2Sa 3 | XteSC | STEP | Raja Saul er nyapsilip cap, er tara keami neng cap, Raja Daud er nyapsilip cap, er tara keami nesala cap yumada, keteng tamun weikanun ton podanapu kurami. Ukudarami dinin, Daud er tarada, puto weik kupbaramu. Dinin, Saul er tamna nesalada, pio puto boun kupbaramu.

2 Samuel 3

Israel yala nesalada, ‘Ware ngebodi nun ila nimi deiyo ngebo kepra, talenkamser’ tenen, podarami taru tep, seku upu

1 Raja Saul er nyapsilip cap, er tara keami neng cap, Raja Daud er nyapsilip cap, er tara keami nesala cap yumada, keteng tamun weikanun ton podanapu kurami. Ukudarami dinin, Daud er tarada, puto weik kupbaramu. Dinin, Saul er tamna nesalada, pio puto boun kupbaramu.

Daud erdi deiamu nyapu tep, seki upu

2 Daud, Hebron mutu kuramu taru di deiamu nyapuda, adeiamnga utopu nukra yakana tep nengeda ake. Dauddi domu ner er si Ahinoam, erda Yisreel mutu ner kuramudi, anerdi Daud er mi Amnon deipu. 3 Dauddi deipu mi butene ngeboda, Kileab kuramu. Er nin Abigailda, menop taru Karmel mutu ngebo, er si Nabal domu dinin, depudi tapupa, solu kuramu. Dauddi deipu mi weneri ngeboda, Absalom kuramu. Er ninda Maakha kuramu. Ada, Gesur mutu taleamu nimi deiyo ngebo Raja Talpai perami ngebo, er ner mi kuramu. 4 Dauddi deipu mi dumbari ngeboda, Adonia kuramu. Er ninda, Hagit kuramu. Pamubari deipu ngeboda, Sefaca kuramu. Sefaca er ninda Abital kuramu. 5 Dauddi deipu mi ngantan bari deipu ngeboda, Yitram kuramu. Er nin sida, Egla. Daud er nyapuda, ngantan bari neng yumada, Hebron mutu neitamai dipapu deiamu.

Raja Saul, er tara ngebo Abnerda, Daud tamna kepka tep, pepu upu

6 Daud er tara keami nesala cap, Saul er tara keami nesala cap, tupa podanapu kuramipa, Abnerdi, Saul er tara neng cap kuramudi, pel doramnga deiki di, puto weik kepbaramu. 7 Ataru neitamaida, Saulda tenpu ner ton, er si Risfa dopra keana tep, kikiman kuramreidi maramrei. Aner er nai bo sida, Aya kuramu. Tenpu tumi ton, Saul er mi Isbosetdi, Saul er jen talena deiyo ngebo Abner tep pepu. “Ne nai bo Sauldi, er keana tep domudi kikiman mapmarei ner, er si Risfada, kanda ware keca deiyo tep, kan cap, aner cap, kikiman mapmarerum do?” pepra sikniptapudi, Abner tep mali pepu.

8 Isbosetdi, upepupa Abner, ange gekepudi, tulum weik kupupa, upepu. “Uo, kanda ware keca deiyo tep, neda tali siknipnerem do? ‘Saul tep yuk nengdi, dapoptenge,’ tenepmaneremdi do? Tonda, kandi ne tep, ‘Erda mambule ngebo gume, erda tali embaramre kam utopu, Yehuda yala ngebo kurure,’ tenepmaneremdi pepmanerem do? Neda kapul taruda, Saul er tepapu kange deipra kuramsi ngebo. Ne deiyo ngeboda, kan nai bo tep ukuramsi. Tonda, Saul er weit yapu yuma cap, er kayapu yuk neng cap tep, tupa teleppu kunune. Nedi ne deiyo ngebo Raja Saul tep, weika di meliamsipa, Daud cap, er jen talena neng capdi, kan nai bo Saul tep, men popbisipmanto kuramsei. Neda teleppu kuramsinge tep, kandi, ‘Ware keca deiyo tep, ne nai bo domu ner ton kikiman mapmarerum do?” pepra, ne tep mali kupra deipmanerem do? Kanda pio mali upu pepmanereme.

