Act 16 | XteSC | STEP | Uda Paulus cap, Silas cap bisi mapbaramreidi, baramreiyanen, Derebe mutu berei. Derebe mutu bereyopda, banmareiyanen, Listra mutu berei. Listra mutu neitamai Yesus er kuramu keca piripra kael keamu ngebo, er sida Timotius, er ninda, Yahudi yala ner, Yesus teka teneamu ner kuramu. Dinino, er naida, Yunani yala ngebo kuramu.

Acts 16

Paulus cap, Silas cap banmareipa, Timotius cap wisipra benami upu

1 Uda Paulus cap, Silas cap bisi mapbaramreidi, baramreiyanen, Derebe mutu berei. Derebe mutu bereyopda, banmareiyanen, Listra mutu berei. Listra mutu neitamai Yesus er kuramu keca piripra kael keamu ngebo, er sida Timotius, er ninda, Yahudi yala ner, Yesus teka teneamu ner kuramu. Dinino, er naida, Yunani yala ngebo kuramu. 2 Listra mutu cap, Ikonium mutu cap, teka tenepra weite-du utopu kurami nengdi, Timotius tep, ‘Angeboda pio telep ngebo,’ teneramidi, er tep telep upu perami. 3 Paulusdi Timotius tep, ‘Putaneryada, nedi er dopra kikiman benkamepe,’ tenepka tep, erdi Timotius dopra, yuk neng damai dubeupa, sundi Timotius er den bam bol deiki tara seki. Akupunge deiyoda, ake. Paulus embankamu mutu neitamai kurami neng yuma, Yahudi yala nesaladi, Timotius er nai Yunani yala ngebo kuramngada, konum kael keamya tepa. Yahudi yala nengdi, Timotius tep, ‘Den bam bol deiki tara sengna gum ngeboda nun songe,’ tenepnung tenen, Timotius er den bam bol deiki tarange seki. ^{▼▼Timotius er den bam bol deiki tara seki – Timotius er naida, Yunani ngebo kuramnga cadi, er deipi taru den bam bol deiki tarange men seki. Paulusdi, ‘Yahudi yala nengda, ato ngeboda, nun songe. Warya tep angebodi yana Yesus upu penmaser do, tenepnung,’ tenepka tep, Paulusdi pepupa, Timotius er den bam bol deiki tara seki. Sun Yahudi yala nengdi teneramyada, ‘Den bam bol deiki tarange sengna gum nengda, nun Allah si eremna ati pumbon men wektenge,’ tenerami.}

4 Ukupyopda, sun Paulus cap, er kikiman embarami neng cap, beidi, ortara, Yerusalem mutu Yesus wepra deiamu neng cap, ton Yesus teka tenepi neng sun deiyo neng wisi neng capdi, ‘Yahudi yala gum nengdi ukupkamenge,’ tenepidi, surat seki upuda, amutu-mutu yuma lap pepra embarami. Lap perembaramidi, sun embarami mutu teka tenepi neng tep, ‘Aupu teka tenepra ange utopu kunkameng’ tenen, lap perembarami. 5 Ukurami atep, amutu teka tenepra Allah upu ati wengami nesalada, sun Yesus teka tenepra pio taleami ngeda, puto weik kupupa, pio dimpepra kurami. Tonda, tumi-tumi yuma yuk nesala ton cap teka tenepidi tapakipa, sun gung weik kepropnen barami.

Teroas mutu beu taruda, Paulusdi ken deiki di epu keca tep, pepu upu

6 Paulus cap, er kikiman embarami neng capdi, ‘Asia tara neitamai Yesus upu peterem benkamep,’ tenerami dinin, Allah er Lek Sambaladi upu sengdongoramnga tep, Asia tara men embarami dinin, Pirgia tara neitamai cap, Galatia tara neitamai cap, amutupu embarami. 7 Embaramidi Misia datara, Bitinia dortara neitamaida, wilipramngai beiyopda, Bitinia tara benterepi dinin, Yesus er Lek Sambaladi, ‘Amutu neitamai men embenkurume,’ pepra ^{▼▼Yesus er Lek Sambala pepunge deiyoda, ada Allah cap, Yesus cap, sun butene dinin, tonpa kurerunge. Sunda Allah tenpu kurure. Atep, ton taruda, Lukasdi Allah er Lek Sambala seku. Ton taruda, Yesus er Lek Sambala seku. Dinino, Sambalada, er tenpu kurure.} upu sekrou. 8 Upu sekroua tep, Misia tara wengna gum dinin, talipu baramyanen, Teroas mutu kwerepidi bei. 9 Teroas mutu beiyopda, bena mapmaiya lukunda neitamai di, kene utopu keca Paulus epu deiki di, Makedonia tara ngebo, tenpu ngebo tekudi, pio moropudi pepu. “Makedonia tara yamemdi, nun makupseo,” pepra moropu.

