Act 28 | XteSC | STEP | Uda nun yuma tuai tara telep kupra konum bepkopda, amokon dana-dana sekdongomu mutu tep, amutu kurami nengdi, “Nun mutu sida, Malta,” pepipa, gekepmupudi kael kepmupke.

Acts 28

Mokon sekdongomu mutu, Malta mutu kurami upu

1 Uda nun yuma tuai tara telep kupra konum bepkopda, amokon dana-dana sekdongomu mutu tep, amutu kurami nengdi, “Nun mutu sida, Malta,” pepipa, gekepmupudi kael kepmupke. 2 Amokon dana-dana sekdongomu mutu kurami nengdi, nun tep bicau kupupa, gispal dopseidi, pio telep-telep kupra melipsei. Tonda, mo pio cemaudi, bul weik kupmaua tep, anengdi gispal konum dopseopda, ‘Sun uku peikameng’ tenen, uku seksei. 3 Uku sekseipa, Paulusdi, tali kouluamudi sekamu co koulkoula buprapudi, uku jenmauai bena derirbaupa, uku bupu di pumya bal aco kan-kan dakupmaua di gupra baudi, Paulus buru si bena topdongopra bomau.

4 Ukunmaupa, amokon sekdongomu mutu kurami nengdi, abal si Paulus buru topdongopra bomupa epidi, sun yuk upu talepdai. “Gapum co bongopupa, mokon men jepmaua tep, tuai tara telep kupra yanmau dinino, nun isokdi er sida Kwangdakra Pona Deiyo Ngebo, ‘Angebo men gam kunkamre’ tenen, erdi teneputopu, abaldi konum topmamemere. Ada, angeboda nimi pon ngebo kurya dia,” pepi.

5 Upepi dinin, Paulus buru gege pepupa, abal uku neitamai sakupa, Paulusda, kip tupa kunmau. 6 Telep kunmau panenda, amutu kurami nengdi, ‘Er nongda ila nepkamre gum, menmena depkamre do?’ tenepidi, dinapu kunmai. Yambul weikanun ton dinapu kunmaipane, Paulus kippu kunmaupa, sun Paulus tep, tenenmai ngeda, tapra kange yuk doupidi, “Angeboda, Kain Jen Ngebo, er mi kurur do, im deiki di ila puto ngebo yanmaser do?” pepi.

7 Uda, nun kunmapka damaida, amutu ila nimi deiyo ngebo, er sida Puplius, er wa peiamya cap, er ila ati cap akwamu. Atep, Pupliusdi, “Nati kikiman kunkamepe,” peprapseudi, jen kareprap, upu pepra, er ati kikiman maprap, kuramupka deiki di, erdi telep-telep kupra meliamseu. 8 Puplius, er naida, nong bupu cap, dei yatunge pu cap jeramupa, asonaipu ikin kange doupra doramu. Doramupa, Paulus er pu donmauai, beudi, Allah konum moropkopda, adoramu ngebo, Paulus er buru angebo er giso deiki taleprapudi, kwetepupa, pu jeramu keca gum kupupa telep kupu.

9 Ange konum kupkopda, amokon dana-dana sekdongomu mutu, pu jeramupa kurami neng yumada, tumi-tumi yuma yakaramipa, pu kwetediramu. 10 Uda amutu kurami nengdi, nun tep, sun kurami keca yuma deiki di, gispal doramseipa, kuramupkanen, yuk mutu mokon deiki benkupka tep, ketenepmupu taruda, nun putaramseu keca yuma makupra karepsei.

Malta mutu di Roma mutu bei upu

11 Malta mutupu kuramupkanen, ware weneri konum kupkopda, bul ware yuma amutupu kunkamya tep, ila gapung co yuk nengdi deiamyada, nun cap, sun cap wekmupudi, ‘Benkup’ tenen, keteneprap mokon deiki bepu. Agapung coda, Aleksandia mutu di taleami gapung co men di Malta mutu yanamye. Agapung co neitamai deiami co, ila coda, aco gum-gum tarada, butene isok, sun urasin utopu keteneprapidi, petumna kael nengdi petupra deiami. Abutene isok sida, Kastor cap, Poluk cap perami. ^{▼▼isok si Kastor cap, Poluk cap – Sun gapung co taleami nengdi, ‘Abutene isokdi nun melimserenge,’ teneramidi, sun sipu ereramidi, sun urasin utopu keca petuprapidi, sun gapung co deiki deipi.} 12 Uda Malta mutu di banmapkanen, gapung co derirbaramyai, mutu sida Sirakusa mutu bena deipipa, nun tuai busukmupudi, amutupu weneri tumi kunmapu.

