Act 24 | XteSC | STEP | Anengdi Paulus dopra Herodes ati dongopidi, kalekamipane, pamu tumi konum kupkopda, Ananias, ada sun Yahudi yala neng mali kurami keca kunumna tep, Allah karena ila nimi deiyo ngeboda, Kaisarea mutu kwereryau. Er cap kikiman yai nengda, Yahudi yala neng sun upu bongdina deiyo neng, wisi neng tenpu-tenpu cap, ton upu bongdina tara upu melipra pena ngebo tenpu, er sida Tertulus cap, sun yuma yaidi, Gubernur Feliks gekenmauai, “Paulusda, er mali kupkada, ake-ake,” peprap katuai lap pepi.

Acts 24

Gubernur Feliksdi Paulus tep, upu bokeiamu upu

1 Anengdi Paulus dopra Herodes ati dongopidi, kalekamipane, pamu tumi konum kupkopda, Ananias, ada sun Yahudi yala neng mali kurami keca kunumna tep, Allah karena ila nimi deiyo ngeboda, Kaisarea mutu kwereryau. Er cap kikiman yai nengda, Yahudi yala neng sun upu bongdina deiyo neng, wisi neng tenpu-tenpu cap, ton upu bongdina tara upu melipra pena ngebo tenpu, er sida Tertulus cap, sun yuma yaidi, Gubernur Feliks gekenmauai, “Paulusda, er mali kupkada, ake-ake,” peprap katuai lap pepi. 2 Uda Gubernur Feliksdi Paulus tep, “Wekroyo,” pepra kongpepupa, Paulus konum wekrou pangeda, Tertulusdi Feliks er gekenmauai tekudi, “Paulus er mali kupkada, ake-ake,” pepra mali upu penmau. Er penmau upuda ake.

3 “Nun nai bo, pio telep ngebo Gubernur Feliks kurume. Mutu-mutu yumadi, tonda, nun kupe keca yuma deiki di, ‘Atelep keca yumada, Feliksdi, pel telep kupra doramseua deiki di telep kuserure,’ pepra kan tep, ‘Pio telepe,’ pekenupe. 4 Dinino, weikanun pepnepa, kan dabale kupkerur tep, nedi nun putapser upu ton pepkukenada, buma dipu pepnepa kange deiprap ton cap gekepkuruma tep moropkene,” Tertulusdi pepu.

5 Upepudi aupu ton pepu.

Angebo Paulusda, er mali kuryada konum kael kupmupke. Erda mali kurur ngebo cadi, mutu-mutu yuma, er mali kupembaramnga deiki di, Yahudi yala neng, nimi weik buluamipa, yu weik kuramupa, upu pedaramidi, mali-mali kurami. Tonda, Yahudi yala nengpu dinin, urasin yuk keproidi mali neng, ada Nasarani ^{▼▼Nasarani neng perami ngeda, ukuprap. Yesusda menop taru Nasaret mutu di yaramnga tep, yuk-yuk mutu nesala yumadi Yesus tep, ‘Nasarani ngebo,’ perami. Uperamyanen, amenda taru, Yesus peteremamupane, er tep teka tenerami neng tep nengeda, “Anengda, Nasarani neng kununge,” perami. Sun Yahudi yala deiyo nengda utenerami, ‘Anengda, sun peda Yahudi yala neng kunung dinin, nun teka tenenup kecada amsepu teka teneptepe teptoda, teleppu kuptue. Dinino, anengda Nasaret ngebo Yesus tep, teka tenenunga cadi, sun urasin yuk keproua tep, sun mali kununge,’ teneramidi perami.} penung nengda, sun deiyo ngebo er akurure. 6 – 7 Angebodi mali kupu ngeda, angepu gume. Tonda, nun Yahudi yala neng, nun mali kuramepunge kunumna tep, Allah karenup atida, akati pum men denmanto keca, angebodi akeca dopra akati pumbon deipmanto kupseue. Atep, nundi Paulus talepra dopropmupke.

8 Nun nai Feliks kan peda, er asiptereprap lepterepmempa, erdi pepkeryopda, nundi, ‘Er mali kupkada, ake-ake,’ pepra er upu yanipmapada, kan peda tek sisinge kael kepkamrume. Tertulusdi pepu.

9 Upenmau pangeda, awekmai neng, Yahudi yala deiyo neng dingeda, “Tertulusdi Paulus tep yanipra penmar upuda, tek penmare,” penmai.

Paulusdi tamupra pepu upu

10 Penmaiyanen, sengpepyopda, Gubernur Feliksdi, ‘Ukuda Paulus upu pepkur’ tenen, buru kaim pepupa, Paulus tekrapudi aupu pepu.

