Act 1 | XteSC | STEP

Acts 1

Allahdi Yesus dopra im deiki dubeu upu

1 – 2 Telepe, ne kabo Teofilus, ne menmena seksi buku neitamaida, Yesus er kuramunge cap, er peteremamunge cap yuma, er gonga keprap adinen, pel dopbaramnganen, sirya erdi wepra dokotepupa, er upu dopra peterembarami neng tep, Allah er Lek Sambala puto deiki di, “Ukunkamrume, ukunkamrume,” pepra konum pepkopda, im deiki konum welepunge yumada konum seksi. 3 Yesus er kange mun keca yuma konum dopropudi, er wepra deipu neng tep, ‘Er tek sisi gam bukmare, tenepkamneng’ tenen, sun damai belepra tekembaramudi, ‘Yesusda, tek sisi konum gam buku,’ tenepmengedi, kange bongtona gum dipapu, ‘Tek do, telel do, men tenepkameng’ tenen, pio tek sisi keca weika di pel dopudi, er wepra deiamu neng tep yana lap pepu. Tonda, ton tumi di, ton tumi di, denge weik 40 tumi deiki di belepra tekembaramudi, Allahdi teka tenenung neng lyepseredi taleserur upu, er nyapu tep lap peramu.

4 Yesus cap, er nyapu cap, kikiman tup kunmaidi, jen jepi taru, tenpu tumi di, ‘Tek sisi kunkameng’ tenen, aneng tep aupu peipu. “Sunda, Yerusalem tapra yuk mutu men benkamrume. Ne naidi, ‘Akeca tek sisi tali karepkamsene,’ peipupa, ne peteremamsipa gekeramrum kecada, ‘Tek sisi karepkamsere’ tenen, dinapu kunkamrume,” pepu. 5 “Uda, Yohanesdi nesala dopra me pumbonpu dongoramu dinin, amenda taru, Allahdi er Lek Sambala dokoteprepa, sun dipruai wekamre pepsene,” Yesusdi pepu.

6 Yesus cap, erdi wepra deiamu neng, tenpu tumi kikiman kunmaidi, anengdi Yesus tep asipterepi. “Naio, ataru dipu nun Israel nesaladi ban-ban yuma nesala talepkamepa deiyo keca kange di tamupra karepsememdi, nun kan-kan di tenpu ngebo, ‘Ila nimi deiyo ngebo kunkamre’ tenen, erepra deipkuserem do gum do?” pepra asipterepi. 7 Asipterepipa, Yesusdi aneng tep tamupra pepu.

“Ne nai er puto deiyo cap, er talepka deiyo cap, akeca dipu, ‘Ataru ukupkamne, atumi ukupkamne’ tenen, men di tenepudi, konum wepra deipu ngeda, akecada, sun deiyo gum tep, men kael keptume. Erdi sun tep men lap pepkamsere. 8 Dinino, Allah er Lek Sambala sun dipruai yana wekseredi, puto weik karepserepa, dopropkamrume. Dopromumdi, Yerusalem kunge nesala cap, Yudea tara kunge nesala cap, Samaria tara kunge nesala cap, mutu sirik im sirik kunge nesala cap, ne kuramsinge cap, peteremamsipa gekeramrumnge cap, dopra peterep embenkamrume,” Yesusdi pepu.

9 Yesus aupu konum pepkopda, sun adinmai tarupu, Allahdi Yesus dopra im deiki welenmauanen, dua kan-kan weku pangeda, dua di leliproupa, sun men epi. 10 Men epi dinin, er tupa welenmau taruda, sun tupa urasin ereiya dinmaipane, nimi butene kurun opkal keamrei neng dato-dato di menmena aneng damai tengyarei. 11 Tengyareidi aupu peprei, “Sun Galilea mutu nesalao, aca tekrapmumdi, warya tep im dup pio dinmarum do? Sun damai Allahdi Yesus dopra im deiki welepmar ngeboda, sun asuru di epmarumpa, im deiki welepmara utopu, amenda taru erpu tamupra yankamre,” peprei.

Yudas yo pununa tep, Matius wepra deipi upu

12 Yesus konum welepu pangeda, zaitun co du mouramu mutu tep, mutu si Zaitun mutu perami mutu di, sun tamupra Yerusalem mutu bei. Ada, Zaitun mutu di Yerusalem mutu bana tep, tenpu Sabat tumi ^{▼▼Sabat tumi – Sun Yahudi yala nengda, ‘Sabat tumida, beipye peingna tumi cadi, pel dona utopu keca men kuptepe. Pel dopmepyopda, Allahdi derepserur,’ tenerami. Atep, sun beipye peingna tumida, Sabat tumi perami tumi neitamaida, ‘Bisi banada 1.100 meterpu betepe. Karen mutu men betepe,’ tenerami.} deiki meneng damai mutu embaramitopu, atumida sun pe utopu bei.

