2Sa 21 | XteSC | STEP | Daud Raja kuramudi upu peramu taruda, keteng tamun weneri deiki di, ila kange mun jen putana li kwamu. Ukuramupa, Dauddi Allah Yahweh tep, “Angeda, ware keca deiyo tep, ila kange mun jen putana li kunmaser do? Ange deiyoda, lap pepneo,” pepra moropu. Moropupa, Allah Yahwehdi pepu, “Aila jen putana li kan damai kupmakera deiyoda, ake. Ada, pumun taru Saul cap, er nyapsilip cap yumadi, Gibeon mutu neitamai kurami nesala pomya deiki di, ajen putana li konum kupmakere,” pepu.

2 Samuel 21

Sauldi deipupa, deidanen yakarami neng tep, ikin keca deriraminge tep, seki upu

1 Daud Raja kuramudi upu peramu taruda, keteng tamun weneri deiki di, ila kange mun jen putana li kwamu. Ukuramupa, Dauddi Allah Yahweh tep, “Angeda, ware keca deiyo tep, ila kange mun jen putana li kunmaser do? Ange deiyoda, lap pepneo,” pepra moropu. Moropupa, Allah Yahwehdi pepu, “Aila jen putana li kan damai kupmakera deiyoda, ake. Ada, pumun taru Saul cap, er nyapsilip cap yumadi, Gibeon mutu neitamai kurami nesala pomya deiki di, ajen putana li konum kupmakere,” pepu.

2 Upepupa, Raja Dauddi sun Gibeon nesala tep, kong pepupa, yai pangeda, upu talepi. (Uda, Gibeon mutu nengda, Israel yala nesala sisa gume. Sunda, Kanaan tara neitamai kurami nesala, Amori yala nesaladi deiamipa, dadeipdanen yakarami nesala, yambul gung tupa kurami. Menop taruda, sun Israel yala nesaladi, “Gume, sun Amori yala nesala yumada, poptapra gawal men dakamepe. Ton popmepyopda, ton tara ngeda, tupa gam kunkamenge,” pepra pedina upu peiami. Upeiami dinino, amenda taruda, Raja Saul erdi, ‘Gume Israel yala nesala cap, Yehuda yala nesala cap, sunpu amutu neitamai kunkamenge’ tenen, sun amutu kupkaminge tep, piriprapudi aGibeon nesala yuma popterepu. Ukuramu dinin, sun Amori yala nesala yuma, popra men gawal dakamnga cadi, agungda yambulanun tupa gam kurami).

3 Ange tep nengeda, sun amutu nesala yai pangeda, Raja Dauddi, sun Gibeon mutu kurami nesala tep, asipetepu. “Raja Sauldi sun Gibeon nesala tep, mali kwamseunge pununa tep nengeda, ware keca kupsetene do? Ne tenepmanada, sun damai Raja Sauldi mali kwamu ngeda, ange daepra gum kweipnedi, telep kupra deiptenyopda, sun kange telep kupserya deiki di, Allahdi er mawa neng, nun Israel yala nesala amutu neitamai kunkamepaida, Allahdi melimrepa teleppu kweipkamsere. ‘Ukupsetu’ tenena tep, nedi ware keca kupsetenepa, telep kange deiptum do?” pepra asipetepu.

4 Upepupa, sun Gibeon mutu kurami nesaladi tamupra pepi, “Gume. Nun damai Raja Saul cap, er nyapsilip yuma capdi, sun mali kweipsei ngeda, sun er yala nengdi kunumna weik gat keca, perak deiki di do, emas deiki di do, ato keca deiki di amali kweipsei ngeda, pio men daepsetenge. Ange utopu, kanda Raja Daud, kan tara nengdi, ato kunumna keca deiki di, menop taru sundi mali kweipseinge men daepsetume. Tonda, nun tenenup ngeda, ‘Nundi sun Israel yala nesala neitamai di tenpu ngebo peda ton, nundi men poptepe,’ tenenupe,” pepi. Upepipa, Dauddi pepu, “Ange tep nengeda, sun Gibeon nesala yumadi, ware keca kupsetenepa, amali kecada daepsetene do? Sunda, ware keca teneprumupa kupkamasen do?” pepu.

5 Upepupa, sun Gibeon nesaladi tamupra pepi, “Gume, tenpu ngebodi nun Gibeon nesala yuma tep nengeda, ‘Ayala nesala yumada, popnedi, gawal dakamne. Ayala nesalada, gum kupra deipkamne. Nun Israel yala nesala kunkamep mutu neitamaida, sun Gibeon yala nesala wangaptenge. Tenpu ngebo ton, ‘Amutu neitamai pio men kunkamre,’ teneramseu ngebo, er tenpu, er nong deikipu ikin keca deiptepepa, ange yuma gum kuptupa, nun kangeda telep kupkamsetue,” pepi.

