2Ti 1 | XteSC | STEP | Telepe, ne Paulusdi Timotius tep asurat sekeipkene. Kanda, ne kange derikenun ngebo kuruma cadi, kanda ne mi pepkene. Allahdi ne tep, ‘Angeboda, Yesus Kristus er upu dopra peterembana tep, gonga kemna deiyo ngebo, Rasul kunkamre,’ teneamneudi, wepra deipneua tep, apelpu donune. Allahdi, “Yesus Kristus tep, nesala ban-ban yuma teka tenepmengopda, pio gam kuna deiyo keca karenkamsene,” pepra, pediramseu upu dopra, ne Paulusdi peterembanune.

2 Timothy 1

Paulusdi, ‘Telepe’ pena tep, pepu upu

1 Telepe, ne Paulusdi Timotius tep asurat sekeipkene. Kanda, ne kange derikenun ngebo kuruma cadi, kanda ne mi pepkene. Allahdi ne tep, ‘Angeboda, Yesus Kristus er upu dopra peterembana tep, gonga kemna deiyo ngebo, Rasul kunkamre,’ teneamneudi, wepra deipneua tep, apelpu donune. Allahdi, “Yesus Kristus tep, nesala ban-ban yuma teka tenepmengopda, pio gam kuna deiyo keca karenkamsene,” pepra, pediramseu upu dopra, ne Paulusdi peterembanune.

2 Uda, ne mi Timotiuso, nun nai bo Allah cap, nun Deiyo Ngebo Yesus Kristus cap, sun butene di, kan Timotius tep, bicau tenekerengedi, sun kange dipapu tali melipra puto kemdikerenge keca cap, uda, nun mali kuna tep, adipapu wenepra poptapsereteng dinin, ange kaukemserengedi, nun putasere keca mesum dipu kareserenge keca cap, tonda, ‘Yuk neng cap yu tenedana gum di, kange deipra teleppu kikiman kunkameng’ tenen, karekerenge deiyo keca cap, karekerunge. ‘Ange yumada, tupa-tupa weika di tapakra karenkamkereng’ tenen, nedi kan Timotius tep Allah moronune.

Paulusdi Timotius tep, ‘Tamna gum di, pio pe deipra, pel telep kupra donkamre’ tenen, pepu upu

3 Ne apu yapudi, Allah er si erepra, er pelpu doramitopu, ne peda utopu, ne kange dipru neitamaida, mali keca inimna pio gum di, Allah er sipu eremnedi, tonda er pel tep, pio dumsisipu kunedi, pel donune. Ataru neitamai yumada, keteng komuni pe, lukunda pe yuma, Allah tep morone taru neitamai, kan tep tenekenedi, kange deipra Allah tep, “Telepe,” pepra moronune. 4 Kan cap, ne cap kikiman pel doramnumu dinin, yuk-yuk benumu taruda, kandi engepmum ngeda, tupa tenekenune. Atep, ‘‘Uo, ne mi Timotius cap antaptenemedi, kikiman kutenemyopda, ‘Ne kange deipra pingpinga di kunkamne’ tenen, pio putanerure. 5 Tonda, kange di ton cap tenekene kecada, pepkukene. Ada, kan nau ner sisa, er si Lois cap, kan nin sisa, er si Eunike cap, sun butene di, tenimtona pio gum dipapu, Allah tep ila di teka teneamreitopu, kan peda Allah cap, Yesus cap tep teka tenerume. Ne kange bongtona gum di, kan tep, konum kael keamkesi. Ada, ‘Angebo Timotiusda, Yesus tep tek sisi ila di teka tenerure,’ tenekenune.

6 Ange konum kael keamkesa tep, aupu ton pepkukene. Ada, pumun taru ne buru kan nong deiki deipra, Allah moropkesa deiki di, Allah er pel dona deiyo keca karepkeue. Uda, nimidi, ‘Nun uku taprur tep, uku bu ila di jepkur’ tenen, si puto di uku puramengtopu, kandi, ‘Allah er pel dona deiyo keca karepneua deiki di, pel pio telep kupra donkamne’ tenen, pio pe deipra piripetepkamrume. Allahdi, er puto konum karepkeua deiki di, pe deipra pel donkamrume. Ne Paulusdi pepkene. 7 Puto di pel donkamrume pepmakena deiyoda, ake. Ada, Allah er Lek Sambaladi, pel dona tep puto karesere kecada, ‘Kwar-kwar kunkameng’ tenen, men kareserure. Ange gum dinin, puto kuna cap, yuk nesala yuma tep bicau tenena cap, ‘Mali kuna ngeda, tali lupra men kunkune’ tenen, dipru kalengdana cap, ‘Atelepnge yuma kunkameng’ tenen, er Lek Sambaladi puto kareserura tep pepkene. Allahdi, kwar dangna cap, tenimtona cap tenena ngeda, men kareserure. Dipru dimpepra, puto di tali lupra kuna keca kareserure.

8 Ange tep nengeda, nun Deiyo Ngebo Yesus, er upu lap pepra peteremna tep, kwar dangna cap, tonda, ‘Uo, yuk nengdi autunkamneng do?’ tenen, ali dangna cap, pio men kunkamrume. Ange utopu, ‘Uo, ne peteremnerur deiyo ngebo Paulusda, ateng koupra wenemna ati dongopya tep, ne ali dakra kunkamne,’ tenena gume. Ange yuma gum dinin, nedi nimi lyemna tep, Yesus er kai telep upu peterepnepa, mali nengdi ne nong deiki ikin keca weik derinenungtopu, kan peda utopu, ‘Ukupnenga peda telepe pua,’ tenen, kunkamrume. Utenepra kan peda balila kunkamrumada, Allah er puto melipra kareserya deiki di kunkamrume.

