeboda, kan ayakanmarem do?” pepra, asipetepupa, Asaeldi, “Teka ne ca. Nedi kan amnyotara sepdara yakanmane,” pepu.

21 Upepkopda, Abnerdi tamupra pepu. “Kau, kandi ne tep pio domna gume. Dana-dana ton dipetepkurume. Ukupmemdi, ne jen talena nengda tenpu ngebo ton epmemdi, tomopropmemnyopda, er jen cap, er talerur keca cap, dalupropkurume. Ne puda tapnerume,” pepra moropu. Upepupane, Asaeldi, aupu men gekepudi, ‘Abnerpu tomopkun’ tenen, tupa Abner amnyo tara, sepdara dombanapu kunmau. 22 Ukunmaupanen, tupa sepdara banmareiyanen, Abnerdi, kange di tamupra Asael tep upepu, “Amio, kandi ne tepapu domnada, yapkunerume. Kandi ne tepapu tupa domyakanememnyopda, amendada nedi tek sisi popkamakene. Popkenyopda, kan dubo Yoab, er urasin dina tep nengeda, ware kuptene do? Ali weik kupnerura cadi, atep yapneo. Tupa sepdara yakana gume,” pepra moropu.

23 Asaeldi aupu gekepu dinin, ‘Tapkune,’ men tenepudi, kika pio deipu atep, Asaeldi Abner er amnyo tara dinin, damai yanmaupa, Abnerdi nimi pona tep, lyom co takke luami ngeda, er si tombak dopropudi, er amnyo tara di lukupa, Asael er munduda, botoprapudi, bali deiki tara pakra belepupa, Asael adipapu acapu depu. Ukupka cadi, amenda taruda, sun yuk jen talena neng yumada, Asael depudi, loka dourbeuaipu, amenda banmai neng yumada, acapu wengbei, ‘Uo, Asael acapu depmaue,’ tenenmaidi, acapu dim peprap tekmaidi, er nong dinmai.

24 Uda ataru dipapu, ajen talen nengdi, acapu tekmaidi, Asael er nong dinmai taruda, Yoab cap, Abisai capda, sundi dukdongopra, ‘Abner popkuneme,’ tenena tep, pio sepdara dombanmarei. Sepdara dombanmareipane, keteng wekrou pangeda, keteng yakan tamna dinin, mutu si Giah mutu ortara kwamngai dinin, abisida Gibeon tara barami bisi dinin, nimi men kurami tara, katawai tarada, tenpu mutu buma deiki welepi. Amutu gon deiki sida, Ama mutu bei. 25 Ama mutu gon deiki bei taruda, sun Benyamin yala jen talena nengdi, Abner tep yana melipi. Ada, ‘Nun podan nengdi, nun deiyo ngebo Abner popkunga cadi, nun dipu er tep, kalekra melipkup,’ tenepidi, Abner aneitamai tekmaupa, sundi, er dana-dana tara ongopgenepra keteneprapidi teki.

26 Amutu gon deiki tekrapidi, Abnerdi, Yoab tep upupudi, ila upu deiki di aupu pepu. “Kao, nunda pio tep mar podana cap, yu parang ya di podanapu kunkamep do? Kanda men kael kepmum do? Tupa-tupa mar podanapu kupmepe pangeda, telep men kweipsetue. Mali weik kupserepa, nimi weikanun ton depkamenge. Nun yuma, ila kange mun kange doupra engenkamepe. Atep, moupra tenepkurume. Tek sisi ngeda, nunda kan kayapu neng kunupe, nunda tenpu yala nesalapu kunupe. Atep, Yoab, kan nyapu tep, dan taru di pepmempa, sundi nun tep domyakanmaseng ngeda, tapkamaseng do?” pepra asipetepu.

27 Abnerdi upepupa, Yoabdi tamupra pepu. “Uo, tek sisi pepkene. Allah Yahweh pio gam kuramretopu, tek sisi upupu pepkene. Kandi apeprem utopu upu men peptum pangeda, ne nyapudi alukunda neitamai yumada, kan cap, kan jen talena neng cap tep, tupa domnapu kunmatepepanen, ipmatuanen berektue. Dinino, aupu konum pepmaserema cadi, nundi tapkupe. Nun tenpu yala nengpu kunupa tep nengeda, tupa podanapu men kunkamepe,” pepu. 28 Upepu dingeda, peten kemna tep, Yoabdi bung-bung pena, er si terompet douprapudi, ila di pung pepupa, ila lelim pepu pangeda, er tara jen talen neng yumadi gekepi. Upepupa, er nyapu sun Yudea tara kurami jen talena neng yumadi, alelim gekepidi, sun kayapu yuk Israel nesala, itamna kurami Israel neng tep dombanmai ngeda, adipapu tapi. Tonda, ataru dipapu, mar porbanange peda taproi.

29 Yoab cap, er jen neng cap tapropi pangeda, Abner cap, er melipra embanmai jen talena neng cap yuma, alukunda neitamai di tupa bisi banmaiyanen, Yordan mekin bei dingeda, ame goupra, ortamna keteng yakan tara bei. Ukupidi, tupa bisipu banmaipane, bereku pangeda, kange di dukdongopra bisipu banmaiyanen, amenda taru ila ati arum sida, Mahanaim mutu bei. 30 Uda atarupuda, Yoabdi, ‘Abner tep poptene’ tenen, dombanmau ngeda tapu. Tapkopda, sun pe mutu tamupra bei. Bei pangeda, Yoab er nyapu yuma bulupra deipudi, nukterepudi, kael kepu ngeda, ‘Ne nyapuda Asael tenpu popmanga,’ tenepmau dinin, ataru dingeda kange di nukterepudi, moupra kael kepu. Ada, Daud er jen talen neng sembilan belas (19) neng ton men epu. Ukupudi acadi, ‘Uo, Daud er melimna jen talen neng, sembilan belas (19) neng ton konum popmange’ tenen, kael kepu. 31 Dinino, Daud er melimna jen talen nengdi, Abner er jen talen neng, sun Benyamin yala neng popmaiya dengeda, weika di kupmau. Ada, tiga ratus enam puluh (360) neng popi. 32 Konum kael kepi dingeda, Zeruya er mi Asael er nong douprapidi, er nai peiamyai ada, Betlehem mutupu bena acapu peipi. Ukupi dinin, atumi lukunda dipapu Yoab cap, er jen talena neng cap, sun yumada, tamupra bisipu banmaiyane, bereng dongon taruda, Hebron mutupu tamupra bei.