Act 15 | XteSC | STEP | Antiokia mutu kikiman kurami taruda, Yudea tara di nimi tenpu-tenpu Antiokia mutu beidi, amutu teka tenerami nesala tep, gonga kepra aupu peteremami. “Allahdi Musa tep peiamupa, Musadi Yahudi yala neng tep, ‘Sun den bam bol deiki tara sengkamrume,’ peprapudi seku. Ange tep nengeda, Musa peteremamseutopu, sun Yahudi yala gum neng peda, sun den bam bol deiki tarange sengkamrume. Sun den bam bol deiki tarange men sekrumyopda, Allahdi men lyepkamsere,” pepra aneng dipu peteremami.

Acts 15

Paulus cap, Barnabas capdi, Yerusalem mutu deiyo neng tep, upu talerberei

1 Antiokia mutu kikiman kurami taruda, Yudea tara di nimi tenpu-tenpu Antiokia mutu beidi, amutu teka tenerami nesala tep, gonga kepra aupu peteremami. “Allahdi Musa tep peiamupa, Musadi Yahudi yala neng tep, ‘Sun den bam bol ^{▼▼Den bam bol deiki tara sengna – Yahudi yala nengdi, metek nyapu den bam bol deiki tara atau urup tara sengami ngeda, deiyo ake. Pumun taruda, Allahdi, Musa tep pepu. “Yahudi yala nesalada, ‘Ne mawa nesala kunkameng’ tenen, anesala konum wepra deipsa tep, peten kemdina tep nengeda, sun metek nyapu deipmenge taru, ban bari tumi konum kupyopda, sal nyapu sun den bam bol deiki tarange sekamrume. Ada, ‘Israel nesala yuma, ne nyapu kunkameng’ tenen, peten kemdina tep, ange pio kunkamenge.” Tonda, lap pena upu nomor 19 dirume.} deiki tara sengkamrume,’ peprapudi seku. Ange tep nengeda, Musa peteremamseutopu, sun Yahudi yala gum neng peda, sun den bam bol deiki tarange sengkamrume. Sun den bam bol deiki tarange men sekrumyopda, Allahdi men lyepkamsere,” pepra aneng dipu peteremami. 2 Aupu peteremami atep, Paulus cap, Barnabas capda, yu kupupa, sundi, ‘Gume, nun deiyo ngebo Yesusdi, aupu men peterepseue,’ peprei. Upepreidi, ‘Den bam bol sengna mambule,’ pepra aupu peteremami neng cap, abutene neng capdi, yu kupdaramidi upu weik pepdai.

Ange tep nengeda, amutu teka tenemi nengdi, ‘Paulus cap, Barnabas cap, ton yuk teka tenerami neng cap, Yerusalem mutu dokotepkup’ tenen, wepra deipi. Deiyoda, ‘Aneng Yerusalem mutu bengedi, Yesus wepra deipu neng cap, Yerusalem mutu teka tenerami neng, sun deiyo neng cap, nun upu pepdapu upu tep, upu sisingkamenge,’ tenen, wepra deipi. Ada, ‘Den bam bol deiki tarange sengna tep nengeda, ware kupkamep do?’ tenepidi, ‘Yerusalem mutu bengedi, upu talepkameng’ tenen, wepra deipi.

3 Uda, Antiokia mutu teka tenepra kurami nesaladi, ‘Aneng Yerusalem mutu benkameng’ tenen, dokotepipa, Fenisia tara neitamai cap, Samaria tara neitamai cap, bisi mapbarami. Amutu neitamai bisi mapbarami taruda, Yahudi yala gum nesala, sun mali kurami keca taprap amnyo karikroidi, Yesus teka tenepra dopropidi taleamingepu, aupu lap perbarami. Aupu kai lap perbaramipa, amutu neitamai teka tenepra kurami nesala gekepidi, ‘E, Yahudi yala gum nesala peda, Yesus tep konum teka tenepi’ tenen, kael kepidi, pio kange deipi.