10 Paulusdi aken utopu keca deiki ange epudi, lap pepupa, nun yumadi tenepmupke. “Gume, Allahdi Paulus kene epka deiki konum lap pepmaser adano. Nundi, Makedonia tara nesala, Yesus lyemna upu peterepkamepe. Allahdi ange, konum tenepmaserada, konum kael kepmapa tep, adipapu, ‘Makedonia mutu peterembenkup’ tenen, ketenepmupke.”

Filipi kuramu ner Lidia, Yesus tep teka tenepu upu

11 Uda, Teroas mutu di, ila gapung co wekrap bukmupudi, kumanya puto deiki di laut mokon deiki banmapkanen, laut mokon neitamai Samoteres mutu bepu. Bena mapmapka, berekupa, Samoteres mutu di mokon deiki banmapkanen, Napolis mutu bemupu. 12 Napolis mutu di tuai bisi deiki Filipi mutu banmapudi, ue taru dumbarito amutupu kunmapu. Filipi mutuda, ada Propinsi Makedonia tara neitamai bokrap kwamu. ^{▼▼Propinsi Makedonia tara ila pala mutu cadi, sun Roma nengdi neitamai dumbari bokra deiami. Menmena bokra deiami mutu neitamaida, Filipi mutu kwamu.} Atara neitamai, sun Roma nesaladi ati arum domidi kurami mutu akwamu. ^{▼▼Filipi – Roma nesala sun mutu sisa Italia taprapidi, yuk mutu neitamai bena kuramitopu, Filipi mutu yakaramidi kurami. Atep nengeda, Filipi mutu nesala sun pedipapu, sun pedipapu upu bongdirami. Roma mutu nimi deiyo nengdi, Filipi mutu kurami nesala tep, upu men bongdirami. Tonda, Italia mutu deiyo neng tep, pajak co bo bulupra men karerami.} 13 Amutupu kunmapka cadi, ‘Sabat tumi deiki di, Allah moronai apu akwapmare’ tenen, Filipi ati arum domyai sirik-sirik dana-dana wiami beilya buplan bisipra bura tara bena me damai bemupu. Aca bena bukmupudi, abulupra wekmai nerapu tep upu pepmupu.

14 Agekenmai nerapu neitamaida, ner tenpu, Tiatira mutu di yau nere, er sida Lidia, bukmaudi gekenmau. Lidiada, kunumna weik mirin opkal kunumna deiyo ner kuramua cadi, yuk nengdi er damai aopkal kunumami. Tonda, anerdi Allah teka tenepra, Allah er si eremamu. Anerda, Paulus er pepu upu gekenmaupa, Yesusdi, ‘Aner ne tep teka tenepredi gekepkamre’ tenen, er dipru buplan pakaipupa, Yesus tep teka tenepu. 15 Teka tenepupa, er cap, er ati pum kikiman kurami nesala cap, teka tenepya tep, me dongopipa, erdi nun tep, ‘Nati yankurum’ tenen, moropseu. “Sundi ne tep, ‘Anerda nun nai bo Yesus tek sisi teka tenepmare,’ tenepmanuruma cadi, ne ati yarumudi, ke tarupu kikiman kunkamepe,” pepra moropseu. Weika di moropseua tep, er ati wekmupu.

Paulus cap, Silas cap dopra, wenemna ati dongopi upu

16 Uda yuk taruda, sun Yahudi neng bulupra Allah mororamyai benmapu taru di, yuk nengdi, ‘Aner nun pel tali donkamser’ tenen, co bo deiki di kunuami ner ^{▼▼Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} tenpu bisi neitamai epmupu. Anerda, tenpu isok taleamnga di, aisok puto deiki di, amenda kupkamu keca yuk neng tep lap peramu. Anerdi yuk neng tep, “Amenda taru ukupkamsere,” pepra lap peramupa, anengdi co bo weik kareamipa, aner er taleami nengdi kunumna weik co bo dororami. 17 Anerdi Paulus cap, nun yuma cap tep domembaramseudi, ila upu di peramu. “Allah pio puto weik kuredi, akeca-keca yuma bisbisa kapra deiki tara kurur Allahda, anengda er pel melimna neng kungedi, ‘Allahdi Yesus tep teka tenepmepya deiki dipu lyemserure,’ pepra Yesusdi nimi lyemserur upu lap penmasenge,” pepra anerdi pio peramu.

18 Tumi-tumi yuma anerdi aupu pio pepembaramudi, nun tep domembaramupa, amenda sirik tarada, Paulusdi kange boktopupa, tamuprapudi, aner dipru neitamai kuramu isok tep, yu bikrapudi upu pepu. “Yesus Kristusda, er si cap, er puto deiki capdi, pepkene. Aner dipru neitamai gupra bura beo, pepkene!” pepu. Upepupa, adipapu aner taleamu isok aner tapra beu.

