2Th 2 | XteSC | STEP | Uda, Yesus teka tenepruma tep, nun weit yapu utopu kurum nesalao, mambul upu ton pepkusepe. Ada, nun Deiyo Ngebo Yesus Kristus tuai tamupra yaredi, nun yuma dopra dubenkamser taru neitamai kunkamre keca yuma tep nengeda, sundi, ‘Uo, ware kupkamep do?’ tenen, ‘Mali kange doupra, dipru sukuramserur’ tenen, upu sekdongopkusepe.

2 Thessalonians 2

‘Allah erda ne songe’ tenen, Yanina Deiyo Ngebo tep, pepu upu

1 Uda, Yesus teka tenepruma tep, nun weit yapu utopu kurum nesalao, mambul upu ton pepkusepe. Ada, nun Deiyo Ngebo Yesus Kristus tuai tamupra yaredi, nun yuma dopra dubenkamser taru neitamai kunkamre keca yuma tep nengeda, sundi, ‘Uo, ware kupkamep do?’ tenen, ‘Mali kange doupra, dipru sukuramserur’ tenen, upu sekdongopkusepe. 2 Ton neng dingeda, upenunge, “Gume sun Paulus cap, er kikiman kunge neng capdi, Allahdi peipupa amenda kupkamre keca lap pepinge cap, surat sekeipinge cap, tonda sun peterepipa gekepmupunge cap deiki di, ‘Yesus doryankamsere tumida, konum kupseue,’ pepipa, gekepmupke,” pepra penunge. Sun tali penunga cadi, upepmenge pangeda, adipapu, mali kange doupra, tenimtonapu men kunkamrume.

3 Ware nengdi do yuma, sundi aupu utopu, mok upu pepra, peterepsenge pangeda, tek men tenenkamrume. Tali men pepsepe. Apepkusen keca kapul men kupre taruda, Yesusdi, tamupra tuai doryankamser tumida, men kupkamre. Menmena kupkamre kecada, ake. Amenda taruda, nesala pio weike ban-ban yumadi, Allah cap, Allah er kun keca yuma cap tep, dabal kuprepa, pio tapra yanipkamenge. Ukupmenge taruda, ‘Allah tep, bisbisa kapkamne’ tenen, Allah er kure keca yuma tep, Yanina Deiyo Ngebo katuai erepra tekamre. Allahdi angebo tep, ‘Ila di wenepra poptapkamne,’ konum tenepu.

4 Allah er kun keca Yanina Deiyo Ngebodi, nesala ban-ban yuma, ‘Nun deiyo keca’ tenen, Allah utopu si pepra, si eremenge keca yuma tep nengeda, erdi yanirure. Erdi, Allah kun keca yuma tep nengeda, ‘Nepu deiki tara kunedi, akeca yumada ne amutarapu kupkamre’ tenen, erdi er pe tep, erepdankamre. Angepu gume, sun Yahudi yala nesaladi, Allah er si eremna tep, ila mambul deiyo ati domi ngeda, angebodi akati wekra, ‘Nesala ban-ban yuma gekenkameng’ tenen, “Nepuda, Allah kunune,” pepra, erdi er pe sipu eremdidankamre.

5 Ne kayapu, ukupu pepmasen upuda, sun konum luprorum do? Ne cap kuramepu taruda, aupu yuma, ataru-ataru yuma, ton cap peramsisi. 6 Dinino, sun kaele, angeboda, ‘Allahdi teneamu taru dipapu katuai tengyankamre’ tenen, ukutaruda, angebo kapul taru, ‘Tali lupra yarur’ tenen, daramdongore kecada, sun kaele.

7 Allahdi, ‘Yanina Deiyo Ngebodi, tali lupra yarur’ tenen, daramdongorur dinino, ukutaru konuma, Allah er kun keca yuma tapra, yanirya deiyo keca putoda, nesala kan-kan di, konum inipra pel dorure. Mali kuna tep, puto deiyo kecada, konum pel dorur dinin, Allahdi wepra deipu ngebodi, akeca pio talepra daramdongoramyanen, Allah tenepre taru konum kupyopda, Allahdi aputo ngebo konum dopropredi, goipropre pangeda, amali kuna deiyo keca putoda, tali lupra katuai kupkamre.

8 Allahdi wepra deipu ngebo, amali keca darapdongopu ngeboda, dopropredi gopropyopda, konum dopropre pangeda, ataru dipapu, iniamredi, Allah kun keca yuma tep, Yanirtamna Deiyo Ngebo jenek kupkamre. Ukupra dakuramrepane, amendada, nun Deiyo Ngebo Yesusdi, er pepkamre upu deiki di, amali ngebo tep, bisbisa kapkamre. Tonda, Yesus er pio telep kupra dirin weik yankamra deiki di, amali kuna deiyo ngebo tep, poptaprapredi, gum kupra deipkamre.

