Act 14 | XteSC | STEP | Paulus cap, Barnabas cap, Ikonium mutu konum bereiyopda, Antiokia mutu kuramreitopu, Yahudi yala neng sun Allah upu peteremna ati wekrei. Akati wekreidi, sun Allah upu pio telep kupra peteremamrei atep, Yahudi yala neng cap, ton Yahudi yala gum nesala cap, weike teka tenepi.

Acts 14

Paulus cap, Barnabas capdi, Yesus kai telep upu Ikonium mutu peteremrei upu

1 Paulus cap, Barnabas cap, Ikonium mutu konum bereiyopda, Antiokia mutu kuramreitopu, Yahudi yala neng sun Allah upu peteremna ati wekrei. Akati wekreidi, sun Allah upu pio telep kupra peteremamrei atep, Yahudi yala neng cap, ton Yahudi yala gum nesala cap, weike teka tenepi. 2 Yuk Yahudi yala nengdi, ada Yesus tep teka men tenepi nengda, ‘Paulus cap, Barnabas cap, nun song cadi, yuk neng tep mali upu peptepepa, abutene nengdi sun peteremrenge keca yanipkamenge,’ tenepidi, Yahudi yala gum nesala tep, minina upu peramiya deiki di yu kemdiramipa, Yahudi yala gum nesaladi, Paulus cap, Barnabas cap tep mali kange doupi.

3 Paulus cap, Barnabas cap, sun peteremamrei taru yumada, Yahudi yala nengdi, yuk yala neng tep yu kemdirami dinin, abutene nengda kwar dangna gum dipu, Yesus upu tupa peteremamrei. Sundi, “Yesus erda nesala yuma tep, bicau teneseredi, tali melimserur ngebo,” pepra upu peteremamrei. Peteremamrei taruda, ‘Aupu gekerami neng teka tenenkameng’ tenen, Yesusdi er puto Paulus cap, Barnabas cap, sun aneng nong deikipu deipupa, sundi nimi men kupmanto pel doramrei. Tonda, amambul pel doramrei pangeda, akeca dirami nengdi, ‘Uo, tek sisi aneng deiki di, Allahdi pio mambul pel donmaser’ tenen, kael keami.

4 Akati arum domyai kurami nesala tenpu dinin, neitamai bokrapidi, ton tara nengdi, Yahudi yala neng sun upu gekerami. Ton tara nengda, Paulus cap, Barnabas cap, sun peteremrei upupu teka tenepra gekerami. Ukuramya tep, amutu nesala kange yuk-yuk tenepidi bongdorami. 5 Bongdoramidi, Yahudi yala gum nesala pe, Yahudi yala nesala pe, sun cap, sun nimi deiyo neng cap, tenpu-tenpu upu sisingamidi, ‘Ikin keca sun butene neng nong deiki deipmepedi, gel dopra sun nong deiki dopra popkamepe,’ teneramidi upu sisingami. 6 – 7 Utenerami dinin, Paulus cap, Barnabas cap, sun aneng teneraminge kael kepreidi, ‘Popsunung’ tenen, sepdaro bereidi, Likonia tara neitamai, Listra mutu cap, Derebe mutu cap damai, amutu neitamai yuma, ‘Yesusdi nimi lyemserure,’ pepra, Yesus er kai telep upu peterep embaramrei.

Paulus cap, Barnabas cap, Listra mutu peteremrei upu

8 Listra mutu peteremamrei taruda, tenpu ngebo, yan pakopramu ngebo kuramu. Angeboda, er deiami taru di, yantang pakopropudi depupa, pio men embaramu. 9 Paulus peteremau taruda, angebodi er upu moupra gekenmau. Gekenmaupa, Paulusdi angebo ngopmauaipu dinmaudi, ‘Angeboda, teka tenipmanto ngebo kurure. Atep nengeda, teka tenepyopda, er yane dumsisikra deiptene,’ tenen, Paulus kael kepu. 10 Kael kepudi, dinmauanen, ila upu di angebo tep, “Kan yan tuai yanipra tekroyo,” pepu. Upepupa, angebo er bukmauai di, im kurukra tekroudi, tali-tali embanmau.

