Act 13 | XteSC | STEP | Antiokia mutu teka tenepi neng kan-kan di, amenda kupkamu keca upu cap, Allah upu lap pena upu cap, peteremna neng, nabi neng kurami. Tonda, yuk nengdi konum teka tenepi neng tep wepra, Allah upu peramidi tali peteremna neng kurami. Sun apeteremami neng sida ake. Barnabas cap, Simeon, ada Niker perami ngebo cap, ton Kirene mutu deiami ngebo Lukius cap, Manaem cap, ton Saulus cap kurami. Menahem, ada ila nimi deiyo ngebo Gubernur Herodes er cap kikiman nemrei ngebo tepa.

Acts 13

Allah er Lek Sambaladi pepupa, sun Antiokia mutu teka tenepi nengdi, Barnabas cap, Saulus cap, wepra dokotepi upu

1 Antiokia mutu teka tenepi neng kan-kan di, amenda kupkamu keca upu cap, Allah upu lap pena upu cap, peteremna neng, nabi neng kurami. Tonda, yuk nengdi konum teka tenepi neng tep wepra, Allah upu peramidi tali peteremna neng kurami. Sun apeteremami neng sida ake. Barnabas cap, Simeon, ada Niker ^{▼▼Niker perami ngebo ada, bol mirin ngebo tep perami.} perami ngebo cap, ton Kirene mutu deiami ngebo Lukius cap, Manaem cap, ton Saulus cap kurami. Menahem, ada ila nimi deiyo ngebo Gubernur Herodes er cap kikiman nemrei ngebo tepa. 2 Sun anengda, ‘Allah si erepkamep’ tenen, jen jena gum di, jen si tepra Allah sipu eremaipane, Allah er Lek Sambaladi peipu. “Sundi Barnabas cap, Saulus cap, wepra deipnerume. Ne tenemsi pel, ‘Sun anengdi dopkamreng’ tenen, weamsa tep, ukuda sundi abutene neng wepra deipnerume,” peipu. 3 Upeipka tep, sun jen si tepra kuramyanen, Allah moropidi, aneng giso deiki sun buru tang talepyopda, ^{▼▼Nimi giso deiki talepra dokotemami ngeda, ‘Allahdi er puto weika di aneng kareprepa, pel telep kupra donkameng’ tenen, sun buru aneng nong deiki deipidi, Allah moropi dingeda, dokotepi. Tonda, lap pena upu nomor 32 dirume.} ‘Apel donkamreng’ tenen, dokotepi.

Barnabas cap, Saulus cap, Siprus mutu bena pel doramrei upu

4 Allah er Lek Sambaladi konum dokotepka tep, Barnabas cap, Saulus cap, ‘Nun pel dorbenkamnem’ tenen, laut mokon pirman tara ubereidi, Selukia mutu berei. Selukia mutu adinen, gapung co pum bukreidi, mokon deiki banmareiyanen, Siprus mutu berei. 5 Siprus mutu bereidi Salamis mutu bereyopda, sun Yahudi nengdi, ‘Allah er si erepmepedi, er upu gekenkamep’ tenen, domi ati neitamai di, ati-ati weik Allah upu peterepra embanamrei. Sun amutu bena peteremamrei taruda, Yohanesda sun aneng melimna ngebo kuramu.

6 Salamis mutu konum peterepreiyopda, adinen Siprus mutu neitamai yuma baramreianen, Papos mutu berei. Papos mutu bereidi, Yahudi ngebo tenpu, nimi ker doramu ngebo kuramupa eprei. Angeboda, nimi ker doramu ngebo cadi, er sida, Baryesus perami. Baryesusdi, tali upu deiki di, “Neda Allah er upu lap pena ngebo kunune,” pertamamu dinin, erda mok upupu peramu. 7 Tonda, amutu ila nimi deiyo ngebo Gubernur Serkius Paulus, er pel melimna ngebo kuramu. AGubenurda, menmena bisipra kael kepmanto kupu ngebo kuramu. Ukuramudi, ‘Allah upu gekeptene’ tenen, putapka tep, “Allah upu peryaneretenge,” moroprap peipupa, yuk neng gekepidi, Barnabas cap, Saulus cap, bena lap pepi.