19 Amelimna ner kunuamidi taleamya deiyo nengdi, aner pel doramupa co bo dororamya deiyo keca, aisok bura beudi gum kupupa, kael kepi. Ange yuma konum kael kepidi yu kupupa, Paulus cap, Silas cap, talepra gipdaro beidi, ‘Akati arum domyai deiyo neng damai lap pepkup’ tenen, amutu nesala upu taleramyai gipra derirbei. 20 – 21 Ukupidi, amutu nesala sun deiyo neng damai abutene neng dopra deidi pepi. “AYahudi yala butene nengda, mali-mali kupmarengpa, nun amutu nesala pio mali kange dounmap adano. Sunda, ‘Ukupkamrum,’ pepmasereng upuda, nun amutu mem keca tep, upu bisipmaserenga tep, akecada, nun amutu nengdi men kuptepe. Tonda, nun Roma nesala kunupa cadi, sun pepmasereng upu dopra, nun Roma nesaladi men kuptepe,” pepi.

22 Upepipa, tali awekmai neng gekepidi, ‘Sun mali kurengepa, tek pepmasenge,’ tenepi. Utenepidi, arup pepmai neng upupu, sun atali wekmai nesala peda, Paulus cap, Silas cap tep pepi. Upepipa, amutu deiyo nengdi pepipa, Paulus cap, Silas cap, sun deiki dongorami opkale gweleptaprapidi, sun nong balana di popi. 23 Anengdi sun nong deiki weika di balana di popidi, abutene neng doprapidi, wenemna ati dongopi. Dongopidi amutu deiyo nengdi, awenemna ati kalengna deiyo ngebo tep pepi. “Kanda abutene neng tep, pio moupra kalekurume,” pepi. 24 Ukuprap pepya tep, awenemna ati kalengna deiyo ngebodi, ‘Paulus cap, Silas cap bererunge’ tenen, abutene neng doprapudi, awenemna ati pio ati pum neitamai wiliami ati dongopudi, sun yane dana-dana pio kwaktaprapudi, ila ikin co bon potokmaiya neitamai dongopudi, getepdongopu.

25 Uda acapu akunmarengpane, manduk pena taruto kupupa, Paulus cap, Silas capdi, gispal dopra Allah si eremna tep, Allah morona cap, mut pena cap kunmareipane, awenemna ati pumbon men di wenepnedi dongorami nesaladi gekenmai. 26 Ukunmaipa, menmena di bime ila puto di long pepka deiki di, awenemna ati dela tu ikrap domyai peda long-long pepu.

Adipapu awenemna ati pum ati-ati yuma puto di paksingipupa, akati wenemna tep dongopi nesala yuma, sun getedongorami rantai tapu yuma sakroupu.

27 Ayuma ukupkopda, awenemna ati kalengna deiyo ngebo bukroudi, akati pumbon buplan yuma tali paktapnapu kupmaupa epu dingeda, ‘Akati wenemna tep dongopi neng yuma konum bendopmange,’ tenepka tep, er parang ya utopu keca doprapudi, ‘Nedi popdankune’ tenen, keteneipdau. ^{▼▼Wenemna ati kalengna nengdi podaraminge deiyoda ake. Pumun taruda, sun Roma deiyo nengdi, sun jen talena neng tep, uperami. “Wenemna ati dongopmepe nesala loptapra bendopsengopda, sun nong yo pununa tep nengeda, sun kalengna nengpu poptapkamepe,” perami. Uperamya tep, awenemna kalengna ngebodi aupu ‘Popdankune,’ pepu.} 28 Ukupu dinin, Paulusdi, angebo tep ila upu deiki di pepu. “Kan podana yaprume. Nun yuma bura men bendopmape. Akunmap adano,” pepu. 29 Upepupa, awenemna ati kalengna deiyo ngebodi, “Weica deso,” peprapudi, Paulus cap, Silas cap, sun tekmareiai neitamai sepdaro beudi, kware tep er nong yuma moropsepudi, sun damai tuai loktapra depu.

30 Ukupudi, amenda taru, erdi sun wenemna ati pumbon di, sun dopra bura tara deudi asipterepu. “Anengo, sundi pepnereso. Ne ware keca kuptenepa, Allahdi lyepnetu do?” pepra asipetepu. 31 Asipterepupa, sun tamupra peprei. “Kanda, nun deiyo ngebo Yesus teka tenepmem pangeda, lyepkamker ja. Yesus tep teka tenepmumyopda kan cap, kan ati kikiman kunge nesala cap, lyepkamare,” peprei.