4 Aneng wepra deipidi, dokotepipa, bisi embaramyanen, Yerusalem mutu beiyopda, Yerusalem mutu teka tenerami neng cap, Yesusdi wepra deiamu neng cap, amutu teka tenepi neng, sun deiyo neng cap, sun yumadi ayai neng tep, “Telepe,” pepra gispal dopi. Gisal dopipa, Barnabas cap, Paulus capdi, awekmai neng tep, Allah meliamnga deiki sun doramrei pel yuma lap peprei. 5 Lap pepreipane, yuk teka tenepi neng, sun gungda Farisi perami nengdi tekra aupu pepi. “Sun Yahudi yala gum nesala peda, sun den bam bol deiki tarange adipapu tek sisi sengkamenge. Tonda, sun peda Allahdi ‘Ukunkamrume, ange men kunkamrume,’ peipupa, Musadi sekeiamu upu deiki di, mem upu tupa peseretopu, aupu yuma teka tenepra, ange dopra pio talepra kunkamenge. Sundi aneng tep upenkamrume,” Farisi nengdi peipi.

6 Sun yuma upepipa, Peterus cap, ton yuk neng, Yesusdi wepra deiamu neng cap, amutu teka tenepi neng, sun deiyo neng cap, ‘Yahudi yala gum nengda, den bam bol deiki tarange adipapu sengkameng do, gum do? Angeda ware kunkamep do?’ tenepidi, ‘Aupu moupra tenipetepmepedi upu talepkamep’ tenen, bulupra weki. 7 Upu weik talepmaidi, Peterus pe, sun pe, pio lemnapu kunmaipa, Peterus tekrapudi, aupu talepmai neng tep pepu. “Ne kayapu, sun kaele. Nun kikiman kuramupka neitamai, men di Allah wepra deipneue. Ada, Allahdi, ne wepra deipneua deiyoda ake. Ada nedi Yahudi yala gum nesala tep, ‘Yesusdi nimi lyemserure,’ pepra peterenkamna deiki di, Yesus er kai telep upu gekenkamenge. Aupu pepnepa, gekepmengedi, ‘Yesusdi lyepkamser’ tenen, teka tenenkamenge. ‘Apel donkamre’ tenen, Allahdi weipneue.

8 Allahdi nun dipru kange neitamai tenenup keca kael kemserure. Allahdi er Lek Sambala karepseutopu, sun Yahudi yala nesala peda, teka tenepya deiki di, er Lek Sambala sun tep konum karepu. Ange kupka deiki di, ‘Sun Yahudi yala gum nesala peda teka tenepmengepa, ne nyapu kutenge’ tenen, Allahdi konum lap pepmasere. 9 Nun pe, sun pe yuk-yuk men teneserura cadi, sun teka tenepya deiki di, Allahdi sun dipruai mali keca kwamu ngeda daepudi, telep kweipu.

10 Nun apu yapu cap, nun cap, Musadi sekamu ^{▼▼Musa sekeiamu mem upu, lap pena tep nengeda, nomor 35 dirume.} mem upuda, domembana tep, pirirtereramupu dinin, ikin kwamseupa, ange yuma men kupmanto kuramupu. Allahdi Yahudi yala gum nesala tep, ‘Musa sekeiamu upu yuma gekepmengedi, talepra dombenkamenge. Akupmenga deiki dipu lyepkamne,’ men pemu dinin, sundi sun Yahudi yala gum nesala tep, ‘Aupu yuma talepra dombenkamenge,’ penmarume. Upenmarumnya deiki di, Yahudi yala gum nesala, sun nong deiki pio ikin keca derinmarume. Angeda, nun Yahudi yala nesala peda, men kupmanto kuramepu. Atep, ware keca deiyo tep aikin keca sun nong deiki derinkamrum do? Ukuprumnyopda, Allah derepkamsere. Atep, ukurumnya deiki di, Allah tep kurpetenmarume. Angeda, warya tep do? 11 Ada pio gume. Nun teka tenenupada pepkusene. Ada, nun deiyo ngebo Yesusdi, nun bicau tep tali melipra kareserur keca deiki dipu, teka tenepepa, Allahdi lyemserure. Mem upu talepra ikin pel dopmepya deiki di men lyemserure. Angeda pio utopu, Allahdi sun Yahudi yala gum nesala peda, bicau tenerea deiki dipu lyemrure.” Peterusdi agekenmai neng tep pepu.