9 Kandi ne nong deiki pio mali upu pepra deipmanerema tep nengeda, ne kangeda, ila telep ngeda, nedi nun nai Allah teneramu keca men makupra kupnyopda, Allahdi ne tep, ila di wenepnetue. Ada tali tep men pepkene. Allahdi Raja Daud tep, ‘Ukupkamkene,’ pepra, pedina upu deiki di peramunge yuma, nedi ton melipkamne. Daud er tamna kepnedi, er tep melipkamne. 10 Ada, Allahdi Saul tep erepra deipupa, ila nimi deiyo keprapudi, amutu yuma talepra kurure. Dinino, Daud er tamna neng tep melipnepa, adeiki di Sauldi taleramre keca cap, nesala yuma capda, Allahdi ange-ange yuma dopropnedi, Daud er tep karepkamre. Ada, amutu tu yuma cap, amutu neitamai kunge nesala cap, dopropredi Daud tep karepkamre. Akeca yumada, Daud er buru deiki karepkamre. Ada, Daud tara nesala melipne pangeda, Allahdi Israel tara kunge nesala cap, mutu cap, tonda Yehuda tara neitamai kunge nesala cap, mutu cap yumada, dopropredi, Raja Daud tep karenkamre. Ne tek sisi pepne. Nedi ange men kupne pangeda, Allahdi ne tep wenepra poptapnetue. Abnerdi Isboset tep pepu. 11 Upepupa, Isbosetda upu ton tenpu pe men pepu. Ada, Abner pepu upu cap, Abner tep, ila kware kupka tep, upu ton men pepu.

12 Ukupu pangeda, Abnerdi, Daud damai Hebron mutu kuramngai, upu dubana tep, nimi tenpu wepra deipudi, ‘Upepkamarume,’ pepupa, sun anengdi aupu dopra, Daud damai lap perbei. Ada, Abnerdi upepkere, “Ware ngebodi, amutu yumada talepkamre do? Atep nengeda, kan cap, ne capdi, ‘Ukunkamneme,’ pepra, pedina upu sisikropkamneme. Ukupnemedi, ne melipkene pangeda, adeiki di, sun Israel yala nesala yuma, dana-dana tara kuramenge nesala yumada, kan tarapu kepkamenge. Kanda ne deiyo ngebo Daud, kan tarapu kepropkamenge. Abnerdi Raja Daud kan tep, upepkere,” pepi.

13 Aupu pepipa, Daud gekepudi tamupra Abner tep pepu. “Telepe, atep nengeda, nedi tamupra apeipne upuda, bena pepkurume. ‘Angeda, tonpa tenpu kange doupra kunkamneme dinin, tenpu kecada pio kupkamnerume. Ada, kanda ne damai yakankamrum taru yumada, kandi Saul er ner mi Mikhalda, adipapu doupra, ne damai duyakankamnerume. Atep ne damai yan kurumu taru yumada, talipu yakana gume. Aner cap doupra yankurume,’ Dauddi Abner tep peipu. 14 Upepu pangeda, Daud peda utopu, nimi Isboset damai perbana tep, upu doproipudi upepu. “Ne kabo kan adipapu, ne men di dopsi ner Mikhalda, ne pe koripu tamupra doproipkunerume. Anerda, nedi Filistin neng denge weik, seratus (100) neng popsidi, sun den bol deiki tarange sekamsidi, kan nai bo Saul damai dubenamsi. Akarepsi ngeda, aner Milka ner tappa utopu kunuamsa tep nengeda, anerda tamupra nepu dopra karepkunerume,” peipu.

15 Upepra deipupa, aupu dubana tep doproipu nengdi pepi pangeda, Isbosetdi nimi tep, upu peipupa, aner Mikhalda er damai bena, gupra dopropidi duyai. Ada, nimi si Lais, erdi deiamu mi, er si Paltieldi, aner domupapu, aner Milkada, dalupra dopropidi duyai. 16 Konum bena gupra duyakai pangeda, aner domu ngebo, er si Paltiel adipapu amenda, engepra domnapu kunmau. Ukunmaupapu banmaiyanen, Bahurim mutu konum bei pangeda, Abner epudi, angebo Paltiel tep, “Kanda tamupra benapu kupkurume,” pepupa, adipapu angebo er pe mutu tamupra beu.