13 Ataru konum kupkopda, Sirakusa mutu di gapung co kange di wekrapmupudi, mokon deiki banmapkanen, Eregium mutu bepu. Bepudi mapmapka bereku pangeda, utara di kumanya puto adine welepupa, kange di mokon deiki banmapkanen, mokon deikipu mapmapka, bereku pangeda, kange di banmapkanen, Putioli mutu bepu. Bepudi gapung co adeipi pangeda, tuai busukmupu. 14 Tuai busukmupkopda, epra embapkanen, Yesus teka tenemi neng akuramya mankau di bandenkapmupudi, epdapudi, sundi nun tep pepsei. “Ngantan tumi ton cap kikiman kunkamepe,” pepseipa, apu kuramupu. Ukuramupkanen, konum kupkopda, nunda tuai bisi mapbaramupkanen, Roma mutu bepu.

15 Dinino, bisi tup mapbaramupu taruda, yuk nengdi pepipa, nun teka tenemuputopu, Roma mutu teka tenemi nengda, Roma mutu idine mutu si Porum Apius diryanamsei. Tonda, tenpu mutu ton kunumna ati weneri kwamnga tep, Tiga Taberne perami mutu diryanamsei. Diryanamseipa, Paulusdi aneng konum epkopda, Allah tep, “Telepe,” pepupa er dipru kwa dipupa, er kange deipu.

Paulusdi Roma mutu bena peterepu upu

16 Roma mutu konum bepu pangeda, Roma mutu nimi deiyo nengdi pepipa, Paulus er ati yuk kuramu dinin, ‘Paulus berur’ tenen, tenpu jen talen ngebo dokotepipa, sun kikiman kuramrei. 17 Roma mutu bepudi, weneri tumi konum beipye peikrap, mapmupkopda, Paulusdi Yahudi yala neng, sun du yapu tep, “Bulupso,” pepu. Upepupa, konum bulupi pangeda, Paulusdi aneng tep pepu.

18 Ne kayapu. Neda sun yala ngebo kunune. Uda, nun Yahudi yala nesala cap, nun apu yapu kuramidi peteremamseipa, nun tupa kupe keca cap tep, ne kuramsi keca deiki di men gaktapsidi, men yanipsi. Men yanipsi dinino, Yerusalem mutu kuramsipa, sundi talepra ateng kouprapneidi, Roma mutu ila deiyo neng tep, tali karepnei. Ada, ‘Anengdi Paulus poptapkameng’ tenen, karepneipa, Roma nengdi ne pio lepterepneidi, sun nimi poramya deiyo keca men kupsa tep, ‘Angebo loptaptepe’ tenen, putapu.

19 ‘Angebo loptapkamepe’ tenepnei dinin, Yahudi yala nengdi, “Ada gume!” pepra sekdongopneipa, ‘Adipu yuk bisi men betene,’ tenepsa tep, “Kaisar er dipu ne upu lepsikra bokeipnetue,” pepra moropsi. Amoropsi dinin, ‘Yahudi yala neng mali kupi kecada, ake, pepkamne’ tenen, men moropsi. 20 Uda ne lap penmasen upu yuma konum kupka tep, ‘Nun bulupmepyopda, upu talepkamep’ tenen, “Sun bulupso,” pepra moropsi. Nun Yahudi yala neng yumadi, “Allahdi akeca tek sisi karepserepa yankamsere,” pepra teka tenepmupudi, dinapu kunup keca tep, ateng koupneipa kunmane. Paulusdi aYahudi yala neng tep pepu.

21 Upepupa, sundi tamupra pepi.

“Gume, Yudea mutu nengdi, ‘Paulus mali kupke,’ pepra surat sekrap, nun damai men dokotepsei atep, men epmupke. Tonda, nun Yahudi yala neng Yudea mutu di kan tep, mali upu pepra men yana peipseiya tep, men gekepmupke. 22 Dinino, sun Yahudi yala neng dinin, sun Yesus tep teka teneprum nesala tep nengeda, yuk nesala ban-ban yumadi sun tep, ‘Anengda, sun urasin yuk keproidi, yuk keca tep teka tenenunge,’ tenengedi, pesenunga cadi, mali upu pepra lulupra derisenunge. Luluprap derisenunga tep, kan tupa-tupa tenemem keca cap, peteremrum keca cap, lap pepsemempa, nun gekepkamapa tep, nun putapmasere,” pepi.

