Act 18 | XteSC | STEP | Uda, Atena mutu neitamai Paulusdi peteremamupa, ton tara neng teka tenepi, ton tara nengda, teka men tenepi. Ayuma konum kupkopda, Paulusdi Atena mutu tapra, Korintus mutu beu.

Acts 18

Paulusdi Korintus mutu beu upu

1 Uda, Atena mutu neitamai Paulusdi peteremamupa, ton tara neng teka tenepi, ton tara nengda, teka men tenepi. Ayuma konum kupkopda, Paulusdi Atena mutu tapra, Korintus mutu beu. 2 Korintus mutu beuopda, tenpu ngebo, er sida Akwila, ada Pontus mutu nengdi deiami ngebo, Korintus mutu kunmaupa, Paulusdi epu. Akwila cap, er ner Pereskila cap, Italia mutu kuramreipa, Roma nesala sun ila nimi deiyo ngebo, Kelaudius erdi, “Sun Yahudi yala neng yuk mutu beso,” pepka tep, sun Italia mutu taprapreidi, Korintus mutu yana kunmareipa, Paulusdi epu.

3 Paulus cap, aneng butenenge cap, upu talepdayopda, Paulusdi uruna tep sun ati beu. Aneng buteneda, opkal dodin ati tenda tep wiramreitopu, Paulus peda opkal dodin ati tenda wiramnga tep, sun kikiman kuramidi, tenda ati tep wirami. ^{▼▼Tenda atida, ke derin ati tep, lyom opkal dopropmengedi, yambul ati utopu keca wipmengopda, tali bura mutu embaramenge nengdi, akati pumbon mapmengedi, berekyopda, uruptapra dopropmengedi kipra embanunge. Tenda ati wiprap deipnopda, yuk neng co bo deiki di kunumyakarami. Kunupnopda, aco boda, tenda wina deiyo neng dopropnedi, sun putapne keca kunumami. Ukuramitopu, Paulus cap, Akwila cap, er ner Piskila capdi, ukurami.} 4 Ukuramipane, Sabat tumi yuma deiki di, sun Yahudi neng Allah upu peteremna ati Paulus wengamudi, Yahudi yala neng cap, Yunani yala neng cap, sun kange tenengenge taprapmengedi, ukupu kange yuk punupmengedi, ‘Yesus teka tenenkameng’ tenen, Paulusdi lepsisingamudi Allah upu peteremamu.

5 Uda Silas cap, Timotius cap, Propinsi Makedonia mutu di Korintus mutu yarei pangeda, Paulusda, yuk pel yuma taprapudi, Yesus er upu tep peteremnapu kuramu. Paulus peteremamudi, Yahudi yala neng tep, “Allahdi nesala yuma lyemna tep, wepra dokotepseu ngeboda, ‘Nun Mesias ^{▼▼Mesias Pumun taru Allahdi pediramupa, Allah upu lap perami nengdi, “Allahdi tuai nesala lyemna tep, Mesias dokotepkamsere,” pepra peramipa, Yahudi yala neng gekeramidi, ‘Dan taru nun damai yankamser do?’ tenen, dinapu kurami dinin, Allahdi Yesus dokotepupa, er tep, teka men tenepi. Men teka teneramya tep, Paulusdi aupu lap pepu. Tonda, lap pena upu nomor 3 dirume.} ngebo ake,’ penup ngeboda, Yuk ngebo gume, Yesus er pua.” Paulusdi aupu pepra peteremamu. 6 Peteremamu dinin, sun Yahudi yala deiyo nengdi, Paulus peteremamu upu yanipra tapidi, er tep luludongoramipa, Paulusdi aneng sun wenemna tep, er opkal gege pepudi ^{▼▼opkal gege pena – Paulus er opkal gege pepu ngeda, deiyo ake. Nun penmape upu men gekepsengedi, yanipsengopda, nundi aneng tapmepedi yukai barameptopu, Paulusdi, aneng wenemna tep, er opkal dopra gege peptapu. Menop taruda, sun Yahudi yala nengdi ukuramya tep, Paulusdi, ‘Sun tep tapne, tenepkameng’ tenen, er opkal gege pepu.}, aneng tep aupu pepu. “Allahdi wenepra popseryopda, sun yapi sun giso deikipu kupkamsere. ^{▼▼Paulusdi “Sun yapi sun giso deiki kwapmasere,” pepunge deiyoda, ukuprap. Sun teka men tenepmaruma deiki, Allahdi popseryopda, sun yapi ne buru deiki men kupkamnere. Sun teka men tenepmarumpa, Allahdi sun tep wenepkamsere. Atep, “Sun yapi sun giso deikipu akwapmasere,” pepu. Ada, nun Ketengban nengdi, ‘Sun yapi sun buru deiki kupmasere,’ perameptopu, adeiyo tenena tep, Paulusdi aupu, pepu.} Angeda, ne deiyo gume. Ukutaru dipu tali kange doupra, Yahudi yala gum neng tep, sun damai peterembenkamne.” Paulusdi aYahudi neng tep pepu.

