Act 27 | XteSC | STEP | Uda amenda taru, sundi, ‘Anengda, ila gapung co deiki Italia mutu dokotepkamepe’ tenen, konum tenepidi pepi dingeda, Paulus cap, ton, yuk neng wenemna ati dongomi neng cap, jen talena neng sun deiyo ngebo, er sida Yulius, ‘Aneng dopra melipra benkamre’ tenen, karepi. Yuliusda, Kaisar er jen talen neng gungda, Yulius sun neitamai kuramu. Tonda, Yulius peda, erdi deiyo ngebo kuramudi, jen neng denge weik 100 neng taleamu.

Acts 27

Jen talena nengdi Paulus dopra, Roma mutu dubei upu

1 Uda amenda taru, sundi, ‘Anengda, ila gapung co deiki Italia mutu dokotepkamepe’ tenen, konum tenepidi pepi dingeda, Paulus cap, ton, yuk neng wenemna ati dongomi neng cap, jen talena neng sun deiyo ngebo, er sida Yulius, ‘Aneng dopra melipra benkamre’ tenen, karepi. Yuliusda, Kaisar er jen talen neng gungda, Yulius sun neitamai kuramu. Tonda, Yulius peda, erdi deiyo ngebo kuramudi, jen neng denge weik 100 neng taleamu. 2 Nunda, mutu si Aderamitum mutu bena, nesala kuramyai ila gapung co kapal wekmupu. Asia tara mokon ku dinin, mokon porai bena ila gapung co deriramyai, ^{▼▼Gapung co deriryakaramyaida, ukuprap. Laut mokon pirman tara dinin, tuai tarada, nesala ati arum dopra kurami. Laut mokon tarada, laut mokon deiki sun gapung co, er sida kapal laut peraminge, deriryakarami.} agapung coda, bena wekamya tep, nun cap wekmupudi, mokon deiki banmapu. Tonda, Makedonia tara dinin, Tesalonika deiami ngebo, er sida Aristarkus cap banmapu.

3 Banmapkanen, ipupa, mokon deiki dinin, gapung co pumbonpu mapmapka berekupa, laut mokon porai gapung co bena deipipa, nun tuai yaniprap, Sidon mutu bepu. Bepupa, Yuliusdi Paulus bicau tenepka tep, ‘Er kayapu nengdi er putanmare keca melipra karepkameng’ tenen, “Kan kayapu neng damai berume,” pepupa, Paulus er kayapu neng damai ke tarupu bena dakunmauanen, tamupra yau.

4 Sidon mutu adinen, mokon neitamai ton baramupupane, kumanya puto di adinu bapupseudi, gwekra dopseua tep, ‘Siprus mutu lelepra benkamep’ tenen, Siprus mutu keteng tengyakan tara di, kumanya men douryanmanto tara, deiki tara banmapu.

5 Baramupkanen, ila mokon dana-dana neitamai sekropmupudi, mokon deiki baramupkanen, laut mokon porai gapung co bena deipipa, Likia tara cap, Pamfilia tara cap dinin, Mira mutu nun tuai busukmupu. 6 Amutu dipu, men baramupu gapung coda, amutu tapmupudi, jen talen neng, sun deiyo ngebo Yuliusdi, Aleksandia mutu di yau gapung coda, Italia mutu benkami gapung co epudi, nun dopra agapung co pumbon dongopseu.

7 Dongopseupa, kange di mokon deikida, pio nemkari atumi pio weike baramupkanen, ikin pelpu pio weik dopbaramupkanen, Kenidus mutuda, tuai tara ordipudi, nunda mokon neitam tarapu banmapu. Baramupkanen, kumanya puto di adinu mungamnga tep, ‘Nun benkamep,’ tenepmupu bisida, men benmanto kupmupudi, ukwerepmupudi, ‘Kerit mutu, kumanya puto men douryakaramu tara lelepra benkamep’ tenen, Kerit mutu iramu tara bepu. Ada Salmone mutuda tuai tara ordipudi, nunda mokon neitamai dipu bisipmupu. 8 Bisipmupudi, gapung co di mokon deiki ikin pelpu dopbanmapka deiki dipu, Kerit mutu damai dinin, mokon porai banmapkanen, mutu si Gapung Co Derina Urasin Telepai, perami mutu bepu. Ada, Lasea mutu damai kwamngai bepu.