32 Upeprei dingeda, sun butene nengdi angebo cap, er ati kikiman kurami nesala yuma cap tep, “Yesusdi nun mali kunup keca gum kupra deipseredi, lyemserure,” pepra, Yesus er kai telep upu lap peprei. 33 Aupu lap pepreipa, alukundapu awenemna ati kalengna deiyo ngebodi, adipapu sun butene dopra, sun susu me kuprap kwetepu. Ukupupa, adipapu er cap, er nyapsilip yuma cap, teka tenepipa, me dongoprei. 34 Me dongopreipa, awenemna ati kalengna deiyo ngebodi, er ati sisa pumbon abutene neng deudi, sun jen keca karepu. Tonda, sun yuma Allah teka tenepya tep, er cap, er ati kikiman kurami nesala cap, pio kange deipi.

35 Uda berekra konum kupkopda, akati arum domya deiyo nengdi, ‘Awenemna ati kalengna deiyo ngebo damai perbenkung’ tenen, sun melimna neng tep kai dakaipidi upu pepi. “Sun upu perberume. ‘Abutene neng lopra taprume,’ pepbankurume,” pepi. 36 Upepya tep, awenemna ati kalengna deiyo ngebodi, Paulus tep pepu. “Anengo, akati arum domya deiyo nengdi, ‘Abutene neng loptaprume’ pepmanenga tep, sun tali daberetume. Tali kange deipra dimpeprappu benkurume,” pepu. 37 Upepupa, Paulusdi amutu deiyo neng sun melimna nengda, kai upu peryanmai neng tep pepu.

“Gumde. Nun butene nengda tali neng gume. Roma mutu ila deiyo nengdi, sun upu pepra deipseiya deiki di, Roma mutu nesala utopu neng keipsei atep, ‘Sunda Roma nesala kururunge,’ tenesenunge. ^{▼▼Roma mutu nesala – Ware mutu deiyo nengdi do yuma, Roma mutu neng tep, tali lupra men weneptenge. Tonda, upu bongdina deiyo nengdi, upu talena gum deiki di, Roma mutu neng tep men wenepra poptenge. Angeda pio mali kuna tepa. Atep, sun Filipi mutu deiyo nengdi, Paulus cap, Silas cap tep balana di bongopi ngeda, pio mali kupi. Tonda, lap pena upuda, nomor 45 dirume.} Nunda Roma mutu neng kunum dipunen, sun anengdi, ‘Amali kupmarum keca deiki di wenepkusepe. Deiyo ake,’ men pepsei. Sundi yuk nesala damai dinmasiai, tali balana di popsei. Balena di popseidi, nun dopra wenemna ati pum getepdongopsei. Ukuda, sundi tali dimpepra, ‘Aneng inipra dokotepkamepe,’ tenepmasengada, gume. Ada men kupmanto. Sun anengpu yangedi, nimi dinmasengai dipu, katuai loptapkamseng adano,” Paulusdi pepu.

38 Upepupa, aupu gekepmai nengdi, akati arum domya nimi deiyo neng tep bena lap pepipa, sun deiyo nengda, ‘Uo, Paulus cap, Silas capda, sun Roma neng kurunge. Dinino, nundi peipmappa, aneng wenepra balana di popmangue. Atep, sun Roma mutu ila nimi deiyo nengdi nun tep, wenepra poptapkamseng do?’ tenen, kware pio weik kupi. ^{▼▼Sun kware weik kupi ngeda, deiyo ukuprap. Nimi deiyo nengdi yuk neng tep, ‘Mali kupmange’ tenen, dopra asimterena gum di, tali lupra popnopda, Roma mutu ila nimi deiyo nengdi, apomne neng wenemna tep porami. Angetopu, upu talena cap, upu bongdina cap gum dipapu, Paulusda tali dopra balana di popya tep, Filipi mutu deiyo nengdi, ‘Uo, Roma mutu ila deiyo nengdi nun ton wenepra popsunung’ tenen, kware kupi.} 39 Filipi mutu deiyo neng kware weik kupya tep, awenemna ati yanmaidi Paulus cap, Silas cap tep, upu moudiryaidi pepi. “Uo, nun mali kunmape,” pepra awenemna ati pumbon di bura tara dubeidi, ‘Sun ati arum domyai neitamai tapra yukai bendopkurenge’ tenen, Paulus cap, Silas cap tep, “Menmena yukai bereso,” pepra deipi.

40 Moropipa, Paulus cap, Silas cap, awenemna ati pumbon di bura konum bereyopda, Lidia ati berei. Lidia ati di sun cap, amutu teka tenepra weite-du utopu kurami neng cap, bulupra wekmaipa, sun telep upu pepreiya deiki di, awekmai neng tep dipru kwa diprei. Ukupreiopda, sun cap, yuk neng cap, amutu tapra yuk mutu berei.