2Sa 20 | XteSC | STEP | Gilgal mutu neitamaida, pio balila kupra, mali weik kuramu ngebo tenpu kuramu. Angeboda, er si Seba. Erda, nimi si Bikri, erdi deiamu ngebo kuramu, Sunda Benyamin yala neng kuramrei. Raja Daud er gonga kemna yakana tep, ataru neitamaida, Sebadi, ‘Israel nesala ne upu gekepkamneng’ tenen, lelim pena keca, er si terompet deiki di, lelim pena tep upunmaudi kong penmau. Ukupmaudi aupu pepu. “Ada nun cap, Isaidi deiamu ngebo, Raja Daud cap, kikiman upu men sisingdanupe. Warya tep er cap kikiman wisiptepe do? Uo sun Israel yala nesala yuma, nunda ataru dipapu Daud tapra, ne pe mutu tamupra bendopkupe! Nun opkal bol di dodina tenda ati deipmupkaipu, tamupra bena kunkamepe,” pepu.

2 Samuel 20

Tenpu ngebo Seba, er upu deiki di, Raja Daud tep yanipu upu

1 Gilgal mutu neitamaida, pio balila kupra, mali weik kuramu ngebo tenpu kuramu. Angeboda, er si Seba. Erda, nimi si Bikri, erdi deiamu ngebo kuramu, Sunda Benyamin yala neng kuramrei. Raja Daud er gonga kemna yakana tep, ataru neitamaida, Sebadi, ‘Israel nesala ne upu gekepkamneng’ tenen, lelim pena keca, er si terompet deiki di, lelim pena tep upunmaudi kong penmau. Ukupmaudi aupu pepu. “Ada nun cap, Isaidi deiamu ngebo, Raja Daud cap, kikiman upu men sisingdanupe. Warya tep er cap kikiman wisiptepe do? Uo sun Israel yala nesala yuma, nunda ataru dipapu Daud tapra, ne pe mutu tamupra bendopkupe! Nun opkal bol di dodina tenda ati deipmupkaipu, tamupra bena kunkamepe,” pepu. 2 Upepupa, sun adipapu Israel yala nesala neitamai dinin, itara kurami neng sun yumada, Raja Daud tapra, ‘Seba, er tara neng kunkamep’ tenen, er cap wisipra bei. Dinino, sun dutara, Yehuda tara mutu tu doprami neng, utarapu talepra kurami Israel yala nengda, sun pio tupa Daud melipra, Yordan me tara di dipdongopra baramyanen, Yerusalem mutu ila ati arum bei.

3 Daud er kuramu ati dam, pio urasin telep mutu Yerusalem beu dingeda, sepuluh nerapu, tek sisi nimi men domi nerapu dinin, er kikiman kuramu nerapu, ‘Ne ati kalengna cap, pel dona cap tep, dakunkamneng’ tenen, er men di beu taruda, er ati deipu nerapu tep, anerapu dopra, yuk ati deipu. ‘Anengdi anerapu kalengkameng’ tenen, er jen talena neng ton dopra deipupa, anengdi, akati kalengami. Utopu ton, Dauddi asepuluh nerapu, sun putanange yumada, dopra deriramu dinin, Raja Dauddi sun anerapu yuma cap, kikiman ton pio men maramu. Atep, sun asepuluh nerapuda, akati pumbonpu tali dakurami. ‘Sunda, solu nerapu kunto kuramenganen, yuk-yuk dakunkamenge,’ teneramnga cadi, ukurami.

4 Amenda taruda, ila nimi deiyo ngebo Raja Dauddi, er kap Amasa tep pepu. “Yehuda tara kurami neng yumada, kan dipapu upupmempa, sun aneng yuma bulupra yankamenge. Sun yankamengada, ue weneri tumi neitamai dipu yankamenge. Acapu bulupkamenge.” 5 Upepupa, Amasa adipapu sun anesala bulupra derina tep lap perbeu. Beu dinino, er deiyo ngebo Rajadi, ‘Weneri tumi neitamai dipu yankamenge,’ peipmau taru neitamai di, er cap, sun Yehuda tara neng cap, tamupra men yai.

