2 Timothy 2

“Ikin keca kukerya peda, kange tenimtona men kunkamrum dinin, puto di kunkamrume,” pepu upu

1Uda, Timotiuso, kandi Yesus Kristus tep, teka tenepra er cap dipru dukdongopra kumem taru neitamai yumada, Yesusdi kan tep bicau tenepra, er kange dipapu pel dona deiyo keca melipra karekerya deiki di, pio puto di kunkamrume. 2Tonda, nedi yuk nesala gekerami mutu peterep embaramsipa, kandi gekeramum upu yumada, kan peda aupu dopra, yuk telep neng, ila kael kepmanto neng tep peteremkamrume. Peteremkamrum nengda, tali neng gum dinin, sundi “Ukunkamepe,” pepra pengetopu, angepu tek sisi kungedi, teka tenepmanto neng tep peteremkamrume. Tonda, anengdi yuk nesala tep, telep-telep kupra petereptenge nengpu wepra peteremkamrume. Tali-tali dakunge nengda gume. 3Tonda, sun jen talen nengdi, ‘Ikin keca akapserya peda, telepe pua,’ tenengedi, pio pe deipra, ikin pel doramengtopu, ne cap, ne kikiman kunge neng cap, ikin kupser dinin, ange tenena gum di, ‘Yesus Kristus er pel don neng, er jen talen neng utopu kunkamepe’ tenen, pio pe deipra pel donupe. Ukunuptopu, Timotius kan peda utopu tenepra kunkamrume.

4Ukuda, ukupmanto upu pepkukene. Tali-tali kunge nesaladi tenepra kurameng keca yumada, sun jen talen neng sisa di, akeca talepra men kununge. Ange gum dinin, ‘Ne ila deiyo ngebodi kange deipkamner’ tenen, sun deiyo ngebodi pere upupu, moupra gekengedi, apelpu donunge. 5Ange utopu, sun esu penge nengdi, ‘Sepdaro banmanyanen, menmena benyopda, menenga keca karepkamnenge,’ teneptenge dinin, esu pena deiyo nengdi, ‘Ukupra, ukupra sepra bankurume,’ pepmengetopu men gekepmengedi, talipu bangopda, tek sisi menenga keca men dopropkamenge.

6Ange utopu, wa pena deiyo ngebodi, pio pe deipra puto weika di pel dore ngeboda, amenda taru awaidam kouamu keca konum wisipyopda, awa pemu ngebodi menmena kipra jeramre. Yuk neng yumada, amenda tarupu kia jenunge. 7Nedi ukupmanto upu deiki di pepmaken upu yumada, kandi, ‘Deiyo dan do?’ tenen, moupra tenipetepmempa, Allahdi, “Aupu nong neitamai ngeda ake, deiyo ake,” peprap katuai kupra deipkerepa, moupra kael kemkamrume.

8Nun apu bo Dauddi deipupa, dadeipdanen yakaramyanen, amenda taru deipi ngebo, Yesus Kristusda, dakuramnganen, amenda popipa depu dinin, kange di ton cap, Allahdi Yesus gam bukeipupa, gam tupa kurure. Ukupu ngeda, ayuma tupa tenenkamrume. Aupuda, Yesus er nimi lyemna tep, kai telep upu neitamai akapupa, dopra peteremnune. 9Yesus Kristusdi nimi lyemna tep, er kai telep upu dopra peteremnepa, yuk nengdi, ‘Aupuda nun song’ tenen, ikin keca weik, ne nong deiki derinengepa, kange mun kange doupra kunune. Tonda, jen talen nengdi, sun pio mali kunge nesala tomopmengedi, ateng koupra wenemna ati dongoramengtopu, Yesus er upu peterep embaramsipa, ateng koupra wenemna ati dongopnei. Dinino, nimidi Allah er upuda, ateng men kouptenge. Er upu peteremepepa, nesala gekepmengedi, teka tenepmengopda, weika di tapakbankamenge.

10Allah er upuda, men sekdongopmanto kurura cadi, ware ikin keca do yuma, kange mun keca akapmanerya peda, ange tenena gum di, apelpu donkamne. Ukununada, tali tep gume. Deiyoda ake. Allahdi menop taru, ‘Ne nyapu kunkameng’ tenen, wepra deiamu nesala yumada, Yesus Kristus pel dopseua deiki di, lyemna keca keteneipseu ngeda, ‘Tek sisi dopropkameng’ tenen, apel pio men tamnune. Tonda, ‘Dopropmengepa, amenda taru Allahdi telep kupra deipserepa, amenda taru doryankamre taru neitamai yumada, pio teleppu gam kunkameng’ tenen, kange mun kange doupnedi, ikin weik kunerya peda, nedi pe deipra pel pio donune.