9 Allah er kun keca yuma, Yanina Deiyo Ngebo yankamre taruda, tali mesumpu men yankamre. Gume, Kain Jen Ngebo er puto weik kuretopu, aputo deiki di, wareto mambul keca do yuma, kunupsek pen pel cap, nimi men kupmanto keca cap, ‘Teka tenepkamneng’ tenen, ila puto kun keca cap, pel weika di donkamre. Ukunkamre dinino, ayumada, tek sisinge gume, ada Kain Jen Ngebo, er mawa di kun keca, mok keca pel dopkamra deiki di yankamre.

10 Tonda, Kain Jen Ngebo er pelda, wareto mali kun keca do, yala-yala yuma, mok pel donmarepane, sun Allah tep teka tenena gum nesala, amenda depmengepa, kange di ton cap gam pio men kunkameng nesalada, amok keca yuma tep, teka tenenkamenge. Anesalada, Allah er tek sisi upu tep, dabale kupupa, “Nun songe, aupu deikida nun kange men deipkamepe,” pepra tamya tep, Allahdi sun tep men lyepu. Ange tep nengeda, Allahdi aneng tep, poprepa pio denapu kunkamenge. Pio dounkamenge. Allah cap, kikiman pio men kunkamenge.

11 Allah er upu tep, “Nun songe,” pepra tamya tep, Allahdi sun tep, ‘Anesala mok kecapu teka tenenkameng’ tenen, kange wang-wang peredi, kange yawaramamra utopu keca, aneng tep ila putonge karerure. 12 Tonda, ware nesala do yuma, sundi, Allah er tek sisi upu tep, “Aupuda nun songe,” pepra tamamidi, mali kun keca yala-yala yuma tep, sun kange deipra, tali lupra kuramenge nesala yuma tep, Allahdi utenerure. Ada, ‘Ne ila di wenepra, poptapkamne’ tenen, sun tep, ila kange wang-wang pena keca kareramrepa, mok kecapu teka tenepra kununge.

‘Tenimtona gum di, teka tenepra, pio dimpeprappu kunkameng’ tenen, pepu upu

13 Sun mali neng tep nengeda, ukupkamre dinino, sun Tesalonika nesala tep nengeda, nun adipapu, “Telepe,” pepra, Allah moronkamsenupe. Ne weit yapu utopu nesala, ne Paulusdi pepsene. Allahdi sun tep, er kange deipseudi, akeca-keca yuma ketekeipu taru di, ‘Anesalada, ne mawange,’ teneamseudi wepra deiamseue. Wepra deiamseua deiyoda, tali tep gume. Ada, ‘Allah, ne Lek Sambaladi, sun dipru neitamai pel doseredi, telep kemdiserenge cap, sundi ne tek sisi upu tep, teka tenengenge cap deiki di, lyepkamne’ tenen, wepra deiamseue.

14 Allahdi sun tep, ‘Anesala lyepkamne’ tenen, wepra deiamseua tep nengeda, ada nundi sun Tesalonika mutu nesala tep, Allah er kai telep upu, nimi lyemna upu peteremamsepua deiki di, Allahdi sun tep upupseue. ‘Ukunkameng’ tenen, upupseua deiyoda, ake.

Ada, nun Deiyo Ngebo Yesus Kristus cap, er yankamre taru kupkamre keca cap, urasin pio telep kupra yankamre. Ataruda, nesala yumadi er tep, gispal dopra, er si ila di eremkameng taruda, ‘Sun Tesalonika neng peda, kikiman utopu ukunkameng’ tenen, upupseue.

15 Ange tep nengeda, nun weit yapu utopu nesalao, surat sekeipmepunge pe, meneng damai di upu deiki di peteremamsepunge peda, ayumada pio moupra talemumdi, kange tenimtona gum dipapu, pio dimpeprap kunkamrume.

16 Telepe ne kayapu, nun nai bo Allahdi, nun yuma tep, bicau teneamseudi, er kange dipapu tali kareamseu keca tep pepkusene. Ada, ‘Pio kunkamser keca, kwar dangna gum dipapu, kange deipra, duka di kuna deiyo keca cap, uda, amenda telep keca yankamser’ tenen, kange deipra, dinapu kun keca cap, kareamseue. 17 Nun Deiyo Ngebo Yesus Kristus cap, nun nai bo Allah cap, sun butene di, ‘Sun Tesalonika nesala tep, sun dipru kwa dimkamsereng’ tenen, Allah morosenupe. Tonda, ‘Sun telep pel donkamrumnge cap, telep upu penkamrumnge cap tep, puto keipserenga di, teleppu kunkamrum’ tenen, Allah morosenupe.