2Sa 8 | XteSC | STEP | Ware kuprap taru konum kupu pangeda, nimi deiyo ngebo Raja Daud, erdi Filistin neng porbeu. Sun aneng yumada, konum popbisipudi, Filistin nesala kurami mutu yumada, erpu dopropu.

2 Samuel 8

Dauddi, tumi-tumi yuma mar poramunge, pepu upu

1 Ware kuprap taru konum kupu pangeda, nimi deiyo ngebo Raja Daud, erdi Filistin neng porbeu. Sun aneng yumada, konum popbisipudi, Filistin nesala kurami mutu yumada, erpu dopropu. 2 Tonda, nimi deiyo ngebo Raja Daud cap, er jen talena neng capdi, Moab mutu kurami neng ton popra tapu. Ukupu dingeda, erdi, “Sunda tu deikipu mapkurume,” pepupa mapi. Upepupa, tu deiki mapi taruda, sun weneri neng amapmaiya kankan di, nimi butene-butene neng kepra popbanmaupa, depi. Atep nengeda, sun aweneri neng kankan di bokra, butene neng popi dinin, tenpu ngeboda tapipa, gam tupa kunmau. Ukupra kupbanmauanen, nimi weik tarada, poptapu dinin, nimi metek tarada, gam tupa kunmai. Atep, sun Moab nengda, nimi deiyo ngebo Raja Daud, er amu tarapu kuramidi, er kunumna tep nengeda, er tep co bo weika di kareryakarami.

3 Ange utopu, amenda taru dukdongopra, nimi deiyo ngebo Raja Dauddi, ton ngebo Rehob, erdi deiamu ngebo, erda ila nimi deiyo ngebo Raja Hadadezer cap er jen talena neng cap yumada poptapu. Raja Hadadezerda, Zoba mutu neitamai yuma taleamudi upu peramu dinino, Daud cap, er jen talena neng capdi, angebo cap, er nyapsilip cap yumada, poptapu. Zoba mutuda, ila pala mutu tenpu, Damasik tara neitamai kwamu. Ataru neitamaida, Dauddi, ila embaramu me, Efrata me pirman mutu yuma tep, ‘Ne puto weika di, amutu yuma talenunada, kange di ton cap telep kupra deipkaman’ tenen, amutu banmau taruda Dauddi, Raja Hadadezer popra tapu.

4 Nimi deiyo ngebo Raja Daud cap, er jen talena neng capdi, Raja Hadadezer popbisipi taruda, nimi porbana tep, sun kuda bisam bali deiki bukra ban nengda, seribu tujuh ratus (1.700) jen talena neng cap, tonda tali tu bisi di ban jen talena neng, dua puluh ribu (20.000) neng yuma capda, tomoprapidi ateng koupra deipi. Ukupu dingeda, nimi porbana tep, kuda bisam tapu getepra tu deiki gipra embaramu keca, er si kereta perang tep dubarami kuda bisam weik tarada, ‘Benung’ tenen, yan melmel sekdongopipa, ai bukra deipi. Ada, ‘Akuda bisamda, tupa men benmanto kupkameng’ tenen, sun bali tara yan tu sekropipa, ai bukra deipupa, aipu buki. Ukupu dinin, tupa tapu kuda bisamda, tapu di gipropmengepa bengedi, nimi porbana keca er si kereta perang ton, akuda seratus (100) ngeda ton tapu.

5 Tonda, Damasik tara neitamai dinin, ila ati arum sida, Damasik mutu kurami nesaladi, nimi deiyo Damasik tara taleamu ngebo Raja Hadadezer, er melimna tep jen neng denge weik dokotepi. Dokotepipa yai dinin, Daud cap, er jen talena neng capdi, sun Damasik mutu di yanami jen talena neng weika di poptapidi bisbisa kapi. Sundi popbisipi jen talena nengda, sun dengeda, dua puluh dua ribu (22.000) neng popi.