9 ‘Abenkamepe,’ tenepmupu tumida, mokon bisi neitamai dipu dam kupupa, tonda, nun Yahudi yala neng mali kuna tep, jen si tepra, Allah karenup taru, ila tumi konum kupke. Konum kupka tep, ato warda, ila mungna pio mungamnga cadi, ‘Popsurur’ tenen, mokon deiki nimi pio men embarami. Ayuma ukupka tep, Paulusdi agapung co talena deiyo neng tep, ‘Moupra tenipkameng’ tenen, pepu. 10 “Anengo, akeca yuma dinedi utenepne. ‘Kange di pio banapu kupmepyopda, nun kange mun keca kuna cap, nun gapung co olongna cap, tonda, sun yuk neng kipi bunga gum kupkamra cap, tonda, nun kan-kan di nesala dena cap, kupkamsere,’ tenepne,” pepu.

11 Paulus upepu dinin, Yuliusdi Paulus pepu upu pio men gekepu. Paulus pepunge tali amulpu gekeptapudi, agapung co men di kunuprap taleamnga deiyo ngebo cap, agapung co bana tep talena neng, sun pel wepra derin deiyo ngebo cap, sun upupu Yulius gekepu. 12 Tonda, amokon deiki gapung co deriryakaramyaida, mutu buma di lelimna gum cadi, kumanya puto di pu peramngai cadi, gapung co bena kweiprepa olongrure. Atep amutuda mali kuramnga tep, ‘Bul weik cap, mungna cap kuramu warda, acapu telep kupra kutepe’ tenen, men kupmanto mutu kuramu. Ukuramnga tep sundi, ‘Fenikis mutu betepe teptoda, bul war neitam taru yumada, telep kupra kutepe’ tenen, “Nun banmapu neng, weika di banapu kunkamepe,” tenepidi pepi. Fenikis mutuda, Kerit mokon dana-dana sekdongomu mutu, mokon ku gapung co deriryakaramyai kwamu. Fenikis mutu teka dinada, keteng wengdongon tara yambul deiki tara cap, ton dutara cap, laut mokon katuai eptume.

Ila mungna mungamupa, ikin kupu upu

13 Uda, amendada, utara di kumanya bouna di adine beupa, sundi, ‘E, nun putaramseu ngeda, adano,’ tenepidi, ‘Gapung co er sida kapal laut dimpepkamre’ tenen, tapu gerekdongoprapidi, ikin keca ^{▼▼Ikin keca mokon pumbon dokotemaminge deiyo ake. ‘Gapung coda kumanya puto cap, laut mokon iwelepnin, ukwerepnin puto capdi dubereipa, dakurur’ tenen, besi keca ikin weiknge dopra tapu di kapal laut dana tara, besi keca dana tara gerekdongoprapidi, ikin weik besi ngeda, mokon pumbon dokotepi. Mokon pumbon wekropa dutara dimpepyopda, gapung co men benmanto kupu. Tonda lap pena upuda, nomor 33 dirume.} mokon pumbon dokotepmaiya, kange di guprap kipropi. Ukupipa, Kerit mutu damai dinin, mokon neitamai mokon deiki banmapu. 14 Dinino, banmapupnen, keteng yakana deiki tara di, ila puto weik mungna mukrapudi, Kerit mutu, ada laut mokon dana-dana sekdongomu mutu pasikne diniprapudi, nun gapung co kapal laut ^{▼▼gapung co – kapal laut – Gapung co, tonda kapal laut perameng keca di mokon deiki bana tep, lap pena upu nomor 33 dirume.} banmupka bena popsu.

