Abuku seku deiyo ngeboda, Yohanes kuramu. Asuratda, erdi weneri taru seku surat cadi, abuku sida 3 Yohanes penupe. Yohanesda, Yesusdi wepra deiamu neng, sun 12 neng kan-kan ton kuramu. Yohanesdi, asurat cap, butene ton cap sekra, asurat weneri deiki er si deipu. Asuratda, weneringe sekra deipu. Tonda, Yohanesdi, Injil Yohanes cap, buku Wahyu cap sekra deipseue. Yohanesda, Asia tara neitamai peterep embaramudi, Efesus mutu ton embeua cadi, asuratda, Asia tara neitamai dinin, Efesus mutu kuramu taru di, sekra dokotepupa, Asia tara nesala dopra embaramidi, dirami.

Yohanesdi, surat butenenge deiki di aupu pepka cadi, Asia tara nesaladi, ukurami. Ukurami dinin, ton taruda, Yohanes pedi dokotepu peteremna neng, tenpu mutu peterep embeipa, amutu nengdi, ‘Mok upu peteremna neng do?’ tenen, tapidi, men melimami. “Aneng men melipkamepe,” pepra pepu deiyo ngebo er sida, Dioterepes kuramu. Dioterepesda, mali ngebo kuramnga cadi, Yohanesdi dokotepu peteremna neng tep, melipi nesala peda, tapu di, “Nun Allah upu ati wengna meme,” pepra dokotepu. Ukupu dinin, yuk ngebo, er sida Gaius, erdi Yohanes dokotepu neng melipka cadi, Yohanesdi, Gaius tep, “Er telep kupu,” pepra seku.

3 John

Yohanesdi, ‘Telepe’ pena tep, pepu upu

1Neda kan deiyo ngebo Yohanesdi ne kabo Gaius tep upu sekukene. Allah er upu teka tenepra talenedi, kan tep bicau tenekenune.

2Ne kao, Allah teka tenepmumpa, kan dipru cap, kan sambala cap telep-telep kupra kukeretopu, ‘Kan nong pe kip kupra kumempa, akeca-keca yuma telep kupra kunkamkere’ tenen, Allah moronapu kukenune. 3Allah teka tenena tep, nun cap, weite-du utopu kunge nengdi, kan kurum keca tep yana lape pepnei. Sundi upepnei. “Gaiusda, Allah er tek sisi upu pio tamna gum di, talenapu kurure. Tonda, Allah upu pesere utopu, Gaius moupra gekeredi, angepu talepra teleppu kurure,” pepra kan tep pepneipa, ne ila kange deipsi.

4Ne Yohanesdi peteremamsipa, teka tenepi nesala tep, “Anesalada, Allah upu peseretopu, moupra gekengedi, pio telep kupra kununge,” yuk nengdi pengepa gekenunada, pio kange telep derinune. Yuk telep kange derinun kecada, yambul pua. Ila ngeda, atenpu.

5Ne kabo, bicau tenekenune. Uda sun teka tenepipa, nun weite-du utopu kunung nengda, kan ton men di men dirume. Tonda, aneng men kael keamum dipunen, sun aneng makuna tep, tamna gum di, pel tupa domemnyada, teleppu kurume. 6Kandi sun tep, bicau tenepra makuramum ngeda, sundi yuk Allah teka tenepi neng yuma tep, lape pekenunge. Allah er pe, nun kupyai yasetupa, makuptepetopu, aneng pe tep, telep kupra makupmemdi, sun benkamengai, “Telepe, dabeso,” peprap, melipra dokotepmemnyopda, angeda telepe pua. Yuk teka tenena neng makupmemnyopda, ada yambulanun Allah er pe tep makuna utopu kuruma tep pepkene.