11Apepkuken upuda, pio tek sisi upu cadi, moupra tenepmemdi, pio peteremkamrume. Aupuda, ake.
‘Allahdi nun cap, Yesus cap, dipru dukdongopseua tep, Yesus depu taruda, nun cap dukdongopra depmupka cadi, er pio gam kunkamre taruda, nun peda er cap, kikiman gam pio kunkamepe.’
12‘Ikin keca nun nong deiki akapserya peda, tamna gum dipapu, pio pe deipra pel donapu kuramepyopda, amenda taru Yesusdi akeca-keca cap, nesala ban-ban yuma cap tep, talepredi, Ila Nimi Deiyo Ngebo kunkamre taru yumada, nun cap, er cap, akeca yuma kikiman talepra kunkamepe.’
‘Dinino, nundi er tep, “Erda nun songe,” pepra, tapmepyopda, erdi nun pe tep, “Anesalada ne walwale, ne nyapu sisa men kununge,” pepra tapkamsere.’
13‘Nundi, “Ukunkamepe,” pepra, pedina upu penup dinin, puto boun kupserepa, nundi pel men dopmanto kuseredi tapmepya peda, Yesusdi, “Ne nyapu tep ukunkamsene,” pepra pedisere upu yumada, tek sisi kunkamsere. Tenpunge peda, men tapkamre. Erdi peretopu kunkamre. Ada, er pedi er pe tep, men tapmanto kurura tep pepne.’

‘Allah er pel donai tep, telep ngebopu kunkamne’ tenen, “Piripetenkamrume,” pepu upu

14Uda, Timotiuso, nedi pepkuken kecada, ‘Teka tenenge nesaladi, tupa tenenkamenge’ tenen, kanda sun gekenai di, kange di ton cap, pio peteremnapu kunkamrume. Ada, “Allah diseredi, upu bokeipkamsera tep, kange moupso,” pepra peteremkamrum upuda, ake. Ada, “Nimidi tali-tali upu tep, yu kuprepa, pedanung kecada, yapso,” penkamrume. Tonda, “Upu deiki di pangdarumada, telep men kudidarume. Upu tep pangdarum nesala cap, pangdarumpa, epmengedi aupu gekenge nesala cap, malipu kudidanunge,” pepra peteremkamrume.

15Ange men kunkamrum dinin, Timotius kanda, ‘Allahdi kange deipkamner’ tenen, tonda, ‘Pel pio telep kupra dona ngebo kunkamne,’ tenenkamrume, pepkene. Tonda, ‘Allahdi kupetepneryopda, “Angeboda, telepe pua,” pepkamnere. Allah er tek sisi upu peseretopu, dumsisi peteremna ngebo kununa cadi, ali men dangkamne,’ tenepra kunkamrume. ‘Ukupnyopda, Allahdi kange deipkamnere,’ tenepra kunkamrume. Aupu pio tenepra kunkamrume. Ne Paulusdi Timotius kan tep pepkene.

16Tonda, aupu peteremkamrume. Allah pio dumsisi kuretopu gum dinin, tali nengdi, pio mali-mali upu pertamamenge ngeda, sun upu gekena gume. Aupu gekenge nesala cap, aupu penge nesala capda, konum mali kunung dinin, aupu penunga deiki di, Allah er kure keca utopu gum dinin, weika di ton cap pio mali kupbankamenge. 17Ukupmanto upu pepkukene. Sengne susu gonga kepra jesere taruda, metekpu kuserur dinin, pio jeramseryanen, weik kupbaryopda, ila kot susu jeserure.

Ange utopu, apio mali upu penge nesala, peteremenga deiki di, nesala weika di ton cap, mali kudinunge. Ange utopu peteremna nengda, Himeneus cap, Piletus cap kurerunge. 18Aneng buteneda, Allah er tek sisi bisi baramrei dinin, konum lerekrap, yuk mali bisi bereidi, mok kecapu talepra kurerunge. Abutene nengdi, “Gume, Allahdi konum deami nesala gam bukra deipkamrada, konum kupu,” pererunge. Aupu peteremrenga deiki di, ton nesala gekepmengedi, Yesus tep teka tenepbange ngeda, konum tamnunge. Yesus tep teka tupa men tenenunge.

19Anesalada ukunung dinino, Allahdi peipseu upuda, men gum kupsetue. Ukupmantoda, pio telep ayumnya co, gat co ikmengepa, men longlong peptupa, pio dimpeprap kuramretopu, Allahdi peipseu upuda, men gum kuptue. Allah er upu neitamai sekami upu deiki di, katuai kupra deipseue. Aupuda ake.
‘Allahdi, ‘Anesala ne nyapu kunkamenge’ tenen, konum wepra deiamseu nesalada, er konum kael keamseu.’ (Bilangan 16:5)

Tonda,
‘Ware nesala do yuma, “Allah tep konum teka tenepsa tep, er mi kunune,” penge nesala yumada, adipapu mali kun keca yuma tapmengedi, amnyo karikra dumsisi bisipu bankamenge.’

