Act 19 | XteSC | STEP | Apolos Korintus mutu apu tup kuramu taruda, Paulusdi tuai bisi di Galatia tara neitamai cap, Pirgia tara neitamai cap, embaramnganen, Efesus mutu beu. Efesus mutu beuopda, acapu Yesus teka tenepi neng, men di men diramu neng epudi, upu talepdaidi, Paulusdi aneng tep asipterepu.

Acts 19

Paulusdi Efesus mutu peteremu upu

1 Apolos Korintus mutu apu tup kuramu taruda, Paulusdi tuai bisi di Galatia tara neitamai cap, Pirgia tara neitamai cap, embaramnganen, Efesus mutu beu. Efesus mutu beuopda, acapu Yesus teka tenepi neng, men di men diramu neng epudi, upu talepdaidi, Paulusdi aneng tep asipterepu. 2 “Sunda, Yesus teka teneprum taruda, Allah er Lek Sambala karepseu do? Gum do?” pepra, Paulusdi asipterepu. Asipterepupa, sundi tamupra pepi. “Gume. Allah er Lek Sambala akapmar upuda, pumun di men pepseiya tep, pio men teneramupudi men kael kepmupke,” pepi.

3 Upepya tep, Paulusdi tamupra asipterepu. “Sun me dongonada, ware kupra me dongopsei do?” pepra asipetepu. Asipetepupa, sundi tamupra pepi. “Yohanesdi, me dongoramutopu, me sisa dipu dongopsei,” pepi. 4 Upepipa, Paulusdi aneng tep, tamupra pepu. “Uda Yohanes er me dongoramunge ada, nesaladi sun mali kuraminge tamamidi, amnyo karendongoramipa, Yohanesdi aneng tep me dongoramu. Deiyoda, sun mali kuraminge tapya tep, anesala me dongoramu. Tonda, Yohanes er amnyo tara yankamu ngebo Yesusda, Yohanesdi Yahudi yala neng tep pepu. ‘Sun Yesuspu teka teneprume,’ pepra peteremamu,” Paulusdi upepra lap pepu.

5 Paulusdi aupu peterepupa, sun men di teka tenepi neng aupu gekepidi teka tenepya tep, Paulusdi aneng tep, Yesus si deiki di me dongopu. Ukupka deiki di, Yesus er tara neng keproidi, er nyapu kepi. 6 Tonda, Paulus buru aneng, sun giso deiki deipu taruda, Allahdi karepupa, Allah er Lek Sambala aneng sun nong deiki yana wekupa, adeiki di sun pedipapu men kael kemami upu, yuk mutu nesala perameng upu penmai. Tonda, Allahdi aneng tep karepu upu, Allah er upu peda, lap penmai. 7 Ataruda, aupu penmai neng, amul dam di dana tara neng utopu, Yesus teka tenepi neng, tujuh neng nukipa dakurami.

8 Uda Paulusda amutupu ton cap ware weneri Efesus mutu kuramudi, Yahudi yala neng Allah upu peteremna ati wekrapudi, ‘Amutu neng ukupu teka tenenange dopropkameng’ tenen, kwar dangna gum, puto di, pio telep kupra lap peramudi, Allah upu, ada ‘Yesus lyepseredi taleserure,’ pepra aupu lepsikra peteremamu. 9 Paulusdi peteremamu dinin, amutu neng tenpu-tenpudi, kika deriramidi, ‘Nunda pio teka men tenepkamepe,’ tenepidi, aupu yanipidi, nimi gekeramya damai, Yesusdi “Ukupkamrume,” pepra deriramu bisi tep, mali-mali pepra derirami.

Ukuramya tep, Paulusdi aneng tapra meneng damai dinin, per ortara yukai beu. Yukai benkoua tep, amutu teka tenepi neng doprapudi, sun yuma Tiranusdi nesala weik wengamipa, peteremamu ati wengami. Akati wengamidi, tumi-tumi yuma Paulusdi Yesus upu lap peramupa, sun yumadi, ‘Telep kupra kael kepkamep’ tenen, upu talerdarami. 10 Upu taleprap, upu lap peprap, kurami keteng tamunda, butene. Apio ukuramya tep, Yahudi yala neng cap, Yunani yala neng cap, Asia tara neitamai kurami nengda, nun deiyo ngebo Yesus, er kai telep upu gekerami.

Sekewa er nyapu yoneitam bari di kuraminge tep, pepu upu

11 Allah er puto di meliamupa, Paulus er buru deiki di nimi men kupmanto keca, kunupsek pen pel doramu. 12 Ukuramnga tep, sun nong me kilina tep, giso koudongorami opkal cap, tonda, ‘Nun opkal buta bapsurur’ tenen, lelipdongopra geterdongorami opkal cap, Paulus er bol tali beramu ngeda, aopkal doprapidi, pu jen nesala damai derirbarami. Aopkal dopra derirbaramipa, anesala pu jeramu keca gum kuramu. Tonda, aneng sun dipru neitamai wengami isok gupra barami.

