2 Samuel 23

Raja Dauddi upu sirya akonum pepu upu

1Dauddi upu sirya pepu upu ake.

Ada Isai er mi Dauddi pepu upu. Akeca-keca yuma deiki tara kure ngebo, ila puto ngebo Allahdi, ‘Angeboda Raja nimi deiyo ngebo kunkamre’ tenen, weipra deipu ngebo Daud. Pumun taru kuramu ngebo Yakub tep, Allahdi bicau tenepra pio meliamupa, Yakubdi Allah er si eremamu. Allahdi, Daud tep wepra deipu. Daudda, Israel yala ngebodi, Israel nesala yuma sun gekena tep, mut weika di eremamudi peramu. Dauddi aupu pepra deipu.

2Allah er si Yahweh, er Lek Sambalada, ne dipru neitamai di upu telep kupra peipneupa, adeiki di yuk neng sun gekena tep lap peramsi. Ada, Allah er Lek Sambaladi, ne dipru neitamai peipneu upuda, ne lyemu deiki di peramsi. 3Allahdi Israel nesala tep, bicau tenepra meliamu ngebodi, ne tep peipneu. Ada, mutu yangne gel lelimdongoramsertopu, Allahdi Israel nesala tep pio melipra kalengamu. Erdi peipneu. “Ware ngebo do, Allah tep kware kurya deiki di, nimi talena deiyo ngebo kemna tep, mali kuna gum dipapu, pio dumsisi kuramredi, Raja kure ngeboda ukurure.

4Ange utopu kure ngeboda, dua gum tumi, keteng tengyaredi, deipre taruda, dirine telep kuramre utopu kurure. Tonda, angeboda mo ceprepa, betei paramrepa, amenda keteng dirin deriramrepa, urasin telep kuramretopu kurure. ARaja ngebodi, Allah tep kware kuprepa, nimi talepyopda, anesalada kange derinunge. Ada keteng tengyaredi dirin deprepa, nimidi kange derinunga utopu kurure.” Allahdi ne Daud tep upepneu, pepu. Upepu dingeda, Dauddi aupu ton pepu.

5“Tenipetepso. Nedi deipsipa dadeipdana yakarami neng, ne yala nesalada, Allahdi sun tep, ‘Telepe,’ tenepra kange men derirur do? Sun kaele, Allahdi ne tep, “Ukupkamsene,” pepra pedina upu pediramneu upuda men tapkamre, pio akunkamre. Allahdi, ‘Ukunkamne,’ teneramneunge yumada, tenpunge peda men tapkamre. Erdi tenepneunge yuma, tek sisi ne cap, ne yala nesala cap tep ukupkamsere. Ange utopu, erdi lyepkamnere ngeda, tek sisi kupkamre. Tonda ne putaramner keca yumada, erdi tenpunge peda men tapredi, yuma karepkamnere. Pediramneunge yumada men tapkamre, ange yuma konum ketenepra karepkamnere.” Raja Dauddi pepu.

6Upepudi, aupu ton dukdongopra pepu. “Dinino Allah tep, ‘Nun songe,’ tenepmengedi, mali weik kunge nesala tep nengeda, nimidi takke keca sun buru di talena gum, akecada ya di sekra bura tara dokotemamengtopu, Allahdi mali kunge neng tapra bura dokotepkamre. 7Takke weik kecada, nimidi pio men talepmanto cadi, co takke di do, besi keca di do, lyumuprapmengedi aca deiptapmengaipu uku dongonunge. Ukuramengtopu pio mali kunge nesalada, Allahdi sun mali kunge nesala tapra, uku dongoprepa ukudi jepra gawal dakamre.” Raja Dauddi aupu pepu.

