2Sa 5 | XteSC | STEP | Ataruda Israel yala nesala yuma, Daud damai Hebron mutu neitamai yaidi upepi. “Kael kepso, nunda kan pe yala neng, kan pe yapi nesalapu kunupe.

2 Samuel 5

Israel mutu neng, sun ila nimi deiyo ngebo kemna tep, Daud wepra deipi upu

1 Ataruda Israel yala nesala yuma, Daud damai Hebron mutu neitamai yaidi upepi. “Kael kepso, nunda kan pe yala neng, kan pe yapi nesalapu kunupe. 2 Pio pumun taru, Sauldi taleamseu taru peda, kandi nimi mar deiyo ngebo kuramumdi, Israel yala nesala cap, jen neng cap dopra, yuk mutu neng nun popmanto neng tep, nimi porbana deiyo ngebo kuramsemume. Tonda, Allah er si Yahwehdi kan tep, ‘Ne nyapu Israel neng domba bisam peirameng utopu kumemdi, sun ila nimi deiyo ngebo kepkamreme,’ peamkeu ngebo kurume,” pepi.

3 Upepi pangeda, amutu-amutu yuma sun wisi neng, ada sun deiyo-deiyo neng yuma, Daud damai Hebron mutu dam yai. Konum yai pangeda, Dauddi ayanmai neng tep, Hebron mutu dam di, Allah gekenai jenek pepu. “Sunda ukupra-ukupra kunkamrume. Neda sun ila nimi deiyo ngebo Raja kunkamsene,” pepra deipu. Upepu pangeda, anengdi Daud tep, “Kanda Israel mutu neng, nun ila nimi deiyo ngebo Raja kunkamsereme,” pepra wepra deipi.

4 ‘Nun Raja kunkamser’ tenen, anengdi Daud erepra deipi taruda, keteng tamun denge weneri, 30 tahun konum mapu dinin, ataru di gonga kepra, adinen dukdongopra Israel mutu kurami neng sun ila deiyo ngebo Raja keamu taru yumada, keteng tamun denge dumbari, 40 tahun keamu. 5 Dauddi Hebron mutu kuramudi, Yehuda yala neng tep taleamngada, keteng tamun yoneitam bari cap, tonda keteng tamun tenpu ton neitamaipu, war ngantan bari cap, anesala taleamu. Ada tujuh setengah tahun deiki di Yehuda yala nesala taleamu.

Tonda, Yerusalem mutu neitamai kuramudi, Israel yala nesala yuma cap, Yehuda yala nesala yuma cap wisipra, taleamu taruda, denge weneri cap, tonda keteng tamun weneri ton cap, yumada 33 tahun anesala yuma taleamu. Atep nengeda, anesala yuma wisipra taleamudi, sun ila deiyo ngebo kuramu taru yumada, 40 keteng tamun deiki di kuramu.

Daud Yerusalem beudi amutu bisbisa kapra, amutu pio talepra kuramu upu

6 Konum ila nimi deiyo ngebo Raja kepu pangeda, Dauddi er cap, er nyapu jen neng cap, amutu kurami neng capdi, ‘Yebus yala neng, Yerusalem mutu neitamai kunung nesalada, popbisipkamep’ tenen, Yerusalem mutu bei. ‘Yebus yala neng popkup’ tenen, beipane, amutu kurami Yebus yala nengdi Daud tep upepi. “Kanda amutuda ware keca puto deiki di yana wektum do? Kanda puto gum ngebo cadi, tali neng, asuru mali neng cap, yan mali neng cap dipapu, kan tep popra dombeketenge. Kanda tali ngebo cadi, amutu neitamai men wektume,” pepra nyek-nyek pepi. Sun tenepidi pepi ngeda, ‘Daud erda puto gum ngebo cadi, amutu men wekra popsetue’ tenen, pepi.