Ne deiyo ngebo Gubernur Feliks, ne kaele. Keteng tamun yambul weikanun deiki di, nun mutu yuma taleamsemumdi, nun Yahudi yala neng tep, nun upu bongdina deiyo ngebo kuramsemume. Atep nengeda, ne kange deipnedi, kan damai ne upu lepsikra lape pepkukene. 11 Uda, ‘Allah si erepkamne,’ tenepsidi, Yerusalem mutu besi taruda, dordinin, nukrap amul di dutara yuma pio kupyakaramupkanen, 12 tumida, atumi kunmape. Yuk tumi ton cap gume, akonuma. Angeda, tali men pepne. Apepman ngeda, yuk neng tep lepra asiptereptumpa, pepketengyopda, kan peda kael keptume.

12 Amali upu pepra deipmaneng nengdi, nun Yahudi yala neng, nun mali kuramnup keca kunumna tep, Allah karenup ati pum, ne cap, yuk ngebo tenpu ngebo peda, upu men pepdanumu. Atep, anengdi minina upu pepmaneng dinin, ange men epi. Tonda, nun Yahudi nesala Allah si eremnup ati pe, uda Yerusalem mutu ati arum domyai neitamai yuma peda, nedi yuk neng bulupra deipnepa, wekmengepa, ‘Ne mali upu pepnepa yu kupyopda, mali-mali kupkamenge’ tenen, men bulupra deipsa tep, tek sisi ange peda, men kupsipa men epnei.

13 Angetopu, sunda sipyal deiki dipu, “Er mali kupke,” pepra tali penmaneng upuda, “Tek sisi ukupke, ange ton ukupke,” pepra wepra men deipnetenge. Deiyo men kwapmarepapu, tali peipmanenge.

14 Apepman dipunen, tenpu upuda, katuai lap pepkusene. Ada, Yesus peteremamu Bisi ^{▼▼Yesus Bisi perami ngeda, ada Yesusdi, ‘Ukunkamrume,’ peteremamu upu cap, erdi kuramu keca cap tep, ‘Angepu talepra dombankamnupe,’ teneramya tep, akeca yuma tep nengeda, ‘Yesus er Bisi,’ perami. Tonda, lap pena upu nomor 39 dirume.} ne teka teneprapsidi, talepra kunya deiki di, nun nai yapu si eremami Allahda, ne peda er si erepra, er tep talepra kunune. Yahudi yala deiyo nengdi, Yesus Bisi talepra dombanup neng tep, sun dipu, ‘Anengda, urasin yuk tara keproidi, tali kecapu teka tenena neng,’ pepra pesenunge. Dinino, Allahdi, ‘Angeda ukunkamrume, angeda men kunkamrume,’ pepra deipupa, Musadi sekeiamseu upu cap, Allah er upu lap pena neng, nabi nengdi sekeiamsei upu cap, tonda aupu utopu kikimanpu kure upuda, teka tenepra talenapu kunune.

15 Tonda, nedi Allah tep, kange tenimtona gum di, pio dimpepra, kange deipra dinapu kune kecada, aYahudi yala deiyo neng peda utopu, dimpepra dinapu kununge. Ada, Allah er upu peserya utopu, dumsisipu kuramenge neng pe, aupu yaniprap mali-mali kuramenge neng pe, Allahdi konum deamenge nesala yuma gam bukra deipkamre taru tep, ‘Dan taru kupkamser do?’ tenen, dinapu kunupe. 16 Ange teka tenepra talenapu kununa tep, ‘Ne pio men tenimdankamne’ tenen, tonda, ne dipru neitamai di, ‘Mali kun keca inipkamne,’ pio men tenenune. Ange pena gum di, ‘Ne dipru dimpepra kunerepa, teleppu kunkamne’ tenen, Allah cap, yuk neng cap dininungai di, ne pedipapu pio mouprap piripterepra telep kupra kunune.

17 Men di Yerusalem mutu kuramsi dinin, amutu tapra yuk mutu bena kuramsanen, keteng tamun weikanun konum mapsopda, kange di Yerusalem mutu tamupra yasi. Yasidi, ne yala nesala kankan kunge nesalada, Yahudi yala nesala tep, co bo cap, yuk keca cap, ‘Tali melipra karepkamne’ tenen, yasi. Tonda, Allah er si eremna tep, ‘Telep keca karepkamne’ tenen, yasi. 18 Yasidi, ne dipruai mali kupnedi lepsikra derina pelda, sirya konum daksopda, teleppu kuramsidi, nun Yahudi yala neng, nun mali kunup keca kunumna tep, Allah karenup ati weksidi, Allah si eremna tep, telep keca karenmasipane, sundi epnei. Akati weksipa, sun epnei taruda, ne cap, yuk neng ton cap kikiman men wekmupu. Tonda, ne cap, yuk neng ton cap, yu kupseupa, men pepdapudi, men kwepdapu.