13 Uda yuk Yahudi yala neng tenpu-tenpudi, isok taleamu nesala tep, ‘Isok goupra benkamre’ tenen, enemdongorami. Anesalada, ‘Isok taleamu nesala, sun isok enemdongonkamep’ tenen, nun deiyo ngebo Yesus, er si pepra tali pirirtereramidi, tali peptapi. Ukuramidi, anesala taleami isok tep, aupu perami. “Paulusdi peteremrur ngeboda, Yesus er si deiki di, aneng nong neitamai di goupra, bura beo pepkene,” uperami. 14 Uperamya utopu, sun Yahudi yala neng Allah karena deiyo neng kuramya neitamai di, tenpu ngebo, er sida Sekewa, er nyapu yoneitam neng sun peda, ‘Aupu pepmepepa, isok bura benkamenge,’ tenepidi, aupu piripterepi. 15 Sekewa er nyapu yoneitam nengdi, Yesus er si tali pepra piripterepipa, aisokdi tamupra pepu. “Yesusda, ne tek sisi kaele. Ton Paulusda, ne kael dinino, sunda, sun ware puto nengdi apenmanerum do?” pepu.

16 Upepupa, aisok taleamu ngebodi depra dourbena taleproudi, aneng yoneitam bari neng tep pio weika di popu. Erdi aneng popka deiki di, pio bisipudi, aneng sun opkal yuma gwelepra tapu. Sun opkal gwelepra tapu di, akati pum di popkopda, sun nong bol deiki dila pio weik kupudi, yapi weik embanmaupa, sun nong banangapu sepdaro bei.

17 Sun Yahudi yala neng cap, Yunani yala neng cap, Efesus mutu kurami nesalada, isokdi Sekewa er nyapu popra bisipu keca lap pepipa, gekepidi, kware pio weik kupu. Kware kupupa, aneng yumadi nun deiyo ngebo Yesus, er si eremamidi, Yesus tep gispal pio weik dorami. 18 Tonda, ataru dipu, men di teka tenerami neng nimi weika di, sun pio mali-mali kurami ngeda, nimi gekeramya damaipu, yana lap peramidi, sun mali kunge keca tamami.

19 Amutu nesala men di nimi ker don pel dorami nesalada, teka konum tenerami dipunen, sun nimi ker don keca lap pena buku inipra deiami. Atep, ataruda, abuku inipra deiamya dopra, nimi dinmaiyai di, tenpai bulupra deipidi, uku dongopipa, uku jepropu. Uda animi ker dona tep, lap pena bukuda, ‘Abuku kunumna ukuprap, ukuprap’ tenen, nukrap deipidi, denge weik 50 ribu derakma nuki. ^{▼▼Derakma perami ngeda, ukuprap. Tenpu keteng komuni pel donmanpane, ipnopda, atumi pel dona yuma kunumna tep, derakma tenpu karerami. Ange tep nengeda, 50 ribu derakma nukra deipi ngeda, kunumna pio weiknge deipi. Ada, tumi-tumi yuma, denge pio weik 50 ribu tumi pel donmanpa kareraminge utopu nukra deipi. Angepu dinin, keteng tamun utopunge tenepmepyopda, ada 150 keteng tamun pel doramipa, kunumamia utopu nukra deipi. Kunumna men nukmantonge deipi.}

20 Ayuma pio telep kupya tep, nesala weik ton cap teka teneramidi tapangdoramipa, weik kupbaramu. Tonda, anesalapu Allah upu gekepra dororamidi, daramdina weik ton cap teka tenepbaramidi, sun dipru wisi kupbaramupa, dumsisipu kurami. 21 Ayuma konum kupkopda, Paulus tenepudi pepu. “Ne Yerusalem mutu benkaman taruda, Akaya tara neitamai cap, Asia tara neitamai cap, embanmanyanen, Yerusalem mutu benkamne,” pepu. Utenepudi pepu. “Asi pepman mutu yuma konum embenyopda, ‘Roma mutu benkamne,’ tenepsa tep, tek sisi Roma mutu peda benkamne.” Paulus tenepudi pepu. 22 Upepudi er melimna neng butene nengda, Timotius cap, Erastus cap, menmena Makedonia mutu dokotepu dinin, erda Asia tara neitamaipu yambulanun ton kuramu.