6 Ukupu dingeda, Raja Dauddi, ‘Amutu nesala ne amutara kunkameng,’ tenena tep, ‘Ne jen talena nengdi atara yuma kalekra talenkameng,’ tenepudi, er jen talena neng gung ton, yuk-yuk dinin, Damasyik tara neitamai deipra embaramupa, dakuramidi, atara nesala yuma sun amutara kepropi. Tonda amutu neng yumadi Raja Daud dadeipembenamupa, sun amutu neng yuma er amu kepra kuramya cadi, sundi co bo doupra yana, Daud tep kareyakarami. Tonda, atau neitamai yumada, Allah Yahwehdi nimi deiyo ngebo Raja Daud tep, erdi dan mutu do yuma, porbaramu taru yumada, Allah meliamnga deiki di, Daud er deiki porbisina deiyo keca deipnepa, telep kupra porbisiramu. Tenpu mutu neng peda, Daud tep bisbisa men kamami. 7 Tonda, Damasyik tara taleamu nimi deiyo ngebo Hadadezer, er amu tara pel dorami deiyo-deiyo nengdi taleami keca, mar podarbanai, ‘Mar popnerur’ tenen, lelimna keca er si perisai perami kecada, gat kunumna weik keca emas deiki di betapra deiami ngeda, Dauddi ange yuma dalupra dopropudi, adipapu ka tamupra Yerusalem mutu dubeu.

8 Tonda ange utopu, yuknge peda, nimi deiyo ngebo Raja Dauddi kunumna weik gat keca, er si perungguda, pio weika di dopropu ada, pumun taru Raja Hadadezer erdi taleamupa kurami mutu neitamaida, Beta mutu cap, tonda Berotai mutu cap, amutu-amutu neitamai yumadi, agat keca er si perunggu dopropudi, tamupra er pe mutu dubeu. 9 Amenda taru, nimi deiyo ngebo Raja Dauddi, Damasyik tara taleamu ngebo Raja Hadadezer cap, er jen talena neng cap yumada, konum popra gawal daku. Apopra gawal dakunge, lap pepipa, yuk ila nimi deiyo ngebo Raja Tou, ada Hamat mutu taleamu ngebodi gekepu.

10 Gekepu dingeda, nimi deiyo ngebo Raja Toudi, er mi Yoram wepra deipudi, “Raja Dauddi Raja Hadadezer popka tep, ‘Telep kupmareme,’ perbenkurume. Tonda, Raja Hadadezer erdi Damasyik tara taleamu neng yumada, kan Raja Dauddi konum popbsipmuma cadi, pio ila di telepe. ‘Ne nai bo Raja Toudi peipmakere,’ pepra, lap perbenkamarume,” pepra dokotepu. Dokotepupa, Daud damai bena, aupu pepra deipupa, lap perbeu. Raja Toudi aupu peipka deiyoda, pumun taruda, Raja Hadadezerdi Raja Tou cap, erdi taleamu nesala cap tep, podanapu kuramreiya cadi, telep kange deipudi, aupu dokotepu. Tonda, Raja Tou er mi Yoramdi, Daud er menenga karena tep, kunumna weik gat keca, emas cap, perak cap, perunggu cap, akeca yuma doupra, nimi deiyo ngebo Raja Daud er damai duyana karepu.

11 – 12 Nimi deiyo ngebo Raja Dauddi, er menenga keca, Raja Toudi dopra deipmaupa, Yoramdi Daud damai yana karepu ngeda, ada kunumna weik gat keca yumada, Raja Dauddi, ‘Ne nai bo Allah Yahweh, er si eremna cap, er gispal dona cap tep, er tepapu karepne,’ tenen, akeca yuma dopra, sun imam-imam neng sun damai karepupa, ‘Allah er mawa keca’ tenen, mawa deipi.

Ange utopu tonda, Dauddi yuk mutu-mutu yuma neitamaida, sun dakurami neng popbisiamu mutu yumada, sun emas cap, perak cap, yuk kunumna weik keca cap taleaminge yuma, Dauddi dalupra dororamunge yuma peda, Allah er gispal dona tep karepu. Ada Edom mutu cap, Moab mutu cap, Amon yala neng kurami mutu cap, Filistin yala neng kurami mutu cap, Amalek yala neng kurami cap, amutu-amutu neitamai yumada, Raja Dauddi popbisipudi, sun talerami telep keca weika di dalupra dopropudi, Allah tep karepupa, mawa deipi. Tonda ange utopu, Zorba mutu ngebo er si Rehob, erdi deiamu ngebo, Raja Hadadezerdi taleamu kunumna weik keca peda, Dauddi dalupra dopropudi Yerusalem mutu tamupra dubeudi, Allah er si eremna tep karepupa, mawa deipi.

