Act 2 | XteSC | STEP | Uda, sun Yahudi yala neng sun ila tumida, Pentakosta perami tumi konum kupkopda, sun Yesus tep teka tenepi nengda, tenpaipu bulupra kunmai.

Acts 2

Allah er Lek Sambala, Yesus teka tenepi neng sun dipru neitamai yana weku upu

1 Uda, sun Yahudi yala neng sun ila tumida, Pentakosta ^{▼▼Pentakosta lap pena upuda, nomor 2 dirume.} perami tumi konum kupkopda, sun Yesus tep teka tenepi nengda, tenpaipu bulupra kunmai. 2 Kunmaipane, ila mungna mukudi, pung ila di peramretopu, ila lelim im deiki yaudi, sun bukmai ati pum dana-dana yuma wekudi, ila di pung penmau. 3 Alelim penmaupa, sun yumadi lyemu urasin yambul utopu kupu keca epi dinin, akecada uku bu jeramretopu keca epipa, akeca bokra, sun nong deiki tenpu-tenpu yana buku. 4 Sun nong deiki bukupa, Allah er Lek Sambala ^{▼▼Lek Sambala – Aupu, ‘Lek Sambala,’ penupa deiyoda, ake. Ara, Allah er Lek Sambalada, ‘Kurun sambala kurure,’ tenena gume. Ada, erdi mali kun keca tenpunge peda, men kuredi, pio dumsisipu kurure. Pio teleppu kurura cadi, asambala er si tep, ‘Allah er Lek Sambala,’ penupe. Indonesia upu deiki di, ‘Roh Khudus,’ atau ‘Roh Suci,’ penunge.} sun dipru wekra dinikudi talepka deiki di, sun yumadi yuk-yuk mutu nesala upu deiki di penmai. Ada, Allah er Lek Sambaladi upu pena deiyo keca karepka utopu, sun upu yuk-yuk penmai. Sun penmai upuda, men kael keami upu dinin, yuk-yuk mutu nesala perami upu penmai.

5 Uda ataruda, mutu-mutu yuma dana-dana kurami dinin, Yahudi yala neng Allah talepra, er si erepra kurami neng, dana-dana di bulupra, Yerusalem mutu yana ke taru tep kunmai. 6 Adana-dana mutu di yana kunmai nengda, akupu keca yuma gekepidi, Yerusalem mutu neitamai dinin, dana-dana di buluprap diryai. Diryaipa, Yesus teka tenepi nengdi, yuk-yuk mutu upu penmaipa, ayai neng sun pe upu yuk-yuk deiki di telep kupra gekepya tep, ‘Uo,’ tenen, lukdanapidi tenimtonapu kunmai. 7 Pio lukdanapidi, buma teling pepupa, asipterepi. “Aupu penmang nesalada, Galilea tara neng be? 8 Sunda Galilea tara neng cadi, nun upu sisa dopra, sundi penmangepa, nun pe upu sisa yuk-yuk gekenmapada, warya deiki di do? Ware keca deiki di nun upu deiki pepsetenge do?” penmai.

9 – 10 Upenmaidi aupu ton pepi. “Nun kunmap nengda, Partia mutu neng cap, Media mutu neng cap, Elam mutu neng cap, Mesopotamia tara kunge neng cap, Yudea tara neng cap, Kapadokia tara neng cap, Pontus mutu neng cap, Asia tara kunge neng cap, uda Pirgia mutu neng cap, Pamfilia mutu neng cap, Mesir tara neng cap, Libia tara dinin, Kirene mutu damai kunge neng cap, Roma mutu kunge neng, nimi bo neng cap, Kerit mutu neng cap, Arab tara neng cap, ukuprap kunmape.

11 Ada, Yahudi yala neng cap, ton neng Yahudi yala gum nesala dinin, Yahudi yala nesaladi Allah tep teka teneprap kunung kecapu, aneng peda Allah tep teka teneprap kununge. Nun amutu yuk-yuk kunup neng bulupra awekmap dinino, Yesus tep teka tenenung nengda, Allah erdi pio telep kuramu keca, nimi men kupmanto keca tep, aupu sundi lap penmangsengpa, nun upu sisa yuk-yuk deiki di gekenmape!” pepi.

12 Sun lukdanapidi, teniptonapu kupmaiya tep, asipterepdai. “Akupmar kecada, ware deiyo di kupmar do? Ange kupmasera tep nengeda, ware kupkamser do?” pepra asipterepdai. 13 Dinino, akunmaidi gekenmai nengpu bokra, ton tara nengda, Yesus teka tenepi neng, upu yuk-yuk penmai neng tep, nyek-nyek pepra autunmaidi, “Anengdi, nun upu sisa yuk-yuk penmasengada, anggur me kange yawaramne me pio weik jenmanga di penmasenge,” pepra nyek-nyek pepi.

