2Ti 3 | XteSC | STEP | Timotiuso, apepkuken upuda, moupra tenenkamrume. Amenda taru, tuai mutu yuma gum kupkamra tep, sirya gawal dakamre taruda, kange mun keca weik kunkamre.

2 Timothy 3

“Sirya taruda, nimi ban-ban yumadi, Allah tapra pio mali weik kupbankamenge,” pepu upu

1 Timotiuso, apepkuken upuda, moupra tenenkamrume. Amenda taru, tuai mutu yuma gum kupkamra tep, sirya gawal dakamre taruda, kange mun keca weik kunkamre. 2 Nimi ban-ban yumadi, pio mali kunkamenge kecada pepkukene. Ada, sundi sun pe teppu tenenapu kunkamenge. Yuk neng tep, bicau tenepra men makunkamenge. Tonda, ‘Co bo weika di doproptepe’ tenen, ila di putarepa, dipru engerepa, kunkamenge. Anesala yumadi, “Nunda pio telep neng,” pepra, sun pe kange dipru erepra deipdangedi, gemena cap, salnong-nong kemna cap, yuk nesala tep yu kuprepa, sun deiki mali upu pepra derinkamenge.

Ukupmengedi, sun nai yapu cap, sun nin yapu cap penge upu tep, balila kupra men gekenkamenge. Tonda, yuk nengdi telep kweipsengepa, anengdi, “Telepe,” pepra, gispal men donkamenge. Allah kure keca yuma tep, ‘Nun song’ tenen, tapmengedi, pio malipu kunkamenge. 3 Yuk nesala yuma tep, bicau tenepra men makunkamenge. Yuk nengdi mali kusenge keca tep, ‘Dakwapye’ tenen, kaukemna gum di, pio tenenapu kunkamenge.

Yuk nengdi, ton nesala tep, ‘Mali neng, tenepkameng’ tenen, mok upu dinin, “Anengdi mali kunge kecada ake,” pepra, luludinapu kunkamenge. Tonda anengdi, ‘Mali kupnun do?’ tenen, kange moupra tenena pio gum di, sun tenenge keca yuma, tali lupra kunkamenge. Sundi yuk neng tep, yu weik kuprepa, ponapu kunkamenge. Telep kun keca yala-yala yuma tep nengeda, ‘Nun song’ tenen, tamkamenge.

4 Anengdi yuk neng tep, mawa di telep upu namdina tep, tali pertamkameng dinin, amendada yu weik kuprepa, aneng deiki, ila ikin keca derinkamenge, ton nengda poptapkamenge. Tonda, sun kupkunge keca tep, ‘Ukupnyopda, amenda taru ware kupkamner do?’ tenena gum dipapu, ‘Tali lupra kupkune,’ tenepra, mali kecapu talepra kunkamenge. Sirya taru kunkameng nesaladi sun pe tep, ‘Nunda pio telep neng, nunpuda pio mambule’ tenen, sun kange eremdidangedi, salnong-nong kunkamenge. Anengdi, Allah er kure keca cap, Allah er cap tep, kange men derinkameng dinin, sun pe putan keca tepapu, ‘Kange deipra tali-talipu kunkamepe,’ tenepra mali-malipu kunkamenge.

5 Allah er si eremna cap, er tep gispal dona cap tep nengeda, tali nong bol deikingepu kunkameng dinin, sun dipru neitamaida, ‘Allah er upu cap, er kure keca cap utopu kuptepya peda, ayuma deiki di er puto weksetudi, puto men keipsetue’ tenen, kunkamenge. ‘Allah er putoda men kurura cadi, ange yumada, nong men kupkamre kecapu,’ tenepra kunkamenge. Sirya taru kunkameng nesaladi, apepmaseutopu kunkamenga cadi, Timotius kanda, aneng utopu neng cap kikiman kuna gume. Beipra karenai yuk kunkamrume. Ne Paulusdi pepkene.

6 Arup pepmasentopu neng, sun kankan neitmai di, mali kunge neng tep, aupu ton pepkukene. Sun mawa di telep upu pepra namdangedi, yuk nesala ati wekra kikiman kununge. Yuk neng tep, gekena telep upu pepra namdangedi, konum wekmengopda, akati kunge nerapu tep, tali ul upu pertamna deiki di pengepa, anerapu gekepmengopda, anerapu sun amali neng tara kepronkamenge. Anerapuda, ‘Ange kupkun do, gum do? Telep ngeda dan do?’ tenen, pio tenimtonapu kunge nerapu tep, anengdi anerapu sun kange dipru gidon upu pepmengepa, gekepmengedi, aneng tarapu kemdongonkamenge. Sun penge upuda, anerapudi tali lupra gekepmengedi, teka tenenunge.

Anerapuda, sun mali kun keca weika di kununga cadi, dumsisi bisida men banunge. Tonda, sun kange dipru neitamai mali kecapu putarepa, akecapu tenenunga deiki di, sun dipru gidorepa, yuk mali bisi lerekra banunge. 7 Anerapudi, ‘Peterepsengepa, kael kepkupe’ tenen, kael kempetenung dinin, nong men kupkamra cadi, sundi moupra men kael kepmanto kunkamenge. Anerapudi, ‘Allah er tek sisi pesere upu ake’ tenen, moupra men kael keptengedi, aupu gekepra men taleptenge. Pio tali-talipu kunkamenge.

