2 Samuel 24

Dauddi nimi si sengna pel dopka tep, seki upu

1Allah Yahwehdi sun Israel yala nesala tep, mali kange doupudi, yu tenepu. Yu tenepu dingeda, Allahdi, ‘Israel nesala, sun deiki kange mum keca karepnepa, ikin kupkamre,’ tenepudi, Raja Daud tep, “Kandi, Israel yala nesala yuma cap, Yehuda yala nesala yuma capda, sunda ware kupra nesala kunung do?’ tenena tep, sun nukmemdi, sun si sekamrume,” pepra deipu. 2Upepupa, Raja Dauddi er jen talena neng, sun ila deiyo panglima ngebo, er si Yoab cap, er amutara jen talena neng tep, sun deiyo-deiyo talepra kurami neng yuma cap tep pepu. “Ukutaruda, sun yumadi Israel yala nesala sun kunung mutu neitamai yumada, sun si sengbenkurume.

Ada, pio itara kure ati arum si, Dan mutu di nukbememdi, adinin dipra dukdongopra, pio sirikai utamnapu dopra kunge ati arum si, Beer-Sheba mutu neitamai yumada, dakunge Israel nesala yala-yala yumada, nukbememdi, lap pepnemempa, nedi sun dengeda kael kepkamna tep, si sekra nungbenkurume,” pepra, Raja Dauddi Yoab tep pepu. 3Dinino, Yoab erdi er deiyo ngebo Raja Daud tep pepu. “Naio, ne tek sisi putapmanerpa pepkun upuda, tek sisi upupu pepkukene. Ada, Allah Yahwehdi, sun Israel nesala weike kunung dinin, amutu-amutu neitamai yumada, Israel nesala dengeda seratus kali lipat di, ton cap tapakra karenkamkere. Tonda nedi tenepmanada, ne deiyo ngebo Raja Daud, kan tupa gampu kumemnyopda, nimi pio weik kunkamengai yumada, kan dipapu dinkamreme. Dinino, naie, ware deiyo keca tep, kandi, ‘Nimi si sekamne,’ tenenmarem do?” Yoabdi pepu.

4Upepu dinino, Yoab adipapu, er deiyo ngebo Raja Dauddi pepmautopu kupu. Atep Yoab cap, er amutara dinin, yuk jen talena neng, sun deiyo-deiyo neng yumadi, Raja Daud kunmauai di, bura tara benmaidi, ‘Sun Israel yala nesala denge ware kupra kunung do?’ tenen, sun kurami mutu yuma nungbei. 5Sundi nungbenmai taruda, Yordan me goupra, ortara keteng yakan tara konum bei dingeda, Yoab cap, er melimna neng cap yuma, sun benmai mutuda, Gat yala nesaladi dopropi tara dinin, ila ban mutu neitamaida, akati arum sida, Aroer mutu iknapi tara bena nungmai. Adininda, itara bisi nungbenmaidi, Gat mutu neitamai dinin, ila ati arum ton doraminge, bena Yaezer mutu damai nungbei.

6Adinin dipdongopra, itara bisi benmaiyanen, Gilead mutu bei dingeda, Kades ila ati arum damai bei. Amutu neitamaida, sun Het yala neng kurami mutu nungbei. Amutu bei dingeda, Yoab cap, er jen neng, sun deiyo-deiyo neng yuma cap, itara ton ila ati arum sida, Dan mutu ton bei. Dan mutu nungbei dingeda, adinin dipra ortara, keteng dangban tara mutu ton keproi. Nungbenmaiyanen, ortara mutu sida, Sidon mutu damai nungbei.