Peterusdi abulupra wekmai neng tep, pepu upu

14 Upepi pangeda, Peterus cap, Yesusdi wepra deiamu neng, 11 neng cap tekipane, Peterusdi awekmai neng tep, ila upu di pepu.

Ne kayapu, sun Yahudi yala neng cap, sun Yerusalem mutu yana kunmarum neng yuma cap awekmape. Ne lap pepkusen upuda moupra gekepneso! 15 ‘Aneng, Yesus tep teka tenenung nengda, kange yawaramne me ^{▼▼kange yawaramne me – Sun Yahudi yala neng kurami mutuda, kange yawaramne me akapu dinin, akeca jerami nengdi, lukunda tarupu jerami. Keteng komuni taruda, ame men jeramiya tep, Peterusdi, “Gume, sun kaele. Nun mutu neitamaida, ipna taru nimidi kange yawaramne me men jenunge. Kange yawaramamre me utopu meda, idona cap, lukunda cap, aketengpu jenunge. Atep ukuda ipna taru keteng jam sembilanpu (9) kupmara tep, ‘Sunda kange yawaramamre me jepmangadi yuk mutu upu penmanga,’ tenena gume,” Peterusdi pepu.} jepmengepa, sun kange yawarapmare,’ tenenmarum ngeda, tek sisi gume. Sun kange men yawarapmare. Sun kaele, nun mutu neitamaida, keteng jam sembilanpu (9) kunmara tep, nimidi aketeng deiki di kange yawaramne me men jenunge. 16 Gume, ukupu epmarumdi, gekenmarum kecada, Allah er upu lap peramu ngebo nabi ^{▼▼Nabi Allahdi, ‘Nimi gekepkameng’ tenen, erdi wepra deiamu neng tep, amenda kupkamu keca cap, er upu yuknge cap, lap pepu pangeda, anengdi, yuk nesala yuma tep lap perbarami. Anengda ‘nabi neng’ penupe. Nabi neng, sun lap pena upuda, nomor 25 dirume.} Yoel peiamseutopu konum kupmasere. Peterusdi pepu. Tonda aupu pepu. Yoeldi peipu upu ake.
17 ‘Allah er peseryada, akeca-keca yuma gum kupkamre taru konum damai kupyopda, nedi nesala ban-ban yuma tep, ne Sambala weika di karepkamne. Sun nyapu cap, sun ner nyapu capdi, Allah er upu katuai lap penkamenge.
Sun kaber nengda, tupa bukmengedipu kene utopu keca epkamenga deiki di, ne upu lap penkamsene. Sun wisi nengda, kene mapmenga deiki di, ne upu lap penkamsene.
18 Ne melipnengedi, ne pelpu donung nesalada, nimi pe, nerapu pe, asirya taru damai konum kupkopda, ne Sambala weika di karepnepa, aneng yumadi ne upu katuai lap penkamenge.’
19 ‘Im alau tara neitamai di nimi pio men dingedi men tenenung keca, pio puto weik keca deipkamne. Tonda, “Tuai tara di Allahdi mambul pel donmasere, tenepkamnunga” tenen, lap pen keca ton deipkamne.
Ada, yapi cap, uku bu cap, ila ket weleramre utopu ket cap, deipkamne.
20 Pio ila tumi, nun nai er mambul tumi, kapul yankamre taruda, ketengda, pio kunukamre. Warda, yapi bi utopu pio lyunkamre.
21 Ukupyopda, ware neng do yuma, “Allahdi melipkamnere” tenen, nun nai Allah er si pepra moronung nengda, Allahdi anesala lyepkamre ja.’ (Yoel 2:28-32)

“Allahdi peamupa, Yoeldi sekeipseu upu konum pepsene,” Peterusdi pepu.

22 Upepudi, aupu ton pepu.

Ne kayapu, aupu gekepso. Allahdi Nasaret ngebo Yesus tek sisi wepra deipu ngeda, katuai lap pemseu. Ada, Allah er puto dipu Yesus meliamupa, Yesus er kunupsek peramu pel cap, nimi men kupmanto pel doramunge cap, ‘Tek sisi Allahdi pel donmasere, tenepkamnunga’ tenen, lap pen keca deipunge cap deiki di, konum kael keamepu. Ada, ‘Allahdi Yesus tek sisi wepra dokotepseue’ tenen, kael kepmepu. Allahdi, er puto Yesus deiki karepupa, Yesus er kuramunge yuma deiki di, ‘Allah tek sisi Yesus wepra deipseuada, sun teka tenenkameng’ tenen, Allahdi katuai lap pemseu. Ayumada, sun peda konum kael keamrume.