Efesus mutu nesaladi, Paulus tep yu kupupa, upu weik pepdai upu

23 Atarupuda, amutu Efesus mutu nesaladi, Yesusdi “Ukupkamrume,” pepra deriramu upu, er kuramutopu kuna tep bisi, ange tep yu weik kupupa, mundu deipra meteka gume, upu weik pedarami. 24 Uda tenpu ngebo, er si Demetrius, erda gat keca, kunumna weik keca er si perak di, metek keca petupra derina kael ngebo kuramu. Ukuramudi isok si, Artemis ^{▼▼Artemisda, sun Efesus mutu nesala, sun si eremami isok si. Sundi Allah si men eremami. Aisok ner sipu teka tenepra si eremami.} er si eremna ati, akati urasin utopu dinin, metekngepu petupra deriramu. Ukuramnga tep, er cap kikiman apelpu melipra doramidi, ketenepra derirami neng cap tep, erdi peramupa pel weik doramidi, apel dona tep, co bo weik dororami. 25 Demetriusdi, “Sun aneng yuma bulupso,” pepupa, er melipra pel dorami neng cap, apel utopu pelpu yukai dorami neng cap, bulupra wekipa, upu pepu.

“Ne kayapu, sun kaele. Apel doramepya deiki dipu, nun kunumna keca weik doramepedi, nun putapsere keca yuma kunumnupe. 26 Uda nepu yuk gume. Sun peda angeboda, Paulus, er kure keca dirumudi, er pere upu gekerum adano. Paulus erdi, ‘Nimi buru deiki di petupra donung allah-allahda, ada pio tek sisi Allah gume,’ perure. Paulus uperya deiki di, nesala weik sun kange yuk punuamenge. Punuamudi, anesala tep dopra gwalin bisi dubaramnge. Ada nun mutu Efesuspu gume. Asia tara neitamai yuma pio ukuramnganen, metekanunpu gawal tapmare.

27 Uda, Paulusdi, ‘Nimi buru di doamenge keca pumbonda, tek sisi Allah men kurure,’ pepra peteremrure. Nun doramep pelda, telep teneramsei dinin, Paulusdi aupu pio peterepyopda, amenda taruda, ‘Nimidi petupra deriramenge kecada malye’ tenepmengyopda, mali pepkamseng gum daca. Angepu gume. Tonda, nun pio telep isok ner Artemis, er si eremnup atida, lepterepsengyopda, ‘Ada talya,’ tenepkameng gum daca. Ukupkamenge tenepne. Tonda, Asia tara nesala yuma cap, nesala ban-ban yuma cap, isok ner si eremnung ngeda, ada Artemis peda, nundi Artemis tep, ‘Pio telepe,’ tenenup ngeda, sundi yanipkamseng do? Yanipkamseng ja tenepne,” Demetriusdi upeprapudi, abulupra wekmai neng tep lap penmau.

28 Uda lap penmaupa, aneng gekepidi, yu pio weik kupupa, ataru dipu gonga keprapidi, ila upu di penmai. “Nun Efesus mutu di, si eremnup isok Artemisda pio telepe. Er puto pio weike,” pepra ila upu di penmai.

29 Ton cap aupupu pio penmaiyanen, amenda akati arum domya neitamai kurami nesala peda, yu di sun yuma kange wang-wang pepupa, dung-dung pepidi, kwemdanmai. Ukupidi, adipapu sun aneng yumadi, Paulus cap, Makedonia mutu di yarei nengda, Gaius cap, Aristarkus cap, talepra dopropidi, aneng yuma tenpu bisipu bulupra talepdaro kikiman bei. Talepdaro tenpu bisipu beidi, tenpu ngebo tenepmare kange utopu doupidi, amutu nesala bulupra wengamidi, upu talerami ati wekroi.

30 Wekroipa, Paulusdi, ‘Aneng doupra wekrong ati benedi, upu pepkune’ tenen, ketenepupane, amutu teka tenepi nengdi, “Ukuna gume,” pepra upu sekroi. 31 Tonda, Asia tara ila-ila deiyo nengda, Paulus er kayapu nengdi, ‘Nun kabo popnung’ tenen, akati wekra, ‘Upu pepkune,’ tenepmare ngeda, ‘Yapronkure’ tenen, aila deiyo nengdi yuk neng tep, “Paulus kao, akati wengdongona yaprume pepmakenge perberume,” pepra upu peipipa, anengdi Paulus tep lap pepi.

32 Ataru neitamaida, aneng doupra wekroi ati nengdi, ton tara neng cap, ton tara neng cap, upu yuk-yuk, dana di dana di ila upupu penmaidi, lelimdanmaiya tep, men gekepmanto kupidi, kange wang-wang pepupa, dung-dung pepi. Tonda, akati kapul wekmai taruda, nesala weik tarada, ‘Upu deiyo ake,’ men tenepmaidi talipu wekmai.