7Amutu bei dingeda, Yoab cap, jen talen neng sun deiyo-deiyo neng yuma capda itara mutu di dipdongopra, utara mutu ton nungbenmaiyanen, utara Tirus mutu neitamai ton nungbei. Tirus ila ati arum dana-dana tara yumada, pala weik gel dopra, taplakra wiami ila lyom gel beilya ton deipra wiami mutu kwamu. Amutu di dipdongopra, nukra banmaiyanen, sun Hewi yala neng cap, sun kanaan yala nesala cap, kurami mutu bena wekidi nuki. Tonda, amutu di dipdongopra, utara ton nungbei. Ada, pio utara nungbenmaiyanen, yambula di keteng yakan tara di domi ila ati arum si, Bersyeba mutu ton nungbei. Ada pio utara nungbenmaiyanen, mutu si Yehuda tara mutu nungbei. 8Yoab cap, jen neng sun deiyo-deiyo neng yuma capda, amutu neitamai embarami taruda, ware sembilan (9 bulan) neitamai yuma nukembanapu kurami. Tonda, tapakra nungbenami tumida, dua puluh (20) tumi deiki di embaramidi nukembarami. Amutu neitamai konum yuma embaramyanen, Israel nesala yuma konum nukra sengpepi dingeda, kange di tamupra itara bisipu tamupra beidi, ila ati arum Yerusalem mutu bei.

9Ukupi dingeda, amutu-amutu neitamai embarami taru, nimi nukra si sengaminge yumada, sun deiyo ngebo Raja Daud, er damai lap perbei. Sun Israel yala nesala nimi jen neng kepmanto neng dengeda, pio weik delapan ratus ribu (800.000) neng kurami. Tonda, Yehuda tara kurami neng, ada jen neng kepmanto neng sun dengeda, pio weik, lima ratus ribu (500.000) neng kuramipa, nukidi, ange yuma doupra lap peryaipa, Raja Dauddi gekepu.

Raja Dauddi Israel nesala yuma nukupa, Allahdi mali kange doupka tep, seki upu

10Raja Dauddi peipupa, er jen nengdi, Israel yala neng kurami mutu neitamai yumada, nungbenamidi, Israel yala nesala yuma konum nukra sengpepidi, gawal daki pangeda, tenpu lukunda neitamaida, Dauddi, ‘Uo neda konum mali kupmane. Ware deiyo keca tep ange kupmasi do?’ tenepudi, mambul kange doupu. Utenepu dingeda, Raja Dauddi Allah Yahweh tep pepu. “Uo, ne naio. Ne kupman ngeda, tek sisi mali-mali kweipdasi. Ange tep nengeda, naio, kandi ne walwal deiki di mali kupsinge tep, kaukepneo, naio,” pepra moropu. 11Upepra moropudi, mapmaua, bereku pangeda, atumi ipna sisa di, Allah Yahwehda er upu peipnepa lap pena deiyo ngebo nabi Gat tep, upu pepu. Angeboda, Daud tep amenda kupkamu keca lap pena pel doramu. Apel doramnga cadi, Allahdi er sinabi Gat tep yana pepu.

12“Kanda, Raja Daud er damai bememdi, pepkurume. Ada, nedi er wenemna tep, ukupmanto weneri ikin keca ton kareptene. Atep Raja Daud tenepredi, er dipapu wepkamrengepu, nedi er nong deiki deipkamne.” Allahdi nabi Gat tep pepu. Uda, ambutumi ipnada, Raja Daud mapmaua konum bukrou. 13Atep, nabi Gat adipapu Raja Daud er damai yau dingeda, Allah Yahwehdi pepra deipmau upu yana lap pepu. Ada, upepu. “Nedi lap pepkuken upu neitamaida, ne deiyo ngebo Raja Daud, kandi dan nge wepkurem do? Ange tenipkurume.

Tenpu ngeda, ake. Amutu neitamaida, keteng tamun denge weneri keteng tamun deiki di, Allahdi ila jen putana deiyo keca karepkamre. Ange gum dingeda, Raja Daud kan mar pekenung nengdi, ‘Daud popkup’ tenen, kan tep domyakengepa, ware weneri deiki di gopra benkamrem do? Agum dingeda, kan kurum mutu neitamaida, ila kange mun pu yala deiyo keca, Allahdi karepre pangeda, weneri tumi deiki di, amutu nesala jenkamre do? Kandi menmena tenepetepmemdi, wepra anupmempanen, nedi Allah Yahweh damai bena lap pepkamne,” nabi Gatdi Raja Daud tep pepu.