23 Uda, menop taru Allahdi, ‘Sundi Yesus tep ukupkamenge,’ tenemnga tep, kapul men kupmau taruda, er konum teneamudi kael keamnga cadi, ‘Yuk nengdi, Yesus dopra, sun popkamenga’ tenen, mali nengdi Yesus dopra sun tep karepsei. Karepseipa, sun yuk pio mali kurami neng meliamya di, Yesus dopra sengdin co deiki deipidi, paku dakra Yesus popipa depu. 24 Yesus depu dinin, Yesus depnedi men lyupmanto ngebo cadi, depu dinin, Allahdi Yesus ka tamupra gam bukra deipu. 25 Pumun taru Dauddi Yesus tep aupu pepra seku. Dauddi seku upuda ake.
‘Ne nai Allah ne urasin damai pio dinune. Ne dumsisi tara kurura tep, “Erdi ne melipkamner” tenen, kwar dangna gum di, tenimtona deiki men kunkamne.
26 Ange tep nengeda, pio ne kange derinune. Allah pio talenerura tep, ne kange deipnedi, bouna di dimpeprappu kunepa, “Allahdi pio melimnerepa, pio gam kunkamne,” tenenkamne.
27 Ada, “Naio ne depnepa, ne sambala dopra, deramenge nesala kungai pio men deiptapkamnerume. Tonda, kandi wepra deiamumpa, kan pelpu kunupsek perur ngebo deprepa, men tapkamruma tep, er bol men lyupkamre.”
28 Pio gam kuna tep, “Abisi benkamrumnyada, ake-ake,” pepra lap pepnemume. Kan damai kunepa, kange derina keca weika di karenkamnereme.’ (Mazmur 16:8-11)

“Dauddi sekeiamseu upuda, konum pepmasene,” Peterusdi pepu.

29 Upepudi aupu ton dukdongopra pepu.

Ne kayapu. Ne tenimtona gum dipapu, tek sisi upu lap pepkusene. Nun apke ila ngebo Daud, er deiamupa, er nong konum peiami. Sundi Daud peiamya damai akupmare. 30 Dinino, Daudda, amenda kupkamu keca tep, lap peramu ngebo, nabi kuramu. Tonda, Allahdi Daud tep, ‘Tek sisi ukupkamne,’ pepra deipu upu deiki di aupu peipu. ‘Daud erdi deiprepa, dadeipdanen baramenganen, sirya tara deipkameng mida, Daud er kuretopu, ami peda, erepra ila nimi deiyo ngebo kupra deipkamne,’ Allahdi pepu. Allahdi peipupa, Daud gekepudi konum kael keamu.

31 Daudda, Allah kupkamu keca tenepudi, Allahdi, ‘Mesias ^{▼▼Mesias ngebo perami ngeda, ‘Yesusdi teka tenena nesala lyepredi talenkamre’ tenemudi, Allah dokotepkamu ngebo tep Mesias perami. Tonda, lap pena nomor 3 dirume.} kunkamre’ tenen, wepra deiamu ngebo tep pepu.

Ada, ‘Allahdi, wepra deiamu ngebo, Mesias konum deprepa, gam bukra deipkamre’ tenen, arup pepmasen upuda, Dauddi aupu pepra sekamu. Ada, Yesus er Sambalada, konum deramenge nesala kungai men tapu. Tonda, Yesus er bol pio men lyupu. Ange yumada, pumun taru Dauddi, ‘Ukupkamre’ tenen, arup pepmasen upuda peiamu. Ne Peterusdi aupu konum arup pepmasene. Peterusdi abulupra gekenmai nesala tep pepu. Upepudi, aupu ton dukdongopra pepu.

32 Yesus depu dinin, er nai Allahdi Yesus tamupra gam bukra deipupa, nun yuma epmupke. 33 Allahdi Yesus erepra im deiki dubena, er dumsisi tara deipudi, ‘Ne karepkamne,’ pemu Lek Sambalada, (Roh Khudus) karepupa, Yesus dopropudi, karepmasere. Ukutaru sun dinmarum keca cap, gekenmarum keca cap, Yesusdi Allah er Lek Sambala weika di karepmaserpa, dinmaserume. 34 – 35 Uda, Daudda, im deiki men welepu dinin, aupu peipu.
‘Ne nai Allahdi ne nai tep pepu. Ne dumsisi tara bungyaiyo! Apio bukamempane, nedi kan yanina tep, anesala porbisiramyanen, sirya tarada, aneng dopra kan amutara deipkamne.’ (Mazmur 110:1)

36 “Ange tep nengeda, sun cap, Israel nesala yuma cap, sun moupra kael kepso! Sun sengdin co deiki poprum Yesusda, nun nai Allah, erdi upu bongdina cap, ton nesala ban-ban yuma talepkamra deiyo ngeboda, ada Mesias ngebo tep, Allahdi angebo Yesuspu konum erepra deipseue.” Peterusdi pepu.