8 Mok upu peramenge dinin, yuk nesala ati inipra wengkameng nesalada, Allah er tek sisi upu yuma tep, yaniptapmengedi, upu sengnunge. Pumun taru kuramrei neng Yanes cap, Yamberes cap, Musadi peramu upu tep yanipreidi, er upu sengamreitopu, ukutaru anengdi utopu, Allah er upu tep, yaninapu kunkamenge. Sun kange dipru neitamai yumada, pio gwalipupa, konum malipu kupka cadi, sundi Allah tep teka men teneptenge. Allahdi sun tep, kange men derirure. 9 Pumun taru Yanes cap, Yamberes capdi, Musa upu yaniramreipane, amenda taruda, yuk nesala yumadi, ‘Gume, sun abutene nengdi kurung kecada, pio walwal di kurerunge. Ange yumada, nong men kupkamre kecapu kurerunge’ tenen, kael keami.

Ange utopu, asirya taru mok penkameng nesala tep nengeda, yuk nengdi, ‘Gume, sunda pio walwal dipu penunge,’ tenepra kael kepkameng ja. Atep, yuk nesala weika di dopra, mali bisi men dubenkamenge. Ne Paulusdi pepkene.

Paulusdi Timotius tep, “Kange moupra kunkamrume,” pepra deipu upu

10 Sirya taruda, sun mali neng ukunkameng dinino, Timotius kanpuda, ange utopu men kunkamrume. Kandi ne kuramsi keca yumada, konum kael keamnemume. Ada, ne pel dopra kuramsi keca cap, ne peteremamsi upu cap, nedi, ‘Ukupkamne’ tenen, pel doramsa deiyo keca cap, Allah tep teka tenenun keca cap, ikin keca kwamneu dinin, deremna gum, bouna di kuramsinge cap, yuk neng tep bicau tenepra makuramsinge cap, ikin kuramneu dinin, tamna gum di, pio pe deipra pel doramsinge capda, ange yuma kan konum kael kemamnemume. 11 Tonda, Allah upu peteremamsa tep, mali nengdi ne nong deiki ikin keca weik deriramneinge cap, yuk ikin kwamneunge cap, ayumada kan konum kael kemamnemume.

Tonda, Antiokia mutu cap, Ikonium mutu cap, Listra mutu cap, peterembesi taru neitamai, Allah upu peteremamsipa, amutu nesaladi, ‘Nun song’ tenen, ikin keca weik ne nong deiki deriramnei dinin, men tamamsidi, pio pel donapu kuramsinge peda, kan konum kael kemamnemume. Kange mun keca weik kuramneua neitamai, nun nai bo Allahdi loptapra lyepneue.

12 Mali nengdi, ‘Allah upu nun song’ tenen, ikin keca weik ne nong deiki deiamnei ngeda, ada ne teppu gume, tek sisi ngeda, ware nesala do yuma, ‘Yesus Kristus cap, dipru dukdongopra kupedi, Allah upu peseretopu, dumsisipu kunkamepe,’ tenenge nesala yuma tep, mali nengdi sun nong deiki kange mun keca derinkamenge. 13 Ataru neitamai yumada, mali kunge neng cap, mok upu mawa di perameng neng cap, mali konum kunung dinin, weika di ton cap tapakra, pio mali-mali weikanun ton kupbankamenge. Sundi yuk neng tep, ‘Mok keca tep teka tenenkameng’ tenen, mok upu tali mawa di pertamkamenge. Ange utopu, yuk nengdi anesala tep, yuk mok upu ton pengepa, anesaladi teka tenenkamenge.

14 Timotiuso, sun mali nengda, pio malipu kupbankameng dinino, kanpuda, gume. Allah er upu konum teka teneamumdi, kange bongtona gum dinin, teka tenepra kael keamumdi, puto di taleamum keca yumada, tamna pio gume. Sundi peteremamkei nesalada, dumsisipu kuramipa, anesala yuma kan tupa teneruma tep, kange tenimtona gum di, dimpeprap kumemdi, tek sisi upu yuma talenkamrume.

15 Tonda, kan melo mi kuramum taru di dipra, aneitam taru yuma, Allah er pio dumsisi upu peteremamkeipa, konum kael keamume. Allah upu peteremamsenga deiki Allahdi, nimi tep lyemserur upu cap, lyepserepa, telep kunkamnup keca cap yumada, kan konum kael kepmume. Nundi Yesus Kristus tep, teka tenenupa deiki di, Allahdi lyemserure. Ange yumada, Allah er upu deiki di kael kemnupe.

16 Allah upu sengaminge yumada, Allah er dipapu pediramupa, sun dipru neitamai gekeramidi, upu sengami. Allah er dipu aupu yuma pediramnga cadi, er upu dopropmepedi, nimi peteremna cap, mali kupmengepa, “Mali kupmarumada ake,” pepra, wenemna cap, amali kupbandenkap, “Ange yapra, telep kunada ake,” pepra lepsikra peteremna cap, tonda, “Mali kun keca yuma tapra, Allah upu peretopu dumsisi kunada ake,” pepra peteremna cap, ayumada Allah upu deiki dopropmepedi, apel-apel yuma telep kupra donupe. 17 Apepmaken pel yuma donupa deiyoda, Allah er tep teka konum tenenung nesala yuma tep, pio telep kupra peterepmepepa, kael kepmenga deiki di, ‘Telep pel yala-yala yuma, telep kupra kunupsek pepra pel donkameng’ tenen, Allah upu dopra peteremepepa, sun cap, nun cap, apel yuma donkamepe. Aupu yumada ne Paulusdi pepkene.