Act 21 | XteSC | STEP | Gapung co damai kikiman bei dingeda, sun akunkoiya tep, nun pe, sun pe, bicau kupseudi boukke karepdapudi, “Sun dakunkamrume,” peprap, engepmepudi, ila gapung co wekrap bukmupupa, kumanya puto deiki di mokon deiki bepmepu. Miletus mutu di kwiryepu banmapkanen, adipapu Kos mutu, ada laut mokon dana-dana sekdongomu mutu, bepu. Bena mapmapka, berekupa, laut mokon deikipu banmapkanen, yuk mutu laut mokon dana-dana sekdongomu mutu, mutu si Erodos mutu bepu dingeda, banmapkanen, Patara mutu bepu.

Acts 21

Paulusdi Yerusalem mutu tamupra beu upu

1 Gapung co damai kikiman bei dingeda, sun akunkoiya tep, nun pe, sun pe, bicau kupseudi boukke karepdapudi, “Sun dakunkamrume,” peprap, engepmepudi, ila gapung co wekrap bukmupupa, kumanya puto deiki di mokon deiki bepmepu. Miletus mutu di kwiryepu banmapkanen, adipapu Kos mutu, ada laut mokon dana-dana sekdongomu mutu, bepu. Bena mapmapka, berekupa, laut mokon deikipu banmapkanen, yuk mutu laut mokon dana-dana sekdongomu mutu, mutu si Erodos mutu bepu dingeda, banmapkanen, Patara mutu bepu. 2 Patara mutu bepu dingeda, Fenisia tara barami gapung co tep enmapkanen, aenmapu gapung coda, konum benkoia tep, keteneipipa epmupudi, nun peda agapung wekrap bukmupudi, mokon deiki bepu.

3 Kumanya puto deiki di mokon deiki banmapkanen, Siprus mutuda, laut mokon sekdongomu mutu bisi neitamai kuramya cadi, asurupu adine itara epmupudi, Siprus mutu ikwapupnen, utara kirikrapmupudi, laut mokon deiki pio banapu kunmapkanen, Siria mutu bepu. Siria tara bepu dingeda, laut mokon porai, mutu si Tirus mutu gapung co ^{▼▼Gapung co di mokon deiki bana tep, lap pena upu nomor 33 dirume.} bena deipu pangeda, sun agapung co kipmai bunga pukrap deipkamai mutu tep, nun peda kiptapsu. 4 Kiptapsupa, Yesus teka teneprap amutu kurami neng tep, enmapkanen, epmupu dingeda, nun cap aneng cap, yoneitam tumi deiki di kikiman kunmapu. Kunmapupa, anengda, Allah er Lek Sambaladi sun dipru tamupupa, sun aneng er puto deiki di Paulus tep, “Kan Yerusalem mutu banmaremada, yaprume,” peprap malye pepmemei.

5 Paulus tep malye pepi dinin, nun gapung co benkou taruda, konum kupkopda, sun ati yuma nun mapmap ati taprap banmapkanen, amutu Yesus teka tenepi neng cap, sun nerapu cap, sun nyapu cap yuma, ati arum bisipmupudi kikiman banmapkanen, laut mokon porai bepu dingeda, nun yuma me wenenga deiki gutam kepdongopmupudi, Allah moropmupu. 6 Allah moropmupu dingeda, “Telepe, sun daberume,” pepra bisi yana kapsei pangeda, nundi “Telepe dakunkamrume” pepmupudi gapung co wekrap bukmupupa, sun anengda, sun ati tamupra bei.

7 Nunda, Tirus mutu di banmapkanen, mokon porai mutu si Petolemas mutu yana gapung co deipipa, busukmupu. Busukmupudi, amutu Yesus teka teneprap weite-du utopu kurami neng epdapudi, “Telepe,” pepdapkopda, tenpu tumipu kikiman kunmapu. 8 Kunmapkanen mapmapka berekupa, Petolemas mutu tapra banmapkanen, Kaisarea mutu bepu. Bepudi, tenpu ngebo, er sida Pilipus, er ati kikiman kunmapu.