12 Uda Peterus upepupa, Barnabas cap, Paulus capdi upu ton cap peprei. Ada, sun Yahudi yala gum nesala kuramya neitamai di, Allah meliamua deiki di, Barnabas cap, Paulus capdi nimi men kupmanto keca pel doramrei. Apel doramrei pangeda, sun dirami nengdi, ‘E, tek sisi Allahdi abutene neng deiki di pel donmasere,’ tenen, kael keami. Apel doramreinge yuma lap penmarei taruda, sun awekmai neng yumadi, ‘Uo’ tenen, upu dimpepra gekenapu kunmai. 13 Barnabas cap, Paulus cap, upu konum penmareianen, sengpepyopda, dimpeprei pangeda, Yakobusdi pepu.

Ne kayapu, ne upu gekepneso. 14 Nun kabo Simon Peterusdi konum lap penmasere. Allahdi Yahudi yala gum nesala neitamai di, ‘Ne mawa’ tenen, nimi ton menmena wepra deiamupa, sundi Yesus tep konum teka tenepi. Ukupka deiki di, erdi nesala ban-ban yuma tep bicaue teneseryada, konum lap pepra peterepseu. Ayumada, Simondi konum lap pepmaser adano. 15 Peterus ukupu pepmaser upu cap, Allah upu lap pena neng sekami upu cap, amsepu kupmare. Allah upu lap pena neng, nabi-nabi neng sekami upuda ake.
16 ‘Amenda taru, ne tamupra yanedi Daud er loka beu atida ^{▼▼Daud er ati loka beu ati pepu ngeda, ada ati tek sisi ati nong gume. Domon upu deiki di, ‘ati,’ pepkada, Daud er yala neng yuma tep pepu. Ada Daud yala neng dinin, ‘Yahudi yala neng cap, Yahudi yala gum neng cap, teka tenepkameng’ tenen, adomon upu pepu. Tonda lap pena upu nomor 34 dirume.} kange di lepsikrap dopkaman ja. Akati pun dea lokmamer atida, lepsikra telep kupra dopkamne.
17 Ukupnepa, yuk nesala ban-ban yuma ada, menop taru di men wepra deiamsi nesala, Yahudi yala gum nesaladi, “Allahdi lyepkamser” tenen, epterepkamneng ja. Ne Allah tep teka tenepmengyopda, lyepkamne.
18 Allah er dipu akeca yuma pel dorure. Men di akeca katuai lap peamupa, nimi kael kemenga deiyo ngeboda Allah er pua. Erdi aupu peamu.’ (Amos 9:11-12)

19 Yakobus aupu pepudi, dukdongopra aupu ton cap pepu.

“Ange tep nengeda, ne kayapu ne tenepmanada, sun Yahudi yala gum nesalada, sun mali kunge keca taprapmengedi, amnyo karikra Yesus tep teka tenenung nesalada, nun Yahudi yala nesaladi, ‘Musa sekeiamu upu ton talepra kunkamrume,’ pepmepya deiki di, sun nong deiki ikin keca ton cap men derinkamepe.

20 Ange men kupkamep dinino, telepngepu ukupkamep ngeda, surat sekmepedi, sun damai dokotepkamepe. Pio men kupkameng kecada, ukuprap pepkamepe. Ware jen keca do yuma, nimidi si tali eremenge keca, ‘Gisal dopra si erepkamep’ tenen, popra karemenge ngeda, nun men jeptepe kecada, sun Yahudi yala gum nesala peda ajen keca yala-yala yuma pio men jenkamenge.

Tonda, upula di tali nyangdana keca yuma pio men kunkamenge. Tonda, kum olokdongopra popmengopda, yapi men sangamre keca yuma, nong galepra pio men jenkamenge. Tonda, yapi mokon yala yuma pio men jenkamenge. Ukuprap pepkamepe,” Yakobusdi pepu.

