Act 25 | XteSC | STEP | Uda Festusda, er talepkamu mutu ukupu yau taruda, ati si Kaisarea mutu yau dingeda, weneri tumi akunmauanen, konum kupkopda, Kaisarea mutu di Yerusalem mutu welepu.

Acts 25

Paulusdi, “Nun Roma mutu nesala, ila nimi deiyo ngebo Kaisar dipu ne upu bokeipnetue,” pepra moropu upu

1 Uda Festusda, er talepkamu mutu ukupu yau taruda, ati si Kaisarea mutu yau dingeda, weneri tumi akunmauanen, konum kupkopda, Kaisarea mutu di Yerusalem mutu welepu. 2 Yerusalem mutu konum beuopda, Yahudi yala neng sun Allah karena tep, ila deiyo neng cap, yuk Yahudi yala upu bongdina deiyo neng cap, Festus damai yaidi, “Paulus er mali kupu ngeda, ake-ake,” pepra Paulus tep mali upu lulupra deipi.

3 Ukuprapidi, Festus tep pio palepra moronapu kunmaidi, aupu pepi. “Naio, nundi Paulus wenepkamapa tep, nun melipsememdi, Paulus Yerusalem mutu dokotepsetume,” upepra moronmai. Sundi ange moropinge deiyoda, ‘Paulusda bisi neitamai kunmapyadi popkamep’ tenen, konum ketenepmaiya tep, Festus tep aupu mawa di pepi. 4 Upepipa, Festusdi tamupra pepu. “Paulusda, sun jen nengdi, ‘Paulus berur’ tenen, Kaisarea mut tup melipra kalengmange. Tonda, ne peda menmena amutupu benkaman ja. 5 Sun du yapu tenpu-tenpu cap, Kaisarea mutu benkamepe. Bepyopda, Paulus tek sisi mali kamre pangeda, umutu dipu ‘Paulus mali kupunge ake-ake,’ pepra, lap pepnetenge,” Festusdi pepu.

6 Uda yoneitam tumito, morokyo tumito Yerusalem mutu kuramyanen, Festus Kaisarea mutu kwerepudi mapmaua, bereku. Berekyopda, Festusdi, ‘Upu lepsikra bokeipkune,’ tenepudi, sun upu lepsikra talerami ati bukudi, “Paulus deneso,” pepu. 7 Upepupa, Paulus deipa, Festus damai yana teku pangeda, Yerusalem mutu di yanmai Yahudi yala deiyo nengdi, Paulus neitamai deipipa atekupa, aneng dana-dana tekrap ongomgenem pepmai. Ukupmaidi, “Paulus er pio mali kupu ngeda, ake,” pepra tali minina upu pedinmai dinin, deiyo kecada, “Paulusdi ukupra mali kupke,” pepra atumi di men lap pepmanto kupi.

8 Ukupipa, adinen Paulusdi, ‘Ne pedipapu upu sekdanedi, sun upu deiki bisipkamne,’ tenepudi, aupu pepu. “Uda Allahdi, ‘Ukunkamrume, ange men kunkamrume,’ pepra deipupa, Musadi Yahudi yala neng tep sekeiamseu mem upu cap, Yahudi yala neng, nun mali kunup keca kunumna tep, Allah karerbanup ati cap, tonda, Roma ila nimi deiyo ngebo, Kaisar ^{▼▼Kaisarda, ada Roma tara nesala cap, Roma mutu-mutu yuma cap, ila nimi deiyo ngebo kuramudi taleramu ngebo kuramu. Tonda lap pena upuda, nomor 41 dirume.} cap, ayuma tep, nedi mali men kupsi,” pepu.

9 Paulusdi upepupa, Festusda, ‘Yahudi yala neng tep, makupnepa, erda telep ngebo, tenepkamneng’ tenen, Paulus tep pepu. “Uda kan dano? Kan cap, Yerusalem mutu bepyopda, anengdi, ‘Paulus er mali kupu ngeda ake,’ pepkengopda, yuk upu bongdina deiyo neng ton gekepmengopda, nedipu upu bokeipkamken do? Gum do?” pepra asipterepu.