Pilipus ada, ‘Yuk neng Yesus teka tenenkameng’ tenen, Yesus upu lap peramu ngebo kuramu. Tonda, ‘Solu nerapu melipkameng’ tenen, men di yoneitam bari wepra deiami nengda, ^{▼▼Yoneitam bari wepra deiami nengda, Buku Rasul 6:1-6 deiki di kael keptume. Deiyo upuda ukuprap. Yesus erdi wepra deiamu 12 neng, sundi, “Nunda Allah upu peteremna pelpu donkamepe,” pepidi, sun cap, Yesus teka tenepra Yerusalem kurami neng yuma capdi, upu taleprap, solu nerapu cap, yuk nesala cap makuna tep, yuk teka tenemi neng, yoneitam bari wepra deipi. Awepra deipi nengda, Pilipus ton kuramu.} Pilipus tenpu akuramu. 9 Pilipus erdi deiamu ner nyapuda, dumbari kaberpu kurami. Adumbari ner nyapuda, Allahdi, ‘Ne pene upu dopra lap penkameng’ tenen, peteremna deiyo keca tali karepupa, Allah er upu lap perami.

10 Uda weikanun acapu kuramupkanen, amenda taru, tenpu nabi ngebo er sida Akabus, Yudea tara di nun damai kwereryau. Angeboda, Allahdi amenda kupkamu keca lap peramupa, angebodi aupu dopra yuk neng tep lap peramudi, Allah er pel tep doramu. 11 Akabusdi nun damai yau dingeda, Paulus er deiyoteng deriramu lyang opkal doprapudi, Akabus er pe buru cap, yane cap, koupdongopudi aupu peipu. “Allah er Lek Sambaladi upeipmasere. Apepmasen lyang opkal deiyo ngebo Paulusda, ne koupdanman utopu dinin, Yerusalem mutu Yahudi yala kunge nengdi angebo dopra, ateng kouprapmengedi, ‘Wenemna ati dongopkameng’ tenen, Yahudi yala gum nesala tep karepkamenge,” pepu.

12 Akabus peipseupa gekepmupudi, nun cap, Kaisarea mutu kurami neng capdi, ‘Paulus Yerusalem mutu banmau ngeda yapronkamre’ tenen, malye peprap moropmupu. 13 Malye peprap moropmupupa, Paulusdi tamupra pepseu. “Ne konum tenepsidi benkamna cadi, sun malye pepra, engenmaruma deiki di, sundi ne tep boun kepra deipmanurumada, warya tep do? Tonda, Yesus er si tep nengeda, Yerusalem mutu benepa, ateng kouna pe, ne nong pona pe, dakupkamnenge. Ne konum tenipsa tep, ange yumada telepe pua,” Paulusdi pepu. 14 Nun penmapu upu gekepra men kunupseua tep, nunda aupuda ton cap men pepterepmupu. Dimpepnapu kupmupu dinin, upu tenpu ton cap pepmupu. “Allahdi konum teneputopu kupkamker ja,” pepmupu.

15 Uda ayuma konum kupkopda, nun yuma ketenepmupudi, bisi baramupkanen, Yerusalem mutu welepmupu. 16 Yerusalem mutu welepmupu taruda, Kaisarea mutu nesala Yesus tep teka tenepra, Yesus kuramu keca piriprap kael keamidi, er kuramnga utopu kurami nesalada, kikiman wisiprap welepmupu. Welepmupudi Kaisarea mutu nengdi, tenpu ngebo, Siprus mutu deiami ngebo, er sida Menason, er ati kunkamupka tep, er ati dubesei. Menasonda, men di teka tenepudi, Yesus er kuramu keca yuma piripra kael keamudi kuramu.

Paulusdi Yerusalem mutu konum beu upu

17 Yerusalem mutu konum bepupa, amutu nesala Yesus konum teka tenepidi, weite-du utopu kupra kurami nengdi, nun tep kange deipseidi, “Telepe” peprap gispal dopsei. 18 Mapmapka, berekupa, Paulus cap, nun yumadi, Yakobus ^{▼▼Yakobus Yesus er weit bo sisa kuramu. Tonda Yerusalem mutu teka konum tenemi neng sun peteremna deiyo ngebo kuramu.} er cap, ‘Upu talepkup’ tenen, er damai bena wekmupu. Tonda, Yerusalem mutu Yesus teka konum tenemi neng, sun deiyo neng, wisi neng peda awekmai. 19 Paulusdi, “Telepe,” peprapudi, upu lap pepu. Allahdi Paulus tep meliamuma deiki di, Yahudi yala gum nesala kuramya neitamai, Allahdi puto kareamupa Paulus deiki di mambul pel domu pel yuma wepra, tenpu-tenpu lap penmauanen, sengpepu.

