Act 20 | XteSC | STEP | Efesus mutu nesaladi Yesus upu tep, yu kupupa, upu koudana cap, mali-mali kuna cap, akunmainge yuma konum kupidi, dimpepyopda, Paulusdi Efesus mutu nesala Yesus kuramu keca piripra kael keamidi, teka tenepi nesala, kongpepu. Kongpepupa, yaipa, sun dipru kwa dimna tep upu pepra deipudi, “Telepe ne bene. Sun dakurume,” pepra, amutu tapra, Makedonia mutu beu.

Acts 20

Paulus men di konum beu dinin, kange di tamupra Makedonia mutu cap, Akaya mutu cap beu upu

1 Efesus mutu nesaladi Yesus upu tep, yu kupupa, upu koudana cap, mali-mali kuna cap, akunmainge yuma konum kupidi, dimpepyopda, Paulusdi Efesus mutu nesala Yesus kuramu keca piripra kael keamidi, teka tenepi nesala, kongpepu. Kongpepupa, yaipa, sun dipru kwa dimna tep upu pepra deipudi, “Telepe ne bene. Sun dakurume,” pepra, amutu tapra, Makedonia mutu beu. 2 Makedonia mutu beuopda, amutu neitamai yuma embaramu taruda, amutu teka tenepi neng, sun dipru kwa dimna upu weik pepra deipembaramnganen, amenda taru, laut mokon di dana-dana yuma sekdongomu mutu, Yunani mutu neitamai beu. 3 Yunani mutu beuopda, ware weneri pio apu kuramnganen erdi, ‘Siria mutu benkamne’ tenen, ketenepra deiamu taruda, sun Yahudi yala nengdi, ‘Paulus popkamepa’ tenen, upu sisingamya tep, Paulus gekepudi, ‘Ne Makedonia mutu neitamai abisipu tamupra benkamne,’ tenepu.

4 Tenepudi amutu beu taruda, er cap kikiman bei neng sida ake. Berea mutu ngebo Pirus er mi Sopater cap, Tesalonika mutu butene nengda, Aristarkus cap, Sekundus cap, Derebe mutu ngebo Gaius cap, tonda, Timotius cap, ton Asia tara butene nengda, Tikikus cap, Terofimus cap, aneng cap, Saulus cap, sun yuma kikiman Makedonia tara neitamai mapbarami. 5 Makedonia neitamai mapbarami dinin, aneng yumada, Makedonia tara tapra, menmena benmaidi, Teroas mutu apu kunmaidi, ‘Sun aneng ware taru yankameng do?’ tenen, Paulus cap, nun cap tep, dinmasei. 6 Dinino, nun yukpu, Yahudi yala neng Nena Gum Roti kalemna ^{▼▼Nena Gum Roti lap pena upuda, nomor 30 dirume.} konum kalepropmupkopda, Filipi mutu di, gapung co pumbon wekra bukmupudi, gonga kepra baramupupane, pamu tumi konum kupkopda, Teroas mutu bepudi, men di bei neng cap epdapu. Epdapudi nun yuma amutupu yoneitam tumi ton cap kunmapu.

Kaber ngebo er si Eutikus, alau ati sakupa popra depu dinin, Paulusdi gam bukra deipu upu

7 Teroas mutupu akunmapupane, ngantan tumi konum kupkopda, nangantan tumi ipropkopda, ‘Nun yuma jen kikiman jepkup’ tenen, bulupra tenpu atipu wekmupu. Wekmupupa, Paulusdi, ‘Ambutumi konum benkamane,’ tenepka tep, Paulusdi amutu teka tenepi neng tep, gonga keprapudi, pio peteremaupane, manduk pena kupu. 8 Nun yuma bulupra wekmapu ati alau atida, weica weik upmai. 9 Upmaipa, tenpu kaber nyapu, er sida Eutikus, jendela bisi bon bukmaupa, Paulusdi Allah upu pio penmaupane, angeboda ukunmaupa, u nemari dungpenmauanen, u pio weik kupkopda, jendela bisi bon mapudi, kange men doupudi, mapra u dakrou taruda, ati dukra domyada weneri ati cadi, angebo sakapudi, tuai dourbeuopda, popu. Popupa, aneng ati dam kwerepidi bena erepropipane, angebo konum depu.

