2 Timothy 4

Allahdi, ‘Ne pel donkamner,’ tenemkeu pel yumada, “Doramemyanen, gawal dangkamrume,” pepra, Paulusdi Timotius tep, pepu upu

1Ukuda, ne mi Timotiuso, Allah cap, Yesus Kristus cap, sun damai kunupa cadi, sun butene di dinmaserengpa, aupu pepkukena tep, kange moupmemdi gekenkurume. Yesus Kristusdi, sun konum deami nesala pe, er yankamre taru tupa gam kunung nesala peda, upu bokeipkamsere. Tonda, er kange di ton cap tuai mutu tamupra katuai yaredi, akeca-keca yuma talepra, ila deiyo ngebo kunkamsera tep nengeda, aupu tali gekertamna gume. Tek sisi adipapu ukunkamrume.

2Ne Paulusdi, kan tep, puto di aupu pepra deipkene. Ada yuk nesaladi kange deipra, “Peterepseo,” penge taru pe, uda, dabal kuprepa, “Peteremna nun songe,” penge taru peda, kanda, ‘Ware tenepkuneng do?’ tenena gum di, ‘Allah upu peterepkaman’ tenen, ketenem dinapu kunkamrume. Mali kupmenge taruda, kandi, “Ange yapso, telep kunada ake,” pepra lepsikra peteremkamrume.

Tupa mali kunge nesala tep, “Angeda meme. Yapso,” pepra, upu sengkamrume. Telep konum kunge nesala tep, “E, angeda telepe, ange utopu pio tupa kunkamrume,” pepra, sun dipru kwadimkamrume. Apepmaken pel donkamrum taru yuma neitamai di, pio moupra tenepmemdi, Allah er upu peseretopu, telep kupra peteremkamrume. Tonda, anesala yuma tep, menmena deremna cap, dabal kuna cap gum dinin, bouna dipu peteremkamrume.

3“Ukunkamrume,” pepmakenada, tali tep men pepkene. Deiyoda ake. Ada, amenda taruda, mutu-mutu nesala yumadi, ‘Allah upu peseretopu nun dabale’ tenen, dumsisi peteremna upuda, tupa men gekenkamenge. Peteremne upu tek sisinge gum dinin, ‘Nun kange deripenge cap, nun putapserenge cap, angepu pepra peterepkamseng’ tenen, “Bulupso,” pepmengepa, peteremna neng, tali-tali nengpu bulumkamenge. Bulupmengepa, anesaladi, sun tali upu peteremna neng tep, “Nundi moropmepengepu, peterepseso,” pepra moropmenge upupu, sun tali peteremna nengdi angepu peteremkamenge. Tek sisi Allah upu peseretopu, pio men peteremkamenge. 4Anesala yumadi, Allah er tek sisi upu peseretopu putarepa, men gekenkamenge. “Angeda nun dabal tep, nun songe,” pepmengedi, tali-tali pertamenge upu, nong men kupkamre upu cap, nenong utopu tali upu cap, angepu gekenkamenge.

5Sunda ukunkameng dinin, kan Timotius puda, kange tenimtona cap, kange wang-wang pena cap men kunkamrume. Yuma taru yumada, kange moupmemdi, moupra tenenkamrume. Ikin keca weik akapkerya peda, tamna gum di, pio pe deipra pel donkamrume. Allah upu kapul men gekerami nesalada, ‘Sun ton gekeptenge’ tenen, Allah er nimi lyemna upu kai peterembanapu kunkamrume. Allahdi kareamkeu pel yumada, tenpunge peda tamna gum di, gawal dakbankamrume.

6Aupu pepmakenada, tali tep men pepkene. Deiyoda ake. Yahudi yala nesaladi Allah er gispal dona tep, gam keca popra karerami taru dinin, ‘Akeca pio telep kweipkup’ tenen, gawal dangna tep, anggur me ton dopra, akeca deiki dingdongoramitopu, neda ange utonun kunune. Ada, Allah teneamneutopu pel dopbaramsanen, gawal dangne taru damai kupnera cadi, ne depkamne taru damai kupnere. 7Uda, ukupmanto ngeda, sun jen talen nengdi, tamna gum dipapu, mali neng tep porbaramengedi, bisbisa kamamengtopu, konum kuramsi. Tonda, kamet pen nengdi, ‘Menenga keca dopropkup’ tenen, tamna gum, pio piripra sepdaro baramengtopu, konum kuramsi. Apepmaken upu nongda, Allah cap, er upu cap tep, teka teneamsi ngeda, men tamamsidi, pio dimpepra tupa talenune. Allah kareamneu pelda, konum dopra gawal dakbanmane.

8Ukupra kuramsanen, ukutaru peda, tupa kununa cadi, Allahdi menenga keca keteneiamneuada, tek sisi dopropkamne. Ada, Yesusdi nesala ban-ban yuma tep, upu bokeipkamser tumida, pio dumsisi upu bongdina deiyo ngebo Allahdi ne tep, mali keca yuma daepneredi, pio telep dumsisi ngebo kupra deipkamnere. Menenga keca dopropkamnada, ange pua. Pio telep kweipkamnerada, ne teppu gume. Ange gum dinin, ware nesala do yuma, ‘Uo, nun Deiyo Ngebo Yesusdi, kange di ton cap tuai mutu tamupra yatudi, dopra dubesetue’ tenen, dipru engepra, ketenepra dinapu kunge nesala yuma tep, menenga keca karepkamsere ngeda, pio telep dumsisi nesala kweipkamsere. Ne Paulusdi pepkene.