17 Ange yuma konum kupmau taruda, Abnerdi sun Israel yala nesala, sun deiyo neng tep, nimi wepra deipupa, aupu dopra perbenmai. Aupu lap perbenmai ngeda, gekepudi, “Uda, ne kaele, sun yumada, pumun dadi, ‘Uo, Daudda, nun Israel yala nesala yuma tep nengeda, nun ila nimi deiyo ngebo Raja kepsetue,’ tenen, tupa tenenapu kuramrume. 18 Ukupra tenemruma cadi, ataruda konuma, angepu kupkamepe. Sundi peiptumpa, Daudda sun tarupu kepsetue. Atep sunda moupra tenepkurume. Nun nai bo Allah Yahwehdi Daud tep, pedina upu deiki di konum peiamu. “Ne amutara pel melipra kure ngebo Daudda, ne mawa nesala sun Israel nesala tep, lyepropkamre. Ada, sun podan neng, Filistin yala neng cap, sun tara keiami neng cap, tonda yuk mutu nesala, sun dana-dana tara kunge nengdi, ‘Podankamepe,’ tenenge Israel nesala popbisipkamepe,’ tenenge nesala yumada, Daud ne deiki di lyepropkamne ja,” pepra deiamu. 19 Tonda, ange utopu, Abner erda, sun Benyamin yala nesala tep, sun damai bena upu peipu. Ukupu dingeda, Abnerdi aupu douprapudi, Raja Daud Hebron mutu kuramngai perbeu. Ada, sun Benyamin yala nesala cap, yuk Israel yala nesala cap, ‘Ukupkamepe’ tenen, upu talepmaidi, ‘Angeda telepe,’ tenenmainge yuma, Abnerdi Daud tep aupu lap perbeu.

20 Abner cap, er tara neng dua puluh (20) neng cap, Hebron mutu damai bei. Bei pangeda, Dauddi sun aneng yuma tep, kalya kalepra jen keca weikanun ton, ketenepra karepu. 21 Ukupkopda, Abner er pedipapu upepra moropu. “Naio, kandi ne tep, ‘Telepe,’ pepnemempa, Israel nesala damai benedi, sun yuma tep, ‘Ne deiyo ngebo Raja Daud, er tamnapu kepkurume. Er cap, sun cap, pedina upu pedankamrume,’ pepkamane. Upepne pangeda, ne deiyo ngeboda, sundi kan tep, ‘Jo, Daud erda nun ila nimi deiyo ngebo Raja kunkamsere. Akonum telep pepmaserema dano,’ pepmengedi, kan tep erepra deipkengepa, kandi sun amutu nesala tep, deiyo ngebo kepra talepkamreme. Ada, ne deiyo ngebo kandi tenepmemtopu kunkamreme. Kandi, ‘Ange-ange yumada, teleppu kurure,’ tenepmem keca yumada, kan dipapu talenkamrume.” Abnerdi Daud tep pepu. Upepu atep, Dauddi, Abner tep, “Telepe, kandi, ‘Ukupkamane,’ tenepmarem ngeda, telep dipu kupkurume. Ukuda daberume,” pepupa, Abner tali kange doupudi, er pe mutu tamupra beu.

Abner popi upu

22 Yambulanun dakunmaipanen, Abnerda Daud er damai di konum tapra beu taruda, Daud er jen talena neng, sun deiyo ngebo Yoab cap, er nyapu cap, ton yuk neng cap, podanai benmaiya tamupra yai taruda, sundi konum popmai neng, sun taleami keca yala-yala yuma, weika di, dalupra dopropi ngeda duyai. Sundi akeca duyai taruda, Dauddi Abner tep, ‘Telepe daberume,’ peipmaupa, Abner konum kange deipra benmaua cadi, Abnerda, Daud damai men kunmau. 23 Dinino, Yoab cap, er nyapsilip cap yai pangeda, amutu nengdi Yoab tep upepi. “Nimi si Nar, erdi deiamu ngebo Abnerda, Raja Daud damai yanmaudi, upu talepdareipa, Dauddi, ‘Kanda telepepu bena kunkamreme,’ pepmaupa, Abnerdi tali kange doupra benmaue,” pepra, lap pepi.