7 Paulusdi aupu konum upepra sengpepkopda, aYahudi yala neng, sun Allah upu peteremna ati pum di, bura tara beudi, akati dampu, tenpu ngebo, er sida Titus Yustus, er ati domngai beudi, akati ngebo cap kikiman kuramrei. Titus Yustusda, Yunani yala ngebo dinin, Allah si eremamu ngebo kuramu. 8 Ayahudi yala neng Allah upu peteremna ati deiyo ngebo, er sida Krispus, er cap, er ati kikiman kurami neng cap, nun deiyo ngebo Yesus tep, teka tenepi. Tonda, Korintus mutu nesala, Paulus upu gekerami nesala weik, sun gekeramidi teka teneramipa, me dongoramu.

9 Uda, tenpu tumi lukunda di, ken utopu keca deiki Yesusdi Paulus tep pepu. “Ne cap kikiman pio kunemnya cadi, kwar dangna gum, puto di akumemnya utopu, kware pio men kunkamrume. Tonda, dimpepra men kunkamrume, ne upupu pio peteremnapu kunkamrume. 10 Korintus mutu akati arum donga neitamai di, ne nyapu weik kunmanga tep, yuk nengdi men poryankamkenge,” Yesusdi Paulus tep pepu. 11 Aupu pepka tep, Paulusda, amutupu kuramudi, keteng tamun tenpu ton yuma mapudi, ton keteng tamunda, neitamaipu kuramu. Ataru yumada, Paulusdi amutu kurami nesala tep, Allah upu peteremamu.

12 Uda ukuprap peteremamu dinin, Galiodi Akaya mutu talepra Gubernur kuramu taru neitamai di, Yahudi yala deiyo neng kikiman yumadi, ‘Paulus popkup’ tenen, er upu yaniptapidi, sun upu bongdina deiyo neng upu talepmaiyai, Paulus dopra akati dubei. 13 Sun dubei nengdi, Paulus tep aupu pepra deipi. “Angebodi, amutu neng tep, sun kange tenenge keca taprapmengedi, ‘Yuk kange punupkameng’ tenen, Allah si eremna tep, ‘Ukuprap, ukuprap kunkamrume’ peserya deiki di, nun Allahdi pediramseu upu Paulusdi yanipra bisipmasere,” pepi.

14 Upepipa, Paulusdi, ‘Upu pepkun’ tenen, si ang peua kepman, Galiodi Yahudi yala neng tep pepu. “Gume. Sun Yahudi yala nengdi, ‘Angeboda, pio mali kupmare,’ peptumtoda, ne telep kupra gekeptenyopda lepsisikra deipsetene. 15 Dinino, sunda, tali nimi si cap, sun yala upu deiyo cap, Allahdi sun yuk pediramseu upu cap tep, pedanmaruma tep, sun pe yuk lepsikdankamrume. Neda, ato tali upuda ne men lepsikeipkusene,” Galiodi pepu.

