Act 11 | XteSC | STEP | Ange yuma ukunmaupane, amutu kunmai nesaladi, “Yuk-yuk mutu nesala, Yahudi yala gum nesala peda, Allah upu teka tenepye,” pepra, kai upu lap perbei. Ukupra lap perbeiya tep, Yudea mutu neitamai kurami neng ada, Yesus teka tenepidi, weite-du utopu kurami neng cap, Yesusdi wepra deipu neng, sun 12 neng cap, sun yuma aupu gekerami.

Acts 11

Peterusdi, Yerusalem mutu nesala tep, lap pepu upu

1 Ange yuma ukunmaupane, amutu kunmai nesaladi, “Yuk-yuk mutu nesala, Yahudi yala gum nesala peda, Allah upu teka tenepye,” pepra, kai upu lap perbei. Ukupra lap perbeiya tep, Yudea mutu neitamai kurami neng ada, Yesus teka tenepidi, weite-du utopu kurami neng cap, Yesusdi wepra deipu neng, sun 12 neng cap, sun yuma aupu gekerami. 2 Aupu gekepya tep, Peterus tamupra Yerusalem mutu welepupa, Yesus teka tenerami neng dinin, ‘Den dam bol deiki tarange sengnada, ila mambule. Ange men kunge nengda, pio malipu kununge,’ tupa tenerami nengdi Peterus tep wenepi. Wenepidi upepi.

3 “Kanda Yahudi yala gum ngebo, ^{▼▼Yahudi yala gum nesala – Yahudi yala nengdi yuk yala nesala yuma tep utenerami. ‘Yahudi yala gum nengda, sun den bam bol deikinge men sengnunga cadi, aneng cap, kikiman kuna cap, kikiman jena capda, pio men kutepe,’ tenerami. ‘Anengda, pio mali neng cadi, sunda mem keca utopu kununge. Allahdi aneng men lyepkamre,’ tenerami.} er si Kornelius, er ati wekrapmumdi, kan cap, den bam bol deiki tarange men seki neng, sun cap jen kikiman wisipra jepmarumnya deiki di, pio mali kupmum adano. Kan kaele, nun Yahudi yala nengdi, angeda mem keca utopu cadi, ange utopu men kunupe,” pepra wenepi. 4 Atep, im deiki di yaupa, akeca-keca yuma kipu opkal cap, malaikatdi er tep pepu upu cap, Peterusdi ange yuma dinmaupa, kupu keca cap, erdi men di epunge yuma cap, gekepunge yuma cap, adine, dukdongopra aupu yuma tek sisi ukuputopu, sun Yahudi neng tep lap pepu. Lap pepudi aupu pepu.

5 Neda Yope mutu kuramsi taruda, Allah moronmasi taruda, ken maramenga utopu keca deiki di mambul keca epsi. Epsidi, dinmasipa, im deiki di pala opkal utopu keca di yakra, sirik dana-dana talepudi, nemari kwerepudi, ne damai yana doupra tekupa epsi. 6 Epsidi, nedi aopkal deiki dipterepsidi, nimi peingepa yan dumbari deiki di embarur keca cap, tonda tali tuai bura embarur keca cap, mundu deiki di embarur keca cap, ma yala im alup embarur keca cap, akeca yala-yala yuma aopkal pumbon akupmaupa nedi epsi. 7 Epsidi dinmasipane, nimi upu utopu upu deiki di pepneupa gekepsi. “Tekroyo. Tekromemdi, akupmar keca popra jeprume,” pepneupa gekepsi. 8 Upepneupa, nedi tamupra pepsi. “Naio, gume. Ato mali keca, nun Yahudi yala nengdi men jeptepe kecada, pio men jenune. Ange yumada mali keca tenenupa tep, mem keca tenenedi, ‘Allahdi derepnerur’ tenen, ange men jeptene,” pepsi.

9 Upepsipa, nimi upu utopu upu di kange di ton cap pepneu. “Yahudi yala nengdi, ‘Nundi akeca men jeptepe,’ perami ngeda, Allahdi konum telep kupra deipka cadi, ukutaruda, ‘Sun jeptume,’ pepmasera tep, kandi akeca tep, ‘Akecada, nun Yahudi yala neng men jeptepe,’ pememnyada, yapkurume. Angeda pio men penkamrume,” pepneu. 10 Akupu keca yumada, atumi tenpu dinin, ue weneri deiki di konum kupudi, adipapu sirya tamupra im deiki welepu.