8 Dinino, animi ker dona ngebo sun Yunani nengdi er si tep, Elimas ^{▼▼Elimas angebo tenpu tep, Yahudi neng sun upu deiki di, er si tep, Baryesus perami. Ton, Yunani neng upuda Elimas perami. Sun upu yuk-yuk dinin atenpu ngebo tep si butene si perami.} perami ngebodi utenepu. ‘Yesus teka tenepi neng tenerami utopu, aGubernur peda, teka teneprur’ tenen, Barnabas cap, Saulus cap sun peramrei upu tep, upu seku. 9 Elimasdi aneng sun upu sekupa, Saulus, ada si butene ngebo cadi, Paulus ton si perami ngebodi, Allah Lek Sambala er dipru dekpepupa, Elimas tep pio dipdolom pepmaudi pepu.

10 “Kanda Kain Jen Ngebo er mi kumemdi, akeca-keca yuma telep kwirye kun keca yuma yaniptamrum ngebo kurume. Tali upu peptapra inimtamna cap, mali kun keca cap, kan dipru neitamai tenimna weik kurume. Allah er kwiryepu pere upu dopra, kandi gwaliprap pememnge upuda, pio men tapkamrum do? 11 Ukuda, Allah puto di wenepkukere. Kan asuru pupkerepa, yambul metekanun ton cap, weik kuramemdi, keteng dirine men epkamrume,” Paulusdi Elimas tep pepu.

Peterusdi aupu pepka deiki di, adipapu Elimas er asuru pupupa, tenpu keca peda men epmanto kupka cadi, ‘Ware ngebodi, ne buru talepnetudi, dubenetue’ tenen, kupembanmaue. 12 Aila nimi deiyo ngebo Gubernurdi, Elimas tep akupu keca epudi teka tenepu. AGubernur teka tenepudi, Yesus peteremna upu yuma tep, ‘Uo, angeda pio mambul upu,’ tenepu.

Paulus cap, Barnabas capdi, Antiokia mutu neitamai, “Yesusdi lyepkamsere,” pepra Yesus er kai telep upu perberei upu

13 Uda, Paulus cap, er kikiman embarami neng cap, Papos mutu tapra, amutu di ila gapung co ^{▼▼Ila gapung co mokon deiki bana tep, lap pena upu nomor 33 dirume.} pum bukidi, laut mokon deiki di Pamfilia mutu beidi, Perga mutu welepi. Perga mutu welepidi, sun akunkoi taruda, Yohanes aneng tapra, ‘Tamupra Yerusalem mutu benkun’ tenen, beu. 14 Beupa, sun anengdi Perga mutu tapra, amutu di Pisidia tara neitamai Antiokia mutu bei. Bei dingeda, sun Yahudi yala deiyo neng Allah upu wengami tumi tep, Sabat ^{▼▼Sabat tumi perami ngeda, ada sun Yahudi yala nesala Allah upu gekena cap, Allah er si eremna cap tep, ati wengbarami tumi tep perami.} tumi deiki di, sun Yahudi yala neng Allah upu gekerami ati wekrapidi, buki.

15 Bukipa, yuk nengdi, Allahdi, “Ukunkamrume, ange men kunkamrume,” peipupa Musa sekamu mem upu cap, tonda Allah peipupa, er upu lap pena deiyo neng, sun nabi-nabi neng sekami upu cap, akati nengdi konum pepyopda, sun Yahudi yala deiyo neng Allah upu geken ati deiyo nengdi, yuk neng tep upu peipipa, anengdi Paulus cap, Barnabas cap tep pepi. “Nun kayapu, dipru kwa dimna upu ton akapseryopda, nun peipserutume,” pepra moropi. 16 Upepra moropipa, Paulusdi tekrapudi, ‘Upu dimpepkununga’ tenen, buru bata deipudi, upu pepu.

Ne kayapu, sun Israel nimi cap, sun Yahudi yala gum nesala, yuk mutu nesala dinin, Allah si eremrum nesala cap, ne upu gekepneso. 17 Israel nesala sun talenung Allahda, men di nun apu yapu wepra anuamudi, sun Mesir mutu neitamai, nimi bo neng utopu tup akurami taruda, Allahdi sun tep meliamua deiki di, Israel nesala gung weik kupbarami. Tonda, er meliamua deiki di, sun kurami keca yuma teleppu kuramu. Weik keipudi, Allah ila puto deiki di, nun apu yapu dopra, amutu neitamai di mepra dubeu.