20 Sengpepupa, awekmai neng Paulus penmau upu konum gekepidi, Allah er si erepmaiyanen, siryada Paulus tep aupu pepi.

Kanda Yesus tep teka tenepmuma cadi, nun weite-du utopu kunupe. Kan kaele, Yahudi yala neng men nukmanto beribu-ribu di Yesus tep teka konum tenemi. Yesus tep teka teneami dinin, Allahdi, ‘Ukunkamrume, ange men kunkamrume,’ peipupa, Musadi mem upu sekeipseu upuda, aneng yumadi, ‘Aupuda ila mambule. Angepu talepra dombankamepe,’ tenen, tupa talenunge. Angeda kan kaele.

21 Paulus, kan peteremrum upuda, yuk nengdi lap pepipa, aYahudi yala nengdi konum gekepye. Ada kandi Yahudi yala nesala dinin, Yahudi yala gum nesala tara neitamai, turukrap kunge nesala tep, peteremrum upu tep lap pepsei. Ada, ukuprap. Paulusdi upeserure.

Allahdi, ‘Ukunkamrume, ange men kunkamrume,’ peipupa, Musadi sekeiamseu mem upu amnyo karikrap yaniptaprume. Tonda, sun nyapu den bam bol men sengkamrume. Tonda, Yahudi yala nesala sun kuramenge keca utopu men kunkamrume.

“Paulusda upeprap peteremrure,” peprap, yuk nengdi pepkeipa Yahudi yala nengdi gekepye.

22 Konum gekepya tep, nun Yerusalem deiyo nengdi ware kupkamep do? 23 Kan yanmaremada, sun Yahudi yala nengdi tek sisi gekepkamenga tep, aneng namna tep, nun pepkukep upupu gekeprap kunkamrume. Nun kupya neitamai di, Allah tep, “Ukupkamepe,” pepra pedina upu deipi neng, dumbari neng kunmange. ^{▼▼Allah tep, “Ukupkamepe,” pepra pedina upu derirami neng Nasaret neng ton perami. Tonda buku Bilangan 6:9-12, tonda buku Rasul 18:18 deiki di kael keptume.} 24 Aneng dumbari neng doprapmemdi, sun dipruai mali kupnedi, ‘Allah damai yatepe’ tenen, kange di lepsikra derinkameng pelda, ^{▼▼Lepsikra derin pel pepi ngeda, Nasaret neng kurami keca tep pepi. Aupu deiyoda, lap pena upu nomor 38 dirume.} kandi meliprume. Melipmemdi, sun dipruai lepsikra derinkameng pel tep, Allah karenkameng kecada kunuprume.

Tonda, apel kunumna keca tep nengeda, kandi makupmemdi kunupra karepmem pangeda, sun potong touptenge. Ukupmemnya deiki di, yuk nengdi kan tep minipra deipkei upu tep nengeda, nesala yuma, ‘Aupuda tali pepya’ tenen, kael kepkamkenge. Tonda, ukupmemnya deiki di, nesala yumadi, Allahdi, ‘Ukunkamrume, ange men kunkamrume,’ pepra peipupa, Musadi sekeiamseu upu peseretopu, Paulusdi ukupmara tep, ‘Er peda aupu moupra talerure’ tenen, kael kepkamkenge.

25 Dinino, konum teka tenepi neng, Yahudi yala gum neng tep nengeda, upu talepmupudi tenepmupu kecada, “Ukupkamrume,” peprap sun tep surat konum sekra dokotepmupke. Ada, ware jen keca do yuma, sun si tali eremenge keca, ‘Gisal dopra si erepkamep’ tenen, popra karepmenge ngeda, nun Yahudi yala nengdi men jeptepe kecada, sun Yahudi yala gum nesaladi, Yesus tep teka tenepi neng peda akeca pio men jenkamenge. Tonda, yapi mokon yala yuma pio men jenkamenge. Tonda kum olokdongopra popmengopda, yapi men sangamre keca yuma, nong galepra pio men jenkamenge. Tonda, tali upula men nyangdankamenge. Upeprap surat sekmupudi dokotepmepu.