15 Popsudi nun gapung co mungna puto di walipra yuk tara dubeseua tep, tamupra men benmanto kupmupu. Ukupmupka tep, tali yapronapu kupmupupa, mungna di dopdarop beseu. 16 Dopdarop beseupa, laut mokon dana-dana sekdongomu mutu, Kauda mutu buma, kumanya men douryanmanto tara, iriamu tara, bisirbapu taruda, metek gapung co ^{▼▼gapung co Gapung co ilange deiki deipra embarami ngeda, deiyo ake. Ada, mungna cap, laut mokon puto capdi, ila gapung co tamopserepa, mokon wekyopda, ‘Nun peda mokon di jepserur’ tenen, ‘Ila gapung co taprap, metek gapung co wektepedi, lyepdatepe,’ teneramidi kurami. Tonda, lap pena upuda, nomor 33 dirume.} tapu gerekdongopra ila gapung co gidoraminge, tapu gidona cap, tonda, agapung co dopra ila gapung co deiki derina cap, men kupmanto kupmupu dinin, amenda taru, deipmupu.

17 Uda ila gapung co talena nengdi, metek gapung co tapu talepra gipra dopropidi, ila gapung co deiki tara bali deiki deipidi gereki. Ukupyopda, laut mokon longteng-longteng pena di, ‘Nun gapung co olokserur’ tenen, ila tapu di dopropidi, ila gapung co koupdongopi. Uda Sirtis mutu, mokon sekdongomu mutu damai, mokon pum gel wenenga gomyai, ‘Mangnar benup’ tenen, kware kupupa, ‘Kumanya puto di ^{▼▼Kumanya puto di embana tep, ila opkal erepra deiamya lap pena upuda, nomor 33 dirume.} benkamep’ tenen, ila opkal perekrap, gupanya diprap, ereprap deiami opkalda, dopra kwerepi. Dakra dopropidi, tali yaproipa, mungna puto di nun gapung co tali walipra yuk tara dubeseu.

18 Pio dubanmaseuanen, mokon deiki dinin, mungna ila puto di gapung co tamurtonmaudi, keteng komuni pe, lukunda peda, pio ila di ponmaseuanen, bereku pangeda, ila di ponmaseua tep, agapung co talen nengdi, ‘Kanam adipu mokon deiki benkamep’ tenen, men di kipi bungada, dopra mokon pumbon dokotenmai. 19 Dokotenmaipa, pio banmapkanen, mapmapka berekupa, weneri tumi deiki di sun aneng dipu, agapung co tapu cap, opkal gupanya deiami co cap, aopkal cap, yuk pel don keca cap, tenpu-tenpu sun buru di dopra, mokon pumbon dokotepi. Ange peda, ‘Mokon jepserura tep, nun gapung co kanam kuptupa, mokon deiki betepe do?’ tenen, kupi.

20 Dokotepi pangeda, dua cap, mo cap ila weik kwamupa, kunungnapu kuramnga tep, keteng dirine pio dina gum cap, kwirye ingna pio dina gum cap, kuramupudi, baramupkanen, tumi-tumi yuma weikanun baramupkanen, men di tenepmupu ngeda, ‘Men depkamepe,’ tenepmupu dinin, ataru di ‘Konum depkamep adano,’ tenepmupudi, kware weik kupseu.

21 Tumi-tumi yuma weikanun agapung co bungami neng jen pio jena gum di, jen si tepnapu kupi pangeda, sun kan-kan di Paulus tekrapudi, aupu pepu.

Ne men di pemsisi upu gekeptumdi, Kerit mutu tapra men bisiptepe teptoda, akeca yuma dakmaser keca cap, sun dokoteprumpa, gum kupmaser keca cap, men kupsetue. Dinino, ne pemsi upu men gekeruma deiki di, aikin keca yuma konum kupmasere. 22 Dinino, nedi pepkusen upuda moupra gekepneso. Sun kan-kan di tenpu ngebo pe men depkamra tep, kwar dangna gum di, puto dipu kunkamrume pepsene. Agapung copuda, olokra tapkamser dinin, nun men depkamepe. 23 Uda ne nai Allah, erdi talepnupa, er si ereprap, er pel dopra kunun Allahda, er dipu er im deiki melimna ngebo, malaikat ambutumi lukunda di dokotepmaneupa, ne damai yana tekmaue.

