2Sa 9 | XteSC | STEP | Dauddi, “Saul er tara neng ton tupa dakunung do? Saul er mi Yonatanda, ne kabo sisa kuramneua cadi, ‘Sun yala neng tep, telep kuipkamne’ tenen, sun yala neng kan-kan, ware neng tupa kunung do?” pepra asipetepu.

2 Samuel 9

Daud cap, Mefiboset cap tep, pepu upu

1 Dauddi, “Saul er tara neng ton tupa dakunung do? Saul er mi Yonatanda, ne kabo sisa kuramneua cadi, ‘Sun yala neng tep, telep kuipkamne’ tenen, sun yala neng kan-kan, ware neng tupa kunung do?” pepra asipetepu. 2 Uda, ataruda, Saul er ati pel melimna ngebo er sida Siba tupa kuramnga cadi, yuk nengdi upupipa, Daud damai beupa, asipetepu. “Kanda Siba do?” pepra asipetepupa, “Teka neda kan amutara ngeboda, ne kunun adano,” Sibadi pepu.

3 Upepu pangeda, Dauddi Siba tep pepu, “Saul er tara neng ton tenpu peda tupa men kunung do? Ada Saul er tara nengda, ton kuramengopda, nedi sun tep telep kupra deipkamne. Ada, Allah melipnerya deiki di, aneng tep telep kupra deipkamne,” pepu. Upepu pangeda, Sibadi Daud tep pepu. “Gume Saul er tara ngeboda, tenpu ton dakurure. Ada Yonatandi deiamu ngebo, yan dana-dana tara yuma kupu mali ngebo cadi, ai bungre ngebo tenpu dakurure,” pepu.

4 Upepupa, Dauddi Siba tep asipetepu. “Ange mida dan mutu kurur do?” pepra asipetepupa, Sibadi tamupra pepu. “Ange mida, Lodebar mutu neitamai di, nimi si Amiel, er mi Makir, er ati kurure,” pepu. 5 Upepupa, Daud konum gekepu dingeda, er pel don neng tep, “Angebo Amiel er mi Makir, er ati Lodebar mutu kurur cadi, akati bena, Yonatan er mi dopra duyankunerume,” pepu.

6 Upepupa, duyai pangeda, Saul mi Yonatandi deiamu ngebo, er si Mefibosetda Daud damai yaudi, Daud er gispal dona tep, gutam tu dipra giso genepdongopu. Ukupupa, Daud kange deipudi, pepu. “Kanda Mefiboset do?” pepupa, amidi, “Teka neda kan amutara ngebo, akunun adano,” Mefibosetdi pepu.

7 Upepu pangeda, Dauddi ami tep pepu. “Kandi ne tep kwardana gume. Kan nai bo Yonatanda, ne kabo sisa kuramneua cadi, nedi kan tep, kange deipra telep kuipkamkene. Kan nai Saulda, pumun taru er wa peramu wa bun yumada, kanpu karepkenepa, talenkamreme. Tonda ne cap tonpa, me cap, jen keca cap tenpaipu jenemedi, kikiman kunkamneme,” pepu. 8 Upepu pangeda, Mefiboset kange deipudi, gutam tu dipra upepu, “Ware keca deiyo tep, ne tep telep kupra melimkamnerem do? Neda, kan pel don ngebo dinin, neda nimidi tapmenge kam utopu kununa cadi, warya tep ne tep ereipkamnerem do?” pepu.

9 Upepupa, amenda taruda, Dauddi Saul er pel don ngebo Siba tep upupupa, yau pangeda, upepu. “Kan deiyo ngebo Saulda men di konum deamu dinin, er cap, er nyapsilip cap, sun talerami bung tapinge cap, tonda sun talerami tu yuma capda, Mefiboset tep konum karepmane. Mefibosetda, Saul er mi, er si Yonatandi deipu mi tepa. 10 Ange tep nengeda, kan cap, kan nyapu cap, tonda kan melimna neng cap, sun yumadi Mefiboset er melimna tep, er wa pel donkamrume. Er wa pel doramempane, nong konum kupyopda, akeca yuma kipra Mefiboset damai duyankamrume. Ada, Yonatandi deipu mi Mefibosetdi jeprepa telep kunkamra tep pepkene. Dinino, kan deiyo ngebo Saul, er mi Yonatandi deipu mi Mefiboset puda, ne cap tonpa kunemedi, kikiman jenkamneme,” pepu. (Uda, Siba er nyapuda asuru di dana neng lima belas (15) nyapu deiamu. Tonda er ati pel don nengda, ban di dana neng dua puluh neng (20) kurami).

11 Dauddi aupu yuma konum pepu pangeda, Sibadi Daud tep pepu, “Naio, kanda ila deiyo ngebo Raja kurume. Neda kan amutara ngebo kununa cadi, kandi pepneremnge yumada, adipapu melipra pel dopbankamne,” pepu. Ataru di dipra dortaru yumada, Mefiboset cap, Raja Daud cap, kikiman tenpuai jen jeramrei. Ada, Daud er nyapu sisa bukra jen jerami utopu kuramu. Deiyoda, Dauddi, angebo Mefiboset tep, weika di bicaue teneramnga tep, er mi sisa utopu kepra kuramu.

12 Amenda taru Mefibosetdi er mi tenpu deiamu. Ami er sida, Mika. Tonda, Saul er pel melimna ngebo Siba cap, er ati kurami neng yuma cap, Mefiboset er pel don neng kurami. 13 Mefibosetda yan butene mali kuamu ngebo dinin, Yerusalem mutu ati arum doramyaipu kuramudi, amutu ila deiyo ngebo Raja Daud, er atipu jena jepra tonpa kuramrei.