7 Utenepra pepi dipunen, Daud cap, er jen neng capdi, Yerusalem mutu neitamai dinin, mutu si Sion ^{▼▼Sion – Pumun taruda, ati arum weik domipa, sun ila nimi deiyo ngebo er si Raja Daud amutu neitamai kuramu. Amutu sida, Sion perami. Ukutaruda, amutupu dinin, amutu sida, kota Yerusalem, angepu penupe.} mutu, ati dopra gel deipra kuramyai bena bisbisa kapudi, aneng poptapipa, amutu dopropudi talepu. Konum dopropu pangeda, nimidi akati arum si tep nengeda, “Ada Daud ernge,” perami.

8 Ataruda, Yerusalem popbisipkoi tumida, Dauddi sun Yebus neng nyek-nyek penmaiya tep, er jen talena neng tep aupu pepmau. “Ware neng do yuma, ‘Yebus yala neng popbisiptepe’ tenepmenge nengda, Yerusalem mutu ongopgenepra gel beilya neitamai dinin, bon potokipa me jena tep wengamre bonai wekamrume. Abon wekre ngebopu, sun amutu asuru mali neng cap, yo mali neng capda, ne podan neng kununga cadi, aneng popkurume,” pepu. Yu kupupa, Dauddi aupu pepka cadi, ukutaruda, yuk neng yumadi upenunge, “Yo mali neng cap, asuru mali neng cap, nun Raja Daud er ila nimi deiyo ngebo ati men wengkamenge,” penunge.

9 Yerusalem mutu neitamai dinin, mutu si Sion mutu, ati dopra gel deipra kuramyai, Dauddi, “Amutu kunkuna tep, amutuda Daud mutu,” pepra si pepu. Konum si deipu dingeda, ‘Amutu yuma puto kupra deipkun’ tenen, ‘Nun gel beilya long-long pepredi, urupsakrur’ tenen, amutu gel beilya pirman gel cap tu cap, weika di tapakra wipipa, erepu. Erepra baripdaudi, puto weik kupu. Ukupkopda, abeilya neitamaida, sun ati dorami. Milo mutu di dipdongopra aneitamai yuma gel beilya wipra ongopdongomidi, ‘Puto kupredi, dimpepkamre’ tenen, apel dorami.

10 Allahda, akeca-keca yuma deiki tara kuredi, ila puto weik kure ngebo cadi, Allah er si Yahwehdi, Daud tep weika di meliamupane, Daud er puto weik ton cap tapakra kupbaramudi, er kun keca yumada, kunupsek pepnapu kuramu.

Daud er ila deiyo ngebo ati cap, er tara nesala kunkameng ati dopkamya tep, pepu upu

11 Tirus mutu sun nimi deiyo ngebo, Raja Hiramdi, Daud er ati dona tep, ati don co telepnge, er si cemara co weik co cap, ati dona kael neng cap, co cangne neng cap, tonda gel betamne neng cap, ati don co, cap, dopra deipudi, aneng yuma dokotepupa, sun yuma Daud damai yai dingeda, Daud er ila ati dopi. 12 Ataruda, Dauddi kael kepudi, ‘Ange yumada, Allah er si Yahwehdi telep kweipmaner ja.’ Ada Allahdi, ‘Angebo ne mawa nesala talepra ila deiyo ngebo Raja kunkamre,’ teneramneutopu, ‘Nimi deiyo ngebo kepneu,’ tenepu. Tonda, ‘Israel yala nesala telep kunkameng’ tenen, Allahdi ila nimi deiyo ngebo Raja keipneudi, ne talenun keca yuma pio telep kupra derinerure. ‘Akupunge yumada, ne pe tep gume. Deiyoda, er mawa nesala, Israel nesala sun makuna tep, ukupneu,’ teneramudi Daud kael kepu.

13 Daud men di kuramu mutu, Hebron mutu tapra Yerusalem mutu konum yau dingeda, Israel mutu kurami nerapu weik ton cap tapakra doramu. Doramudi, kikiman dakuramyane, er nyapu cap, ner nyapu cap, weika di ton cap deriramu. 14 Daud Yerusalem mutu yaudi deipu nyapu sida, adano. Er nyapu sun sida, Syamua cap, Sobab cap, Natan cap, Salomo cap deipu.
15 Tonda, Yibhar cap, Elisua cap, Nepeg cap, Yapia cap,
16 Elisama cap, Elyada cap, Elifelet cap deriramu.