6 Ukupu pangeda, nimi deiyo ngebo Raja Dauddi Abisai tep pepu. “Ukutaruda, Absalomda yambul ikin kweipsetu dinino, angebo Seba tep nengeda, ila mali kweipsetue. Atep, nundi er tep pio mounkamepe. Ange tep nengeda, Abisai kandi ne jen talena neng weika di doupra, berumudi angebo Seba tep dombenkamrume. Menmena di angebo men tomopmemnyopda, Seba er adipapu sepdaro, ila lyom gel di deipra, ongopdongopra wipi beilya mutu neitamai wekrepa, nundi er damai men betepye. Sepdaro berura cadi, menmena er tep tomorberume,” pepu. 7 Raja Dauddi upepupa, Abisai beu. Tonda, Yoab er jen talena neng ton, Abisai cap bei. Sun yumadi Kreti mutu neng cap, Peleti mutu neng capda, Yoab er amutara pel dorami neng cap, yuk jen talena neng cap yumada, Abisaidi gonga kepupa, Yerusalem mutu di bei. Ada, ‘Bikri er mi Seba tomona tep, dombankamepe’ tenen, dombei.

8 Uda, dombanmaiyanen, Abisai cap, Yoab cap, tonda Kreti neng cap, Peleti neng cap, yuk jen talen neng yuma cap banmaiyanen, Gibeon mutu ila gel bukamngai bei. Beipa, Amasadi, ‘Aneng cap antapkaman’ tenen, yaudi, sun aneng yuma cap antapdai. Antapdai taru dipapu, Yoab er mar podarbana tep, jen talena neng kenengami opkal kenekmaudi, adeikida lyom parang ya yunge ton, er kin keca pumbon akapmaupapu, er deiyo deiki konum gereku. Aparang yada, er deiyo deiki deipmaudi kikipmaunge yuma, er Amasa damai bau taruda, yu tema kiamu keca pumbon di, kwiripra saku. Ukupupa, ayu parang yada, gisikra buru tebalal tara keprou.

9 Ukupupa, Yoabdi Amasa tep pepu, “Kao, kanda telep do? Kan upuda wareto do, ne kabo?” pepu taru dipapu, Yoab er dumsisi buru di, Amasa er bana potong talepudi, ‘Amasa tep mutupkun’ tenen, Yoabdi er Amasa yana talepu. 10 Dinino, Amasadi Yoab er tebalal buru deiki yu tema doupmauada, men epmau. Men epmaupa, dato-dato di Amasa er mundu ayu tema doumaungedi luku. Luku pangeda, Amasa mundu neitamai akamunge yumada, sakudi tu deiki saku. Er ataru dipapu depu. Adipapu depka cadi, Yoabdi ton cap men luku.

Ukupu dingeda, Yoab cap, er weit bo Abisai capda, ‘Bikridi deiamu ngebo, angebo Seba tep, tomopkuneme’ tenen, pio dombanapu kunmarei. 11 Yoab tara jen talena ngebo tenpudi, Amasa depmaupa deipmaiyai tekmaudi, upu ila di penmau. Ada, “Ware nesala do yumada, Yoab tara ton keapna, Raja Daud er tara ton keapna kemtonung do? Pio telep ngeda, Yoab er tarapu kepkamnunge,” penmau. 12 Amasa er gemnada, nimi bisi embaramya damai deipmaipa, er yapida embanmaua neitamaipu kupmau. Ukunmau taruda, Yoab er jen talen neng yumadi, abisipu banmaidi, dinmaipa, sun aneng yumada, bandenkap aceipu bena dim penmai. Ada, ‘Uo Amasa popmaupa, acapu depmau adano’ tenen, dim penmaidi er gemna epmai. Ukunmai pangeda, arup taru ‘Yoab tara kepkup nengda, er tara kepronkupe’ pepra, ila upu di pepmau ngebo di, Amasa er gemnada doprapudi dubena, aca wai dam tara neitamaipu deiptapudi, lyom opkal bol di agemna lelipdongopu.