18 Mepra dubeupa, sun anesaladi Allah tep mali kurami dinin, keteng tamun dengda 40 tahun deiki di, sunda mo gum mutu cadi, nimi men kurami mutu neitamai embarami taruda men tamamudi, pio melimamu. 19 Kanaan mutu neitamai kurami nesala amutu yala, amutu yala nesala yuma yoneitam bari akurami dinin, Allah er pio meliamnga deiki di, Israel nesaladi amutu nesala yuma popbisipi. Popbisipipa, amutu-mutu nesala yuma, sun taleami mutu yuma, Allahdi Israel nesala tep karepu.

20 Allahdi akuramunge yumada, dukdongopra keteng tamun deng weik 450 tahun deiki di kuramu. Ayuma ukupyopda, Allahdi, ‘Israel nesala sun upu bongdina deiyo neng kunkameng’ tenen, sun nimi deiyo neng kareamupa, pio ukuramyanen, amenda taru, Allah er upu lap pena ngebo, nabi Samuel erepra deipupa, yana teku. 21 Samuel teku taruda, sun anengdi moropi. “Nun ila upu bongdin ngebo, Raja ngebo wepra deipseo,” pepra moropi. Sun moropipa, Allahdi, Benyamin yala ngebo, er sida Kis, er mi Saul, ‘Sun ila nimi deiyo ngebo Raja kunkamre’ tenen, wepra deipupa, Sauldi keteng tamun dengda 40 tahun deiki di, sun ila nimi deiyo ngebo Raja kuramu.

22 Amenda taru, Saul mali kupupa, Allahdi, Saul tapu di, ‘Yuk ngebo sun nimi deiyo ngebo, Raja kunkamre’ tenen, Saul pununa tep, Daud wepra deipu. Allahdi Daud tep tenepudi aupu pepu. “Isai er mi Daudda, ne cap nun dipru amsepu kunuma tep, nun kange tenpu doupnumu neng kunume. Nedi er tep, ‘Apel donkamre,’ tenememnya yumada, tek sisi er donkamre ja,” pepu. Paulusdi sun awekmai neng tep pepu.

23 Upepudi, aupu ton dukdongoprap pepu.

Allahdi nun Israel neng nun apu yapu tep pediramutopu, Daud yala nengdi deipipa, dadeipdanen yakaramyanen, sirik tara ukuda Israel nesala, nun tep lyemserur ngebo Yesus wepra deiamnganen, konum karepmasere. Ada Daud yala nengdi deipya tep, Allahdi, ‘Ukunkamenge,’ peamutopu konum kupmasere. 24 Yesus kapul men yau taruda, Yohanesdi Israel nesala yuma tep, “Sun mali kurumu keca cap, sun dipru neitamai mali tenerumunge cap, ayuma taprumudi, sun dipru kwirye kecapu taleprumudi, me dongopkusene,” Yohanesdi pepu. 25 Yohanes er pel doramnganen, gawal dakamau taru di aupu pepu. “Sundi ne tep wareto ngebo tenenerum do? Sun tenenmanerum ngeboda ne gume. Ne gume dinino, angeboda ne amnyo tara yankamre ngeboda, erda pio ila ngebo cadi, ne tali ngebo kunune. Atep, er sandal tapu getedongon sandal dongoryada, nedi men loptaptene.”

Yohanesdi pepu upu pepsene. Paulusdi sun Antiokia nesala tep pepu.

26 Upepu dingeda, Paulus aupu ton dukdongopra pepu.

Ne kayapu, nun Abraham nyapu Yahudi yala nesala yuma cap, sun Yahudi yala gum nesala dinin, Allah teka teneprumdi gispal dorum nesalada, Allahdi nun yuma lyemserur upu nun tep konum kai dokotepmasere. 27 Sun Yerusalem mutu neng cap, sun deiyo neng capdi, ‘Yesusda, nun lyemserur ngebo adano,’ men tenerami dipunen, sun Yesus popi taruda, Allah upu lap pena neng, sun nabi-nabi nengdi, “Ukupkamenge,” pepra sekami upu utopu kupi. Allah upu lap pena neng, nabi nengdi sekami upuda, nun Sabat tumi yuma deiki di, Allah upu peteremna nengdi pesenunge.