Dauddi Filistin yala neng popbisipu upu

17 “Daudda Israel neng sun ila nimi deiyo ngebo Raja keipmare,” peipipa, Filistin neng gekepidi, ‘Adipapu angebo bisbisa kapra tomopkup’ tenen, nimi gung weika di bulupra, ‘Daud dan do?’ tenen, diryaipane Daud konum gekepudi, adipapu er inimna ati beu. Ada Yerusalem mutu neitamai dinin, gel beilya wipra puto weik keipi mutu wekra beu. 18 Ukupu taruda Filistin neng weika di yaidi mutu si Refaim mutu, pala ban mutu yuma sun dipapu dinipra, sun opkal bol di dodin tenda ati deipi.

19 Ukupi pangeda, Dauddi Allah er si Yahweh tep asipetepudi, “Ne adipapu Filistin neng tep porbenepane, kan puto ne buru deiki deipnetumdi, kandi melipnememnya deiki di, sun tep bisbisa kapra popbisiptene do?” pepu. Upepupa, Allahdi Daud tep pepu. “Kandi Filistin neng porbenkurume. Ne puto yuma kan buru deiki deipkenepa, Filistin neng yuma popkurume,” pepu.

20 Allahdi Daud tep konum pepu pangeda, Dauddi mutu si Bahal-Perasim ^{▼▼Bahal-Perasim – Amutu sida butene. Ton sida Bahale-Yehuda perami.} mutu damai yaudi, Filistin neng yuma popra gawal dau. Konum popu dingeda, upepu. “Ne nai Allah kandi melipmanerempa, ne podan neng yuma, sun kunai cap, sun nong cap yumada, me opredi yawaramamre utopu konum kupne. Kandi mepra banmamumdi, melipmanemumpa, ne amenda yana aneng yuma popbisipmane,” pepu. Dauddi upepka tep, aneng popu mutu sida Bahal-Perasim mutu perami. ^{▼▼Bahal-Perasim – Sundi asi pepinge deiyoda ake. Sun Ibrani upu deiki di, Bahal-Perasim deiyoda ‘Allah er si Yahwehdi menmena popbisipu’ tenen, pepnunga tep, asi pepra deipi. Amutu tenpu dinin, yuk si ton Bahale-Yehuda penunge.}

21 Dauddi sun Filistin neng popu pangeda, ataru Filistin nengdi, sun isok si eremami keca, acapu konum taprapidi, sepdara bendopi pangeda, Daud cap, er nyapu jen neng cap, sun tapi keca dopra dubei. 22 Amenda taruda, sun Filistin mutu neng, kange di ton cap, yaidi Refaim mutu banai sun dipapu yan dinipi. 23 Ukupi pangeda, Dauddi Allah tep, “Naio, ware kupkaman do?” pepra asipetepupa, Allah er si Yahwehdi tamupra pepu. “Aca, ‘Sun urasin tara adipapu tali lupra bena poptene’ tenena gume. Ange gum dinin, sun amnyo tara inipra bememdi, sun ati damai co si kertau co dam tara di kepra, wekra aneng popkurume,” pepu.

24 “Ukupra ware ka dimumdi, Gekenmamumpane, jen neng nepmengedi yan lelim perameng utopu, kertau co dupai lelim peprepa gekepmumnyopda, kan peda adipapu jen doropkurume. Ada, alelim gekemum taruda sundi, ‘E ukuda, Allah er si Yahwehdi mepra banmara cadi, nun tep melipserya deiki di, Filistin mutu neng yuma popkupe’ tenen, adipapu porbenkurume,” pepu. 25 Ange-ange yumada, Allahdi Daud tep, ‘Ukupkamrume,’ pepmautopu kupudi, Filistin neng porbeu. Ada Giba mutu di gonga kepra, adine dipdongopra, Geser mutu damai, Filistin nesala yuma popra, gawal daku.