13 Uda, Raja Daud cap, er jen talena neng capdi, Damasyik tara kurami nesala yuma popudi, tamupra er pe mutu yau taruda, nimi yuma er telep kuramunge yuma diramidi, Daud er si tep ila di eremami. Amutu neitamai kurami nesala yumada, Raja Daud er si kael keami. Ada, Edom mutu neitamai dinin, Asin tara mutu kurami neng denge pio weik, delapan belas ribu (18.000) jen talena neng popunge yumada, gekepya tep, Daud er si ila di kael kepidi, er tep weika di gispal doramami.

14 Ukupu dingeda, adipapu Raja Dauddi ati dopra, er jen talen nengpu, Edom mutu neitamai yumada, gung yuk-yuk dinin, weika di deipu. Dopra deipupa, ajen talena nengdi Edom tara yuma kalengamipa, sun Edom tara kurami nesala yumadi, Raja Daud tep, amu kepra kurami. Tonda, atau neitamai yumada, Allah Yahwehdi nimi deiyo ngebo Raja Daud tep, erdi dan mutu do yuma, porbaramu mutu yumada, Allah meliamnga deiki di, Daud er deiki puto weik cap, nimi porbisina deiyo keca cap deipupa, amutu nesala yuma tep, telep kupra porbisiramu. Tenpu mutu neng peda, Daud tep men bisbisa kamami.

Dauddi, ‘Adeiyo nengdi melimkamneng’ tenen, nimi wepra deipupa, er amutarapu pel doramya tep, seki upu

15 Ange yuma konum kupu dingeda, Raja Daud erdi, sun Israel yala nesala, dana-dana tara kurami nesala yuma tep nengeda, sun ila nimi deiyo ngebo Raja kepra, talepra kuramudi upu peramu. Tonda, erdi moupra kalekra taleamudi, sun Israel yala nesala yuma tep, pio telep kupra, dumsisi upu deiki dipapu, sun tep upu lepsisikra bongdiramu. Erdi ton tara neng tep, ‘E sunpuda, ne kayapu neng cadi, sun tep telep upu peipkamne dinin, yuk tara neng tep nengeda, mali upupu penkamne,’ tenen, dipru men wilipra kuramu. Ange pio men teneramu. Sun Israel nesala yuma tep nengeda, utotopu teneramudi, pio telep kupra anesala yuma taleramudi upu peramu.

16 – 17 Ukupra kuramu taru neitamai di, Daud nimi deiyo ngebo Raja kepra taleamu dinin, er melimna tep, er amutara pel yuk-yuk dona tep nengeda, deiyo kepra deiamu nengda, sun si ake. Ada, Seruya er mi Yoabda, jen talena neng sun deiyo ngebo kuna tep, Dauddi er wepra deipu. Tonda, Raja Dauddi, er taleamu nesala yuma tep, ‘Angeda kupkamrume, angeda pio men kupkamrume,’ pepra, deiamunge doupra, lap pena deiyo ngeboda, Ahiluddi deiamu ngebo, er si Yosafat wepra deipu. Tonda, imam-imam pel dona tep nengeda, Ahitub er mi Zadok cap, Abyatar erdi deiamu ngebo Ahimelek cap wepra deipu. Tonda, amutu neitamai kurami pel cap, yuk kuraminge yuma cap, ‘Tupa tenenkamep’ tenen, sengna pel dona deiyo ngeboda, er si Seraya wepra deipu.

18 Tonda, Yoyadadi deiamu ngebo er si Benayada, Dauddi wepra deipupa, angebodi, Daud er pe nong kalekra melimna tep, jen talena neng, sun deiyo ngebo kuramu. Ada, sun gung sida Kereti neng cap, Peleti neng cap, ajen talena neng, sun deiyo ngebo kuramu. Tonda, sun imam-imam neng pel dona tep nengeda, Israel nesala ila nimi deiyo ngebo Raja Daud, er pe nyapupu wepra deipupa, imam pel talepra dorami.