Act 10 | XteSC | STEP | Kaisarea kuramu ngebo, er sida Kornelius, erda Roma mutu jen deiyo neng, 100 jen neng sun upu bongdin ngebo kuramu. Sun nimi deng 600 neng gung yuk-yuk kepra, sun si bokra deriramya utopu, er gung sida Italia perami.

Acts 10

Korneliusdi Peterus tep, kongpepu upu

1 Kaisarea kuramu ngebo, er sida Kornelius, erda Roma mutu jen deiyo neng, 100 jen neng sun upu bongdin ngebo kuramu. Sun nimi deng 600 neng gung yuk-yuk kepra, sun si bokra deriramya utopu, er gung sida Italia perami. 2 Er cap, er nyapsilip yuma cap, Allah erdi peiamu upu pio talepra kurami. Tonda, er nyapsilip yuma cap, Allah tep teka tenepra kurami. Tonda akeca-keca yuma putaramu nesalada, sun putaramu keca yuma, erdi melipra weik kareramu. Tonda, tumi-tumi yuma Allah mororamu. 3 Ukuramnganen, tenpu tumi deiki di sintara kupupa, tup bukmau taru dinin, ken maramenga utopu keca epu. Epudi im deiki Allah kai melimna ngebo, malaikat katuai jenek yaupa epu. Epupa, angebo Kornelius damai yauopda pepu. “Korneliuso,” pepu.

4 Upepupa, Kornelius, kware weik kupupa, dimpeprappudi, angebo er nongpu pio dinmau. Pio dinmaudi, “Naio, ware kupkun do?” pepu. Upepupa, im deiki Allah kai melimna ngebo, malaikatdi tamupra pepu. “Kandi Allah mororumnge cap, kandi kankan kunge nesala tali karerumnge cap, Allah dikeredi tenimkerura cadi, Allahdi kange deipkere. 5 Atep, kandi nimi dopra dokotepmempa, Yope mutu bengedi, tenpu ngebo er si Simon, tonda er si yuk ngeda, Peterus penung ngeboda, dopra yankamnunge. 6 Er Peterusda, yuk ngebo ati kunmare. Ada, Simon domba bol ketenepra deiya opkal wirur ngebo cap, kikiman kurunge. Simon, er atida, laut mokon pirman tara ati dopra kurur ngebo tepa.” Im deiki kai melimna ngebo, malaikatdi Kornelius tep pepu.

7 Amalaikat pepudi konum beuopda, Korneliusdi er pel melimna neng butene neng cap, jen taleamu ngebo Kornelius meliamu ngebo cap, kongpepu. Ajen taleamu ngebo peda, Allahdi, ‘Ukunkamrume,’ peiamu upu pio talepra kuramu. 8 Korneliusdi aneng kongpepupa, yaiopda, ukupu kupmau keca cap, epmau keca cap yuma lap pepupa, gekepi pangeda, erdi aneng tep, Yope mutu dokotepu. 9 Dokotepupa, sun anengdi banmaiyanen, bisi bena mapbanmaiya berekupa, kange di dukdongopra banmaiyanen, keteng dukduk kupupane, sun aneng Yope mutu ati damai bai taruda, Peterusda er ati pumbon di gupsaka yaudi, bura tara co moropra deiamya, abisi welepudi, akati arum deiki ason utopu ban kupra domyai, ^{▼▼Ati arum deiki ban kupra domyada, amutuda mo pio meteka dipu cemamu atep, sun atida gel di domi. Ati arumda ban kupra domidi, akati arum deikida, yambul ati alaunge ton domi. Akati lap pena upuda, nomor 27 dirume.} ‘Allah moropkun’ tenen, welepra bungbeu.

10 Moronmaupane, jen putapupa, sundi er jen danmai taruda, akati deiki tup bukmaudipu, kene maramenga utopu keca epu. 11 Im deiki di im dana-dana wengepropupa dinmaupa, pala opkal di yakra sirik dana-dana talepmaudi, nemari kwereryakanmau. 12 Kwereryakanmaua tep, dinmaupa, yan dumbari deiki di embarur keca cap, mundu deiki di embarur keca cap, ma yala im alup tara embarur keca cap, ayuma aopkal pumbon akupmaupa epu. 13 Peterus akeca epupa, nimi upu utopu upu deiki di Peterus tep pepu. “Tekroyo. Tekromemdi akupmar keca epmemdi, wepra popmemdi dapra jeprume,” pepu.