7Teka tenena gum nesaladi, aneng tep men makuramipane, ‘Yesus er si deiki di pel donkamep’ tenen, sun pe mutu tapra, Yesus er nimi lyemna kai telep upu peterembana tep, yuk mutu pel dopembaramyanen, tupa apelpu dorbanunge. 8Ange tep nengeda, ‘Aneng cap, nun capdi, amsepu pel melipra doptepe pangeda, yuk nesala pe ton, Allah er tek sisi upu gekepkameng,’ tenena tep, ato neng makunkamepe. Anengda, sun putapre keca yuma tep, makunapu kunkamepe. Ada, jen keca do, ati manai do, akeca yuma tep, makunapu kunkamepe.

9Uda yuknge ton pepkune. ‘Sun Allah teka tenerum nesala yuma gekepkamrum’ tenen, surat seksisi dinino, tenpu ngebo er si Dioterepesda, yuk nengdi ne tep, ‘Erda pio ila ngebo kurure tenepkamnenge’ tenen, pio putarepa, nun upu men gekeserure. Erdi nun tep, ‘Sun yuke,’ teneserure.

10Ange tep nengeda, nedi kan damai yatenetoda, er Dioterepes tep, “Er kure keca yuma adano,” pepra katuai di lape pepkamne. Ada, erdi nun tep, ‘Yuk nengdi Yohanes cap, er nyapsilip cap tep, mali tenepkamenge’ tenen, erdi yu kuprap, minina upu peserura tep, pepkene. Tonda, angepu gume. Dioterepesdi, nun weite-du utopu kunung nesala tep, “Telepe,” pepra, pio men namdorurdi, men makurure. “Ne gume, Yesus teka tenenge nesalada, nedi men melimkamne,” perure. Tonda, yuk nengdi, ‘Gume, anengda, nun weite-du utopu kununga cadi, nun dipu, “Telepe,” pepra makupkamepe,’ tenenung neng tep nengeda, Dioterepesdi, ‘Ne mutu nengdi napropnung’ tenen, “Sun yapso,” pepra upu sengdongorure. Ukuredi, “Allah upu ati ton cap men wengkamrume,” peprap, nun tep makupmanto kunge neng tep, tamrure.

11Ne kabo Gaiuso, mali kun kecada, dipterepmemdi, beipra yukai kunkamrume. Mali kun nengdi kuramengtopu, kanda pio men kunkamrume. Mali kun keca gum dinin, telep kun kecapu epra, angepu kunkamrume. Ware neng do yuma, telep kupra kwiryepu kunge nesalada, Allah cap, amse kungedi, Allah er nyapu kununge. Sun mali-mali kunung nesalada, Allah tep moupra men kael keamiya tep, er kure keca moupra men tenenunge. Tonda, teka men tenenunge, pepne.

12Yuknge ton pepkune. Yuk nesala yumadi, nun kabo Demetrius tep, “Erda teleppu kurure,” pepra penunge. Tonda, Allah upu peseretopu kurur ngebo cadi, Allah upu deiki di ton, ‘Demetriusda, teleppu kurure,’ tenenupe. Utopu ton, nun peda, er tep, “Teleppu kurure,” penupe. Angeda tali men penupe. Tonda, sun kaele, nundi peramep upu yumada, tek sisipu penupe.

13Uda upu weikanun akupmanerada, surat lyoma di seksetene dinino, kertas cap, sengna keca cap deiki di, sekra men pepkusene. 14Deiyoda ake. ‘Sun damai yanedi, sun pe nong ton epkamsene,’ teneprap putanerura tep, sun damai yankamne tarupuda kikiman bukmepedi upu sisingkamepe. Atep konuma, ‘Sunda telep kangepu dounkamrum’ tenen, Allah morosenune. Sun kayapu, ne damai amutu kunge nesaladi sun tep, “Telepe,” peipsenunge. Tonda, sun damai kunge neng, nun kayapu, sun mutu neitamai kunge nesala tep, sun si yuk-yuk si pepra, “Yohanesdi sun tep telepe peipsere,” pepra aneng tep peipsurume.

Telepe ne Yohanesdi akonum pepne.