9 Allah er puto deiki di nun tep, ‘Mali keca yuma tapra, dumsisi kun nesalapu kunkameng’ tenen, upupseudi konum lyepseue. Ukupseuada, nun telep kupra pel doramupka deiki di men lyepseu dinino, erdi menop taru konum teneamseutopu, erdi nun tep bicau tenepseudi, er kange dipapu nun tep tali melipra lyepseue. Allah er kange dipapu bicau teneamseudi, ‘Yesus Kristus pel donkamra deiki di, anesala melipra lyepkamne’ tenen, keteneiamseu ngeda, ada Yesus Kristus deiki di keteneiamseu. Angeda, akeca-keca yuma kapul men ketekeiamu taru di, nun Lyemna Deiyo Ngebo Yesus Kristusdi, ‘Anesala lyepkamre’ tenen, konum keteneiamseu.

10 Dinino, ukutaruda Yesus Kristus nun Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Yesus tep aupu pepu. Lap pena nomor 17 dirume.} tuai mutu konum yaseua deiki di, Allahda, Yesus Kristus deiki di lyemserurada, konum katuai kupra deipseupa, kael kemnupe. Yesus Kristus er pel dopseua deiki di, nimi dena deiyo keca konum bisbisa kapudi, gum kupra deipu. Ukupseudi, nimi lyemna tep, Yesus er kai telep upu peteremenga deiki di, tek sisi gam kuna deiyo keca cap, bol koptapra pio gam kunkamepnge capda, konum jenek kuserepa, kael kemnupe.

11 Uda, nimi lyemna tep, Allahdi, ‘Paulusda, Yesus er kai telep upu dopra peterembana tep, gonga kemna deiyo ngebo kunkamre. Menop taru di, aupu men gekerami mutu nesala, menmena lap perbenkamre. Tonda, Allah upu peteremna deiyo ngebo kunkamre,’ teneamneudi, wepra deipneue. 12 ‘Apel donkamre’ tenen, wepra deipneupa, apelpu donuna cadi, yuk nesaladi, ‘Nun songe’ tenen, ikin keca weika di, ne nong deiki derinenunge. Ukunenunga cadi, ne kange mun kange doupra, ikin kunerure. Dinino, ikin keca ne nong deiki kapnerya peda, nedi, ‘Uo’ tenen, ali men dangnune. Ada tali tep gume. Deiyoda ake. Ne kange tenimtona pio gum dipapu, ne teka teneamsi ngeboda, ne kaele. Nedi Allah tep, ‘Pio moupra kalengkamner’ tenen, er deikipu moupra deiamsinge yumada, men gum kupnetue. Ukutaru di dipdongopra, Yesus tamupra er yankamre taru dinin, aneitam taru yumada, Allahdi kalengneredi, dinkamnere. Ne Paulusdi pepne.

13 Uda, ne mi Timotiuso, nedi peteremamkesi keca yumada, Allah er upu peseretopu dumsisipu peteremamsa tep, angepu talepra, kan pedi utopu peteremkamrume. Ukupra peteremkamrum taru yumada, Yesus Kristus cap, dipru dukdongopra kumemdi, yuk nesala tep bicau tenena cap, Allah tep teka tenememnge cap, ayuma pio moupra talepmemdi kunkamrume. 14 Tonda, nun deiyo neng cap, Allah er Lek Sambala capdi kan tep, ‘Erdi aupu talepra peteremkamre’ tenen, kan deiki deipkepu pel dona deiyo keca yuma, kandi, ‘Angeda wangapnerur’ tenen, pio kange moupra kalengmemdi, didankamrume. Ukupra kunkamrumada, Allah er Lek Sambala, nun kange dipru neitamai kuserure ngebodi, er puto kareserya deiki di, moupra kalengdankamrume.

15 Tonda, Timotius, kan kaele. Asia tara teka tenemi nesala yumadi, ne tep konum tapnei. Anesala kan-kan sun Pigelus cap, Hermegenes cap, sun butene neng peda tapnerei.

16 Dinino, Onesiporus cap, er ati kunge nesala cap yuma tep nengeda, ‘Allahdi anesala yuma tep, wenemna gum di, sun putana utopu, bouna di melipra karenkamre’ tenen, moronune. Deiyoda, tenpu tarupu gum dinin, Onesiporusda, yuma taru yuma weika di, ne dipru kwa diramneue. Tonda erdi ne tep, ‘Uo, Paulusda ateng koupra wenemna ati dongopya tep, ne ali kupnerur tep, er damai men benkune,’ pio men teneramneue. 17 Ange gum dinin, ne Roma mutu neitamai kuramsipane, erdi Roma mutu yau dingeda, ‘Paulus dan cei kurur do?’ tenen, pio pe deipra eramneuanen, antapnemudi, melimneue.

18 Tonda Timotius, kan konum kael kepmume. Pumun taru Efesus mutu neitamai pel doramsi taruda, Onesiporusdi ne putaramneu keca cap, akeca-keca yuma tep, weika di meliamneue. Ukuramnga yuma tep nengeda, ne putanerepa utenenune. Ada, ‘Uo, nun nai bo Allahdi Onesiporus tep kange deiptudi, Yesus tamupra yankamre taru, upu bokeipkamser tumida, Allahdi tali popra tapmemetu dinin, angebo er mali kuramunge yuma tep kaukepra, wenemna gum di, tali melipra telep kupra deipkamemere’ tenen, moronune.