11 Akupu keca im deiki welepu taru dipapu, Kaisarea mutu di ne doryakana tep, dokotepnei neng, weneri nengda, ne kunmasi ati damai tengyai. 12 Tengyaipa, Allah er Lek Sambaladi upepneu. “Anengda, yuk mutu nesala cadi, ‘Ne cap kikiman men benkamne,’ tenena yaprume. Tali lupra kikiman wisipra berume,” pepneu. Tonda, nangantan bari teka tenepi neng cap, kikiman bepke. Bepudi Yahudi yala gum ngebo, er si Kornelius, er ati wekmupu.

13 Er ati wekmupupa, Allah kai melimna ngebo, malaikatda, Kornelius er ati belepra tengyaudi yana pepu upu, Korneliusdi nun tep lap pepseu. “Allah kai melimna ngebo, malaikatdi upepneu,” pepra Korneliusdi lap pepseu. “Tenpu ngebo er sida Simon dinin, ton sida Peterus penung ngeboda, dopra dekana tep, nimi wepra dokotepkurume. 14 Angebo dopra yangepa, erdi pepkamser kai telep upu deiki di, kan cap, kan nyapsilip yuma cap tep, Allahdi lyepkamsere,” pepra Korneliusdi aupu lap pepseu.

Peterusdi, sun Yahudi yala neng, Yerusalem mutu kurami neng tep lap pepu.

15 Lap pepudi, aupu ton dukdongopra pepu. “Uda, Allah er Lek Sambala nun tep yana wekamseu utopu, ne upu gonga kepra penmasa neitamai di, aneng peda, Yahudi yala gum neng dinine, sun tep yana sun dipru weku. 16 Sun dipru wekupa, nun nai Yesus peiamseutopu tenepsi. Ada, ‘Yohanes men di tali me dongoramu dinin, amenda taru, Allahdi er Lek Sambala dokotepserepa, sun dipru wekra dekpepkamsere,’ peiamseunge tenepsi. 17 Nun men di nun nai Yesus Kristus tep teka tenepmupu taruda, Allah er tali karepseu Lek Sambalada, ange utopu aYahudi yala gum neng peda karepu. Ukupka tep, neda ware utopu ngebodi, Allah er tenemunge tep, upu sekmatene do?” Peterusdi sun Yerusalem mutu kuramidi, Yahudi yala neng tep pepu.

18 Upepupa, sun aneng gekepidi, upu ton cap men pepidi, Allah er sipu erepi. Erepidi upepi. “Ukuda konuma. Sun yuk-yuk tali mutu nesala, Yahudi yala gum nesala peda, sun mali kunge keca tapra, ‘Pio gam kunkamep’ tenen, Yesus tep teka tenepmengopda, Allahdi aneng tep, bol koptapra gam pio kuna deiyo keca konum karepmare,” pepi.

Antiokia mutu teka tenepi neng tep, pepu upu

19 Uda atarupuda, Stefanus popi taru di, yu nengdi, Yesus tep teka tenena nesala tep, sun nong deiki ikin keca weik deriramya deiki di, yuk-yuk karen mutu sepdaro bei. Sun bei nengdi, ila karen mutu ton bei. Fenisia tara cap, Siprus mutu cap, tonda, Antiokia mutu cap, bei dingeda, anengdi Yahudi yala neng tep, “Yesusdi lyemserure,” pepra, Yesus tep, kai telep upu peterep embarami. 20 Dinino, yuk neng ton Siprus deiami mutu neng cap, Kirene mutu deiami neng capdi, Antiokia mutu bei dingeda, Yunani neng tep peterepi. Ada, “Nun nai Yesusdi lyemserure,” pepra Yesus er kai telep upu lap pepra peteremami. 21 Allahdi aneng tep, puto di meliamua deiki di, amutu Antiokia mutu nesala gekepidi, weika di teka tenepidi, sun kange dipru tenena keca yuma, Yesus er deikipu deipidi, ‘Yesus erda nun upu bongdina tep, ila deiyo ngebo pio kunkamsere,’ tenen, Yesus tep teka tenepra kurami.