10 Asipterepupa, Paulusdi tamupra pepu. “Nimi mali kupmengepa, upu talepra bongdingaida, ukutaru akonum bukmap adano. Aca dipu ne upu bokeipnetume. Nedi Yahudi yala neng tep mali pio men kupsada, kan peda konum kael kepmarem adano. Dinino, ‘Angeda, nun song,’ tenepneruma cadi, atep nengeda, Kaisar er dipapu upu bokeipkamnere. 11 Dinino, nimi mali kupmengepa, poramenga deiyo keca kwamtene teptoda, ‘Ne pona yapnerume!’ pepra, upu men sektene. Dipunen, ne mali kuna deiyonge men kwapmara tep, kandi sun Yahudi yala neng pe, tonda yuk neng pe tep, ‘Anengdi er popkameng’ tenen, men doupra karepnetume. Deiyoda, men kwapmara tep, kan pe, yuk neng peda, ange men kuptume. Atep, neda ‘Kaisar er dipu ne upu bokeipnutue’ tenen, moropkene,” Paulusdi Festus tep pepu.

12 Upepupa, Festus gekepudi, er cap, er meliprap upu lepsingna neng cap, upu konum talepyopda, Festusdi aupu pepu. “Kanda, ‘Kaisar dipu ne upu bokeipnetue,’ pepra moropmarema tep, Kaisar er damaipu benkamrume!” pepu.

Festusdi Paulus tep, ‘Ware kupkun do?’ tenepudi, er cap Raja Ageripa cap upu taleprei upu

13 Uda tumi butene do, weneri do, konum kupkopda, ila nimi deiyo ngebo, ‘Raja Ageripa ^{▼▼Raja Ageripa lap pena upuda, nomor 42 dirume.} cap, er mal ner Bernike cap, epdapedi gispal dopdankamep’ tenen, Festus damai Kaisarea mutu yarei. 14 Yareidi, acada yambul weikanun kuramyanen, Festusdi Paulus upu bongdinange tep, Ageripa lap pepnepa er tenipredi, ‘Ange telepe, ange mali, pepkamner’ tenen, upu talepreidi, Festusdi pepu.

Feliksdi tenpu ngebo wenemna ati dongomutopu tapra beupa, wenemna ati apu kunmare. 15 Ne Yerusalem mutu besi pangeda, Yahudi yala deiyo neng, sun Allah karena tep ila deiyo neng cap, sun upu bongdina deiyo neng, yuk wisi neng capdi Paulus tep, “Er mali kupke. Atep kandi pepmempa, jen nengdi er poiptenge,” pepra palepra moropnei. 16 Moropneipa, aneng tep upepsi. “Yuk nengdi tenpu ngebo tep, ‘Er mali kupke,’ pepmengopda, angebodi ton er upu lepsikra peptue. Ada, sun pepdanameng neng, meneng damai bulupmengepa, sun men di pepi upuda gekepredi, ‘Gume neda ukuramsi, ukuramsi,’ pepra, sundi er tep penge upu lepsikra pena tep, upu tenpu pe men pepmar taruda, nun Roma nesaladi ato ngeboda, tali lupra men poptepe. Yuk neng tep, ‘Angebo popkunge’ tenen, menmena di men karenupe,” pepsi.