14 Upepupa, Peterusdi tamupra pepu. “Gume. Ada men kuptene. Ato mali keca cap, Yahudi yala neng men jeptepe keca ^{▼▼Yahudi yala nengdi men jerami keca – Yahudi yala nengdi men jerami keca deiyoda ake. Ada, pumun taruda, Allahdi sun Israel nesala tep, ‘Sun men jenkamrum kecada ange ton, ange ton popra men jenkamrume,’ pepra mem upu peramudi deipka cadi, bal cap, bisam sisa cap, tonda yuk yala keca cap men jerami. Akeca lap pena upuda, Imamat pasal 11 dirume. Tonda Rasul 21:25 dirume.} cap, pio men jenune. Akecada mem keca cadi, ‘Allahdi derepnerur’ tenen, yamdongonune,” pepu.

15 Upepupa, nimi upu utopu upu di kange di ton cap, pepu. “Yahudi yala nengdi, ‘Nun akeca men jeptepe,’ perami ngeda, Allahdi konum telep kupra deipmardi, ‘Ukutaruda, sun jeptume,’ penmasera tep, kandi akeca tep, ‘Akecada Yahudi yala neng men jeptepe, angeda mem keca,’ pememnyada yaprume. Pio men penkamrume,” pepu.

16 Akupu keca yumada, atumi tenpu dinin, ue weneri deiki di kupudi, adipapu sirya tamupra im deiki welepu. 17 Welepupa, Peterusdi er kene utopu dinmau keca tep, ada ‘Ware kuna tep do? Ange epmana cadi, ware kupkamne do?’ tenen, pio tenimnapu kunmaupane, Korneliusdi dokotepu nengda, ‘Simon ati ake,’ pepipa, gekepidi, Simon ati dam beilya buplan bisi damai tengyai. 18 Tengyaidi pepi. “Simon Peterus akati kunmar do?” pepra kongpepidi asipterepi.

19 Asipterepi taruda, Peterusdi er kene utopu dinmau keca tep, tup tenenmaupane, Allah er Lek Sambaladi Peterus tep pepu. “Simono, nimi weneri nengdi kan tep enmakenge. 20 Atep, tekromemdi tuai tara kwererberume. Nedi aneng dokotepsa cadi, ‘Aneng cap kikiman benkun do, yapkun do?’ tenena gum di, aneng cap kikiman tali lupra berume.” 21 Allah er Lek Sambaladi Peterus tep aupu pepupa, Peterusdi aneng tekmaiyai kwereryaudi pepu. “Sun enmarum ngeboda ne pua. Sun warya tep yanmanerum do?” pepra asipterepu.

22 Asipterepupa, sun ayai nengdi tamupra pepi. “Gume, Roma mutu jen deiyo neng, 100 neng upu bongdina deiyo ngebo, er sida Korneliusdi peipmaserpa yanmape. Korneliusda, Allah peiamu upu yuma pio talepra kurure. Atep, Israel neng yumadi er tep, gispal dongedi kange derinunge. Tonda, im deiki Allah kai melimna ngebo, malaikatdi Kornelius tep peipu. ‘Peterusdi kan ati yakana tep, upu dokotepra moropmempa, kan ati yaredi, er peipkamker upu, apu telep kupra gekepkamrume,’ pepra, Kornelius tep peipupa, Korneliusdi gekepudi, doproipseupa, nun yanmape,” pepi.

23 Ayai nengdi Peterus tep upepipa, Peterusdi, “Ne ati wengyaso. Kikiman mapkamepe,” pepu. Upepupa, mapmaiya berekupa, aneng cap, Peterus cap, gonga kepra banmai. Tonda, Yope mutu neng, Yesus tep konum teka tenepidi, sun weite-du utopu kurami neng cap, Peterus cap tapakra banmai. 24 Banmaiyanen, bisi bena mapmaiya, berekupa, banmaiyanen, Kaisarea mutu bei.

25 Uda, Peterusdi Kornelius ati wekroupane, Korneliusdi pio kange deipra, gispal ^{▼▼gispal dona – Yahudi yala nengdi, ila neng yangopda, ‘Gispal dopkup’ tenen, sun yan damai loktapidi, nong genepdongorami. Uda ange utopu nunda, nun damai ila neng yangepa, telepe pepra, buru karepmepedi, gispal dorameptopu, sun Yahudi yala nengda, ila neng yanpa gispal dopkun dingeda, ukurami.} dopkua tep, Peterus yan damai loktapudi, nong genepdongopudi, gispal dopu. 26 Korneliusdi ukupupa, Peterusdi pepu. “Gumde. Tekroyo. Ne peda tali tuai ngebo pua. Atep ne gispal dona yaprume,” pepu. 27 Upepupa, Peterus cap, Kornelius cap, sun upu talenmareiyanen, ati pum wekroreidi, abulupra wekmai neng epu. Peterus aneng epudi, aupu pepu.