13 Amasa er gemna ajen talena ngebodi konum dopra bisi baramyai di gopda pepra karenai bena deipu pangeda, sun yuk jen talena neng yumada, ton cap dim men pepidi, tupa Yoab cap kikiman wisipra beidi, Seba tomona tep pio dombei. 14 Sebadi sepdaro benmau taruda, sun Israel nesala kurami mutu neitamai yumada, bisi banmauanen, imutu bana tep, dapu mutu (arah utara) kurami neng yuma konum bisipudi kirikra yai. Ukupu dingeda, itara mutu si, Bet-Maaka mutu dinin, ati arum sida Abel mutu beu. Beu pangeda, er cap kikiman meliami neng, ada er nai bo, er tara neng, sun Bikri yala neng yuma capda, amutupu buluprapidi, Seba cap akati arum doramyaida, sun kikiman weki.

15 Ukupi pangeda, amenda sun Yoab cap kikiman embarami neng yumada, yuk nengdi, “Sebada, Abel-Bet-Maakha perami ati arum neitamai yana kunmare,” pepipa gekenmaiya tep, sun yumadi amutu yana wareki. Ada, ukupi dingeda, amutu yumada, ongopdongoprapidi wareki. Tonda, akati arum dana-dana tara ila lyom gel beilya wiamya damaida, atembok bura tara di, tu paliprapidi doupra, agel beilya damai yaidi derinmai. Ukunmaipanen, ila di welepu. Tonda, sun adipapu ‘Agel beilya tembok saktue’ tenen, beilya nong deiki ila gat co di bongonmaidi pirinmai. 16 Ukupra kunmai taruda, akati arum Abel mutu doramiya neitamaida, ila kael keamu ner tenpu kuramu. Anerda, ila lyom gel beilya deiki tekmaudi, ila upu deiki di penmau. “Aupuda gekepneso! Gekepneso! Ne moropne ngeda ake. Yoabda peprumupa, ne damai yankurure. Ne tenepman upu ton, er cap, ne cap kikiman nun upu talepkamaneme,” pepu.

17 Upepupa, Yoab gekepudi, adipapu aner damai yaupa asipetepu, “Naio kanda Yoab do?” pepra asipetepupa, “Teka neda Yoab,” pepu. Upepupa, anerdi tamupra pepu, “Neda, kan amutara pel melimna ner utopu kununa cadi, ne pepkun upuda, kandi pio moupra gekenkurume, naio,” pepupa, Yoabdi, “Telepe, neda konum gekepkukene,” Yoabdi pepu. 18 Upepupa, anerdi tamupra pepu. “Pumun taruda, amutu dana-dana tara kurami nesala yumadi uperami. ‘Ada, nimi yumadi, ‘Ware kuptene do?’ tenenge taruda, ‘Ila kael nengdi ila kael upu ton pepnetenge’ tenen, putapseryopda, Abel mutu bena asimpetenkamrume. Ukupmempa, amutu nengdi, telep kael upu penkamsenunge,’ perami. Ukuramya deiki di, sun walwal kuraminge tep upu lepsisikra bongdirami.

19 Nunda, ila ati arum, Abel mutu neitamai dakunup nesala yumada, yuk mutu neng tep, podana cap, yu tenena cap gum dipapu, bouna di dim pepra pio telep kange doupra kunupe. Nundi, ‘Ukunkamepe,’ penupada, tek sisi angepu kunupe. Mok upu men penupe. Ada, Israel mutu neitamaida, yuk ati arum weik dakunung dinin, nunda boun kangepu doupra kunupe. Atep ngeda naio, kanda ware keca deiyo tep, ‘Amutu yumada, poprapnedi, bisbisa kapra, sikke bukra gum kupra deipkamane,’ tenenmarem do? Tonda, Allah Yahweh erdi, ‘Amutuda ne mawange cadi, pio talenkamne,’ teneredi, taleserur mutu tu neitamai yuma tep, naio ware keca deiyo tep, kandi, ‘Amutu kwamre keca yuma yawarapra deiptene,’ tenenmaserem do?” pepu.