17 Uda, sun Yahudi yala deiyo neng cap, ne cap, Kaisarea mutu di acapu yapudi, mapmapka berekyopda, yuk taru men tenepsi. Atarupu tenepsidi upu lepsikra bongdinai buksidi, “Paulus acapu deneso,” pepsi. 18 Paulus tep, “Er mali kupke,” pepra mali upu pepra deipi nengdi, ‘Upu pepkup’ tenen, tekidi, upu penmai pangeda, ne tenepsitopu men pepi. ‘Erda apio mali keca kupke, pepkamenge,’ tenepsi dipunen, sundi ne tenepsi upu utopu keca men pepi. 19 Ange gum dinin, sun pepi upuda yuke. Uda sun cap, Paulus cap amsepu men teneramyada, sun Yahudi yala neng teka teneprap talenung keca cap, tonda tenpu deamu ngebo, er sida Yesus angebo tep, Paulusdi “Er gam kurure,” pepra lap pere ngeda, amsepu men tenenunga cadi, aupu tep pedanmai.

20 Pedanmai pangeda, neda ato upu tep, ‘Ware kupra lepra asiptereptene do?’ tenen, kange boktopneu. Ukupneua tep, Paulus tep nedi pepsi. “Kan upu bokeipkamkena tep, kan dano? Yerusalem mutu kan cap bepyopda, sundi pepkei upu bokeipkamken do? Gum do?” pepra asipterepsi.

21 Asipterepsipa, Paulusdi, “Roma mutu yuma talepra, ila nimi deiyo ngebo Kaisar, er dipu upu bokeipnetue,” pepra moropu pangeda, nedi jen talen neng tep pepsi. “Paulus berur tep, tupa meliprap dirume. Amenda taru, Kaisar damai dokotepkamne dinin, ukutaruda, akunkamra taruda, ‘Er berur’ tenen, sun melipra dirume,” pepsi.

22 Festus upepupa, Raja Ageripadi Festus tep pepu. “Ne putapmanerada, ne peda angebo upu gekepkaman tenepmane,” pepu. Ageripadi upepupa, Festus tamupra, “Ambutumi er pere upu gekepkamareme,” pepu.

Paulus Raja Ageripa damai yaupa, pepu upu

23 Mapmaiya, bereku pangeda, Raja Ageripa cap, er ner Bernike cap, nimi weika di gispal donmaipa, sun pio telep opkale keprapreidi, upu penmaipa, gekenkamai ati sal nong-nong kupreidi wekrorei. Tonda, jen neng, sun ila deiyo neng cap, Kaisarea mutu ila-ila neng cap weki. Wekipa, Festusdi, “Paulus deso,” pepkopda, Paulus dopra awekmai ati duyai. 24 Dopra yai pangeda, Festusdi aupu pepu.

Nun nai Raja Ageripa. Ton, nun cap akati wekmarum nesalada, angebo dinmarume. Yahudi yala neng yumada, Yerusalem mutu neng cap, tonda Kaisarea mutu neng cap, sun yumadi Paulus tep, “Er gam kunkamrada, pio mali. Kandi poipsetume,” pepra palepra moropnei. 25 Ayuma lepterepsidi, mali kupmengepa nimi poramenga deiyo kecada, “Paulusdi ukupke,” pepra men pepipa, ato keca pio men gekepsi. Men gekepsi dipunen, erdi, “Roma mutu yuma talepra ila nimi deiyo ngebo Kaisar dipu ne upu bokeipnetue,” pepra konum moropka tep, ‘Angeboda, Roma mutu dokotepkamne,’ tenepsi.

26 Utenepsi dinin, angebo tep, “Er mali kupu kecada ake-ake,” pepra, nun nai Kaisar tep, katuai lap pepra surat men sekeiptene. Atep nengeda, awekmarum nesala ton cap dinin, pio tek sisi ila ngeda, nun nai Raja Ageripa tep, Paulus dopra deipsene. Ada, nundi aupu lepterepmepedi, ‘E er mali kupu kecada ake, ange sektene’ tenen, er dopra sun damai deipsene. 27 Tonda, ne tenepmanada, ‘Nun wenemna ati dongopmap ngeboda, “Er mali kupu kecada ake,” men pepmepe dingeda, deiyo men kwapmarepapu yuk mutu tali dokotemnada, pio mali,’ tenepsi. Ada, deiyo gum tepa. Festusdi pepu.