Upepudi, aupu ton pepu. 21 “Nundi, ‘Ange men kunkamrume,’ pepra surat sekra penkamep upuda, mesum tep gume. Aupu yumada, Musa sekeiamu upu neitamai kurura tepa. Pumun taru di ukutaru yumada, Musa sekeiamu upu peteremamipa, nun mutu-mutu yuma nun Yahudi yala neng Allah si eremnup ati neitamai, Sabat tumi yuma deiki di tupa peteresengepa, aupu tupa gekenupa tep pepne.” Yakobusdi pepu.

Yerusalem teka tenena deiyo nengdi, Yahudi yala gum nesala tep surat dokotepi upu

22 Yakobusdi apepka tep, amenda taru, Yesusdi wepra deipu neng cap, amutu teka tenerami neng cap, sun deiyo neng cap, sun yuma kikiman tenepidi, ‘Nun akunmap neng neitamai di, yuk neng ton wepra deipkamepepa, Paulus cap, Barnabas cap wisipra Antiokia mutu benkameng,’ tenepi. Utenepidi Yudas er si ton Barsabas perami ngeboda, er cap, Silas cap, wepra deipi. Abutene nengda, amutu teka tenepi nengdi, abutene neng tep, gispal doramidi, ‘Sunda pio telep neng,’ teneramya tep, abutene neng wepra deipi.

23 Yesusdi wepra deiamu neng cap, amutu teka tenerami neng, sun deiyo neng capdi, ‘Asurat dopra karerbenkameng’ tenen, awepra deipi neng tep, surat karepi. Asurat neitamai sun seki upu ake.
Yahudi yala gum nesala, Antiokia ati arum domyai cap, Siria tara cap, Kilikia tara cap, amutu-mutu neitamai Yesus teka tenepra kurum nesala tep asurat sekeipsepe. Sun cap, nun capda Yesus teka tenenupa cadi, weite-du utopu kunupe.
Nundi Telepe pepsepe.
24 Sunda ikin kange doupra kunmarumnyada gekepmape. Ada nundi, “Ukunkamrume,” pepra men dokotepmepu dinin, nun kupya neitamai nengdi, yuk neng ton sun damai yaidi, sun peteremami upu deiki gekeprumdi, ‘Anengo, uo, ware kupkup do?’ tenen, pio ikin kange doupra kunmarumada gekepmape.
25 – 26 Atep, nun yuma kange tenpu deiki di tenepmepedi, ‘Nimi wepra, sun Yahudi yala gum nesala damai, nimi ton dokotepkamepe,’ tenepmupu. Uda nun kayapu neng sisa, Barnabas cap, Paulus cap, sun aneng tep pio bicaue kuserure. Sun anengda, sun kange tenena cap, sun dipru cap, sun nong yuma, ‘Nun deiyo ngebo Yesus, er upu peterepnemedi, er pelpu donkamnem’ tenen, Yesus tep kareprei. Yuk nengdi, ‘Yesus upu peteremrungada, nun songe’ tenen, abutene neng tep, portererami dinin, abutene nengda, Yesus er upu tep peteremrungada, men yamdongoramrei. Tupa apelpu dorurunge. Atep, ‘Anengda sun damai dokotepkamepe,’ tenepmupu.
Tonda, ‘Nun mutu wepra deipmupu neng cap, aneng cap, wisipra kikiman sun damai yankamenge,’ tenepmupke. 27 Nun kan-kan di dokotepmap neng butene nengda, sun si Yudas cap, Silas cap, nundi asekmap upu tek sisi utopu, sun upu deiki di lap pepkamserenga tep, dokotepsepepa, sun damai peryankamserenge. 28 Allah er Lek Sambala cap, nun yuma cap, nun kange amsepu kikiman kupedi tenepmupka tep, ikin keca ton cap tapakrap, sun nong deiki men deipkamepe. Dinino, amambul mem keca puda, pio men kunkamrume.
29 Ware jen keca do yuma, yuk nengdi, ‘Nun nai’ tenen, si tali eremenge keca, ‘Gisal dopra si erepkamep’ tenen, popra karepmenge ngeda, nun teka tenenup neng men jeptepe kecada, sun Yahudi yala gum neng peda, ajen keca yala-yala yuma pio men jenkamrume. Tonda, yapi mokon yala yuma pio men jenkamrume. Tonda, kum olokdongopra popmengopda, yapi men sangamre keca yuma, nong galepra pio men jenkamrume. Tonda, upula tali nyangdana keca yuma pio men kunkamrume. Akeca pio men kuprumnyopda, teleppu kupra kunkamrume.
Telepe, aupupu sekra deipmepe.