16 Upepka tep, Galiodi er nyapu tep peipupa, anengdi sun Yahudi yala nesala tep, “Bura beso,” pepra upu bongdina ati pumbon di dokotepipa, bura bei. 17 Bura beidi, upu bongdina deiyo neng upu talepmai ati damai di, Sostenes, ada Yahudi yala neng Allah upu peteremna ati ^{▼▼Allah upu peteremna ati – Yahudi yala neng, sun Allah upu peteremna atida, nun gereja yambul atonun kwamu dinin, yambul yuk. Ada sundi hari Sabtu wengamidi, Allah er si eremami. Yahudi yala nesala kurami mutu yuma neitamai, Allah upu geken ati domi. Bahasa Indonesia deiki di, akati tep, ‘rumah ibadah’ penunge. Tonda, yuk-yuk tumi yumada, Yahudi yala nengdi, Allah upu gekena cap, peteremna cap, nimi pepdaramipa, sun upu bongdina tep nengeda, akati wengami. Dinino, ila mambul ati, Yerusalem mutu neitamai, Allah er karena tep domi atida, tenpu atipu kwamu. Tonda, lap pena upu nomor 26 dirume.} deiyo ngebo tep, taleprapidi, er nong bongopi. Sostenes ponmai dipunen, Galioda, ‘Sun yuk dapodange,’ tenepudi, kaukepronmau.

Paulusdi Antiokia mutu tamupra beu upu cap, tonda Piskila cap, Akwila capdi, Apolos petereprei upu

18 Paulusda, Korintus mutu yambul weikanun ton kuramnganen, amenda taru, amutu teka tenepra, weite-du utopu kurami neng tep, “Telepe, dakurume,” pepra deipudi, Siria mutu benkamya tep, er cap, Piskila cap, Akwila cap, gapung co pum wekra bukidi, kumanya puto deiki di, mokon deiki barami. Dinino, Paulusda, men di Allah tep, “Ukupkamkene,” peiamnga tep, sun Sirya mutu benkui taruda, Kengkeria mutu beidi, Paulusdi yuk neng tep, “Ne potong toupneso,” pepupa, er potong toupi. ^{▼▼Potong tourami ngeda, ada, Yahudi yala nengdi, ‘Allah tep pedina upu pepnedi, er pelpu donkamne taru neitamaida, ne giso potong toupkamnenge,’ teneramya tep, Paulus peda, ange utopu kupu. Aneng tep, “Nasarit pedina neng kununge,” perami. Tonda, lap pena upu nomor 38 dirume.}

19 Mutu si Sirya mutu benkamya tep, mokon deiki banmaiyanen, bisi neitamai Efesus mutu orbei dingeda, Paulusdi Piskila cap, Akwila cap tep, “Sun dakureso,” pepra deipu dingeda, erpu sun Yahudi yala neng Allah upu peteremna ati wekrapudi, ‘Sun Yahudi yala neng Yesus tep teka tenenkameng’ tenen, Yesus er upu lap pepra peterepu.

20 Peterepupa, sun Yahudi nengdi, “Kanda nun yambulanun ton kikiman kunkamepe,” pepra moropipa, Paulusdi tamupra, “Gume. Neda yuk mutu ton benkamna cadi, kikiman men kunkamepe,” pepu. 21 Dinino, benkoua tep, gonga kepudi bau taruda, Paulusdi amutu neng tep peipu. “Uda Allahdi, ‘Tamupra berye,’ tenepneryopda, tamupra yankamne. Gum dingeda, gume.” Paulus upepudi, Kaisarea mutu bana tep, Efesus mutu di, gapung co wekra bukudi, laut mokon deiki beu.