28 Yerusalem mutu nesala cap, sun deiyo neng capdi, ‘Nesala mali kupnepa, poramep deiyo kecada, Yesus akeca mali kupmara deiki di popkamepe’ tenen, deiyo ton dipterepi dinin, men kupka cadi, men tenepi dinin, ‘Pilatus pepyopda sun popkamenge,’ tenepidi, Yesus pona tep, sundi Pilatus tep, “Yesus poipseo,” pepra moropi. 29 Allah upu lap pena neng, nabi nengdi, Yesus tep sekeiami upu utopu, ataru nesaladi ange yuma konum kupipa, depu pangeda, Yesus teka tenepi nengdi, sengdin co deiki di er nong dopra, nimi peirameng gel imir pumbon peipi. 30 Peipi dinin, Allahdi Yesus tamupra gam bukra deipu.

31 Gam bukeipupa, atumi-atumi tenpu-tenpu dinin, amutu-mutu belepra teknepa, nimidi dirami. Ada, er cap men di Galilea mutu di Yerusalem mutu kikiman embarami nengdi Yesus dirami. Sun diramidi, ukuda nun Israel neng tep, Yesus er peteremamunge cap, kuramunge cap, lap pesenunge. 32 – 33 Ukuda, nundi sun tep, kai telep upu, nimi lyemna upu penmasepe. Allahdi nun apu yapu tep pediramutopu, Yesus gam bukra deipka deiki di, sun nyapu nun ukutaru kunup neng tep, nong konum kupmasere. Yesus gam bukra deipka deiki di, pio gam kuna deiyo keca konum karepmasere. Mazmur dua sekeiamu upu pepkusene. Aupuda ake.
‘Kanda, ne Mi Sisa kurume. Atumida, neda kan nai kunmakene.’ (Mazmur 2:7)

34 Allah er mi depu taruda, ‘Kange di pio men depkamre’ tenen, Allahdi tamupra gam bukra deipu. Er gam bukra deipu ngeda, menop taru sekeiami upu deiki di, ukutaru konum kael kemnupe. Allahdi peamu upu ake.
‘Daud tep pediramsitopu, sun peda pio telep keca, ada pio gam kuna deiyo keca, tek sisi karepkamsene.’ Allahdi pepu. (Yesaya 55:3)

35 Tonda yukai sekami upuda ake.
‘Kandi wepra deiamumpa, pio dumsisipu kunkamre ngebo, kan Mi Sisa amenda taru depyopda, pio men lyupkamre.’ (Mazmur 6:10)

Aupu pepunge deiyoda, ada Daud tep gume. Ada Yesus tep peipu. 36 Daud kuramu taru Allahdi, ‘Daud apel donkamre,’ tenemu pel doramnganen, gawal konum dakudi, depu pangeda, er apu yapu peiramyaipu peipipa, er bolpu lyupu. 37 Dinino, nun penmap ngebo Yesusda, depmaupane, Allahdi gam bukra deipu ngeboda, kange di men depu. Tonda, pio men lyupke.

38 – 39 Ne kayapu, ange tep nengeda, ‘Sun kaele kepkuruma’ tenen, lape pepsene. Allahdi Yesus deiki dipapu, nun mali kupe keca cap, nun kange dipru mali tenenange cap, gum kupra deriseredi, kaukemserure. Ware nesala do yuma, Yesus tep teka tenepmengopda, mali keca di sun dipru cap, kange cap, talepra moupseudi, upu mouserur keca yuma, Yesus deiki dipu lyemseredi lotamserure. Musa sekamseu upu utopu kurumnya deiki di, mali keca talepseuada, lyepra men loptapsetue.

40 Uda, Allah lap pena neng peiamseitopu, ‘Men kupkamser’ tenen, moupra dinkamrume. Sun nabi nengdi peiami upuda ake.
41 ‘Sun nyek-nyek perumu nengda gekepso! Pio tenimtonapu kuramrumyanen, depkamrume. Sun gam kurumu taruda, nedi pio mambul pel dopkamne dinino, yuk nengdi sun tep lap pepsetenga peda, men gekepkamrume.’ (Habakuk 1:5)

Paulusdi Habakuk sekeiamu upu cap, Paulus er upu cap, konum pepkopda, aupu sengpepu.

42 Paulus cap, Barnabas cap, sun Yahudi yala nengdi, Allah upu peteremna ati neitamai di benkurei taruda, sun peprei upu gekepmai nengdi moropi. “Sun pepserum upuda, aminggu pepra orSabat tumi di, ton cap dukdongoprap pepkamsurume,” pepra moropi. 43 Moropipa, aupu gekepmai neng yuma bendopyopda, Yahudi neng cap, tonda yuk mutu nesala dinin, Yahudi yala neng teka teneraminge yuma, sun peda kael kepra teka tenerami neng cap, Paulus cap, Barnabas cap, kikiman bei. Kikiman bei pangeda, Paulus cap, Barnabas capdi, aneng tep aupu peprei. “Ukutaru Allahdi er puto di melimserur keca, er kange dipu bicau teneseredi, tali karerserya deiki di kurume. Ange pio talepra kurumudi, Allah tep pio men tamkamrume,” pepra, aneng sun dipru tep kwadeiprei.

