Act 26 | XteSC | STEP | Festus er upu konum pepupa, Raja Ageripadi Paulus tep pepu. “Ukuda, kandi, kan pe tep kan melimna tep nengeda, upu lap pepsemempa, gekepkupe,” pepu. Upepupa, Paulusdi, ‘Nedipu upu sekdanedi, sun upu deiki bisipkamane,’ tenepudi, er buru bata deipudi, gonga kepra aupu pepu.

Acts 26

“Paulusdi, er mali kupke,” pepra deipi upu tep, Raja Ageripa er gekenai sekrou upu

1 Festus er upu konum pepupa, Raja Ageripadi Paulus tep pepu. “Ukuda, kandi, kan pe tep kan melimna tep nengeda, upu lap pepsemempa, gekepkupe,” pepu. Upepupa, Paulusdi, ‘Nedipu upu sekdanedi, sun upu deiki bisipkamane,’ tenepudi, er buru bata deipudi, gonga kepra aupu pepu.

2 Ne nai Raja Ageripao, atumida kan damai teknedi, sun Yahudi yala neng yumadi, “Kan mali kupmume,” pepra deipnei upu sengdongona tep, ne upu lap pepkune. Atep, ne kange deipne. 3 Uda ne ila kange deipmange deiyoda, ake. Ada, Yahudi yala neng sun kunge keca cap, sun yuk-yuk tenepmengedi pedanung upu cap, konum telep kupra kael keamume. Atep nengeda, ne pepkaman upu yuma kapul men gekepkunerum taruda, ‘Bouna di gekenkamanerum’ tenen, moropkene.

4 Uda, ne nyapu taru di, ne kuramsi keca yumada, sun Yahudi yala neng, sun kaele. Ne deiamnei taru di, ne mutu neitamai ne tara neng cap, kikiman kuramupka cap, tonda, Yerusalem mutu kuramsa cap, sun Yahudi deiyo neng yuma, sun kaele. 5 Pumun di konum kael kepneiya cadi, nun yuma Yahudi yala neng dinin, Allah pere upu moupra talepnedi kunup kecada, mem upu tep, pio mouprap talenung gungda, Farisi neng kununge. Sun Farisi neng kungetopu, ne peda Farisi ngebo kuramsi. Aupu yumada, sun Yahudi deiyo neng peda, ‘Aupu nun ton pepkup,’ teneptenge teptoda, sun peda kael keamneiya tep, sundi lap peptenge dinin, men pepkunge.

6 Uda, Allahdi nun apu yapu ^{▼▼Yahudi yala neng, sun apu yapu tep, lap pena upu nomor 20 dirume.} tep pediramu upu, ne peda, ‘Tek sisi ukupkamsere,’ tenenune. Ara, ‘Konum deamenge neng amenda taru gam bukra deipkamre,’ teneprap dinapu kunune. Ange teka tenenuna tep nengeda, atumi di, sun upu bokeipmanerume. 7 Nun Yahudi yala nengda, yala-yala 12 yumadi, keteng komuni pe, lukunda pe, Allah er si ereprap er pelpu dopedi, Allahdi aupu pediramseu upupu, ‘Konum deami neng gam bukra deipkamrada, ukupserepa, nun peda eptepe’ tenen, teka tenepra pio dinapu kunupe.

Ne nai Raja Ageripao, sun Yahudi yala neng dipunen, sunda Yahudi yala deiyo neng dipu, ateka tenepra dinup keca tep, “Paulusdi aupu peteremrura deiki di, er mali kuramu,” pepra mali upu pepra derinenunge. 8 Sun yumada, ‘Allahdi konum deamenge nesala gam men bukeiptue. Ada men kupmanto keca,’ tenerumnyada, warya deiki di atenerum do? Ware keca deiyo tep aupu teka men teneptum do?

9 Uda, men di ne peda, pio dimpepra puto di teneramsi. Ada, Nasaret mutu deiami ngebo, Yesus, er si eremaminge cap, er peteremamu upu cap, er nyapu cap, er tep kurami keca yuma cap tep, ‘Ne kuramtene keca yuma deiki di, akeca yaniptenepa, gum kuptue,’ teneramsi. 10 Uteneramsa tep, ne tenepsitopu, Yerusalem mutu neitamai di, angepu kupsi. Yahudi yala neng Allah karena tep, ila deiyo nengdi, “Ukuptume,” pepra deipneia deiki di, Yesus tep teka tenerami neng, Allah er nyapu weik dopra wenemna ati dongoramsi. Tonda, sundi, “Aneng popkupe,” pepi taruda, ne peda, Allah er nyapu yanina tep, ‘Walito penmange, dapoptapso,’ tenepra peramsi.