28 “Sun tek sisi kaele. Nun Israel neng nun mem upu deiki di yuk-yuk mutu nesala, ada Yahudi yala gum nesalada, ‘Sun pio mali nesala,’ tenenupa tep, kikiman kuna cap, uruna kuna cap men kunupe. Ukupra tenenupa cadi, kanda Kornelius, Yunani yala ngebo kuruma tep, kan ati men yana wektene tenemsi. Ange tenemsi dinino, Allahdi ukupu peipmaner upu deiki di konum kael kepmasi. Ada, ware yala neng do yuma, ‘Sun dereng utopu, mali kununge,’ tenepra men peptene.

29 Ange tep nengeda, kandi doproipmarum neng, sun anengdi nati yaidi, ‘Yaseo,’ pepmanungu upu men bisipmanue. Gekepmasidi tali lupra yanmane. Atep, sun warya tep, ‘Angebo duyankameng’ tenen, wepra dokotepmarumpa, ne damai bena duyanmaneng do? Ware deiyo tep, amutu duyanmanerum do?” upepra, Peterusdi aneng tep bouna di asipetepu. 30 Asipetepupa, Korneliusdi tamupra pepu.

“Gume. Ordum tumi, ato keteng sintara deiki di Allah moropsi. Moronmasi taruda, menmena dirin weik opkal keamu ngebo ne damai iritara tengyau. 31 Tengyaudi upepneu. ‘Korneliuso, Allahdi kan moronmarem upu gekepmakere. Tonda, kandi kankan kunge nesala tali karerum keca tep dikeredi tenimkerure. Allahdi kange deipkerure. 32 Atep, kandi nimi wepra, dopra dokotepmempa, Yope mutu bengedi, tenpu ngebo er sida Simon, ada Peterus penung ngeboda, dopra duyankamnunge. Er Peterusda, Simon domba bol ketenepra deiya opkal wirur ngebo cap, kikiman kurunge. Simon er atida, laut mokon pirman tara ati dopra kurur ngebo tepa,’ pepneu.

33 Upepneua tep, adipapu nimi wepsidi, ‘Kan Peterus duyankamkeng’ tenen, nimi dopra dokotepsi. Ukuda, konum yanmarema tep, telepe pepkene. Atep, ukuda Allah er kunmardi dinmasera damaipu kunmape. Ada, ‘Allahdi aneng pepkamre’ tenen, peipkeupa gekepmum upu yumada, ‘Nun pepsemempa gekepkupe. Allahdi ware upu pepkuser do?’ tenen, bulupra wekmape.” Korneliusdi Peterus tep pepu. 34 Upepupa, Peterusdi gonga keprapudi pepu.

E, ukuda ne tenepne. Tek sisi Allahdi nun tep nun mutu cap, nun urasin cap, ato keca diserya deiki di, ‘Ne nyapu sisa,’ men teneserure. Allahdi, ‘Ton yala nengda telepe, ton yala nengda mali cadi, ne nyapu men kunkamenge’ tenen, bokra yuk-yuk men wilimserure. Allahdi teneseryada, ‘Nimi ban-ban yumada, utotopu kununga cadi, ware mutu nesala do yuma, ne nyape kutenge,’ teneserure.

35 Dinino, yuk-yuk mutu nesala yuma, dipru kwirye kupra kunung neng cap, ton Allah er nong cap, Allah er pesere upu cap tep, ‘Ada mambul,’ tenen, teka tenepra kunung neng yumada, ‘Sun yuma ne damai yatenge,’ teneserure. 36 Allahdi Israel neng tep akai telep upu pepu. “Sun mali kuruma keca tep, Allah deremseryada, nun mali kuna keca Yesus er dipu gum kupra deriserya deiki di, nun cap, Allah cap kikimanpu telep kupra kunkamepe. Yesus Kristusdi, nun cap, Allah cap, telep kupra antapra deriserure. Yesus Kristusda, akeca-keca yuma talerur deiyo ngeboda, erpu kurure.”