44 Ukupra dakuramyanen, pel dona gum di, beipye peikrap, sun Allah upu peteremna tumi, Sabat tumi kupkopda, amutu nesala yuma, ‘Allah upu gekepkamep’ tenen, bulupra weki. 45 Nesala weik bulupra wekipa, Yahudi yala deiyo nengdi awekmai neng epidi, aneng tep yu kupupa, dipru neitamai wilipra deipidi derepi. Derepidi, Paulus er penmau upu cap, ton er cap tep mali upu pepra upu seki. 46 Upu sekipa, Paulus cap, Barnabas cap, kwar dangna gum, puto di, tamupra apenmai neng tep peprei.

“Pio telep ngeda, nundi Allah upu menmena sun pepsetenemepa gekeptum dinino, sun aupu tapmarumdi men gekepmarume. Ange tep nengeda, Allahdi gam pio kuna kareserur keca, ‘Men dopropkamepe’ tenen, sun kange dipu tenepdanmarumdi, aupu tapmaruma cadi, ukuda nunda Yahudi yala gum nesala tep, sun damai peterem benkamneme.” 47 Allahdi nun tep aupu peipseu.
‘Kan deiki dipu, nimi ban-ban yuma, mutu sirik im sirik dakunge nesala tep, “Lyemna keca dubenkamrum” tenen, yuk-yuk mutu nesala dirine kemna tep, upna dirine utopu ^{▼▼upna dirine utopu – Yesayadi peiamu upuda, deiyo weneri akupmare. Lap pena upu nomor 47 dirume.} nedi wepra deipkene.’ (Yesaya 49:6)

Paulus cap, Barnabas capdi peprei.

48 Paulus cap, Barnabas cap, aupu yuma pepreipa, sun Yahudi yala gum nesala gekepidi kange deipidi, pepi. “Uo, Allah er upuda pio mambule,” pepra Allah si erepi. Ukupidi, Allahdi, ‘Sun gam pio kuna deiyo keca dopropkameng’ tenen, men di anupra wepra deiamu nesalapu teka tenepi. 49 Ukuramyanen, amutu damai kurami nesala weik ton cap, nun nai Yesus upu gekeramidi, sun teka tenena neng sun gungda weik kupbarami.

50 Dinino, amenda taru, sun Yahudi yala deiyo nengdi, amutu Yunani kurami nerapu, sunda isomka kuramidi, Allah si eremami nerapu cap, tonda, amutu sisa ila-ila neng cap tep aupu pepi. “Paulus cap, Barnabas cap, sun nong deiki ikin keca deipkupe,” pepra, upu deiki di papra dokotepi. Upu deiki di papra dokotepipa, amutu nengdi, Paulus cap, Barnabas cap, sun nong deiki ikin keca deipidi, “Sun aneng bereso,” pepra, sun mutu neitamai di dokotepi. 51 Dokotepipa, Paulus cap, Barnabas capdi uteneprei. ‘Amutu nengdi Allah upu yaniptapmai atep, nun peda sun tep, tenena gum di, pio yaniptapra benkuneme,’ tenepreidi, sun sandal amutu tu bapmau sandal dopropreidi, amutu tu kiliptapra Ikonium mutu kwereprei. ^{▼▼Tu bapmaunge kiliptamami – Tu bapmau ngeda, kiliptamaminge deiyo ake. ‘Mali keca katuai epkameng’ tenen, nundi co bata copra derirameptopu, amutu nengdi, ‘Amutu nesalada, Allah upu yanitamnung nesala kununga cadi, Allahdi amutu nesala tapkamre,’ tenepserengdi, ‘Sun sandal kwiripra nun mutu tu palepmaua kiliptaprei,’ tenepi.} 52 Sun kwerepra berei dinin, sun atupa kurami nesala, ada Antiokia mutu Yesus teka tenepra tup akurami nesalada, Allah er Lek Sambala sun dipru neitamai dekpepra dinikupa, kange deipra kurami.