11 Ton taru ton, ton taru ton, mutu-mutu weike, Yahudi yala neng sun Allah upu peteremna ati embaramsidi, ne upu peamsa deiki di, sundi Yesus er nyapu tep wenemamidi, ikin keca weik sun nong deiki derirami. Tonda, sun tenerami keca tep, “Ada talye,” peramsidi, ‘Sun teka tenerami keca tapkameng’ tenen, pio puto di pirirtereramsi. Angepu gume. Tonda, Yesus teka tenemi neng tep, pio yu weik kupneupa, ‘Aneng deiki pio ila kange mun keca deipkamne,’ teneramsidi, yuk-yuk karen mutu ton ati-ati yuma embaramsi. Paulusdi pepu.

Paulusdi er Yesus teka tenepunge, lap pepu upu

12 Paulusdi pepu. Ange embaramsitopu, Allah karena tep ila deiyo nengdi, “Nun tep nimi poipserume,” pepra deipneia deiki di, ‘Damsyik mutu benkun’ tenen, besi. 13 Ne nai Raja Ageripao, Damsyik mutu besipane, keteng dukduk kupkopda, ne bisi yo tup besi taruda, ila dirine weik im deiki di yaudi, ne cap, ne kikiman banmapu neng cap, nun dana-dana melangdan pepseupa, epsi. Keteng dirineda, yambul dirine. Dinino, adirinda, pio ila dirine kupu. 14 Adirin di, melangdan pepseupa, asuru melimala pepseupa, nun yuma tuai depmupupa, nimi upu utopu upu, Ibrani upu deiki di aupu pepneupa, gekepsi. “Saulus, Sauluso, ikin keca warya tep derinmanerem do? Kandi co takke gukdongopmempa, pu ila weik jenmakera tep, ware keca deiyo tep tupa balilapu kurum do?” pepneu. ^{▼▼Co takke pepu ngeda, ada domon upu di pepu. Deiyoda, Saulusdi, ‘Yesus tep teka tenenung keca yumada, nun Yahudi yala nengdi kunup keca utopu gume. Atep, nimi dipu kununga cadi, malipu kununge’ tenen, ikin keca sun nong deiki deipembaramnga deiki di, Allahdi, ‘Ukunkamenge,’ tenen, er tenemunge yanipke. Atep Allahdi Saulus tep aupu pepu. Tonda, lap pen upu nomor 43 dirume.}

15 Upepneupa, nedi tamupra asipterepsi, “Naio, kanda ware ngebo do?” pepra asipterepsi. Asipterepsipa, nun nai Yesusdi, “Kan ikin keca derinmarem ngeboda, ne Yesus pua,” pepneu. Tonda upepneu.

16 Ukuda, kan yane tuai yaniprap tekroyo! Uda nedi kan damai benbenepmakena deiyoda, ‘Ne pel melimna cap, ne tep yuk neng lap pena cap, kunkamnerum’ tenen, wepra deipmakendi, benbenepmakene. Nedi kunepa, konum dimem keca cap, amenda taru, kene utopu keca deiki di peterepkamken keca cap, kandi yuk neng tep, ne upu lap penkamrume. 17 Tonda, kan tara neng Yahudi yala neng pe, Yahudi yala gum neng peda, porterepkamkengada, nedi lyepkamkene.

18 Nedi aneng tep dokotepkamkena deiyoda, ‘Sun asuru laipkamruma’ tenen, dokotepkamkene. Tonda, ‘Sun kange yuk punupmengepa, sun kange dipru kunungnai kunga tep, dirinai tamupra dopra, deriryakankamruma’ tenen, dokotepkamkene. Tonda, Kain Jen Ngebo er puto di taleramngai di tamupra, ‘Allah er puto di talepkamrai dopra, deriryakankamruma’ tenen, dokotepkamkene. Ada warya deiyo tep, tenena gume. Kandi aneng tep, akeca yuma konum kupmemnyopda, ne tep teka tenepmenga deiki di, sun dipruai mali tenenung keca cap, sun mali kunge keca cap, Allahdi kaukepropredi, akeca gum kupra deipkamre. Tonda, ne Yesus tep teka tenepneia deiki di, Allahdi konum wepra deiamu nesala cap, wisipra kunkamenge. Allahdi aneng tep ukupkamre. Yesusdi ne Paulus tep upepneu, Paulusdi pepu.

19 Upepu dingeda, Paulusdi aupu ton dukdongopra pepu.

Ange tep nengeda, ne nai Raja Ageripao, im deiki di kene utopu keca dokotemneupa, epsipa peipmaneuada, men tapsi. Yesusdi peipneutopu tupa kunune. 20 Uda, menmena Damsyik mutu kurami nesala cap, adine Yerusalem mutu kurami nesala cap, uda Yudea tara neng cap, tonda Yahudi yala gum nesala cap tep, aupu peteremamsi. “Sun yuma sun mali kurum keca tapra, sun kange yuk punupraprumudi, amnyo karikrap, Allah er tarapu kepronkamrume. Sun kange tenena ukupunge punupmaruma utopu, yuk taru pe sun kun keca yuma pio kwiryepu kunkamrume. Ada, ware neng do, yuma epsengedi, ‘Sun mali kurami keca yuma konum tapya tep, ukutaru yumada, kwiryepu kunmang adano,’ tenepsengedi, kael kepkamsenunga tep, aupu pepne.” Aupu peprapsidi peteremamsi.