10 Depkopda, Paulus kwerepudi angebo damai yauopda, angebo nong deiki iriprap mapudi, Paulusdi pepu. “Sunda, ‘Uo, ami konum depmara,’ tenenmarumdi mali kange doupmarumada, yapso. Ukutaruda, er konum gam bukre,” Paulusdi pepu. 11 Ayuma konum kupkopda, Paulus tamupra alau ati welepudi, jen bokra deipseupane, nun jepmupke. Jepmupkopda, Paulus upu ton cap penmaupane, berekupa, er beu. 12 Asakmau ngebo sun ati dubeidi, ‘Ae, angeboda, konum gam bukmara tep, angeda telepe pua,’ tenepidi kange deipi.

Paulus Teroas mutu di Miletus mutu beu upu

13 Nun yuk menmena gapung co bena wekra bukrapmupudi, Paulus cap, nun kikiman benkamupu mutu tep, mokon deiki di Asos mutu bemupu. Paulusdi, “Ne tuai bisi benkamna tep, sun menmena mokon deiki berume,” pepra deipseua tep, ukupmupu. 14 Nunda, menmena Asos mutu bena kunmapupane, Paulus amenda yaupa, epdapudi, er cap agapung co pumbon wekra bukupa, nun kikiman mokon deiki bepudi, laut mokon di dana-dana sekdongomu mutu, Pulau Metilene mutu bemupu.

15 Bena mapmapka, berekyopda, amutu tapra laut mokon deiki bepudi, laut mokon di dana-dana sekdongomu mutu ton, Pulau Kios mutu bemupu. Bena mapmapka, berekupa, amutu di mokon deiki banmapkanen, mokon sekdongomu mutu ton, Samos mutu bemupu. Bena mapmapka berekyopda, mokon deiki banmapkanen, laut datapra tuai tara, Pulau Miletus mutu bepu.

16 Paulusdi ila tumi Pentakosta ^{▼▼Pentakosta lap pena upuda, nomor 2 dirume.} kapul kupmar taruda, ‘Yerusalem mutu betenyopda, ada pio telepe’ tenen, putapka tep, utenepu. ‘Asia tara neitamai bena kunyopda, ne Pentakosta tumi, Yerusalem benkamne, tenepsi tumi damai kuprur tep, Efesus mutuda kirikra benkamne,’ tenepu. Utenepka tep, Miletus mutupu bepu.

Efesus mutu teka tenepi neng, sun deiyo neng wisi neng tep, Paulusdi pepu upu

17 Miletus mutu konum bepkopda, Paulusdi Efesus mutu teka tenepi neng, sun deiyo neng, wisi nengda, yangepa, ‘Ne cap upu talepkamep’ tenen, yuk neng tep pepra deipupa, aupu kai douprap Efesus mutu perbei. 18 Perbeipa, awisi neng konum yaiopda, Paulusdi aneng tep pepu.

“Uda ne Asia tara men di yanamsi taru di, nun kikiman kuramupu taru yuma, sun diramnurumpa, ne kuramsi keca yumada, sun kaele. 19 Yahudi yala nengdi, ‘Paulus popkamepe’ tenen, upu sisingamnei ngeda, pio ikin kudiramneiya deiki di kupetepnei. Kupetepnei dipunen, kange eremna gum di, bouna dipu pel doramsidi, pio engena deiki di nun deiyo ngebo Yesus, er melimna tep, er pelpu doramsi.