14Upepupa, Raja Daud erdi tamupra pepu. “Uo! Angeda ne pio kange mun tepa! Dinino, ne kangeda, nimidi ne ikin keca derinada, ne dabale. Atep, ne kangeda, pio telep ngeda, Allah Yahwehdi nun Israel yala nesala yuma kunup mutu cap, ne cap, ikin keca deipsetue. Deiyoda, nun nai bo Allah Yahweh er dipapu pio ila di bicau teneramseue. Dinino, ila kange mun ngeda, nun podan nengdi, nun Israel nesala tep, ila yu di popsenunga tepa. Nimidi nun tep, bicau men tenesenunge.” Dauddi pepu.

15Raja Dauddi ange wepra pepka tep nengeda, Allah Yahwehdi, ila kange mun pu yala deiyo keca dopra, sun Israel yala nesala kurami mutu neitamai yuma, atumi ipna taru di gonga kepra, Allah Yahwehdi teneamu taru utopu, tek sisi kupu. Ange kupu taruda, aila kange mun pu jeramupanen, sun Israel yala nesala kurami mutu neng yuma depya dengeda, tujuh puluh ribu (70.000) neng depi. Ada iknapi tara, Dan mutu di dipdongopra, dutara kwamu ila ati arum si, Beer-Sheba mutu, daneitamai yumada, nimi weik depi.

16Dinino, Allah Yahweh, er im deiki pel melipra don ngebo Malaikatdi, ila kange mun pu yala, deiyo keca karena cap, tonda ‘Nimi depkameng’ tenen karena cap, ataruda, ‘Sun Yerusalem mutu ati arum neitamai kurami neng yumada, popra gum kupra deipkun,’ tenepudi, keteneipunge yuma, Allah Yahwehdi dinmaupa konum epu. Epka tep, Allah Yahwehdi amalaikat tep, “Gume, yapkurume. Adipapu ukuna gume,” pepra, upu sekrou. Ada, Allahdi, ‘Amutu neitamai kunge nesala yumada, konum gum kupra deipkamane,’ tenepmau kange yumada, adipapu tapu. Ukupudi, amalaikat tep pepu, “Akonuma, aceipu deipkurume pepu!” Allahdi aupu peipu taruda, nimi pona deiyo malaikatda, konum Yebus mutu ngebo, er si Arauna, er kuramngai dinin, sun kouami keca gandum du dopra, bol kortamamyai damai yau taruda, adipapu yaprou.

17Nimi deiyo ngebo Raja Dauddi, sun Israel yala nesala yuma pona tep yakanmau malaikat epu. Epu dingeda, Raja Dauddi Allah Yahweh tep pepu. “Uo, ne naio, ne tenpu dipapu ila mali kun keca kupsi. Mali kuna deiyo ngeboda, nepka. Ne dipapu konum ila mali kupsi. Dinino, ne nai, sun amutu kunge nesala yumada, ware mali keca ton kurami do? Atep nengeda naio, ne cap, ne nyapsilip cap, ne naidi deiamupa, dadeipdanen yakarami neng yumapu, ikin kecada, nun nong deikipu deipkuserume,” pepra moropu. 18Atumida, nabi Gat adipapu, Raja Daud er damai yaudi pepu. “Raja Daud, kan adipapu angebo Arauna, erdi gandum wa pepra koupupa, konum wisipupa, er bol komopra tamre du dororyaipu, welepkurume. Ukupmemdi, aceipu bena, Allah Yahweh er si eremna cap, er tep gispal dona tepai, gel pala di yakra deipmemdi, mesba betapra dopkurume.