19 Dinino, Asia tara Yahudi yala neng tenpu-tenpu, “Paulus mali kupkada ake-ake,” pepkuketenge upu ton akwaptuopda, kan damai yatengedi, lepra lap peryaketenge teptoda, ada telepe pua. 20 Ange gum dingeda, awekmang neng dipu, ne Sandeheren neng gekenmaiyai teksi taruda, sundi, “Tek sisi mali kupu ngeda adano,” pepra lulupra deipnei upuda, ukutaruda, kange di katuai lap pepsetengepa gekeptepe teptoda, ada telepe pua. Ne kangeda, ne mali men kupsi.

21 Dinino, tenpu keca puda, nedi kupsi ngeda pepkukene. Ada nedi Sandeheren neng tep, upepsi. “Ne kayapu, ‘Allahdi konum deamenge nesala yuma gam bukra deipkamre’ tenen, teka tenepra talenya tep, sundi, ‘Kan mali kupmume,’ pepra peipmanerume. Atep nengeda, ‘Atumi sun upu bongdinmanurume,’ pepra, nimi upu lepsikra bongdina deiyo neng, Sandeheren neng tep, upepsi. Apepsinge tep, mali tenepmanenge, tenepne,” Paulusdi pepu.

22 Paulus upepupa, Gubernur Feliks Yesus Bisi upuda yambul weik konum kael keamu ngeboda, Paulus pepu upu gekepudi, upepu. “Jen talena neng, sun ila deiyo ngebo Lisias yarepa, upu talepra bokeipnedi, kan upu peipkamkene. Atumida, upu gekenada konuma cadi, sun daberume,” Feliksdi pepu. 23 Upepudi jen talen ngeboda, denge 100 jen neng taleamu ngebo tep Feliksdi peipu. “Uda, ‘Paulus berur’ tenen, moupra kalekamrum dinin, er tali embana cap, er kayapu nengdi er putapra keca kareryakana capda, telepe pua,” pepu.

24 Gubernur Feliks upepudi yukai beudi dakuramnganen, ataru konum kupkopda, er cap, er ner, Yahudi yala ner, er sida Derusila cap, kikiman tamupra Kaisarea mutu yarei. Yareidi, Feliksdi yuk neng tep, “Paulus dopra deneso,” peipupa, sun gekepra dopra yaipa, Paulus konum yauopda, Paulusdi, Yesus Kristus, teka tenepra talena upu Feliks tep lap penmaupa, Feliksdi aupu gekenmau.

25 Paulusdi penmauanen, deiyo upu weneri pepu. Tenpu ngeda, ‘Allah upu peserya utopu dumsisipu kunup,’ pepu. Tonda, ‘Nundi mali keca putapserepa, mali kupnup’ tenen, ‘Nun pedipapu kalengdanupdi, malinge tapnup,’ pepra aupu ton pepu. Tonda, ‘Amenda taru Allahdi nesala weika di lepterepseredi, upu bokeipkamsere,’ pepra aupu cap, Paulusdi lap pepra penmaupane, Feliks gekepudi kware weik kupupa upepu. “Ataru tep nengeda, akonuma. Yuk upu ton men pepkurume. Kanda ke taru tep dabeo. Yuk taruda tali go taru kupnere pangeda, kongpepkamkenepa, upu ton pepkamnerume,” pepu.

26 Upepu dinin, ataru-ataru yumada, ton teneramu. Ada, Feliks er dipu, Paulus tep uteneramu. ‘Paulusda, amutu ila ngebo Feliksdi ateng koupnei tapu lopkamnera tep, co bo karepkamne, tenepkamner’ tenen, Feliksdi tenepu. Utenepka tep, Paulus bena dakuramupane, kange di tamupra kongperamupa, upu taleramrei.

27 Apio kuramreipane, keteng tamun butene konum kupkopda, Feliks er yo pununa tep, yuk ngebo er sida Perkius Festus, wepra deipi. Ukupi dinin, Feliksdi, Yahudi yala neng namna tep, tonda sundi, ‘Er telep ngebo, tenepkamnenge,’ tenepudi, Feliksdi, Paulus wenemna ati adeiamutopu tapupa pio akatipu kuramu.