37 Uda, Yudea tara neitamai konum kuramu keca yuma, sun konum gekepra kael kepmarume. Galilea mutu di gonga keamudi, Yohanesdi me dongon upu peteremamupa, adine, 38 Allahdi Yesus Nasaret mutu ngebo, konum wepra deipka tep, ‘Ne pelpu donkamre’ tenen, er puto cap, er Lek Sambala cap, Yesus nong deiki deipupa, Yesusdi pio telep pelpu dopembaramu. Dopembaramudi, Kain Jen Ngebo taleamupa kurami nesala weike kwetepra deriramu. Anesala kweteramu deiyoda, Allah cap, Yesus cap, sun kikiman kuramreiya deiki di, Allah er puto kareamupa, anesala kweteramu.

39 Yerusalem mutu cap, Israel nesala sun mutu-mutu yuma cap, amutu neitamai di er kuramu keca yuma, nun asuru di diramupudi, yuk neng tep lap penupe. Diramupkanen, sun amutu nengdi Yesus dopra sengdin co deiki deipra popya deiki depupa, epmupu. 40 Konum depkopda, peipmaipane, mana butene mapudi, weneri tumi deiki di Allahdi tamupra gam bukra deipudi, er puto di Yesus nun damai peterep embeseu.

41 Amutu nesala yumadi Yesus gam bukra deipupa men epi dinin, Allahdi men di wepra deiamseu nengpu, epmepu. Ada Yesus depu dinin, gam buku taruda, er cap, kikiman jen cap, me cap, kikiman jepmupu nengda, nun dipu Yesus gam bukupa epmupu. 42 ‘Tup gam kunung nesala pe, konum depi nesala pe, wepredi bokra upu bongdina deiyo kunkamre’ tenen, Allahdi wepra deipu ngeboda Yesus er pua. Yesusdi nun tep, “Ware nesala do yuma, aupu lap pepra peterembenkurume,” peipseu.

43 Men di Allah er upu pediramupa, sun sengamidi aupu lap perami neng, nabi neng kurami. Nabi-nabi neng yumadi, sun sengami upuda tupa pediserure. Ada, ware-ware neng do yuma, er tep teka tenepmengopda, er si deiki dipu sun mali kunge keca cap, dipru mali tenenung keca cap, gum kupra deipseredi kaukemserure. Er dipu lyemserure. Peterusdi aupu yuma pepu.

44 Peterusdi aupu tupa penmau taruda, teka tenepipa, Allah er Lek Sambaladi aupu gekenmai neng tep, sun nong deiki yaudi, sun dipruai weku. 45 – 46 Musadi peiputopu, sun den bam bol deiki tara konum seki neng, ada Yahudi yala neng, Yesus teka teneramidi, Peterus cap kikiman yanmai nengda, ayuma epi. Epipane, akati weki nengda, Yahudi yala gum neng kurami dinin, Allah er Lek Sambala yana, ila di sun nong deiki deipupa, sun dipruai wekua deiki di, anengdi yuk-yuk mutu nesala penge upu deiki di, ^{▼▼yuk mutu nesala upu pepi – Allah er Lek Sambala aneng dipruai weku pangeda, er puto deiki di, yuk mutu nesala perami upu men kael keami dinin, Allah er Lek Sambala puto deiki dipu, aupu pena deiyo keca karepua utopu, yuk mutu nesala upu deiki di pepi.} Allah si erepi. Allah er si erepipa, Peterus cap, kikiman yanmai nengdi ange epya tep, sun lukdaidi, ‘Uo’ tenen, giso talanga beu.

Akeca epi nengda, lukdai deiyoda, ‘Allahdi nun bicau teneserya deiki di, er tali kareserur Lek Sambala, tali Yahudi yala gum nesalada, sun den bam bol deiki tara men sengamya tep, Allahdi ware kupra er Sambala ato neng kareptu do? Amali kunge neng ton, sun peda Allah er Lek Sambalada men doproptenge,’ tenepya tep, lukdaidi teniptopi. 47 Tenimtonmai dinin, amenda taru, Peterusdi pepu. “Ware nengdi, ‘Gume,’ peptengedi, upu seksetengepa, aneng dopra me men dongoptepe do? Nunda, Allah er Lek Sambala konum dopropmuputopu, sun aneng peda, Yahudi yala gum neng dinin, Allah er Lek Sambala konum dopropmanga tep, me dongoptepe,” Peterusdi pepu.

48 Atep, Peterusdi pepu. “Anengda, Yesus Kristus tep teka tenipmanga cadi, Yesus er si deiki di me dongopso,” pepupa, sundi aneng dopra me dongopi. Me dongopipa, amutu neng sundi pepi. “Kan cap kikiman metekanun ton kunkamepe,” pepra moropipa, metekanun ton Peterus acapu kunmau.