24 Yana tekmaudi, ne tep upepneu. “Pauluso, kwar dangna gum di, tali kange doupra akumemtopu, yuk taru peda kware pio men kunkamrume. Kan tek sisi Kaisar damai bemempa, er dipu upu bokeipkamkere. Tonda, Allah pio telep ngebo kurura tep, erdi kan tep, bicau tenekerya tep, kan cap kikiman barumu nengda, sun nong yuma men depkamenge.” Malaikatdi upeipneu. Paulusdi pepu.

25 Upepu dingeda, aupu ton pepu. “Allahdi upeipneua tep, nedi Allah tep pio tek sisi tenenune. Er peipmaneua utopu kupkamsere. Atep, sun aneng yuma kwar dangna gum di, puto dipu kunkamrume. 26 Dinino, tenpu keca puda, tek sisi kupkamsere. Ada mokon dana-dana sekdongomre mutu buma kamyai gapung co mangnarbenkamepe,” Paulusdi agapung co bungami neng tep pepu.

Sun gapung co olokra tapu upu

27 Pio baramupkanen, udeiki di dana tara yuma, 14 lukunda konum mapmupu dinin, mungna puto di Laut Adria deiki tup gwekra donmaseupane, lukunda neitamai sisa di, agapung co talen neng sun kange neitamai dipu, ‘E tuai tara meneng damai yakanmape,’ tenepi. 28 Utenepidi, ‘Acada mokon kaurye weik kupu do, gum do?’ tenen, mokon kaurye tep kunumteren tapu di, ^{▼▼Mokon kaurye tep kunumteren tapu lap pena upuda, nomor 33 dirume.} ‘Mokon pumbon kaurye weik do, yambul do?’ tenen, atapu mokon pumbon dokotepra kunupterepipa, mokon dalai di 40 meter kupu. Metekanun ton bapkanen, kange di kunupterepipa, (mokon pumbon mutu buma belemngai tep) mokon dalai di 30 meterpu kupu.

29 Ukupupa, me puto ila di longteng-longteng peredi, ‘Tu sirik tara gel si nun gapung co dopra karerbeseredi, olokra popsurur’ tenen, gapung co der tara di, gapung co tapu di ikin keca, er sida jangkar, gerekdongoprap mokon pumbon dokotepi. Ada, ‘Gapung co dimpepredi acapu kunkamre’ tenen, ikin keca, mokon pumbon dokoterami kecada, gerekdongoprapidi, dumbari di mokon pumbon dokotepi. Dokotepidi, ‘Menmena berektu’ tenen, Allah moronapu kunmai.

30 Uda ila gapung co talen nengdi, ‘Aneng cap, agapung co cap tapra, nun yuk benkamepe,’ tenepi dinin, tapu der tara gerekra dokotepmangtopu, giso tara peda, ‘Ikin keca gerekdongopra tapu dokotepkamenga tep kunmange, tenepkamsenunga’ tenen, metek gapung coda, ila gapung co deiki deiamya tapu gerekrap nemari dokotepidi, tapnenep banmai. Ukunmaiyanen, laut mokon deiki derirbei. Ada, ‘Nun pedipapu ila gapung co tapmepedi, lyepdankamepe. Sun yuk nengda, dakwapye,’ tenen, kupi. 31 Derirbei pangeda, Paulusdi tali jen talen neng cap, sun deiyo ngebo cap tep, aupu pepu. “Abenkunge nengda, ila gapung co pumbon tupa men kupmengopda, nun yuma tu tara telep kupra men betepe. Atep, nun yuma mokon jepkasere. Atep aneng upu sekrume,” pepu.