6 “Ange tep nengeda, kanda nimi deiyo ngebo Raja Dauddi, ‘Telepe,’ tenepmemdi, Raja Saul erdi deiamupa, dadeipdanen yakaramyanen, deiami neng kankan neitamai di, ngangtan bari neng dopra, nun Gibeon mutu neng tep karepsetumpa, nundi anengpu poptepe. Ada, nundi aneng dopra, Allah Yahweh er damai dinin, Gibea mutu neitamaipu, ila lyom co ikmepedi, takke deiki lukra deipmepyopda, atakke deiki di, angangtan bari neng lukra popdongoptepe,” pepi. Upepipa, Raja Dauddi, “Jo, angeda telepe. Saul tara neng ngangtan bari neng dopra, sun Gibeon mutu kurum neng tep, nedi karepkamsene,” pepu.

7 Raja Dauddi, aupu peiputopu kupu. Dinino, Saul erdi deiamu ngebo Yonatan, erdi deiamu mi, er si Mefiboset, erda yan meiyal semu ngeboda, er dopra men karepupa, sun Gibeon nengdi angebo men popi. Deiyoda, menop taru, sun Daud cap, Yonatan capdi, Allah Yahweh er damai di, “Nun buteneda, telep kange deipra, tek sisi teleppu kunkamneme,” pepra, deipdarei pedina upu tepa. Allah Yahweh er si deiki di, “Tek sisi pepneme,” pepreiya tep, nimi deiyo ngebo Dauddi, Yonatan er mi Mefiboset dopra, sun Gibeon mutu neng tep men karepu. 8 Saul erdi deipu ngebo, Yonatandi deipu ngebo Mefiboset, yan meiyal semu ngeboda, Dauddi men dopropudi, men karepu dinin, yuk nengpu dopropu. Ada, tenpu ngebo er si Aya, erdi deiamu ner mi, Rizpa, menop taru Raja Sauldi aner dopudi, sun butenedi, nyapu butene, sun si Amoni cap, ton ngebo er si Mefiboset cap, deiprei neng dopropu. Ada, Saul er ner Rizpa, anerdi deiamu neng, butene ton dopropu. Tonda, Saul er nermi, er si Merab, anerdi deiamu neng pamubari ton dopropu. Apamu bari neng yumada, aner Merab, er cap, er nenge er si Adrieldi deiprei. Dauddi sun adeipmarei neng pamubari dopropu. Adriel er nai bo sida, Barzilai kuramu. Barzilaida, Mehola mutu ngebo kuramu.

9 Nimi deiyo ngebo Raja Dauddi, angantan bari neng dopropudi, sun Gibeon mutu neng tep karepu. Ukupu pangeda, sun angangtan bari neng yumada, Allah Yahweh er si eremami mutu buma deiki, ada Gibeon mutu dup deiki bena, lyom co takke keteneipinge deiki deripkotepipa, adipapu yuma depi. Nimi deiyo ngebo Raja Dauddi, pio mo cemna gum di, dou pio mamu taru, sun angangtan bari nengda ikin keca dopra deiamupa, Gibeon mutu nengdi popipa konum depi. Ataruda, sundi wa pepra kouami keca, er sida jelai sekrapidi, kipra derinmai taru depi.

10 Uda ange yuma konum kupi pangeda, Aya er mi Rizpa, er mali opkal bol, karung goni peramenge utopunge, er cap, er nyapu pamubari sun nong gemna derina tep nengeda, ila pala gel deiki deipudi, er nyapu pamubari konum popmainge, aopkal bol deiki deipu. Er peda aopkal bol deiki buku. Apopi neng sun gemna dopra, lelipra deipu. Rizpa aceida, pio men tapra beu. Atara neitamaipu, dou gonga kepra mamu taru di dipdongopra, sun wa kouami keca kin taru li yuma cap, tonda mo douryakan li taru cap, akeca sangdon taru li capda, Rizpada yukai men beu. Aneng sun poptapmai nong kalengnapu kuramu.

Ange utopu, ataru neitamai yumada, Rizpadi im alau tara lakra embaramre ma yala-yala yuma capda, ‘Ne nyapu sun gemna tu yana jepnung’ tenen, pio kalengnapu kuramu. Ada keteng komuni tali tapnepa, sun aneng gemna tali men jerami. Utopu ton, ‘Tali bura tara dakuramre yu kecadi, lukunda neitamai yangedi, sun aneng gemna ton jepnung’ tenen, pio kalengamudi, men tamamu. Pio acapu kalekra kuramu.

