2Th 3 | XteSC | STEP | Telepe nun kayapu, sundi nun tep, Allah moronkamserume. Ada, nundi Yesus er kai telep upu, nimi lyemna upu dopra, sun damai peteremamsepupa, teka tenepra telep kuramruma utopu, ‘Yuk mutu nesala peda utopu kunkameng’ tenen, Allah moronkamserume. Ada yuk nesala weike ton cap gekepmengedi, teka tenepra, ‘Aupuda, ila mambule’ tenen, ‘Allah upu tep, kange deipmengedi, teka tenena nesala menmena weik kupbankameng’ tenen, Allah moronkamserume.

2 Thessalonians 3

Paulusdi, “Allah moronkamserume,” pepra moropu upu

1 Telepe nun kayapu, sundi nun tep, Allah moronkamserume. Ada, nundi Yesus er kai telep upu, nimi lyemna upu dopra, sun damai peteremamsepupa, teka tenepra telep kuramruma utopu, ‘Yuk mutu nesala peda utopu kunkameng’ tenen, Allah moronkamserume. Ada yuk nesala weike ton cap gekepmengedi, teka tenepra, ‘Aupuda, ila mambule’ tenen, ‘Allah upu tep, kange deipmengedi, teka tenena nesala menmena weik kupbankameng’ tenen, Allah moronkamserume. 2 Tonda, nesala ban-ban yumadi, teka men tenenunga cadi, sun pio mali kun nengdi, Paulus cap, er kikiman pel donge neng cap tep, ‘Mali kupmengedi, popnung’ tenen, Allah moronkamserume. 3 Sun anengda, mali kudisenung dinino, Allah erpuda, tamna gum di, er perur upu yuma, tek sisi gawal dakrur ngebo cadi, ‘Kain Jen Ngebodi, sun tep, mali kupra deipserur’ tenen, sun kange dipru, puto kemdiseredi, moupra kalengkamsere.

4 Nun Deiyo Ngebo Yesus melimserya deiki di, nundi sun tep, ‘Mali kunung do, gum do?’ tenen, kange tenimtona men kuserure. Ange gum dinin, nun kaele, nundi sun tep, “Ukunkamrum, ukunkamrum,” pepra derisenup keca yumada, sun konum utopu kurume. Tonda, pio ukunkamrume. 5 Uda, nun Deiyo Ngebo Yesusdi, sun melimserya deikida, Allahdi sun tep, ila di bicaue teneseredi, makusere keca yumada, ‘Ila di kael kepmumdi, er cap dipru dukdongopra kunkamrum’ tenen, Allah morosenupe. Tonda, er melimserya deiki di, Yesus Kristus ikin keca akuramnga peda, Yesus Kristus tamna pio gum dipapu, pio pe deipra, pel puto di doramutopu, ‘Sun peda utopu kunkamrum’ tenen, Allah morosenupe.

“Pel talepra kuna gum di, tali kunada mali,” pepu upu

6 Uda nun kayapu, sunda nun weite-du utopu nesala kurume. Nun Deiyo Ngebo Yesus Kristus, er si deiki di, aupu pepra deipkusepe. Ada, ware ngebo do yuma, teka tenenung dinin, tek sisi pel talepra dona gum dinin, tali-tali kungedi, nundi peteremamsepu utopu kuna gum dinin, yuk kupmengedi, mali kungopda, aneng cap kikiman men kunkamrume. Beipra yukaipu kunkamrume. 7 Angeda tali tep men pepsepe. Sun peda sun kaele. Nun peteremamsepudi, telep kupra kurameputopu, sun adipapu kunkamrume. Sun cap kikiman kuramepu taru yumada, tek sisi pel tapra, tali-tali men kuramepu. Pele pio telep kupra doramepu.

8 Tonda, yuk nesala sun jen keca dopra, tali mesum dipu men jeramepu. Ajen keca kunumna tep, co bo karepne dipapu jeramepu. Yuk neng sun jen kecada, talipu men jeramepu dinin, sun yuma tep teneramepudi, ‘Gume, anengda ikin keca sun nong deiki men deipkamepe’ tenen, keteng komuni pe, lukunda peda, pio pe deipra, pel weik doramepudi, kunumna deiki dipapu jeramepu.