Asurat gawal dangna tep, pepu upu

9Ukuda Timotiuso, ‘Paulus damai menmena benkune’ tenen, pio piripetepkamrume. 10Deiyoda, ne melipneu ngebo Demasda, tali tuai mutu kure keca yuma tep, ‘Angeda mambule. Ne doproptene’ tenen, dipru engeramnga tep, konum tapneudi, Tesalonika mutu beu. Kereskesda, Galatia tara beutopu, Titusda, Dalmatia mutu konum beu. 11Atep, ne melimna ngebo, tenpu ngebopu Lukas cap kikiman kunume. Atep, Timotiuso, kandi ne damai yankamrem taruda, Markus dopra denkamnerume. Allah er pel donun taruda, Markusdi telep kupra melimnerura tep pepkene. 12Ne kabo Tikikusda, Efesus mutu dokotepsi.

13Uda, Teroas mutu neitamai ne kabo Karpus cap kikiman kuramnumu taruda, ne deiki kenengne lyom bupu opkal luprosidi, tapsi. Timotius kandi ne damai yankamrem taruda, aopkal cap, ne buku cap, ne surat cap kipra denkamnerume. Ne tapsi buku-buku yuma denkamnerum dinin, ‘Ila mambule,’ tenene ngeda, ada, gam kun keca poprapidi, bol koptapra ketengai kalapipa, gelal sepupane, abol deiki Allah upu seki nge, er sida galungan, angeda lumdongona gume. Ange peda dopra duyankamnerume.

14Uda, yuk upu pepkukene. Tenpu ngebo er sida Aleksander, ada gat keca, er si tembaga dopra, akeca-keca ketenepra derirur ngebodi, ikin keca pio weika di ne nong deiki deriramneue. Erdi ne tep, kange mun keca weik kareamneu. Atep nengeda, Allahdi angebo tep, kwang dakredi, er wenemna tep, kange mun keca weik karenkamemere. 15Nundi Allah upu peteremamepunge tep, Aleksander puto di upu sengamseudi, yaniramseua cadi, Timotius kandi, ‘Angeboda mali kupnerur’ tenen, kange moupra kalekmemdi, moupra dinkamrume.

16“Paulus mali kupunge ake,” pepra, ‘Upu bokeipkamep’ tenen, yu nengdi ne dopra, upu bongdina deiyo neng damai dubenei taru menmena ngeda, ne upu melimna tep, tenpu ngebo peda, ne damai yana upu pepra men melipneue. Sun yumadi, ne tapra bendopnei. Ukupnei dinin, ‘Anesaladi ne tapneinge tep, Allahdi sun tep men wenepredi, tali kaukepkamre’ tenen, Allah moronune. 17Aneng yuma tapnei dinin, nun deiyo ngebo Yesus, ne damai yana melipneua deiki di, er puto karepneupa, ne upu telep kupra peramsa deiki di, ataru bulupra yakarami Yahudi yala gum nesala yumadi, Allah er nimi lyemna upu gekerami. Ataruda, anesaladi tali lupra poptapmanetenge. Dinino, Yesusdi loptapra lyepneua tep, sundi men popnei.

18Ataru di melipneutopu, amenda yankamre taru neitamai yumada, mali nesaladi ne tep, ‘Paulus poptepe,’ tenepnetenge dinin, ne kaele, nun Deiyo Ngebo Yesusdi lyemkamnere. Ukupra kuramneryanen, amenda taruda, erdi akeca-keca yuma talepra, ila deiyo ngebo kunkamraida, telep kupra dopropneredi, im deiki dubenkamnere. ‘Nesala ban-ban yumadi, er Yesus tep, er si erepra, er gispal pio tep donkameng’ tenen, putanerure. Apepmantopu, ‘Upuptenge’ tenen, “Amin,” pepne.

“Ne kayapu tep, ‘Telepe pepmasere,’ pepra deipkamnerume,” pepu upu

19Ne mi Timotiuso, ne kayapu Akwila cap, er ner Pereskila cap, uda, ne kabo Onesiporus cap, er ati neng yuma cap tep, “Paulusdi telepe peipmasere,” pepra kai upu peipkamrume. 20Nun kabo Erastusda, Korintus mutu tupa kunmare. Tonda, Miletus mutu benumu taruda, ne kabo Terofimus pu jepka tep, erda amutupu tapra besi.

21Timotiuso, bul war li kupkamra damai kuprea tep, akeca kapul men yanmare taru, ‘Menmena ne kai yanetume’ tenen, moropkene. Ne cap kunge nesaladi kan tep, “Telepe,” pedikenunge. Sunda, Ebulus cap, Pudes cap, Linus cap, Kelaudia cap, uda, amutu teka tenenung nesala yuma capdi, kan tep, “Telepe,” pepkepe. 22Nun Deiyo Ngebo Yesus cap, kan cap dipru dukdongopra kikiman kunkamker taru neitamai yuma, ‘Melimkamker’ tenen, Allah morokenune. Tonda, ‘Allah er kange dipapu bicau tenekeredi, kan pel dona tep puto melipra karenkamker,’ tenen, Allah morokenune.

Telepe, ne Paulusdi pepkene.

Acapu deipkene.