30 Uda awepra deipi neng dokotepipa, sundi Antiokia mutu beiyopda, sun pepipa Antiokia mutu teka tenepi neng yuma bulupra weki pangeda, Yerusalem deiyo nengdi seki surat karepi. 31 Asurat karepipa, Antiokia teka tenena neng, wekmaidi asurat dopra pepidi, asurat neitamai telep kwa dimna upu gekepya deiki di pio kange deipi. 32 Yudas cap, Silas cap, sun peda Allahdi peramu upu lap pena deiyo neng kuramreiya cadi, sundi amutu teka tenerami neng tep, dipru kwa dimna upu cap, dipru puto kemdina upu cap, upu weik peramrei.

33 Amutupu yambul weikanun ton cap kikiman kuramipane, ‘Aneng sun dokotemna deiyo nesala damai tamupra benkameng’ tenen, amutu teka tenepra weite-du utopu kurami nengdi, telep upu pepra deipidi, “Telepe, kange doupra dabeso,” pepra, aupu kai yai neng tamupra dokotepi. 34 Dinino, Silasdi, ‘Acapu kunkamne,’ tenepudi amutupu yambul ton kuramu. 35 Tonda, Paulus cap, Barnabas cap, Antiokia mutu acapu weikanun ton kuramreiyanen, sun cap, nimi weik ton capdi, Yesus er upu lap pena cap, peteremna cap pel dorami.

Paulus cap, Barnabas cap, mali kange doupra, upu pepdareidi, yuk-yuk bokra bendoprei upu

36 Amenda taru, Paulusdi Barnabas tep pepu. “Nun beriyo! Nun butene nengdi Yesus er upu peteramnumu mutu yuma, tamupra benemedi, ‘Sunda ware kupra kunmang do? Telep kupra teka tup tenenung do, gum do?’ tenen, dipterepkamneme. Uruna kupra benkamneme,” Paulusdi Barnabas tep pepu. 37 Barnabasdi, ‘Yohanes ada yuk si ton Markus si penung ngeboda, er cap kikiman betepe’ tenen, putaramupa tenimamu. 38 Barnabasdi ange teneamudi pepu dinin, Paulusdi, ‘Gume. Angebo tapangnada yaprume. Yohanesda, Pamfilia tara di tapseudi, nun pel gawal men dangamnumu taru, tapseupa nun pel yuma wisipra pel men dopmupka tep, nundi er dopra kikiman men betepe,’ tenen, tenimamudi pepu.

39 Ukuprap yuk-yuk teneramrei atep, yu weik kupupa, upu weika di pepdarei. Adeiki dipu, yuk-yuk bokdarei. Bokdareidi, Barnabasdi Markus dopra, ila gapung co wekra bukreidi, ‘Siprus mutu benkamnem’ tenen, laut mokon deiki berei. 40 Dinino, Paulusdi Silas wepudi yukai beu. Ada, amutu teka tenerami nengdi, ‘Yesus er melimna deiki dipu apel donkamreng’ tenen, abutene neng tep, Allah moropidi, Yesus tep karepipa, berei. 41 Sun baramreianen, Paulus cap, Silas cap, Siria tara ton, Kilikia tara ton embaramreidi, amutu teka tenepra kurami nesala tep, sun teka tenepra pio talepi ngeda, ‘Atalepya utopu, puto di dimpepra kunkameng’ tenen, Paulusdi amutu neng tep, dipru puto kudiramu.