20Uda, Timotiuso, ne Paulusdi yuk domon upu ton pepkukene. Ila ati doramenga neitamai yumada, akeca-keca weik derinunge. Ton keca tep nengeda, ‘Ange dopra ila mambul taru tep, mambul pelpu donkamepe’ tenen, kunumna weik keca, emas cap, perak cap dopropmengedi ketenepra derinunge. Ton keca tep nengeda, ‘Akeca dopra, tali tumi yuma deiki di mambul gum pel, tali pelpu donkamepe. Akecada mambul gume’ tenen, tali akwapre keca, co cap, tapu cap, gat tu cap dopropmengedi, ketenepra derinunge. Ton ngeda, petupra derinunge.

21Ange yambul utopu, ware ngebo do yuma, mambul gum keca cap, mali keca yala-yala yuma cap tep, taptu dingeda, telep pel dona ngebo kuptue. Ukupmantoda, erda ila ati pum kunumna weik keca kuretopu, ila mambul pel talepra dopmanto ngebo kunkamre. Ato ngebo, er deiyo ngebo Allahdi angebo tep, er mali kun keca gum kupra deipre dingeda, angebo tep telep kweipkamre. Telep konum kupyopda, ila mambul pel yala-yala yuma talepra, er nai bo tep, telep pel melipra dopmanto ngebo kunkamre.

22Atep Timotiuso, sun kaber nesaladi mali keca putaprepa, mali kuramenge keca tep, beipra karenai yuk kunkamrume. Amali keca yuma tapra, Allahdi, ‘Ukunkamrume,’ peseretopu kupra, dumsisi kun kecapu talepra kunkamrume. Tonda, Yesus tep teka tenena cap, yuk nesala tep bicau tenepra makuna cap, mali kange doupra yu tenena gum di, yuk neng tep, kange deipra, ‘Bouna di kikiman kunkamepe’ tenena cap, akeca yumada, pio tenenapu kunkamrume. Ada, kanpu gum dinin, sun yuk nesala, mawa di tali pertamna gum dinin, sun kange dipru dumsisi kunge nesaladi, nun Deiyo Ngebo Yesus tep, teka tenenung nesala cap, atelep kecapu tenepra kikiman kunkamrume.

23Uda, sun yuk nesaladi, ‘Deiyo ake,’ men tenipmanto upu dinin, walwal di pepdangepa, yu kuprepa, upu deiki pangdanung upu yumada, kandi men gekenkamrume. Tali-tali upu cap, walwal di penung upu cap, upu talepmengedi, yu kuprepa, deremdana cap, pangdana cap, penung upu yumada, telep kupra men deipsetue. Kan kaele, aupu yumada mali kudiserura tep, aupu yumada, gekena meme. Tonda, ato upu penada, pio gume.

24Tonda, kan pe, Allah er pel dona tep melimna nesala peda, upu deiki di yu kuprepa, deremdanada pio men kupkamenge. Yu kuprepa, mali upu pedana gum dinin, Allah er pel melimna nesaladi yuk neng tep, dipru bouna di telep kupra adipapu melimkamenge. Yuk neng tep adipapu telep kupra peteremkamenge. Yuk nengdi, Allah er pel don neng tep, mali kupsenga peda, ‘Mali kupra deipmanenge,’ men tenenkamenge. Akeca tep kaukepmengedi, tupa tenenapu men kunkamenge. Dipru bouna dipu telep kunkamenge.

25Yuk nengdi, Allah er upu peteremna ngebo tep, ‘Nun song’ tenen, er upu yanipmengedi, ‘Bisbisa kaptepe’ tenen, piripetepmengopda, er yu kuprepa deremdana gum di aneng tep, telep upu peprap, bouna di peteremkamre. Sun walwal di kunge keca tep, lepsikra peterememdi, tek sisi upu lap penkamrume. Ada tali tep gume. Ada, ‘Allahdi aneng tep, sun dipru neitamai pel melipra doptupa, sundi, “Nun mali kun keca tapmepe,” peptengedi, Allah er bisipu tamupra yankameng do?’ tenen, bouna di peteremkamrume. Sun mali keca tapmengopda, Allah er tek sisi upu kael keptengedi, telep kupkameng do, gum do? Nun walwale dinin, ‘Allahdi anesala tep ukupkamre do?’ tenen, telep kupra peteremkamrume.

26Tonda, Kain Jen Ngebodi, ‘Ne mali pelpu donkamneng,’ tenen, anesala sun kange dipru ateng koupra deipka cadi, er ikne pumbon utopu kununge. Dinin, Allah er tek sisi upu kael keptenga deiki di, ‘Uo, nun mankau di mali kuramepu dinino, ukuda, konum kael kepmapa tep, ange tapkupe,’ moupra tenepmengedi, ‘Telep bisipu tamupra yankameng’ tenen, bouna di peteremkamrume.