2Sa 6 | XteSC | STEP | Yuk taruda, Dauddi Israel nesala kuramya kan-kan di, pio telep jen talen neng denge weneri, dinin tiga puluh ribu neng (30.000) bulupra deipu.

2 Samuel 6

Allahdi peiamupa, Musadi aupu sekra, co lase di domi bekin pumbon deiamunge doupra, Yerusalem mutu dubei upu

1 Yuk taruda, Dauddi Israel nesala kuramya kan-kan di, pio telep jen talen neng denge weneri, dinin tiga puluh ribu neng (30.000) bulupra deipu. 2 Daud cap, Dauddi wepra deipmau jen talen neng cap, ‘Allahdi peiamu upu, gel pala deiki sekra co bekin, er sida Peti Perjanjian, dongominge dopra dubenkamep’ tenen, Yehuda tara neitamai dinin, mutu si Bahale-Yehuda mutu tapra bei. Uda, nun nai Allah er si Yahweh. Erda akeca-keca deiki tara kuredi, ila puto weik ngebo kurura cadi, im deiki kunge jen malaikat yumada, sun deiyo ngebo kurure. Akeca Peti Perjanjianda, Allah er si Yahweh, er mawa bekin penupe. Abekin deiki tarada, im deiki pel don neng malaikat urasin utopu keca petupra, dana-dana tara ketenepra deipinge neitamaida, Allah er puto cap, er dirine cap kareprepa, yana akurure.

3 Allahdi peiamupa Musadi sekamu upu, co bekin, er sida Peti Perjanjian pumbon deipi ngeda, nimi si Abinadab er ati di dopropi. Abinadab er atida metek mutu buma deiki kwamu. Dopropidi, ukupu dopi keca, ada tu deiki embana keca deiki deipi dingeda, sapi bisamdi akeca gipra banmaupa, Abinadab er ati di yakanmai. Ukupra yakanmai dingeda, Abinadab er nyapu Uza cap, Ahiyo capdi, atu deiki embana keca damai yakanmarei. Ada, ‘Aco bekin sakrepa mali kuprur’ tenen, moupra kalekmareidi mepra yakanmarei. 4 Yakanmareipane, Ahiyoda mepra banmaupa, akecada sapi bisamdi gipra amenda yakanmau.

5 Ukupra yakanmareidi, amem co bekin dubanmarei pangeda, Daud cap, er nyapu Israel neng yuma capdi, ila puto di Allah gispal dona tep, mut pepbanmai. Mut pepra yakanmai taru dipu, bung-bung penada keca yala-yala weika di penmai. Akeca sida, kecapi cap, gambus cap, rebana cap, kelentung cap, tonda ceracap di, ila lelim pepra yakanmaidi Allah er si eremai.

6 Banmaiyanen, nimi si Nakhon, er gandum bongonai bei dingeda, asapi bisam yan giso dukupa, ‘Allah er upu dongopi mambul co bekin, er sida Peti Perjanjianda, tuai sakrur’ tenen, Usadi buru dokotepra amem keca talepu. 7 Ukupua tep nengeda, ataruda Allahdi Usa tep tulum kupupa, adipapu Allahdi Usa poptapra, adubanmarei mem keca damaipu tapu. Usada, tali ngebo cadi, aPeti Perjanjianda, mem keca kwamnga cadi, tali lupra talepupa, Allahdi angebo adipapu popupa depu. ^{▼▼Allahdi Usa popka deiyoda, ake. Pumun taruda, Allahdi Israel neng yuma tep, “Ne upu kipmum co bekin, er sida Peti Perjanjianda, ila mem keca cadi, tali nengdi sun buru di talena meme. Ne si eremna ati pumbon pel dona deiyo neng dipu akeca taleptenge,” pepra deipka tepa.} 8 Allah er si Yahwehdi Usa popunge tep, Dauddi Allah tep derepu. Ange tep nengeda, ataru dipu, amutu atep si dopu. Ada Peres-Usa ^{▼▼Peres-Usa – Sun Ibrani upu deiki di, asi Peres-Usada, er deiyo ‘Usa’ tep nengeda, ‘Allah derepu’ tenen penunge.} mutu pepu. Amutu si tep nengeda, ukutaru peda asipu tupa penunge.

9 Ukupupa, Dauddi Allah er si Yahweh tep ila kware kupu. Kwar kupupa, Dauddi Allah tep pepu. “Uo, ware kupra Allah peiamu upu kiami co bekin, er sida Peti Perjanjianda, ne damai yatu do?” pepra asipetepu. 10 Daud kwar kupka tep nengeda, aduyakarami co bekinda dopra, Dauddi, “Ne domsi ati arum, ne pe kune mutu, Yerusalem mutu men dubenkun dinin, Gad mutu ngebo, er si Obet-Edom er ati pum deipkune,” pepu. 11 Upepka tep, Allahdi peiamu upu sekra co bekin, er sida Peti Perjanjian pum deiami keca dopra baramya, Gad yala ngebo Obet-Edom er ati deipipa, ware weneri acapu kuramu. Ataru neitamai yumada, Allah er si Yahwehdi Obet-Edom cap, er ati kurami nesala yuma cap tep, kange deipudi, telep kweipupa, sun yuma pio teleppu kurami.

12 Allahdi Obet-Edom cap, er ati kun nesala yuma tep kange deipudi, telep kweipupa, yuk nengdi, “Allah er peiamu upu kipi co bekineda, Obet-Edom er ati kurura tep, Allahdi angebo cap, er ati kunge neng cap, er talerur keca yuma cap tep, pio telep kweipu,” pepra, Daud tep lap pepipa gekepu dingeda, sepdaro beudi, akeca Obet-Edom er ati di doprapudi, kange deipudi er pe mutu dubeu. Ada, Daud er pe mutu, Sion perami mutu neitamai, abekin duyana deipu.