Raja Daud er melimna tep, puto weik jen neng kuramipa, nimi yumadi gispal dorami neng tep, seki upu

8Ange sekup ngeda, Israel nesala talepra, ila nimi deiyo ngebo Raja Daud, er ila puto kurami jen talena neng, sunda kwar tenena gum neng kurami. Sun sida ake. Menmena ngeboda, Hakmoni mutu ngebo er sida, Ishabal kuramu. Erda, sun ataru nengdi perami neng, weneri puto jen talena neng tep, “Gung Weneri Neng,” perami ngeda, (Triwira) er dipapu gonga kemne ngebo kuramu. Er angeboda, tenpu mar podarban taru ton, er angebo er tenpu dipapu pomunge dengeda, pio weik delapan ratus (800) neng pomu. Tonda, sun apopu nesala yumadi, ila lyom gel di taplakra wiami gel beilya peda, gum kupra deiamu.

9Jen talena ngebo, butene ngeboda, ‘Gung weneri’ ngeda, Ahohidi deiamu ngebo er si Dodo, erdi deipu ngebo er sida, Eliasar kuramu. Angebo Eliasarda, Raja Daud melipupa, sun Filistin nesaladi, ‘Israel nesala tep mar podarbenkamep’ tenen, bulupra wekmaiyai, sun aneng berei. Ukuprei taruda, sun Israel jen talen neng yumada, kware kupupa, adipapu gopropi dinin, Eliasarda, kware gum dipapu, acapu tekudi, Filistin neng popbisipu.

10Eliasar tupa pio, ‘Filistin neng yumada, popkamne’ tenen, pirinapu kuramupanen, ataruda er nong yumada, puto boun kupu. Eliasar er yu tema buru deiki di douamunge yumada, er buru teia deipudi, adouamu keca yumada, pio men tapmanto kupudi, er buru yuma getepnapu kupu. Ukuamupanen, tenpu tumida, Allah Yahwehdi, sun Israel yala nesala yuma tep, ila pon keca sun deiki deipu. Ukupu taruda, Israel yala nesala, sun jen talen neng yumada, arup taru di tamupra benmai nesalada, Eliasar er Filistin neng ponmauaipu tamupra yai. Yai dingeda, sun Filistin neng popmaipa depyada, sun jen talena nengdi talerami keca yumada, ‘Nun mawa keca’ tenen, yana dalupra dopropi.

11“Gung weneri neng,” peramenge neitamai dinin, weneri ngeboda, nimi si Age, erdi deiamu ngebo, er si Shama. Shamada, Harari mutu ngebo kuramu. Uda, sun Filistin neng buluprapidi, Lehi mutu neitamai wengbanmai taruda, tenpu dang du binge, er si kacang merah wa peamyaida, weika di dinikamo. Awai damda, sun Filistin nengdi, ‘Acacang mera upula dopropkamep’ tenen, piripetepipa, Israel yala nesala cap, mar podanmaipa, Israel neng yumada, ‘Filistin nengdi popsenung’ tenen, kware kupupa, sun Filistin neng damai di gopdapeprapidi, sepra bendopi. 12Sun Israel yala jen talena neng, weik tara ngeda, sepdara benmai dinino, ataruda angebo Shama erpuda, awa neitamaipu tekrapudi, mar pio podanapu kunmau. Ukuramnganen, Shamadi sun Filistin neng yuma, awaidam neitamai kunmai nesala yumada poptapu. Popu dingeda, awaidam yumada, popra gawal dakudi, erpu talepu. Ukupra Shamadi popupa, Allah Yahwehdi ila porbisina deiyo kecada, angebo deiki dopra deipupa, erdi sun podan neng yumada, popra gawal daku.

13– 14Ange utopu, yuk ukupunge yupra kin taru li kupne pangeda, nimida weneri neng dinin, sunda ila deiyo neng kurami. Nimi deiyo ngebo Raja Daud, er jen talena nengda, denge tiga puluh (30) ila puto neng cap, tonda kware tenena pio gum neng capda, ‘Nun nai Daud damai benkamepe,’ tenen, pio menmena di, mutu si Adulam mutu gel imir damai di kwerepi. Ila nimi deiyo ngebo Raja Daud, erda agel imir pumbon, nimidi men popmantoai, pio telepai kunmau.