24 Upepipa, Yoab gekepu dingeda, Yoab adipapu sepdarapudi, ila nimi deiyo ngebo Raja Daud damai beudi upepu. “Uo, ne deiyo ngebo kandi, Abnerda kan damai yanmaupane, ware deiyo keca tep, tali tapmarempa, kange deipra benmau do? Tonda, ne deiyo ngebo kandi, Abner tep, ‘Tali benkurume,’ peptapnapu kupmumpa benmar do? Telep ngeda, Abner tomopmatumdi, ateng koupdongopmatume. 25 Nun deiyo ngebo kan kaele, Abnerdi kan damai yanmau ngeda, tali minin upu peryanmakeue. Tonda, erdi kan tep, ‘Daud er kure keca cap, er tenerenge capda, ware kurur do, ware kupkamre do?’ tenen, diryanmakue.” Abnerdi Daud tep pepu.

26 Upepudi Daud er damai di tapra beu dingeda, Yoabdi, er tara jen talena neng tep pepu. “Abner tep nengeda, upupkurume,” pepra, nimi wepra deipupa, upu perbei. Ukupi taruda, Abner tep amenda melipra dombanmaiyanen, mutu si Sira mutu bunkon mokon damai beidi, Abner tamupra duyai. Akupmainge yumada, Daud er men kael kepu. 27 Abner menmena tamupra Hebron mutu beu taruda, Yoab ila ati arum doramya damai, bura tara di, akati wengbana tep, bisi buplan dam bena teku taruda, Abner tep Yoabdi inimna upu pepkunga tep, kuramengtopu kupu. Ukupkanen, Yoabdi Abnerda, adipapu tema di, er mundu pumbon lukdongopupa depu. Yoabdi Abner popupa depka deiyoda, Yoab er weit bo Asaelda, menop taru Abnerdi pomnga tep, Yoab teneamnga di, kwangdakudi Abner poptapu.

28 Ukupupa, amenda taru Dauddi, ange yuma konum gekepra kael kepu dingeda, erdi pepu. “Angeboda Yoab, er kange dipapu poptapka cadi, ne nai bo Allah er kaele, ne cap, ne talepsi neng capda, Abner popmar ngeda, nun men kupmapa cadi, ataru di dipra dorkunkamre taru yumada, Abner popmaunge tep, wenemna keca cap, ikin keca cap, nun deiki mali keca men yankamsere. Ange deiyoda nundi gume,” pepu. 29 Upepu dingeda, aupu ton dukdongopra pepu. “Gume, Abner popmaunge wenemna tep nengeda, nedi, ‘Angeda telepe,’ tenenun ngeda ake. Ada Yoab cap, er nai bodi deipupa, dadeipdanen yakarami neng, sun tamna nesala deikipu, ikin keca weik tupa-tupa yakankamre. Atamna neng, sun mali kupya deiki di, anesala sun wenemna tep nengeda, ikin keca yarepa, doronapu kunkamenge. Sun dadeipgerekdanen, baramenge peda, dopropkamenge.

Adopropkameng kecada ake. Ada, nong bol deikipu susu jena weik ngepu dopropkamenge. Tonda, ila kange mun pu, bol kouna utopu ngeda, sun nong bol deiki pio jenkamre. Tonda, adeiki di, nimi men dorameng pelda, nerapu di opkal wina utopu pel donung ngeda, sun sal nyapudi ali dakra, anerapu pel talepra donkamnunge. Agum dingeda, sun nyapsilip neitamaida, nimi podanaidi poppmengepa depkamenge. Tonda sun jen keca yuma pio gum kupbaramrepa, jen putanapu kurepa, pio kunkamenge. Ange yumada, sun wenemna tepa,” Dauddi pepu. 30 Atep nengeda, Yoab cap, er weit bo Abysai cap, sundi Abner tep poptapi. Deiyoda, er Abnerdi, sun weit bo Asaelda, Gideon mutu neitamai di pomnga tepa. Abysai cap, er dubo Yoab capdi, tupa teneramreia di, Asael er kwang dangna tep, Abner poprei.