13 Ataru Allahdi peiamu upu sekra co bekin, er sida Peti Perjanjian pumbon deiami keca dopra, ‘Daud ati benkup’ tenen, banmai nengdi, yana u ngantan bari dipapu yanipdongopmaipa, Daud adipapu “Bana gume,” pepudi, dimpepra tekmai pangeda, erdi jem sapi bisam wisinge cap, sapi bisam mi galemna pamnge cap, ton popra Allah er gispal dona tep karepudi er si erepu.

14 Akeca dubanmai pangeda, Daudda pio telep kurun opkal kenekmaua di, ila kange deipmaudi, Allah tep gispal don mut pepra mut pepbanapu kunmau. 15 Ukupra banmauanen, er cap, Israel neng yuma cap, kange deipra bum-bum pena er si terompet peprapidi, mut penmaiyanen, Allahdi upu peiamupa, Musadi sekra co bekin, Peti Perjanjian pumbon deiami keca doupmaidi, Dauddi doramu ati arum dubei. 16 Aco bekin, er sida Peti Perjanjian dopra, Daud mutu er sida Sion mutu, konum wengbenkoi taruda, Saul er ner mi Mikael, Daud doamu nerdi dinmaupa, Daudda Allah er si Yahweh, er si eremna tep kari ponmaudi mut semaupa epudi, Mikael er dipru neitamai di, ‘Daudda, ne dabale, angeda ware keca tep kunmar do,’ tenepu.

17 Allahdi peiamu upu deiami co bekin, er sida Peti Perjanjian dubanmaiyanen, Dauddi, ‘Akeca deipkamep’ tenen, lyom opkal bol di, keana dodin tenda ati dopra deiamngai pumbon bena deipi. Ukupi pangeda, Dauddi Allah tep gispal dona cap, er si eremna cap tep, yapi keca poprapudi, uku dongopu. Ton ngeda, nimi cap, Allah cap, antamdina tep nengeda, yapi keca popra, tu galeprapudi, ton bokra Allah tep karepudi, ton tara ngeda, sun imam nengdi ton jepi. Ukupidi, Allah er si Yahweh tep karepudi, er si erepi.

18 Dauddi akeca yuma konum kupudi, Allah tep si erepu dingeda, ‘Allahdi Israel mutu neng yuma tep, telep kweipkamre’ tenen, telep upu pepra deipu. Ada, “Nun nai bo Allah, er si Yahweh, akeca-keca yuma deiki tara kuredi, ila puto weik ngebo kurura cadi, er si deiki di pepne. ‘Erdi Israel neng yuma tep telep kweipkamre’ tenen, Allah moropsene,” Dauddi pepu. 19 Upepu dingeda, jen keca pio taue telep ngeda, awekmai nesala, yuk-yuk dinin, nimi pe nerapu pe yumada, roti cap, kue kismis cap, karepupa jepi dingeda, sun pe ati yuk-yuk tamupra bei.

20 Uda, ange yuma konum kupu dingeda, Dauddi, ‘Ne nerapu cap, ne nyapu cap, nati kunge neng yuma cap tep, telep upu peipnepa, Allahdi aneng yuma tep telep kweipkamre’ tenen, er ati tamupra beu. Beupane, er ner Mikaelda Saul er ner midi, ati pumbon di bura tara yana antapdareidi, aupu pepudi wenepu. “Kan dano? Atumida, nedi konum kael kepkene. Kanda Israel mutu neng sun deiyo ngebo Raja kumem dinin, atumi kupmamumada, pio mali nesala kuramengtopu konum kupmamume.

Ada, mut sepmamum taruda, kan lyom opkal dongomumada, kwerepna welepna kemamumdi, pereng-pereng penmakupa, kan bukke cap, nong cap, katuai kunmakue. Ukupmakupa, kan ati tali pel don neng, sun amutara kunge pel melimna nerapudi, dinmakungupa, ali dangneto kunmaumume. Akupmamum ngeda, ila deiyo neng angetopu kupmengepa, sun amutara neng epmengedi gispal donung do, auputunung do?” pepra wenepudi, nyek-nyek pepu.

21 Mikaeldi upepra wenepu pangeda, Dauddi tamupra pepu. “Gume, ne mangkau di ali dangne keca kupmaneu. Dinino, ne nai bo Allah er si Yahweh dinmanerai, er si eremna tep, mut pepra mut sepmanue, yuk ngebo tep gume. Ada, Allahdi, ‘Israel nesala, sun ila ngebo kepkamre’ tenen, wepra deipneu. Ataruda, Allahdi kan nai bo Saul men wepra deipu. Tonda angetopu, Saul er yala neng ton, aneng-aneng yumada Allahdi men wepra deipu. Aneng yuma tep, mut men sepmanue. Aneng tep gume. Gispal dopra mut sepmanuada, Allah er si eremna tep kupmaneu. Yuk deiyo tep gume. Er si eremasitopu tupa kunkamne.

22 Dinino, yuk neng dingeda, ne tep ila tulum tenenkamnenga peda, ‘Angeda mambule,’ men tenepkamne. Ange utopu, ne pedi, ne pe tep, ‘Mali kupmane,’ tenepdatenedi, ali dakdatenya peda, ange mambule gume. Dinino, kanda arup taru pepmanerem nerapuda, sundi ne tep, ‘Erda ila mambule,’ tenepkamneng ja,” Dauddi pepu. 23 Upepupa, dakuramipane, keteng tamun denge weik dakuramipane, Saul er ner mi, Mikaelda, mi tenpu peda men deiamutopu depu.