21 Upepra peterepsa tep, Yahudi yala nesala nun mali kupe keca kunumna tep, Allah karenup ati damai kunmasipane, Yahudi yala deiyo nengdi, taleprapneidi popterepnei. 22 Dinino, pumun dadi, pio ukutaru pe, Allah meliamneupa, kuramsanen, ataru peda tupa kunune. Ukununa cadi, atumipuda, atekmandi, tali kankan kunge nesala pe, ila-ila neng pape, sun gekena tep, aupu tek sisi upupu lap penmasene.

Uda, Allah er upu cap, amenda kupkamu keca tep lap perami neng, nabi-nabi neng cap, Musa capdi, “Tek sisi ukupkamre,” perami upupu peteremamsi. Ne pedi tenepsi upu cap tapakrap men penmasene. Ne penman upuda, sun pumun taru kurami nengdi perami upu utopu upu penmane. 23 Ada, Allahdi, ‘Tuai nesala lyepkamre’ tenen, wepra deiamu ngebo, Mesias ngebo kange mun keca dopra kuramyanen, depredi, erda menmena gam bukronkamre. Er depmaryanen, menmena gam bukre ngebodi, er tara neng, Yahudi yala neng cap, Yahudi yala gum nesala cap tep, “Allahdi lyepkamsere,” pepra, lap peprepa, aupu sun gekepmengedi, sun dipru neitamaida, dirine utopu kupkamre. Musa cap, Allah er upu lap perami neng, nabi-nabi neng capdi aupupu peiami. Paulusdi Raja Ageripa tep aupu yuma pepu.

Paulusdi Raja Ageripa tep, pepu upu

24 Paulus er kuramu keca tup lap pepu panenda, Festus ila upu di, Paulus upu bisiprap sekdongopu. “Paulus, kan kangeda gum kupmaker adano. Kan ila kael keamuma deiki di, kange wang-wang pepmakerpa, mutana ngebo utopu penmarema dia,” peprap ila upu di pepu. 25 Upepupa, Paulus tamupra pepu. “Nai Festuso, ne mutana ngebo men kunune. Ne penman upuda, telel upu gume. Pio dumsisi upupu penmane,” Paulusdi pepu. Upepudi aupu ton pepu.

26 “Nun nai Raja Ageripada, aupu yuma er konum kael keamnga tep, nedi er tep tali luprap pepnapu kuptene. Ne tek sisi kaele. Akuramu keca yuma men inipka cadi, ayuma kuramupane, er walwal di men diramu guma. Ayuma er diramnge tep, er konum kaele. 27 Ne nai Raja Ageripao, Allah er upu lap perami neng, nabi-nabi neng perami upuda, teka tenerum do? Ne tenepmanada, ‘Teka tenepmanto konum kurume,’ tenepmakene,” Paulusdi Raja Ageripa tep pepu.

28 Upepupa, Raja Ageripadi Paulus tep pepu. “Ametek taru di, kan upu penmanerema deiki di, ‘Aupu pepnepa gekepredi teka tenepyopda, Yesus teka tenepra, Kristen ngebo kupkamre’ tenen, penmanerem do?” pepu. 29 Ageripa upepupa, Paulusdi tamupra pepu. “Metek taru di do? Weik taru di do? Uda nedi Allah moronyada, kan teppu gume. Kan cap, ne upu penmanpa gekenmarum nesala yuma cap, ‘Ne kunetopu kunkamrum’ tenen, Allah moronmane. Dinino, tenpu ngeda, ‘Ne ateng koupneitopu, sun peda koupkamnunge,’ pepra Allah men moronune,” Paulusdi pepu.

30 Paulus upepupnen, Raja Ageripa tekroupa, adinen, Gubernur Festus tekrou. Adinin, Bernike cap, sun kikiman bukmai neng, ila-ila neng cap yuma tekroi. 31 Tekroidi, akati tapra yukai konum beiyopda, yuk neng gekenai gum dinin, sun upu talepdanmaiyanen, sundi aupu pepi. “Nimi mali kupmengepa, nun wenemna ati dongoramepa deiyo keca pe, tonda, nimi poramenga deiyo keca peda, angebo Paulus pio men kuramudi, tupa men kurure,” pepi. 32 Upepidi, Raja Ageripadi, Festus tep aupu pepu. “Paulusda, ‘Kaisar dipu ne upu lepsikra bokeipnetue,’ pepra men moromtu teptoda, nundi angebo tali lopra taptepe. Dinino, Paulusdi Kaisar er si pepka deiki di konum moropmasera tep, Paulus men loptaptepe,” pepu.