11 Ukuramupa, yuk nengdi Raja Daud damai pepi. “Saul er tali pel dona ner dinin, erdi domu ner Rizpa, er Sauldi deiamupa, dadeipdanen yakaramyanen, yana ngangtan bari deiamu neng, sun poptapmai nong (gemna) tep kunmaunge yumada, ‘Ma cap, tali keca cap jeprur’ tenen, pio kalengrure,” pepipa, Raja Dauddi gekepu. 12 Upepipa, Raja Daud gekepu dingeda, adipapu sepdaro, menop taru peiami neng, Saul er yoka cap, Yonatan er yoka cap, Yabesh mutu dinin, Gilead mutu neng kuramyai bena dorbeu. (Sun anengdi ayoka yumada, Bet-San ati arum neitamai di konum upula dopromi.

Ada, sun Filistin nengdi, Gilboa mutu dupai di, Raja Saul popidi, er poptapi nong (gemna) cap, Yonatan er gemna cap deripkotemyaida, konum Gilboa mutu dupai, Raja Saul konum popi. Popidi, sun gemna dopra, amutu Bet-San ati arum neitamai gel beilya deiki koupdongopra deiami.) Dauddi, ayoka yuma acei di dopropu. 13 Nimi deiyo ngebo Raja Dauddi, Saul cap, Yonatan cap, sun yoka Yabesh mutu dinin Gilead tara neitamai di doupra yau. Ukupu dingeda, Daud erdi sun co deiki deripkotemipa, depi ngangtan bari neng, sun yoka yuma peda, Raja Dauddi bulupra deipu.

14 Ange konum kupu dingeda, nimi deiyo ngebo Raja Daud, erdi Saul cap, Yonatan cap, sun yokada, Raja Dauddi ngangtan bari neng co deiki gerekra deripkotemu neng, sun yoka cap, kikiman wisipra tu palipu. Ada, sun Benyamin yala nesaladi talepra kurami mutu neitamai dinin, sun tu sida, Zela tara, ada Saul er nai bo Kishdi paliami tu pumbonpu, bena dongopra aneng sun yoka yumada palipu. Raja Dauddi, “Ukupkamnerume,” pepra deiamutopu, er pel melimna nengdi angepu konum kupi. Ange yuma konum kupi dingeda, Allahdi sun amutu neitamai kurami nesala yumadi, sun putaramupa, mororami ngeda, “Nun nai Allah melipseo,” pepra, mororami upu konum gekepudi, meliamnga deiki di, amutuda kange di ton cap telep kupra deipu.

Filistin mutu neitamai taleami dinin, animi deiyo neng popbisipi upu

15 Uda, sun Filistin yala nengdi, Israel yala nesala tep, ‘Mar popbenkamepe,’ pepra gonga kepra, podarami. Ukudarami taruda, Raja Daud er jen talena neng cap, Filistin neng porbana tep bei. Apodarbei taruda, nimi deiyo ngebo Raja Daudda, konum wisi deipka cadi, puto boun kupu. 16 Ukupu taruda, ila lyom cap, puto weik cap kurami nesala, anengdi deipipa, dadeipdanen yakarami nesala kankan neitamai di, tenpu ngebo deiyo tenpu ngebo, er sida Yisbi-Benob yau. Ayau ngebo, er nimi pona tep lyom takke co utopu keca, er si tombak tembaga deiki di deipra domnga, er ikinda weneri cap, ton neitamainge cap, 3.5 kilogram utopu kuamu. Ataruda, Yisbi-Benob peda ukupu tema yu pio weiknge cap doupra yau. Ada, ‘Nimi deiyo ngebo Raja Daud popkamne’ tenen, yu tema ton, ukupunge doupra yau.