Apner depupa, er nong dopra peipi upu

31 Ukuprei pangeda, Dauddi Yoab cap, er nyapsilip yuma cap tep upepu. “Sun kemrum opkal yumada, gwelepra taprumudi, depmenge neng tep, engenkunge taru kenengamenge opkal kepraprumudi, Abner depmara tep engenkamrume. Tonda, Abner peirbenkoi taruda, Daud er peda, nimi depmenge neng dongorameng co bekin co pumbon dongopra doupmai neng mepra banmai pangeda, er Daud peda, amenda banmau. 32 Abner er nong dopra, Hebron mutu bena peipi pangeda, amutu nesala sun deiyo ngebo Raja Daud cap, er nyapu cap yuma, ila di engepra pein damaipu kunmaidi, Abner tep weika di engenmai.

33 Ange yuma konum kupi dingeda, Dauddi, Abner tep engepudi upepu. “Abner depmar ngeda, tali walwal ngebo depneto kupmar do? Angeda gume. 34 Abner depu taruda, er buruda koudongona gum tepa. Utopu er yan peda, daramdongona peda gum tepa. Er popmangpa depmar ngeda, nimi pona tep, ila tulum kange doure ngebodi popmare,” pepupa, amutu nesala yumada, gekepidi mali kange doupra, ila di kange di ton cap engenapu kunmai.

35 Engenmaiyanen, amenda taruda, amutu kunmai nesala yumadi, ‘Uo, keteng dangbanku taruda, nun nai bo Daudda, jen yambulanun ton jeptue’ tenen, nenemai dinin, Dauddi upepu, “Gume, Allah dipapu popkamanere. Ada ukupmanto, keteng asuru banmaryanen, kapul men wekapre taru di, roti do, yuk jen keca do, metekanunpu jeptenyopda, Allahdi ne wenemna tep popnetue,” pepu. 36 Dauddi upepupa gekepidi, amutu nesala yumada, Dauddi pepmaunge tep, ila di kange deipi. Tonda ange utopu, Daud er kupne keca tep nengeda, amutu nesala yumada, sun kange pio derirami. 37 Atumida, Daud weika di engenmaupa, sun amutu nesala yuma dinmaiya cadi, Daud erdi taleamu nesala yuma cap, tonda Israel yala nesala yuma capda, konum kael kepi. Ada, sundi, ‘Gume, angeda Daud erdi, ‘Angebo Nardi deipu mi Abner tep, dapoptenge’ tenen, pio men tenemnga tep, tenepmardi kupmara,’ tenepidi kael kepi.

38 Tonda, sun deiyo ngebo Raja Dauddi, er amutara kuramidi, er pel tep meliami neng tep pepu. “Ne kayapu, sun ton kael kepmarum do? Atumida, Israel neng sun ila deiyo ngebo utopu ngebo, ila telep mambul ngebo tenpu depmar ngeda, moupra men kael kepmarum do?” pepra, asipetepu. 39 Tonda upepu. “Uo, neda nimi deiyo ngebo kemna tep, Allahdi wepra deipneu dinin, ukutaruda ne puto pio bounpu kupmanere. Tonda, ukutaruda Zeruya er nyapuda, ila tulum weik kupka tep, yu di pio telep ngebo poptapi. Neda, sun tep ware kuptene do? Gume, aneng tep upu men sekmatene. Men bisbisa kapmatene. Atep, angeda Allah Yahweh er dipapu, wenemna keca sun tep kareptue. Ada, sun mali kunung keca tepapu kunupra, amalinge utopu tep, ila ikin wenemna kecada, karepkamre,” Dauddi pepu.