Uda, ataru puda, sun Filistin neng sun opkal bol di dopra deipi tenda atida, Refaim mutu banai bena dopra kunmai. Sun Filistin jen talen neng yuma kuramya deiyoida, Betlehem mutu neitamai apu kurami. 15Dinino, Raja Dauddi er deiami mutu tep, tupa pio tenenapu kuramudi, erdi uperamu, “Uo, Betlehem mutu bisi buplan damai, pio telep bunkon me deipudi embare meda, nimidi ton gwepra karepnetengepa, jeptenyopda, kange deiptene,’ tenenune!” pepu.

16Upepu pangeda, sun ila deiyo neng, denge 30 deiyo neng kankan di, sun puto weik neng, sun weneri nengda, sun deiyo ngebo Raja Dauddi penmau upu yumada, upu pena gum dipapu moupra gekepi. Dinino, ataru dipapu, aweneri nengdi, sun Filistin jen talena neng bisi bon kalengna tep, kunmai tara di kepra bei. Sun weneri nengdi bei dingeda, apenmau bunkon damai di, me gwepra tamupra, Daud damai duyai. Uda, ame konum gwepra duyai dinino, Raja Dauddi, ‘Gume ame men jepkune,’ tenepu. Utenepka tep nengeda, Raja Dauddi, ‘Ameda, ne nai bo Allah Yahweh, er gispal donange tep, karepkune,’ tenepudi, Allah er si eremna tep, ame tu deiki diktapu.

17Ame diktapu dingeda, nimi deiyo ngebo Raja Dauddi pepu, “Teka ne nai Allah Yahwehdi, ‘Ame men jeptume,’ pepra deipnetua utopu, tek sisi pepne. Ameda tek sisi nedi men jepkune! Nedi ame dopra jepnyopda, ukupmantonge pepkune. Ada, sundi, ‘Nun nai Daud melimna tep, ormutu bepepa, Filistin nengdi popsengopda, telepe pua,’ tenepmang neng tep, ukupmanto upu pepkune. Ada, ‘Yu nengdi, aweneri neng poptengepa, sun yapi sakyopda, ada sun yapi dopra jena utopu kuna tep, ange pio men kupkune,’ tenepudi pepu.” Atep nimi deiyo ngebo Raja Dauddi ameda pio men jepu. Angeda, sun gung weneringe, ila puto neng cap, kware tenena gum neng cap, kupmainge tep, tenepudi ame tapu.

18Ange utopu, sun jen neng kware tenena pio gum neng, sun si tep nengeda, “Nimi gung dengeda, tiga puluh deiyo-deiyo neng,” perami. Uda Yoab er weit bo, er si Zeruya, erdi deiamu ngebo, Abisaida, agung tiga puluh deiyo nengda, erdi gonga kepropudi, sun deiyo ngebo kuramu. Ukupu dingeda, pumun taru di Abisaida sun podan neng, nimi denge pio weik, tiga ratus neng (300) ton pomu. Ange ukuamnga tep nengeda, Abisai er si tep, amutu kurami neng yumadi konum kael keami. 19Akupunge tep, ataru kurami nengdi, er si kael keamidi, agungda, 30 neng ton akurami dinin, er tepapu, ‘Uo, erda ila mambul ngebo,’ teneramidi, er si weika di, gispal dorami. Tonda, agung 30 neng tep, sun deiyo ngebo kuna tep, erdi gonga kepra deiyo ngebo kuramu. Dinino, ataru nesaladi, ‘Ila puto weik cap, kware tenena gum cap kunge deiyo nengda, “Gung weneringe,” perami nengda, er Abisaida, sun puto kuramengetopu ngeda, pio men kuramu,’ tenerami.