17 Dinino, Zeruya er mi Abisaidi, ‘Raja Daud tep melipkamne’ tenen, Raja Daud tep, yana melipu. Ayanmaudi, ‘Raja Daud tep popkaman’ tenen yanmau ngebo, ila lyom cap, puto weik cap kuramu ngeboda, Abisaidi popu. Ange konum kupu dingeda, Raja Daud er jen talen neng yumadi, Daud tep moropi. Ada, nun ukutaruda, mar podarbanaida, kan ton men melipra bankamepe. Deiyoda, ake. Ada, “Nun nimi deiyo ngebo, nun podan mutu nengdi, kan tep popkengopda, ila mambul kange doupra kunkamepe. Kan depmem pangeda, kandi deipmempa, dadeipdanen, yakankameng nengdi, gum kupsengopda, kan yala nengdi, nun Raja men kupkamtenge. Kan tep popmengopda, ada Israel nesala, kunup mutu neitamai, kanda tenpu ila dirin keca, weica utopu kurema cadi, ange kaptupanen, angepu gum kuptuopda, nunda ware kuptepe do? ‘Kunungna neitamai utopu kupserur’ tenen, pepkepe,” Israel jen talena nengdi, Raja Daud tep, upepra deipi.

18 Amenda taru ton, mar porbana ton deiyo kupra, sun Filistin nengdi, ‘Israel nesala tep porbenkamep’ tenen, Gob mutu podarbei. Apodarbei taruda, Husa mutu ngebo er si Sibkai, erdi nimi tenpu, nong ila lyom ngebo er sida, Saf popu. Safda, menop taru ila-ila lyom nong neng, raksasa perami neng kurami taru, sundi deipipa, dadeipdanen yakarami neng, metek kupbaramipa, gum kupmanto kurami dinin, erda, sun yala nengdi deipnepa deipdanen yakarami ngebo kuramu.

19 Yuk taruda, mar podarbanaida, sun Israel neng cap, Filistin neng cap, kange di ton cap Gob mutu pordarami. Aporbei taruda, tenpu ngebo er si Yair, erdi deiamu ngebo Elhanan, erda Betlehem mutu ngebodi, Gat mutu ngebo er si Goliat popu. Tonda angebo Goliatda, ^{▼▼Goliat – Angebo Goliatda, Raja Daudda, kaber ngebo kuramu taruda, nimi si Goliat ton pomu. Ataruda, Elhanan popu ngeboda, yuk ngebo tenenupe. Dinino, sun sida utoto pua. Ada, sun buteneda, du ngebo cap, weit bo cap, kuramreiya tep do? Agum dingeda, sun butene nengda, nong ila lyom cap, nong pio puto weik cap kuramreiya tep, asi tenpu ngepu si perami do? Nun yambul walwale. Tonda, 1 Tawarikh 20:5 deiki di, “Elhanandi Goliat er weit bo popu,” seki. Tonda, 1 Samuel 17 deiki di, “Dauddi, Goliat popu,” seki. Nun kangeda, Dauddi dubo popu, Elhanandi weit bo popu, tenepmepe.} puto weik cap, nong lyom weik cap kuramu ngebo, raksasa perameng neng utopu kwamu ngebo cadi, er nimi pona tep takke betaipu coda, ila ikin weik co di betapra deipudi taleamu.

20 Amenda taru ton, Israel nengdi, Gat mutu neitamai podarbana ton gonga kepra bei. Ukupi taruda, amutu neitamai nong ila lyom ngebo ton, raksasa perami neng, sun ayala nengdi deiami ngeboda, Gat mutu kuramu. Angebo er buru yumada, buru dana-dana tara ngantan bari (6) di kuamu. Utopu, angebo er yan du yuma peda, dana-dana tara ngantan bari (6) yan du kuamu ngebo kuramu. Er buru du cap, yan du capda, nukra 24 kwamu. Angebo peda, sun menop taru kurami neng ila lyom nong cap, ila puto cap kurami. Sun anengda, raksasa perami. Anengdi deiamipa, dadeipdanen yakarami nengdi, angebo ton deipipa, Gat mutu kuramu. 21 Ukuamu ngebo, erda Filistin ngebo cadi, sun Israel yala nesala yuma tep, mali nenemamudi peramu. Uperamunge tep nengeda, Daud er weit bo, er sida Simea, ^{▼▼Simea – Angeboda, er si tep nengeda, Simea perami. Tonda, yuk Allah upu buku neitamaida (1 Samuel 16:9), angebopu dinin, er si tep nengeda, ‘Shama’ seki. Dinino, angebo er tenpua.} erdi deiamu ngebo Yonatan, erdi aFilistin mutu ila nong cap, puto weik cap kuramu ngebo popu. 22 Nimi deiyo ngebo Raja Daud cap, er nyapu jen talena neng yuma capdi, sun nong ila lyom cap, puto weik cap kurami neng, raksasa yala nengdi deiami neng, dumbari nengda, popi. Adumbari popi neng yumada, sunda raksasa perami neng cadi, ayala nengdi deipipa, deipdanen yakaramya, Gat mutu yana kurami neng popi.