2Sa 4 | XteSC | STEP | Amenda taru, yuk nengdi, “Uo, Hebron mutu damai di, Yoab cap, er weit bo Abysai cap, sundi Abner tep poptapi,” pepra lap pepipa, Saul er mi Isboset gekepudi, er telep kange doupra, puto kuramunge yumada, gum kupupa mali kange doupu. Ukupupa, Israel mutu nesala yumadi, Isboset mali kange doupunge konum gekepidi, ‘Uo, ware kupkamep do?’ tenen, sun yuma kwar kupu.

2 Samuel 4

Isboset popi upu

1 Amenda taru, yuk nengdi, “Uo, Hebron mutu damai di, Yoab cap, er weit bo Abysai cap, sundi Abner tep poptapi,” pepra lap pepipa, Saul er mi Isboset gekepudi, er telep kange doupra, puto kuramunge yumada, gum kupupa mali kange doupu. Ukupupa, Israel mutu nesala yumadi, Isboset mali kange doupunge konum gekepidi, ‘Uo, ware kupkamep do?’ tenen, sun yuma kwar kupu. 2 Isboset er melimna tep jen talen nengda, butene neng, sundi yuk mutu neng porbana tep, deiyo neng keprei. Aneng sun sida ake. Tenpu ngebo er sida Baana. Ton ngebo er sida Rekhab. Sunda, Rimon er nyapu kuramrei. Sunda, Benyamin yala nesala dinin, Berot mutu kuramrei. Berot mutu tuda, Benyamin yala nesala taleamya tep, ‘Sun Berot mutu kunge neng peda, Benyamin yala nesala utopu kununge,’ tenerami. 3 Uda, ‘Berot mutuda, Benyamin yala nesala mutu konum weki,’ pepra, si sekami mutu, sun tek sisi amutu akurami nesalada, menop taru neitamai di, Berot mutu di gopra, Gitaim mutu yaidi, pio amutu kuramitopu, abuku sekmepe taru peda, tupa acapu kununge.

4 Uda, Saul er mi Yonatandi deipu ngebo, er sida Mefiboset, ami er yanda mali kuamupa, telep kupra er yan yanipra men embaramu. Akuramunge deiyoda, ake. Ada, Mefiboset er keteng tamun pamubari kepu taruda, Yizreel mutu di nimi yaidi, “Nimi podan taruda, Saul cap, er mi Yonatan capda, popipa konum depmarenge,” pepipa, ami er melimna nerdi gekepu. Ataruda, Mefibosetda metek mipu kuramnga cadi, er melimamu ner abamur upu gekepudi, kware kupupa, ami dopropudi ongopra douprapudi, sepdaro baupa, sakapudi, tuai dourbenapudi, Mefiboset er kalyo kotokroupa, men embenmanto tep, atipu kuramu.

5 Uda, Berot mutu ngebo er si Rimonda, nyapu butene deiamu. Sunda jen talena neng, sun deiyo neng butene neng kuramrei. Sun sida, Rekhab cap, Baana cap kuramrei. Abutene nengda, Isboset er ati damai berei. Akati bereiyada, keteng komuni men kapudi keteng bupu tupa kwapu taru neitamai berei. Atep nengeda, Isbosetda komuni beipe peingna tep mapmau tarupu, er ati dam berei. 6 Isboset ati pel melimna nerda, gandum du wenmaudi, pel donmaupa ue pio weik kupmaua tep mapmau. Aner mapmau taru dipu, abutene neng yo beipra, bereidi, Isboset mapmau ati inipra wekrei.

7 Ati wekrei dingeda, Isboset mapra u dakpepmaupane, amapmau ati bo wekrei. Konum wekrei dingeda, nimi pona tep keca, yu tema doupmareiadi, Isboset er mundu neitamai lukra popra deipreipa, akati apu depu. Ukupu pangeda, er giso du sekra doupra berei. ‘Sun anengda epsenung’ tenen, bisi banada, Yordan mutu ban tara, Arabah tara di kepra, sepdara inipra berei. 8 Konum berei dingeda, Baana cap, Rekhab capdi, Isboset er giso sektaprei ngeda, Raja Daud Hebron mutu kuramngai bena kareprei dingeda, upeprei. “Ada, Raja Sauldi kan tep ‘Poptene’ tenen, dombaramkeu ngebo, er mi Isboset perami ngebo, er gisoda adano. Nun nai, kanda nun deiyo ngebo Raja Daud, nun kangeda atumida Allah Yahwehdi, Saul cap, er nyapsilip capdi, ‘Daud poptepe’ tenen, dombanapu kuramkeinge tep, konum kwangdakmare,” peprei.

9 Upepreipane, Dauddi sun Rekhab cap, Baana cap tep tamupra pepu. “Ne nai Allah Yahweh gam kuna deiyo ngebo pio gam kurura cadi, ne tek sisi pepsene. Allah erdi ne kange mun kuramneua taru neitamai yumada, melipra lyemamneu. Er si deiki di pepsene. 10 Sun moupra gekepnereso. Ne Siklag mutu kunmasi taruda, tenpu ngebo ton ne kunmasi damai yaudi, Raja Saul deamunge tep yana lap pepneu. Aupu dubenmau ngebodi, ‘E, telep upu duyanmana cadi, aupu pepnyopda, Dauddi ne tep kange deipkamnere,’ tenepupane, angebo adipapu tomoprapsidi poptapsi. Ukupsinge deiyoda, Saul deamnga tep, abamur upu ne damai dubenmaunge tep, menenga keca kareramengtopu, kwangdangna tep, angebopu poptapsi.

11 Atep nengeda, nimi mali kupmengepa, sun wenemna tep yuk nengdi kwangdangna tep popmengopda, ada yambul mambule. Dinino, deiyo men kwapmarepapu, sunda yu kupseupa, telep kuramu ngebopu popmarerumada, ila mambule. Pio mali kupmareruma tepa. Sunto neng tep nengeda, ila kange mun ikin keca, sun nimi mali kupmarerum neng deiki deipkune. Ada Abnerda, er mali kuna pe gume. Erda telep ngebo dinin, mangkau di, er pe ati pumbon tupa mapmaupapu, sun yu kupseupa, sundi er akati wekra pomreruma tep pepsene. Ange tep nengeda, ukutaruda akupmarerumnge tep, nedi ikin keca derinada, sun deikipu deipkusene. Abner popmarerumpa, er yapi embeua kunumna tep nengeda, sun menenga keca karena tep, nedi peipnepa, ne tara nengdi sun butene tep, nong popsengedi, amutu neitamai di gum kupra deipkamasenge.” Raja Dauddi sun Rekhab cap, Baana cap tep pepu.

12 Upepu dingeda, Dauddi er melimna neng, kaber neng tep, “Rekhab cap, Baana capda, adipapu popkurume. Konum popmum dingeda, aneng butene sun buru cap, sun yan capda, sekra tapmumdi, sun nongda mokon damaipu tapu gerekra deripkotepkurume.” Dauddi pepu. Upeputopu kupi. Dinino, Isboset er giso sektapreidi, duyanmarei ngeda, Daud er melimna nengdi dopropidi, Isboset er nai bo Abner depmaupa, yuk nengdi men di peiamyaipu, amutupu bena, tu palipi.