Yerusalem mutu teka tenepi neng, sun deiyo nengdi, Paulus tep aupu pepi.

26 Upepi pangeda, mapmaiya, berekupa, Paulusdi adumbari neng doprapudi, sun dipruai mali kupnedi lepsikra derina pelda, er cap kikiman dopi. Dopidi, Paulusda Yahudi yala neng, sun mali kurami keca kunumna tep, Allah karerbarami ati wekrouopda, aupu pepu. “Uda dipruai mali kupnedi, ‘Kange di lepsikra derinkamep’ tenen, ataru yuma tali pel kuramepyanen, sirya konum kupyopda, adumbari neng, sun dipruai mali kupnedi kange di lepsikra derina tep, Allah tep karen kecada, atumi atanggal deiki di karepkamepe,” peprap lap pepu.

Nasaret neng ukuramitopu, adumbari neng peda, ‘Ukupkamepe,’ tenepi dinin, akaren keca gum tep, tenipterepra yamdongoramipa, Yerusalem mutu sun deiyo nengdi Paulus tep, aupu pepi. “Kandi aneng makuna tep, akeca kunupra melimkamrume,” pepi.

Sun Yesus tep teka tenena gum neng, Yahudi yala nengdi, Paulus tep popmanto kupi upu

27 Uda, ‘Allahdi nun mali kun keca daepkamser’ tenen, dipru lepsikra derina yoneitam tumi damai konum kupkopra, Yahudi yala neng tenpu-tenpu, Asia tara di yai. Yaidi, Paulusda Yahudi yala neng, sun mali keca kunumna tep, Allah karerbarami ati damai kunmaua epi. Epidi, akati damai wekmai neng yuma tep, “Popkupe,” pepra, sun upu pepya deiki di aneng gekepidi, yu kupupa, aneng yuma “Angebo popkupe,” pepra Paulus taleproi.

28 Taleproidi upu ila di penmai. “Anengo, sun Yahudi yala neng yuma melipseso! Angeboda, nun Yahudi yala neng cap, Allahdi, ‘Ukunkamrume, ange men kunkamrume,’ pepra peipupa, Musadi sekeiamseu mem upu cap, ton akati, nun Allah si eremepedi, er tep gam keca popra karenup ati cap tep, angebo Paulusdi, ‘Ayumada mali,’ pepra peteremya deiki di yaniserure. Tonda, Yahudi yala gum nesala, Yunani nesala dopra, nun Allah si eremnup ati damai deriryaseua deiki di, nun Allah tep wepra deipmupu ati, atelep atida ^{▼▼Telep ati. Yahudi yala nengdi, ‘Akatida, mali keca tenpunge peda men kurur ati,’ teneramya tep, akati sida, ‘Telep Ati,’ perami. Yahudi yala nengdi sun Allah tep karerami ati damaida, wilipra beilya wiami. Abeilya wiamyai deiki tarada, Yahudi yala nesalapu wengdongorami. Beilya iriamu tarada, Yahudi yala gum nesala tali wengami. Abeilya buplan damai, ‘Mankau di abisi benung’ tenen, upu sengne tep, lap pena upu sekra deiami ngeda ake. “Sun Yahudi yala gum nesalada, abeilya bisipra, wekrorumupa, poptapkamsepe. Popsepyopda, nun deiyo gume. Sun deiyo pua.” Upeprapidi upu sekra deiami. Ada Yahudi yala gum nesala, ‘Nun Allah si eremnup ati yangopda, mali kupsurur,’ teneramya tep, aupu pepi.} mali kupseue.” Upeprapidi upu ila di penmai.