9 Nunda deiyo neng kunupa cadi, ‘Sun jen keca tali mesum dipu karepsetenge’ tenen, mororamsetepe dinin, ange men kuramepu. Ange men kupmanto tenena tep men kuramepu. Ange men kupmepunge deiyoda, ‘Nundi telep kupra kuramepepane, anesala sun kael kemna tep, nun kupe keca epra kael kepsengedi, sun utopu kunkameng’ tenen, ukuramepu. 10 Sun cap kikiman kuramepu taruda, nundi sun tep, “Gume, ware ngebo do yuma, pel tek sisi men pel dore ngeboda, jen men jeptue. Talipu kunkamre,” pepra peteremamsepupa, konum gekeramruma tep, angeda, sun konum kaele.

11 Uda, yuk nengdi, nun damai yana pesengepa, gekenupada pepkusepe. Sundi, upesenunge. “Tesalonika mutu nesala kan-kan di, ton nengda pel tek sisi talepra men donunge. Tali-talipu kununge. Sundi, yuk neng kunge keca tep, dipra embana cap, upu tali pertamna cap, luludina cap kununge,” upepra pesenunge. 12 Ange utopu kunge nesala yuma tep nengeda, nun Deiyo Ngebo Yesus Kristus si deiki di upenupe. “Ukuna meme. Tali-tali kuna cap, tali embana cap, yuk neng kun keca tep upu pertamna cap, men kunkamrume. Tek sisi pelpu talepra kunkamrume. Sundi jerum keca yumada, pel dopmumpa, kunumna keca karepsengepa, adeiki dipu jen kunupra jenkamrume. Tali morona gume.” Sun tali-talipu kunge nesala tep, aupu penupe. 13 Sun telep neng tep nengeda, upesenupe. “Ataru-ataru yumada, tamna pio gum dipapu, dumsisi kuna cap, telep kuna cap adipapu pio kunkamrume. Dabal kuna meme,” pepra pesenupe.

14 Ware ngebodi do, nundi asurat neitamai sekeipmap upu men gekepredi, tapra yanipyopda, angebo tep moupra tenenkamrume. Er cap kikiman kuna gume. Kurapropkamrume. Ada, ukupmum pangeda, erdi, ‘Uo, ne mali kunmanpa, kunmanenge’ tenen, ‘Ali kupkamre’ tenen, pepmasepe. 15 Ukunkamrum dinino, angebo tep nengeda, ‘E angeboda, nun podan ngebo utopu kurur’ tenen, yu kuprepa, ‘Pio song,’ tenena gume. Erda, sun weit utopu ngebo cadi, ‘Er mali kun keca tapkur’ tenen, bouna di wenepra peterenkamrume.

Gawal dangna tep, pepu upu

16 Uda, Allahda ikin kuna cap, podana cap gum di, pio teleppu kupra, kange deipra kuna deiyo ngebo, erdi sun tep, ataru-ataru yuma cap, sun kun keca neitamai yuma cap, ‘Kange deipra telep kuna deiyo keca pio karenkamser’ tenen, Allah morosenune. Tonda, ‘Allahdi, sun melipserepa, er cap dipru dukdongopra kikiman kunkameng’ tenen, Allah morosenupe.

17 Paulus, ne buru dipapu asurat sekeipsene. Yuk ngebodi gume. Ne sengnepa, surat deiki sengna keca urasin kuryada, sun kaele. Ne sengne surat yumada, urasin utopu kurura cadi, sun kaele. Ukuprappu sengnune.

18 ‘Nun Deiyo Ngebo Yesus Kristusdi, sun yuma tep, bicau teneseredi, er kange dipapu melimsere keca pio karenkamser’ tenen, Allah morosenune. Telepe akonuma.

Ne Paulusdi asurat sekeipsene.

Acapu deipne.