13 Yerusalem ati arum domyai sun kunmai atipu tamupra konum beiyopda, sun ke tarupu kunmai ati apu, alau ati ^{▼▼Alau ati perami ngeda lap pena upu, nomor 27 dirume. Ada sun atida, gat keca di domiya tep, tenpu ati arum deiki tara alau tara ton, yuk ati ton domi. Ukuramya tep, sun atida bertingkat kuramu.} welepi. Ataru kunmai neng sida ake. Peterus cap, Yohanes cap, Yakobus cap, Anderias cap, Pilipus cap, Tomas cap, Bartolomeus cap, Matius cap, tonda, Alpeus er mi Yakobus cap, Simon Patriot perami ngebo cap, Yakobus er mi Yudas cap, aneng yuma kunmai. 14 Aneng yuma cap, Yesus er nin Maria cap, Yesus er weit yapu cap, ton yuk nerapu ton cap, sun yuma atumi-atumi yuma buluprapidi, pio Allah moronapu kurami. 15 Ukuramyanen, ataru neitamai di, Yesus tep teka tenerami neng, denge weik 120 neng, sun wekmaiya kan-kan Peterus tekrapudi, aupu pepu.

16 “Ne kayapu, pumun taru di Allah er Lek Sambaladi, Daud, er dipru tamupupa tenepudi, ‘Ukupkamre,’ pepra sekeiamu upuda, ataruda Yudas men kael keamu dinin, aupuda er Yudas tep peramu. Aupuda, men sukmanto upu tep, ukutaru konum kupmasere. Ada, Yesus ateng koupkami neng damai dudorbena dopra yaudi, ‘Yesus aca,’ pemu ngebo, Yudas tep, Dauddi aupu peipu. 17 Yudasda, Yesusdi nun 11 neng wepra deipseutopu, er peda wepra deipupa, kikiman kuramupudi, nun Allah tep doramepu pelda, er capdi apelpu kikiman doramupu.” Peterusdi pepu.

18 Yudas, er pio mali kupka deiki di, sun co bo karepipa, ange dopropudi, wa peiamya konum kunupkopda, erdi popdau taruda, loka dourbeudi, er mundu bongopupa, er deiplyu yuma yamopsaku. 19 Ukupupa, Yerusalem mutu kurami nesala yuma gekepi dingeda, awa peiamya sida, sun Aramaik upu deiki di “Akeldama wa,” perami. Sun mutu upu, Aramaik deiki di, ‘Akeldama,’ peramyada, aupu deiyoda yapi wa ^{▼▼Yapi wa perami ngeda, ukuprap. Yudas, er lokdorbeupa, er mundu bongopupa, deiplyu yamopsakudi, er yapi awaidam embeua tep, awaidam sida, ‘yapi wa,’ perami.} tep perami.

20 Peterusdi aupu ton pepu. Buku Mazmur neitamai Daud seku upuda ake.
‘Er kuryai sun yuma tapra benkamenge. Tenpu ngebo pe er kuryai men kunkamrume.’ (Mazmur 69:25)
‘Er pel doramnga yo pununa tep, yuk ngebodi dopbenkamre.’ (Mazmur 109:8)

Peterusdi pepu.

21 – 22 Upepudi aupu ton pepu. “Ange tep nengeda, men yapronkamepe. Tek sisi tenpu ngebo wepra deipkupe. Ada, Yohanesdi gonga kepra me dongoramu taru di, Yesus cap, nun cap, kikiman kupyakaramupkanen, Yesus im deiki welepu taru peda, ataru yuma kikiman kuramupu neng, aneng kan-kan dipu tenpu ngebo wepra deipkupe. Ada, aneng kan-kan dinin, tenpu ngebo konum wepmepyopda, er cap nun yuma capdi yuk neng tep, ‘Yesus konum gam buku,’ pepra lap perbenkamepe. Ada, Yesus cap kikiman kuramupu taru, nun asuru di ange yuma diramupka tep, ‘Yesus konum deiamu dinin, gam buku,’ lap perbenkamepe.” Peterusdi awekmai neng 120 neng tep pepu.

23 Upepupa, sun yumadi, Allahdi wepra deipkamre ngeboda, ‘Angebo do, angebo do?’ tenen, nimi butene neng si sipepi. Tenpu ngebo er sipu weneri perami ngebo, ada Yusup Barsabas, ton Yustus perami ngebo pepi. Ton, tenpu ngebo Matius pepi. 24 Si konum pepi dingeda, Allah moropya deiki di aupu pepi. “Naio, kanda nun dipru neitamai tenepe keca yumada, kan kaele cadi, aneng butene neng dinin, Yudas er pel yo pununa tep, ‘Angebo Yesus upu dopropredi, peteremna pelpu donkamre’ tenen, konum wepra deipmum ngeboda, katuai wepra deipseo. 25 Yudas apel doramu dinin, mali kupka tep, apel tapra er wenemna tep walito wenemnai benmare,” pepi. Ada, ‘Allahdi nimi wenemnai, pio malyai deipkamemerya,’ tenepidi, pepi.

26 Allah konum moropipa, metek gel pala deiki di, dopropidi, aneng butene sun si sekrapidi, mau pumbon dongoprap, singipdongoprapidi amau long-long pepipa, gel duya menmena puksakungepu dopra dipterepipa, Matius si kupmaua epidi, erpu wepra deipi. Wepra deipyopda, er cap, Yesus wepra deiamu neng, sun 11 neng cap, tapakra gung kepidi, adipu gonga kepra pel dopbarami.