33 Animi wekmaiya neitamai di, ‘Angebodi upu pepkur’ tenen, Yahudi yala deiyo nengdi, angebo er sida Aleksander, sun buru di papra dopbanmaiyanen, aneng wekmaiya utara, sun urasin deipra dinmai tara deipi. Deipidi, animi yuma wekmaiya neitamai di tenpu-tenpu nengdi ila upu di, Aleksander tep, “Upepkurum, upepkurum,” pepra deipi. Deipipa, ‘Upu pepkun’ tenen, tekrapudi buru bata deipu. ^{▼▼petupra deiami keca – Nimi buru deiki di petupra deriramidi, si eremami kecada, sun Yahudi yala nengdi, ‘Nun dabale,’ teneramya tep, sun Yahudi yala nengdi, ‘Uo, nun aupu pedanmapada, Artemis tara nengdi, “Ada sun deiyo,” pesenunge’ tenen, Yahudi yala nengdi Aleksander wepra deipi. Wepra deipipa, Aleksanderdi, “Aupu pedanmarumdi kange wang-wang pepra dung-dung pedanmarumada, nun Yahudi yala neng, nun deiyo gume,” pepu.}

34 Buri bata deipu dinin, anengdi Aleksander erda, Yahudi yala ngebo epidi, dabale kupupa, sun yuma upu kikimanpu ila upu di penmai. “Nun Efesus mutu si eremnup isok Artemisda ^{▼▼Artemis tara nengdi Aleksander er upu sun yanipi ngeda, ukuprap. Yahudi yala nengdi nimi buru deiki di petupra deirengedi si eremenge kecada, ‘Nun dabale,’ teneramya tep, Aleksanderda, Yahudi yala ngebo cadi, ‘Nun asi eremepenge tep, wenepkuser do?’ tenepidi upu bisiprapidi koupdai.} pio telepe. Er puto pio weike,” pepra atumi tenpu dinin, upu weik pio penmai.

35 Upu pio penmaipa, amutu deiyo neng perami upu gekepnedi, sekrap lap peramu ngebodi, tekrapudi, “Upu yapso,” pepupa, anengda upu dimpepi. Upu dimpepipa, erdi pepu.

Nun pio telep isok ner Artemis, er si eremne ati dopmupka cap, er urasin nong utopu keca, im deiki di sakupa, dopropmupu keca cap, nun Efesus mutu kunup nesaladi akeca melipra kalengnupada, ware ngebo, ware ner, men kael kepi do? Gume, nesala ban-ban yuma ange konum kael kepi. 36 Aupuda, tek do, telel do, men pepmanto. Tek sisi upu pepmasene. Ange tep nengeda, pio telep ngeda, sun kunmarum kecada yapkurume. Sundi sun tep, popmanto keca berbera men kunkurume.

37 Adiso, anengda, nun allah-allah si eremnup ati pumbon deamupu keca upula men dopramserei. Tonda, nun isok ner Artemis tep, si mali-mali pepra, lulupra men deiamserei dipunen, sundi aneng dopra akati denmarume. 38 Atep, akonum pepmasene. Demetrius cap, er dorur pel utopu pel donge neng cap, sundi yuk neng tep, mali kupmasenge upuda, ton tupa kupmaseryopda, nun gubenur upu lepsingna deiyo ngebo akapmare. Tonda gubenur erdi upu bongdisere taruda, sun aneng peda upu ton kuptuopda, acapu sun pedipapu, “Erdi mali kupmanere,” pepra wepra pepdatenge.

39 Tonda, sun peda, upu ton kupseryopda, nun deiyo nengdi, “Upu talepkupe,” pepmenge tarupu, sun cap aneng cap, upu talepra lepsikamrume. Aca gume, tonda yuk taru ton gume, sun upu bongdina tarupu pepkamrume. Ukutaru gume. 40 Dinino, atumi kunmap keca tep, yuk nengdi dopra nun deiyo neng damai perbesetengopda, sun gekepmengedi, “Sundi upu talepdaidi, kange wang-wang pepupa, dung-dung pepidi, kwepdaiya deiki di, nun deiyo neng kuramep keca sun anengdi yanipmasenge,” pepkamsetenge. Upepsetengopda, aupu pepdanmapdi kwepdanmapnge cap, dung-dung pepmapnge cap, “Nunda adeiyo tep upu talepmapa,” men peptepe. Deiyo men kwapmaserpapu kunmapa tepa. Amutu deiyo neng perami upu gekepnedi, sekrap lap peramu ngebo, Sekretaris ngebodi pepu.

Aupu pepu ngeboda, ada amutu deiyo neng perami upu gekepnedi, sekrap lap peramu ngebodi, akati bulupra wekmai neng yuma tep pepu. 41 Ayuma konum pepkopda, abulupra wekmai neng yuma tep, “Ukuda konuma. Sun yuk-yuk tali-tali embaso,” pepupa akati tapra bendopi.