32 Upepka tep, ajen talen nengdi metek gapung co gerekdongopmai tapu, ya di sekwetepipa, mokon wetepupa, ila gapung co talena neng yumada, ila gapung co men tapra bei. Tupa kunmai. 33 Uda berekmaua tep, tulep bisi yapmau taru di, Paulusdi anesala yuma tep aupu pepu. “Denge weik u deiki dana tara maramupu taru yumada, mek-mek kange doupra dinapu kurumudi, jen jena gum di si teprapu kurume. Jen keca meteka pe men jerume. 34 Ukutaruda, sun jen keca dopra jeprume pepsene. Jen jeptuma deiki dipu, gam kuptume,” pepu. Tonda, aneng kan-kan di, ‘Tenpu ngebo pe, men depkamenge’ tenen, Paulusdi adomon upu pepu. “Sun kan-kan di tenpu ngebo pe, er giso potong tenpu peda, men lyeksakamre,” pepu.

35 Paulusdi aupu konum pepkopda, jen keca roti dopra doupudi, sun gekenmaiyaipu “Ne nai Allah, telepe,” pepra, Allah moropu. Allah moropudi, aroti kwaneng toprap jenmau. 36 Paulus ukupka deiki di, sun dipru kwa dipka tep, sun yuma kange deiprapidi, sun peda jen jenmai. 37 Agapung co wekamupu nengda, denge weik 276 neng bukamupudi yakaramupu.

38 Anengda, sun putaramutopu jepipa, konum boupu pangeda, ‘Gapung co kanam kuprepa, mokon deiki erepropkamre’ tenen, jagung utopu dinin, roti daramnga deiyo keca, er sida gandum, ^{▼▼Gandum perami ngeda, ada yambulanun jagung utopu dinin, manmaneng utopu keca deiki tara du mourure. Adu keca dakra, pauprapmengedi, me cap tapakmengopda, danunge. Dapmengedi jenung keca sida, roti peramenge. Akecada, weik kwapka cadi, ikin kupka tep, ‘Mokon dokotepmepyopda, nun gapung co yambul kanam kupsetue’ tenen, akeca dopra mokon pumbon dokotepi.} mokon pumbon dokotenmai. 39 Dokotenmaipa, konum bereku pangeda, tu tara epi dinin, men di men diramya tep, ‘Nunda amutu yanmapa,’ men tenepi. Dinino, mokon ku tenpu kurun gel wenenga kupmaupa, epi. Epidi, ‘E acapu nun gapung co lukra derirbenterepkamepe,’ tenepi.

40 Utenepidi, gapung co ikin luluna tep gerekdongopra dokotemi tapu yumada, sekdongopidi, mokon pumbonpu yaproi. Atarupu, gapung co urasin tamuna tep, der tara domi co lase ^{▼▼co lase – Gapung co der tara domi co lase lap pena upuda, nomor 33 dirume.} tapuda loptapi. Loptapi dingeda, ‘Mokon kuai benkup’ tenen, gapung co giso tara opkal co gupanya diprap erepra deipidi ^{▼▼Kumanya puto di embana tep, ila opkal erepra deriraminge lap pena upuda, nomor 33 dirume.} mokon kuai benterepi. 41 Benterepi dinino, mokon pumbon gel wenenga gomngai dukpepudi, acapu gapung co lukra derirbeu. Derirbeuopda, gapung co giso tara dimpepudi, men lokmanto kupupa, gapung co der tarada, me puto ila di longteng-longteng penmaua deiki di, gapung co der tara bongonmauanen, pio bongopra depu.

42 Ukupupa, sun tali jen talen nengdi, ‘Nun ateng kouamupudi wenemna ati dongoramepu nesala me gekrap bendopsenung’ tenen, ‘Poptapkamepe,’ tenepi. 43 Utenepi dipunen, sun deiyo ngebodi, ‘Paulus lyepkamne’ tenen, putapka tep, sun tali jen neng tenepidi, sisingami keca upu sekrou. Upu sekudi, mokon deiki me gengna konum kael keami neng tep, aupu pepu. “Sunda, gapung co deiki di me deiki sakraprumudi, tuai tara me gekrap berume,” pepu. 44 Mokon deiki me gengna walwal neng, yuk neng yuma tep, aupu pepu. “Sunda, tali co lase di do, uda, gapung co bongopra depmara metek co di bukrumudi, tuai tara berume,” pepu. Upepseupa, gekepmupka deiki di, er pepseutopu kupmupkopda, nun yuma telep kuprappu tuai tara wengbepke.