22 Beudi, yuk neng cap laut mokon deiki pio banmaiyanen, Kaisarea mutu damai mokon porai gapung co lukra deriramyai bena lukeipyopda, Paulus erda, Yerusalem mutu welepudi, amutu teka tenepi neng tep, “Telepe,” pepra, gispal dopudi, acapu uruna tep kunmauanen, adipapu Antiokia mutu beu. 23 Antiokia mutu beuopda, amutupu yambul kuramnganen, Antiokia mutu tapra adinen, ortara mutu, Galatia tara neitamai cap, Pirgia tara neitamai cap, amutu-mutu neitamai yuk-yuk peterep embaramu. Peterep embaramudi, Paulus er peteremamu upu deiki di, amutu kuramidi Yesus kuramu keca piripra kael kepra kurami neng tep, sun dipru puto kepra deipembaramu.

24 Uda, Paulus tup peterep embaramu taruda, tenpu Yahudi yala ngebo, er sida, Apolos, mutu sida Aleksandia deiami ngeboda, Efesus mutu yau. Apolosda, akeca-keca yuma kael keamudi, ila kael ngebo kuramu. Tonda, Allah upu yuma ila di kael keamu. 25 Sundi Yesus er Bisi ^{▼▼Yesus er Bisi peraminge deiyoda, ake. Yesus er peteremamu upu cap, er kuramunge cap, “Apu dopropmepedi, talepra dumsisipu kunkamepe. Yesus kuramutopu nun peda utopu kunkamepe,” pepra peteremami upu tep, ‘Yesus er Bisi’ perami.} peteremamiya tep, erdi, ‘Aupuda, tek sisi mambul upu,’ tenepudi, Yesus kuramu keca cap, Yesus er peteremamu keca cap, puto di yuk neng tep, Yesus er peramutopu, Apolos peda, tek sisi upupu dumsisikrap peteremamu. Dinino, Yohanesdi me dongona tep, peteremamu upu, aupupu kael keamu. 26 Apolosdi, sun Yahudi yala neng Allah upu peteremna ati wekrapudi, kwar dangna gum, puto di gonga kepra peterepu. Peterepupa, Piskila cap, Akwila cap, er upu gekepreidi, ‘Nundi er melipkamnem’ tenen, “Nun ati yaiyo,” pepra moropreipa, sun ati beiyopda, Allah cap, Yesus Er Bisi cap tep, telep kupra lepsikra lap peramrei.

27 Uda amenda taru, Apolosdi, ‘Ne Akaya mutu benkaman’ tenen, putapupa, Efesus mutu teka tenepi nengdi, “E ada walito,” pepidi, er dipru kwa dipi. Ukupidi, ‘Akaya mutu teka tenepi nengdi, Apolosda sun mutu berepa, kange deipra gispal dopkamemeng’ tenen, surat sekra dokotepi. Apolos Akaya mutu beuopda, Allahdi, Akaya mutu nesala bicau tenemnga tep, tali meliamua deiki di, amutu nengdi teka tenepra kurami. Ateka tenerami nesala tep, Apolos er peteremamu upu deiki di, aneng tep weike melimamu.

28 Akaya mutu nesala wekmaiya neitamai di, Apolos cap, sun Yahudi yala deiyo neng capdi, upu weik pepdai. Pepdaidi, men di Allah pediramupa, er upu lap pena neng, nabi neng sengami upuda, Apolos er upu puto penmaua deiki di, “Allahdi, ‘Nimi Lyemna Deiyo Ngebo, Mesias dokotepkamsene,’ pepu ngeboda, tek sisi Yesus er pua,” pepra, telep kupra katuai lap pepu. Aupu cap, ton er peramu upu yuma cap deiki di, sun Yahudi yala deiyo neng penmai upu bisipu. Apolosdi Yahudi yala deiyo neng, sun upu bisipka deiki di, Akaya mutu teka tenerami neng tep weika di meliamu.