20 Sun kaele. Wareto upu do, sun melipsetupa, kael kepmanto upu yuma, inipra men kuramsi. ‘Ware pepnenung do?’ tenen, ne nong depdongopra men kuramsi. Gume. Nimi yuma gekeramyai cap, tonda, sun ati yuma yuk-yuk wekra embaramsidi katuaipu peteremamsisi. 21 Yahudi yala neng cap, Yunani yala neng cap tep, ‘Moupra tenipkameng’ tenen, uperamsi. ‘Sun mali kurumu keca cap, sun dipru neitamai mali tenerumu keca cap, tapraprumudi amnyo karikrap, Allah tara keproprumudi, nun deiyo ngebo Yesus teppu teka teneprume,’ lap peramsisi.” Paulusdi pepu.

22 Upepu dingeda, aupu ton pepu. “Uda ukutaruda, Allah er Lek Sambaladi, ne dipru neitamai di, ‘Yerusalem mutu berume,’ pepra palepra deipmanera deiki di, Yerusalem mutu benkamane. Amutu benyopda, ware kupkamneng do, ne walwale. 23 Tenpu keca puda kaele kepne. Yuk-yuk mutu sun ati arum dongai yuma, wenemna ati deipkamnenge cap, kange mun keca kupkamnerenge cap, amutu yuma embankamnai yuma ukunkamnere. Allah er Lek Sambaladi, ‘Moupra tenipkamre’ tenen, ange yuma puto di lap penmanera tep, apuda kael kepne.

24 Nun deiyo ngebo Yesusdi, pel karepneuada, Allah er kange dipu nun bicau tep, Yesus deiki lyepseredi, tali melimserur upu, er kai telep upu peteremna pel karepneue. ‘Apel yuma doptenedi, gawal daktenetoda, apuda pio telepe,’ tenenune. Yesus karepneu pelda, ‘Pio dopembaramnyanen, gawal dakamne’ tenen, kunune. Ne pona pe, dena peda, telepe pua. Ne gam kunada, ‘Ne mawa’ tenena gum di, ‘Ada talya. Dapopnetenge,’ tenenune.” Paulusdi pepu.

25 Upepudi, aupu ton dukdongopra pepu. “Ukuda ne kaele. Sun yuma, sun neitamai embaramsidi, ‘Allah lyepseredi nimi dipru talenkamsere,’ pepra, er upu peteremamsisi nesala yuma, kange di ton cap, pio ne men dinkamnurume. 26 Ange tep nengeda, aupu pepsene. Sun cap, yuk neng weik ton cap, neitamai yuma Allah upu konum peterepra embenamsisa tep, atumida apu pepsene. Allahdi, ne peteremamsisi neng tep, upu bokra deipseredi popserepa, pio deprumyopda, Allahdi ange ne deiki men deipkamnere. Ange tep men wenepkamnere. Angeda ne deiyo gume. Ada mesum tep gume. Pio tek sisi pepmasene. 27 Ada warya tep do? Allah pumun di teneramudi persere upu yuma, ‘Ange pepkun do, ange men pepkun do?’ tenen, tenimtoramsidi men peteremamsisi. Aupu yuma tali lupra katuaipu peteremamsesa tepa.

28 ‘Mali kupnup’ tenen, sun dipru moupra kurumudi melipra didankamrume. Tonda, Allah er Lek Sambaladi, ‘Sun dipru melipdangedi dinkameng’ tenen, melimna neng utopu kupra deipseudi, wepra deipseu nengda, sundi sun tep, sun dipru moupra kalekra dinkamrume. Allah er Mi Sisa depupa, er yapi embeua deiki di, Allah kunupra deipu nesalada, domba peirameng nengdi sun domba peiramengtopu, Allah er teka tenepra talenung neng tep, melipra peinkamrume. Aneng tep moupra dimumdi melimkamrume. 29 Yu weik jerem yaryopda, nimidi ayam peiramengai wekrap, poprapredi, jepropyopda, bulukrap metekapu tamrur utopu, ne bendopnyopda, mok upu peteremna neng, sun neitamai yangopda, sun melipra peirum nesala tep, sundi yana tali dimpepra men kunkamenge. Sun mok nengdi telel upu peterepkamsenge.