19Atep ataruda, nimi deiyo ngebo Raja Daud, Allah Yahwehdi, “Ukupkurume,” pepra, deipmaupa, nabi Gat erdi upu doupra peryanmautopu, Raja Dauddi konum bena kupu. 20Daud cap, er melimna neng cap, sundi gandum du bol komopra tamamyai bei taruda, amutu taleamu ngebo, Arauna er urasinda, utara dinmau tara di, nimi deiyo ngebo Raja Daud, er amutara pel don neng cap yakanmaiyanen, Arauna er damai yakanmaipa epu. Epu dingeda, Arauna er adipapu, er gutam tu dipdongopra, er urasin geneprapudi, er nong yuma tu deiki mapudi, Raja Daud yakanmau tara deipu.

21Ukupudi Arauna adipapu Daud tep asipetepu, “Nimi deiyo ngebo Raja Daud, kanda ware keca deiyo tep, acei yakanmarem do?” pepra asipetepu. Upepupa, Raja Dauddi tamupra pepu, “Ne acei yanmana deiyoda, gandum du derina tep, yakra deipmengedi, bol komoramengaida, ‘Atu kunupkaman’ tenen, yakanmane,” pepu. “Ange kunupne dingeda, ne adipapu Allah Yahweh er si eremna cap, gispal dona cap tep keca, mesba gel taplakra yakeipnedi dopkamne. Ukupnepa, ila pu yala deiyo keca puda, adipapu dim pepkamre,” pepu.

22Upepupa, Araunadi aupu pepu, “Gume Raja Daud, kanda gandum pel aca donupai tuda, kunumna gume, tali dopropkurume. Ada, Raja Daud kandi, ‘Telepe,’ tenepmem ngepu, adipapu dopropmemdi, Allah Yahweh er si erepmemdi, dopra karepkurume. Atep, ‘Amutu akwapmare sapi bisamda, karepkenyopda, poprapmemdi uku dongopkuruma’ tenen, nedi tali karepkene. Kandi Allah tep uku dongopkamrume. Tonda, ne deiyo ngebo Raja, uku dongon co tep nengeda, agandum du dekana tep keteneipmepu co lase papan cap, sapi bisam kum deiki derinup ikin co cap, akeca yumada, akupmar ngepu dopra, uku sekmemdi, asapi bisam popra dapmemdi, Allah Yahweh tep gispal dopmemdi, er si ereptume. 23Ne Araunadi ange-ange yumada, dopra nimi deiyo ngebo Raja Daud kan tepapu karepkene. Ada, nun nai bo Allah Yahweh tep, kandi karepkamremnge yuma tep nengeda, Raja kan tepapu ila di kange pio deipkamkere. ‘Allahdi kange deipkamker’ tenen, moropkene,” Araunadi pepu.

24Upepu dinino, nimi deiyo ngebo Raja Daud erdi tamupra pepu, “Angeda pio gume! Neda ange yumada, telep keca karepkenya deiki di, kunupnapu kupkamne. Deiyoda, nedi Allah Yahweh tep, tali kecapu men kareptene. Nedi pio men kunupmanenge, er si eremna tep dopra karenada, ne gume,” pepu. Raja Dauddi upepu dingeda, Raja Daud adipapu gandum bol kopra derinai cap, asapi bisam yala-yala yuma cap, ange yuma tep kunupunge co bo dengeda, lima puluh (50) kunumna weik keca, er si perak deiki di kunupu. 25Ange yuma konum kunupra seng pepu dingeda, Dauddi Allah Yahweh er gispal dona cap, er si eremna cap tep, mesba dopu. Tonda ukupudi, yapi keca popra, uku dongopudi, Allah er si erepu. Tonda, ‘Nimi cap, Allah Yahweh cap, antamdapedi, telep kupra kikiman kunkamep,’ tenena tep, ayapi keca yumada, poprapudi, Allah si erepu. Ukupupa, Allah Yahweh tep, Raja Dauddi amutu neitamai kurami neng yuma tep, moropu ngeda, gekepra melipu. Ada, sun Israel yala nesala, ila kange mun pu yala deiyo keca kareamunge yumada, Allahdi gum kupra deipu. Apu jeramnga deiki di, sun Israel nesala yuma ton pio men deami.