29 Asia tara di yai neng, sun Yahudi yala nengdi Efesus mutu ngebo, er sida Terofimus, er cap, Paulus cap, Yerusalem ati arum neitamai embareipa, emya cadi, sun Allah tep karerami ati damai tek sisi men epi dinin, sun kange deiki dipu, ‘Paulusdi angebo, Yahudi yala gum ngebo doprap, Allah karena ati damai dubenmasere. Akati damai embareng do?’ tenen, kange nepupa, pepi. 30 Upu ila di penmai panenda, Yerusalem ati arum neitamai kurami nesala yuma gekepidi, kange kunukupa, yu kupidi, dana-dana tara yumadi, sepdaro aupu penmaiyaipu wengyai. Wengyaidi Paulus taleprapidi, sun Allah tep karerami ati pumbon di, gipdaro bura tara dubei pangeda, adipapu yuk nengdi, Allah karenai neitamai wilipra wiami beilya buplan dekdongopi.

31 Anengdi, Paulus tup porterenmai tarupu, yuk nengdi, Roma jen talen neng sun deiyo ngebo tep upepi. “Yerusalem mutu kunge nengda, ‘Paulus popkamep’ tenen, yu weik kupmarpa kwemdanmange,” pepra lap pepipa gekepu. 32 Gekepudi adipapu er nyapu jen talen neng, er amutara jen neng dinin, nimi deiyo neng utopu neng cap, sun tali jen talen neng cap, wepra doprapudi, akwemdanmai neng damai, er cap kikiman sepdaro bei. Sepdaro bei pangeda, akwemdanmai nengda, jen talen neng cap, jen talen neng sun deiyo ngebo cap, epi dingeda, kware kupupa, Paulus ponmaiya yaproi.

33 Yaproipa, ajen talen neng, sun ila deiyo ngebo Paulus damai yaudi, Paulus dopra deipudi, er jen talen neng tep pepu. “Angeboda, rantai tapu butene di koupdongopso!” pepu. Upepudi, awekmai neng tep asipterepu. “Angeboda, ware ngebo do? Er kupmau kecada dano?” pepra asipterepu. 34 Asipterepupa, akunmai nengpu nimi bokra ton tara ila upu yuk ton penmai, ton tara ila upu yuk ton penmaiya deiki di, ila di lelimdanmaiya tep, ajen talen neng sun deiyo ngebodi, ‘Angebo tek sisi warya kupmau do?’ tenen, men tenipmanto kupu. Ukupupa, erdi er jen talen neng tep pepu. “Paulusda, nun kunup ati dubeko!” pepu.

35 Upepupa, sun Paulus dopra dubeidi, beilya buplan dam apio welerbaipnen, ayu kunmai nengda, yu ila weik kupupa, ‘Paulus popkup’ tenen, yu di talepbuntupnen baipa, sekaleknen baipa, ajen talen neng, ‘Paulus dopra popnung’ tenen, Paulus er nong doprap alauai ereptalepidi dubei. 36 Ayu kupupa dombanmai nengdi, upu ila di penmai. “Paulus popmeko,” penmai.

Paulusdi yu kupupa, awekmai neng tep, pepu upu

37 Ajen talen nengdi Paulus dopra, sun ati buplan damai wekronkoi atep, baipane Paulusdi ajen talen neng deiyo ngebo tep, Yunani upu deiki di asipterepu. “Kan tep upu ton pepketene do?” pepra asipterepu. Asipterepupa, ajen deiyo ngebodi tamupra pepu. “Yunani upuda kael keamumdi penmarem do? 38 Men di Mesir mutu ngebo, ‘Amutu taleryakanung neng popra bisipkamep’ tenen, nimi pon neng denge weik 4 ribu neng buluprapmumdi, bura mutu dubarum ngeboda, kan do? Yuk ngebo do?” pepra asipterepu.

39 Asipterepupa, Paulusdi tamupra pepu. “Neda Yahudi yala ngebo, Kilikia tara, yambul mutu gume. Pio telep mutu, Tarsus mutu deipnei ngebo kunune. Awekmai neng tep, upu peptene do?” pepra moropu. 40 Moropupa, ajen talena deiyo ngebodi, “Telepe dapepo,” pepupa, Paulusdi ajen talen neng, sun ati apio deiki tekudi, ‘Upu dimpepkung’ tenen, awekmai neng tep buru bata deipu. Buri bata deipupa, sun yuma konum dimpepyopda, Ibrani upu deiki di aneng tep Paulusdi pepu.