30 Ada yukai dipu gume. Tonda, sun kurumnya neitamai nengdi ton, erepra tekmengedi, ‘Yesus er upu gekenung nesalada, nun tep domyankamsenge,’ tenepmengedi, tek sisi Allah upu doprapmengedi, tali walipra tali-tali keptapsengopda, telel upu gwalipra peterepkamsenge.

31 Ukupkamsenga tep, sunda pio moupra dinkamrume. Keteng tamun weneri deiki di, keteng komunge cap, lukunda cap, ne engena deiki di, ‘Pio moupra tenipkamrum’ tenen, pio lap peramsisidi, peteremamsisi upu ada, ‘Sun dipru pon keca popsurur’ tenen, ‘Moupra dinkamrume,’ pepra peteremamsisi upuda, pio tenenkamrume.” Paulusdi pepu.

32 Upepudi aupu ton pepu. “Uda konuma, tenpu upu ton pepkusene. Allah upu, ada Allah er kange dipu nun bicau tep, tali melimserur upuda, aupu puto deiki di sun dipru darapra talepseredi, dipru wisi keipseryopda, Allahdi keteneipseu keca dopropkamepe. Ada, Allahdi anupra wepra deiamu neng yuma, ada sun pe, yuk neng peda, Allah ketekepra deipka karepkamser kecada, nun ateka tenenup nengpu dopropkamepe. Atep nengeda, Allah cap, Allah er upu puto deiki capdi, sun dipu sun tep ‘Melipkamsereng’ tenen, sun nong dopra Allah tep karepsene.

33 Uda, ware nesala do, ware neng do yuma, sun kunumna weik keca, perak cap, emas cap, opkale cap, uda sun bunga yuma kwamupa ne ton, ‘Ange dopra kuptene’ tenen, pio men putaramneue. 34 Ne kuramsi kecada, sun kaele. Ne cap, nun kikiman pel dopembaramupu neng cap, ne buru puto deiki dipu pel doramsipa, co bo dororamsidi, nun putaramseu kecada, kunumamsi. ‘Yuk nengdi talipu karenkamneng’ tenen, moronapu men kuramsi. 35 Ne pel doramsa cap, ne kuramsinge cap deiki di peteremamsisi. Pio telep ngeda, apu. Ne ikin pel doramsitopu, nun ato pel dopmepya deiki di, kankan kunge nesala cap, puto boun nesala cap tep melimkamepe. Ange peda peteremamsisi.

Ukunkamep taru yumada, Yesus er peipseu upuda, pio tenenkamepe. Ada, ‘Sundi nun karepsengopda, yambul metek kange derinup, dinino, nundi yuk neng tep karepmepyopda, pio ila kange derirserure. Pio telep ngeda, yuk neng karena dinin, yambul mali ngeda, nun dorona tepa.’ Utenenapu kunkamrume.” Paulusdi, Efesus mutu teka tenepi neng, sun deiyo neng kongpepupa, Miletus mutu yaipa, aupu yuma lap pepu.

36 Aupu yuma Paulus konum pepkopda, er cap, aneng cap, sun yuma kikiman gutam tu dipdongopipane, er Paulusdi Allah moropu. 37 Allah moropupa, sun aneng yumadi Paulus er tep bicau tenepidi, “Telepe dabeo,” peprap iriprapidi engenmai. 38 Sun pio mali kange doupi ngeda, erdi, “Ne ton pio men dinkamnurume,” pepu. Apepunge tep, pio mali kange doupra engenmai. Ayuma konum kupidi, Paulus er benkou gapung co damai kikiman bei.