20Yuk jen ngebo ton, er si Yoyada. Erdi deiamu ngebo, er si Benaya kuramu. Erda Kabzeel mutu ngebo kuramu. Er angeboda, kware tenena pio gum ngebo kuramu. Ukuramnga cadi, ila puto ngebo kuramudi mambul weik pel doramu. Ukuramu taru, angebodi Moab neng ila neng butene pomu. Apomu neng buteneda, sun nai bo er si Ariel kuramu. Tonda, angebo Benayada, ton taruda im neitamai di, pio bul keca, er si salju saku. Atumida, Benaya erda adipapu tenpu mutu tu pumbon neitamai wekudi, atu pumbon wekrou taruda, yu keca, er si singa tenpu ton akupmaupa, erdi popu. 21Tonda, angebopu dinin, yuk taru peda, Benayadi Mesir mutu neng kankan, ila puto weik ngebo ton popu. Ada, kware tenena pio gum di, er nimi pona tep taleamu co, lupra douamu keca er sida tombak, douamu ngebo tep, Benayadi, aMesir ngebo damai yau dingeda, er maca dipapu talepra yau. AMesir ngebo er buru deiki di douamu ila nimi pon co, tombak jenda, Benayadi adipapu dalupra dopropu. Atombak dopropu dingeda, aMesir puto weik ngebo, adipapu poptapu. Mesir ngebo er mening tombak dipapu poptapu.

22Angeda Yoyada er mi Benayadi kupunge asekmape. Benayada, ila mambul keca doamunge tep nengeda, amutu kurami nesaladi, er si ton kael keami dinin, erda, sun “Gung Weneri Neng,” perami neng si tep, gispal doramitopu, er Benaya tep nengeda, utopu gispal men dorami. 23Dinino, Sun agung tiga puluh (30) kurami jen talena neng kan-kanda, er Benaya, puto weik pel doramnga cadi, er si ton kael keamidi, er tep gispal dorami. Ukupu dinino, er tep nengeda, “Erda sun Gung Weneri Neng kurami utopu gume. Erda sun utopu ngebo men kurure,” perami. Dinino, pio telep kupu pangeda, nimi deiyo ngebo Raja Dauddi, ‘Ne pe nong kalengnenge jen talena neng, sun deiyo ngebo kunkamre’ tenen, Benayada erepra deipupa, ila ngebo kepra kuramu.

24Sun amutu nesaladi, “Sunda gung tiga puluh (30) neng,” perami nengda, sun sida ake. Ada, Yoab er weit bo Asael, tonda, Dodo er mi Elhanan Betlehem mutu ngebo, tonda, 25Herob mutu neng sun si Sama cap, Elika cap, 26Tonda, Palti mutu ngebo Heles cap, Tekoa mutu ngebo Ikes, erdi deipu mi Ira cap, 27Tonda, Anatot mutu ngebo Abiezer cap, tonda, Husa mutu ngebo Mebunai cap, 28Ahohi mutu ngebo Zalmonda cap, Netofa mutu ngebo Maharai cap, 29Netofa mutu ngebo Baana, er mi Heleb cap, Ribai er mi Itaida, Gibea mutu ngebo dinin, Benyamin yala ngebo cap, 30Piraton mutu ngebo Benaya cap, ila mutu bukamngai Gaas mutu ngebo Hidai cap kurami.

31Tonda, Beet-Araba mutu ngebo Abialbon cap, Bahurim mutu ngebo Asamawet cap, 32Saalbon mutu ngebo Elyahba cap, Guni mutu ngebo Yasyen cap, 33Harari mutu ngebo Sama, erdi deipu mi Yonatan cap, tonda Harari mutu ngebo Sarar, er mi Ahiam cap, 34Maakha mutu ngebo Ahasbai, erdi deipu mi Elifelet cap, Gilo mutu ngebo Ahitofel, erdi deipu mi Eliam cap, 35Karmel mutu ngebo Hezrai cap, Arbi mutu ngebo Paerai cap kurami.

36Tonda, Zoba mutu ngebo Natan, erdi deipu mi Yigal cap, Gat yala ngebo Bani cap, 37Amon yala ngebo Zelek cap, Beerot mutu ngebo Nahari, erda Zeruya er mi Yoabda, er nimi porbana tep, gat opkal kenengamunge doupra embana ngebo kuramu. 38Tonda, Yetri mutu ngebo Ira cap, Yetri mutu ngebo Gareb cap, 39Het mutu ngebo Uria capda, akonuma. Sun ajen talen neng sun denge yumada, tiga puluh tujuh (37) nengpu kurami. Sun ajen talena neng yumada, “Gung Tiga Puluh” (30) perami neng, puto weik neng kuramipa, sun tep gispal dorami.