11 Uda abulupra wekmai neng, Paulus kupu keca sun epidi, sun Likonia upu deiki di, ila upu pepra gonga kepidi, apio perami. “Uo, nun allah-allah ^{▼▼allah-allah – Sun Yunani nengda, si eremami keca, isok-isok si weik kael keamidi taleami. Sundi isok-isok tep si eremami keca tep, ‘allah-allah’ perami dinin, ada tek sisi Allah gume. Ada isok tep perami.} si eremnup keca, nimi nong utopu deiki di, abutene neng akonum yanmaserenge adano,” pepra ila upu perami. 12 Uperamidi Barnabas tep sun isok si, si eremami keca, er sida Seus perami. Paulusda, upu pena deiyo ngebo kuramnga tep, er tep nengeda, sun isok si Hermes perami. ^{▼▼Hermes, Seus – Sun Yunani nengda, si eremami keca, isok-isok si weik kael keamidi taleami. Sun isok-isok deiyo ngebo sisada, Seus perami. Seus er upu kai melimna ngebo sida, Hermes perami. Ada, ‘Allah utopu ngebo kurure,’ teneramidi Hermes perami.} 13 Seus er si eremami atida, Listra ati arum domyai dinin, bura tara domi. Akati deiyo ngebo, ada Seus er karena deiyo ngeboda, erdi jem sapi cap, kait-kait keca lyumoprapudi, tapu kwanepra deipmau keca cap dopra, amutu ati arum domyai sirik tara wiami beilya buplan damai, tengyau.

Ada mesum tep gume. ‘Akeca popmepya deiki di Paulus cap, Barnabas cap, gispal dopmepedi, sun si erepkamep’ tenen, akeca dopra tengyau. 14 Ukupupa, yuk nengdi lap pepipa, Barnabas cap, Paulus cap aupu gekepreidi, akupkunge ngeda, ‘Warya tep kupkung do?’ tenen, sun mali kange doupreidi, sun deiki dongoramrei opkale gwelepra tapreidi, ^{▼▼Sun opkale gwelepra taprei ngeda, deiyo ukuprap. Yahudi yala nengdi yuk neng sun tep mali kupne pangeda, ‘Uo, warya tep mali kupmang do?’ tenen, sun mali kange doupra, petenkemna tep, sun pe opkal gwelepra tamami.} ‘Sun akupmang keca yapronkung’ tenen, aneng wekmaiyai neitamai sepra bereidi ila upu di peprei.

15 “Sun akunmarum ngeda warya tep do? Nunda tali kuramenge nesala utopu kunume. Nun tali tuai nengpu kunume. Nundi sun tep, ‘Yesusdi nimi lyemserure,’ pepra, Yesus er kai telep upu denmaseneme. Sun amutu nengdi tali keca si eremrumnyada, taprumudi, amnyo karikra, ‘Allah tek sisi kurur ngebo er sipu erepkamruma’ tenen, pepseneme. Allah tek sisi, erdi alau tara cap, tuai tara cap, laut mokon cap, aweneri keca neitamai kure keca yuma cap, ketekepra deipu ngeboda er pua. Atep er sipu eremkamrume.” 16 “Menop taruda, nesala ban-ban yuma, ‘Ange telepe,’ tenepra kuraminge yumada diramu dinin, ‘Yaproso,’ men pepseu. Tali dimpepra kuramudi, kaukeamseue.

17 Ukuramu dipunen, ‘Erda wareto Allah kurur do?’ tenen, lap pena tep kecada, men tapseu. Erdi nun bicau tep telep kweipseu kecada ake. Dua neitamai di mo kareserure. Tonda, nun jenup kecada, ataru-ataru jenge tep, yuk-yuk wepra kareserure. Tonda, nun jenup keca weika di kareserure. Tonda, nun dipru kange derinup keca yuma kareserepa, ‘Kange dekpepseupa pingpingapu kunupe,’ peramepe. Ange yuma kareserya deiki di, ‘E, Allahdi tek sisi bicau teneserure’ tenen, kael kemnupe,” Paulus cap, Barnabas capdi, awekmai neng tep peprei. 18 Aupu yuma peprei dipunen, awekmai neng sundi, ‘Asapi bisam cap, domba cap popmepya deiki di, abutene neng sun gispal dopmepedi, sun si erepkamepe,’ tenepi ngeda, men tapmanto kunmai. Ukunmaiya cadi, sun Paulus cap, Barnabas cap, sun upu weik pepreiya deiki dipapu, aneng sun tenipmai keca yaproi.