22 Yuk nengdi Antiokia mutu nesala ukupi keca kael kepidi, kai pepipa, Yerusalem teka tenepra kurami neng gekepidi, ‘Barnabasda Antiokia mutu dirbenkamre’ tenen, wepra deipi. Wepra deipidi, “Dirbeo,” pepra, Barnabas dopra Antiokia mutu dokotepi. 23 Dokotepipa, Barnabas Antiokia mutu beuopda, Allahdi aneng tep, bicau teneamudi, pio telep kupra meliamu keca epudi, pio kange deipu. Barnabas kange deipudi aneng tep pepu. “Sun Yesus teka tenerum ngeda, tamna gum pio talepra kunkamrume.

Tonda, sun kange tenimtona gum dipapu, sun dipru bongna gum di, ayuma wisipra, nun nai Yesus tep pio karenkamrume. Er teppu pio talenkamrume,” Barnabasdi aneng tep telep upu peipudi, sun dipru kwa dipu. 24 Barnabas, erda kange tenimtona gum dipapu, Yesus tep pio puto di teka teneramu. Allah er Lek Sambala er dipruai dinikudi, puto karepupa, pio telep ngebo kuramu. Ukuprap kuramupa, amutu nesala, nun nai Yesus tep, weika di teka tenepra tapakipa, sun gungda denge weik kupbaramu.

25 Uda amenda taru, Barnabasdi, ‘Saulus erbenkamne’ tenen, amutu tapra, Tarsus mutu beu. Tarsus mutu beuopda, pio dipra embanmauanen, Saulus epu. 26 Saulus epudi, Saulus dopra Antiokia mutu tamupra duyau. Duyaua tep, Barnabas cap, Saulus cap, Yesus teka tenepra taleami neng cap, keteng tamun tenpu deiki di, ton tumi di, ton tumi di yuma, bulupra wengamipa, sundi Antiokia mutu nesala weik, Allah upu peteremamrei. ‘Yesus kuramnga utopu kuptepe’ tenen, putaramupa piripra kael kepidi, kwirye kurami neng tep, amutu yuk tali kurami nengdi, Antiokia mutu di gonga kepidi, “Anengda Kristen nesala ^{▼▼Kristen nesala perami ngeda, Yesus teka tenerami nesaladi, Yesus er peteremamunge yuma dopra, teka teneramidi, Yesus er kuramutopu sun peda, kurami. Ukuramya tep, yuk nengdi anesala tep epra uperami. ‘E anesalada, Yesus Kristus kuramu keca utopu kununge,’ teneramidi, “Aneng tep nengeda Kristen nesala penkamepe,” teneramidi, uperami. Tonda, lap pena upu nomor 28 dirume.} kununge,” perami. Ada, menmena taru Antiokia mutu nesaladi gonga kepra, “Anesalada Kristen nesala kununge,” perami.

27 Barnabas cap, Saulus cap, sun peteremamrei taruda, amenda kupkamu keca tenepra, lap perami neng, nabi neng ton, Yerusalem mutu di Antiokia mutu yai. 28 Aneng yaipa, sun kabo tenpu ngebo, er sida Akabus tekrapudi, Allah er Lek Sambaladi Akabus tep peipupa, erdi akurami neng tep, amenda kupkamu keca tep upu peipu. “Amenda taru, nimi kunge mutu yumada ^{▼▼Nimi kunge mutu pepu ngeda, ‘Roma mutu nimi deiyo neng taleami mutu yuma tenepkamenge’ tenen, aupu peipu.} jen pio putapkamre,” peipu. Akabus peiputopu, Roma mutu nimi deiyo ngebo, er sida Kelaudius, amutu taleamu taru neitamaida, tek sisi amutu-mutu neitamai yumada, jen gum kupupa, jen putaramu.

29 – 30 Akabus aupu peipka tep, amutu Yesus teka tenepi neng gekepidi, ‘Yudea tara teka tenepra kunge nesala tep, melipkamep’ tenen, sun yuk-yuk adeiamitopu bokra karepi. Yerusalem mutu Allah teka tenerami neng, ‘Sun deiyo neng damai bena karepkamrenge’ tenen, Barnabas cap, Saulus cap tep dopra deipipa, abutene nengdi aketeneipi co bo dopra Yerusalem mutu bena kareprei.