37 Peterus aupu yuma konum pepupa, sun awekmai neng konum gekepi pangeda, ‘Uo, nun pio mali kupmupke’ tenen, dipru buluksakupa, pio mali kange doupidi, Yesus wepra deipupa, er upu dopra peterep embarami nengda, Peterus cap, er kayapu neng cap yuma tep, tamupra pepi. “Uo, nun kayapu, ukutaru nunda, ware kupkamep do?” pepi.

38 Upepipa, Peterusdi tamupra pepu. “Sun yumada, sun mali kurumu keca cap, dipru mali teneramrumu keca cap, ‘Allahdi kaukepseredi nun malinge gum kupra deipkamser’ tenen, sun malinge yuma taprumudi, amnyo karikrap, Allah er tara keproprumupa, nunda Yesus er si deiki dipu ^{▼▼Yesus si deiki di peraminge deiyoda ake. Ada, ‘Yesus er puto deiki di kupkupe’ tenen, perami. Tonda ‘Yesusdi wepra dokotepseudi puto karepseua deiki di kupkupe’ tenen, perami. Tonda, ‘Yesus er nyapu kunupa cadi, er si deiki di kupkupe’ tenen, perami. Acada, ‘Yesus er puto deiki di me dongopkusepe,’ teneramidi pepi.} me dongopkamsepe. Ukupmepyopda, Allahdi nun bicau tep, tali kareserur Lek Sambalada, karepserepa, dopropkamrume. 39 Allahdi, ‘Akeca karepkamsene,’ pediramseu upuda, ada sun cap, sun nyapu cap, sun nyapu deipmengepa dadeipdanen benkameng nyapu cap, tonda, karen mutu kunge neng cap tep, aupu pediramseu. Ada, nun nai Allahdi konum wepra deipudi, kongpepkamre nesala yuma tep, ‘Allah er Lek Sambala karepkamsere’ tenen, pepne,” Peterusdi pepu.

40 Upepudi, wenemna cap, lap pena cap, weike pepka deiki di aneng tep pepu. “Sun pedipapu ataru pio mali kunge nesala kan-kan di lyepdarumudi, Allah damai bankamrume.” Upepu ngeda, ‘Allahdi sun poprur’ tenen, upu pepu. 41 Peterusdi awekmai neng tep aupu penmaupa, ‘Tek sisi penmasere’ tenen, gekepra dopropi nesalada, me dongopi. Me konum dongopi pangeda, sun ukupu teka tenepi nesaladi, men di teka tenepi nesala cap, tapakipa, denge weik kupbaramu. Atumi deiki di tapaki neng dengeda, tiga ribu neng ton cap teka tenepidi, Yesus tep teka tenemi nesala cap tapaki.

Yesus teka tenerami neng, sun kikiman kurami upu

42 Yesusdi wepra deipu neng, sun peteremami upu gekeraminge cap, jen kikimanpu wisipra jeraminge cap, kikimanpu Allah mororaminge cap, bicau tenen, melimdaramidi, sun dipru dukdongoprap kikiman kurami. ‘Nun angepu ukuptepe’ tenen, putaramnga tep, yuk keca tenena gum di angepu kurami. 43 Allahdi er puto meliamnga deiki di, Yesusdi wepra deipu neng kunupsek peramu pel cap, Allahdi puto weik kudiramupa, nimi men kupmanto keca, pel doraminge cap, apel doramidi ukuramya tep, aneng yuma sun diramidi, buma teling pepupa, ‘Uo, tek sisi Allahdi mambul pel donmasere’ tenen, mambul kange douramidi, kange deiprap dirami. Ton nengda, kange deirami. Ton nengda, mambul kange doupra kunmai.

44 Yesus teka tenerami neng yumadi, kikiman kuramidi, sun taleami keca yuma, ‘Ne mawa,’ tenena gum di, kikimanpu karepdaramidi, akeca yumada wisipra talerami. 45 Ada, sun talerami keca dopra kunumamidi, ware neng do yuma, atumi-atumi sun putapnetopu, dopra karerdarami.

46 Ukuramidi, tumi-tumi yuma, Yahudi yala neng, sun mali kurami keca kunumna tep, Allah er si eremna tep karerbarami ati ^{▼▼Allah tep karerbaramidi, er si eremami ati lap pen upuda, lap pena upu nomor 15 dinkurume.} damai bulupra wengbarami. Tonda, sun ati-ati yuma bulupra wengamidi, jen keca bokra, kange deriramidi, jen kikimanpu jerami. Tonda dipru men welimdidaramidi, telep kangepu doupra kurami. 47 Tonda, Allah er si eremna tep, “Allahda er pio telepe,” pepra er si eremamipa, amutu yuma, Allahdi yuk nesala lyemamudi, dopra deipbaramupa, Yesus tep men di teka tenerami neng cap, tapangamidi, sun denge weik kupbarami.