19 Amenda taru, Antiokia mutu cap, Ikonium mutu capdi, Yahudi yala neng yanmaidi, sun upu pepya tep, awekmai neng gekepidi, ‘Aneng tek penmasenge,’ tenepidi, sun peda aneng pepi upupu teka tenepidi, Yahudi yala neng tara keproi. Yahudi yala neng tara keproidi, gel dopra Paulus er nong deiki doprapidi, popidi, ‘Konum depmare,’ tenepidi, er nong dopra sun ati arum domyai bura tara gipra bena deipi. 20 Deipidi, ‘Konum depmare,’ tenepmaipune, sun Yesus teka tenepi nengdi, Paulus er nong damai bulupra dana-dana wekidi, Allah moropi pangeda, Paulus bukra tekroudi, akati arum domyai neitamai kange di weku. Wekudi mapmaua berekupa, Paulus cap, Barnabas cap, amutu tapra, ‘Derebe mutu benkunem’ tenen, berei. 21 Derebe mutu bereyopda, ‘Yesus dipu nimi lyemserure,’ pepra, Yesus er kai telep upu peterepreipa, nesala weik teka tenepidi, Yesus er kuramu keca piripra kael kepidi talepra kurami.

22 Amenda taru, amutu weneri Listra mutu cap, Ikonium mutu cap, Antiokia mutu cap, Yesus teka tenepi neng tep amutu tamupra peterep embaramreidi, aneng dipru puto kudiramrei. Aneng dipru puto kudiramreidi, amutu neng Yesus teka tenepra pio talepi ngeda atalepya utopu, ‘Pio dimpepra kunkamenge’ tenen, sun dipru kwa dimamrei. Ukuramreidi aupu peprei. “Nun teka tenenup nesalada, ikin keca weik neitamai dipu, Allah pio talepkamser taru wekamepe. Tali kange doupra kanam dipapu men wektepe,” peprei.

23 Upepreidi Paulus cap, Barnabas capdi, ‘Apelpu donkameng’ tenen, sun Allah teka tenepi neng, ‘Sun deiyo neng kunkameng’ tenen, nimi yuk-yuk amutu neng, amutu neng, yuma wepra deipembaramrei. Aneng wepra deiprei taruda, sun butene nengdi ukuprei. Allah morona cap, Allah si eremna tep, jen si tena cap deiki di, amutu neng nun nai Yesus teka tenepya tep, ateka tenepi neng dopra, ‘Yesus dipu sun putapre keca pio melimkamre’ tenen, wepra deipembaramreidi, Yesus tep kareprei. 24 Ukupreidi, Pisidia mutu neitamai peterep embaramreiyanen, Pamfilia tara berei.

25 Ubereidi, Perga mutu Allah upu konum peterepyopda, Atalia mutu kwereprei. 26 Atalia mutu kwerepreidi, gapung co deiki wekra bukreidi, laut mokon deiki baramreianen, ^{▼▼Laut mokon deiki embarami gapung co lap pena upuda, nomor 33 dirume.} Antiokia mutu tamupra berei. Ada, ukupu gawal dakrei pelda, kapul men pel doramrei taru, benkurei taruda, sun Antiokia mutu nesaladi, ‘Allah er melimna deiki dipu apel dopkamrenge’ tenen, men di wepra deiami. Atep nengeda, ka tamupra Antiokia mutupu berei. 27 Bereidi, sundi pepreipa, amutu teka tenepi neng bulupra wekipa, sun Allahdi meliamupa sun doramrei pel yumada, lap peprei. Tonda, “Allahdi tali Yahudi yala gum nesala tep, ‘Teka tenepkamenge,’ tenepu tarupu, konum kupmare. Atep, Allah melipmarpa konum teka tenenmange,” pepra, aupu ton lap peprei. 28 Lap pepreidi, amutupu kuramrei. Ada, sun cap, Yesus er kuramu keca piripra kael kepidi, pio teka tenepra taleami nesala cap, Antiokia mutu nesala cap, kikiman weikanun pio kurami.