20 Anerdi upepupa, Yoabdi, “Gume, pio tek sisi, ‘Ange ukupkamane,’ tenen, men yanmane. ‘Sun mutu popra sikke bungna cap, gum kupra derina capda, ukupkamne,’ men tenepmane! Angeda pio men tenenune. 21 Nun tenenmap ngeda, ange gume. Dinino, nimi tenpu ngebo, er sida Bikri, er mi Seba, Efraim mutu iknapi dam tara di yana deipi ngebo, er dipapu, ‘Nimi deiyo ngebo Raja Daud tep popbisipkamne,’ tenerure. Atep nengeda, nedi moropsene. Sundi, er Sebapu tomoprumudi, dopra karepkamnerume. Ukupmum pangeda, nunda adipapu, tapmepedi, sun neitamai di gopra, yuk mutupu tamupra benkamepe,” pepu. Upepupa, anerdi tamupra pepu. “Atep nengeda, angebo Seba, nundi er gisoda sektapmepedi, doprapmepe dingeda, alyom gel beilya deiki tara di, sun damai dopkamepe,” pepu.

22 Aila kael nerdi, aupu pepu dingeda, adipapu er kange telep deiki di, Bet-Maaka mutu neitamai dinin, akati arum sida, Abel mutu talepra kurami nesala yuma tep lap perbeupa, sun yumadi, ‘Dyo, telepe pua, ukupkupe,’ peprapidi, adipapu Bikri erdi deiamu ngebo, Seba er gisoda sekrapidi, Yoab damai dokotepi. Ukupi taruda, Yoabdi ila pung pena keca, er si terompet lelim pepupa, er nyapu jen talena neng yuma, amutu tapra, sun ati yuk-yuk di, tamupra yai. Sun deiyo ngebo Yoab peda, tamupra Yerusalem mutupu yaudi, nimi deiyo ngebo Raja Daud, er damai yana lap peryau.

Daud er amutara pel dona neng tep, pepu upu

23 Uda, nimi deiyo ngebo Raja Daud, erdi er amutara pel talepra dona neng tep wepra deipu. Ada, Israel nesaladi yuk mutu neng podana tep, sun jen talepra deiki tara kunkamre ngebo, ‘Panglima perameng utopu ngebo kunkamre’ tenen, Yoab erepra deipu. Raja Daud er pe kalengna tep ila puto jen talena nengda, nimi si Yoyada, erdi deiamu ngebo, er si Benaya erepra deipu. Sun yalada, Kerit yala nesala cap, tonda, Peletit neng cap kurami. 24 Tonda, “Angeda, ukupra ikin pel dopkurum dinin, co bo karena gum dipapu aikin pel dopso!” pepra, nimidi men tenepmanpapu palepra, upu pena deiyo ngeboda, er si Adoram wepra deipupa, erdi apel dimamu. Tonda, amutu neitamai negara tep co bo derina deiyo ngebo bendahara ^{▼▼bendahara – Ibrani upu neitamai seki upu deiyoda, yambul walwal kuserure. Ton Alkitab neitamaida, ‘Bendahara’ sengnunge. Bendahara tep nengeda, ada amutu co bo nungna cap, mawa derina cap, bokra karena cap pel doramu. Dinino, ton Alkitab neitamaida, ‘Upu sengna deiyo ngebo’ sengnunge. Upu sengna deiyo ngeboda kuptuopda, amutu neitamai mambul pel cap, mambul keca kuraminge capda, sekra derinada, ataru nimi deiyo ngebo Raja cap, erdi taleramu nesala cap tep, kange di tamupra lap peramu.} ngeboda, Ahilud er mi Yosafat erepra deipu.

25 Amutu neitamai yuk mambul keca sengna pel talepra dona tep, sekertaris ngeboda, tenpu ngebo er si Seya erepra deipu. Imam pel dona tep nengeda, butene neng, Zadok cap, Abyatar cap, wepra deipu. 26 Nimi deiyo ngebo Raja Daud, er ati dam kalengna tep, imam pel dona deiyo ngebo ton, erda Yair mutu di deiami nengdi ngebo, er sida Ira wepra deipu.