23 Upepipa, sun cap Paulus capdi, “Uda atumi deiki di bulupmepyopda, upu talepkamepe,” pepi. Upepitopu, atumi konum kupkopda, dana-dana tara yumadi, Paulus kunmau ati damai nimi weika di bulupra yanmai. Yanmaipa, ipna taru di dipra, keteng komuni neitamai cap, adinen, tupa peterenmaupanen ipropu. Paulusdi peterenmau upuda ake. Tenpu ngeda, Allahdi nesala lyepredi, sun dipru talenkamre upu peterenmau. Tonda, Musadi sekeiamu upu neitamai cap, tonda Allah er upu lap perami neng, nabi-nabi nengdi sekeiami upu neitamai cap, upu dopropudi, ‘Sun kael kepso. Yesusda, tek sisi nimi Lyemna Deiyo Ngebo kurure,’ pepra peterepu. Ada, ‘Awekmai neng teka tenenkameng’ tenen, peterepu.

24 Paulus er aupu lap penmaua deiki di, ton nengda, teka tenepi dinin, ton nengda, ‘Nun men gekepkamepe. Teka men tenipkupe,’ tenepya tep, teka men tenepi. 25 Sun amsepu men tenepidi, upu weik pedanmaiyanen, benkui taruda, Paulusdi er penmau upu siryada aupu pepu.

Allah er Lek Sambaladi nun apu yapu tep, tek sisi aupu peipu. Ada, Allahdi Yesaya tep peipupa, nabi Yesayadi seku upu ake.
26 Kanda, Yahudi yala neng damai bememdi aupu penkamrume. “Sunda tali amul deiki pio gekenkamrum dinin, tek sisi, ‘Deiyo aca’ tenen, moupra men gekenkamrume. Tonda, sun asuru di bol deikingepu pio epkamrum dinin, ‘Deiyo aca’ tenen, tek sisi men kael kepkamrume.”
27 Deiyoda ake. Anengda, sun dipru gat konum kupka tep, ‘Aupu gekepnup’ tenen, amul kinidongoramengtopu kununge. ‘Nun dina song’ tenen, asuru puramengtopu kununge. Uda sun asuru men puptenga teptoda, asuru di telep kupra eptenge.
Sun amul men kiniptenge teptoda, amul di telep kupra gekeptenge. Ukuptengyopda, sun kange tenenada, telep kupra kael keptenge. Ukupmengedi, ne tara keprongopda, nedi sun tep kwetepnedi lyepkamne. ^{▼▼Yesayadi aupu pepu ngeda, deiyo butene kupmare. Allahdi, ‘Pu jeramre nesala, kwetenkamne’ tenen, pepupa, Yesayadi seku. Deiyo butene ngeda, ada, ‘Nesala ban-ban yuma, sun mali kunge keca gum kupra deipnedi lyepkamne’ tenen, Allahdi peipupa, Yesayadi aupu sekamu. Paulus, er tenepu ngeda, ake. ‘Yahudi yala nesaladi Yesus er upu pio yanirtamamya tep, Allah er upu peteremna neng, Yahudi yala gum nesala kuramiai dokotepnepa, sundi aneng tep peterepmengepa, Yahudi yala gum nesala ton, Yesus teka tenenkamenge’ tenen, Paulusdi aupu pepu.} Allahdi peipupa, Yesayadi seku. (Yesaya 6:9-10)

28 Uda, upeipseua tep, ukutaruda, ‘Sun tek sisi kael kepkurum’ tenen, aupu pepsene. Ada, ‘Allahdi nesala lyepkamre’ tenen, kai dokotepseu upu, Yahudi yala gum nesala tep, konum dokotepmare. Anengda, tek sisi gekepkamenge. Allahdi aneng lyepkamre ja!

Paulusdi awekmai neng tep aupu yuma pepu.

29 Paulusdi aupu konum pepudi sengpepkopda, sun Yahudi yala nesala gekepidi, kange yuk-yuk tenenmaiya tep, yu weik kupupa, upu ila di pedanmaidi, yukai bendopi. 30 Paulusda, er ati sisa gum dinin, yuk neng ati dinin, er co bo deiki di kunuprap, keteng tamun butene deiki di akati kuramupane, er uruna tep yakarami neng yuma tep, kange deiprap gispal doramu. 31 Akuramu taru yuma, yuk nengdi, ‘Yapronkamre’ tenen, men sengdongoramipa, Paulusdi kwar dangna gum, puto di, nun nai bo Yesus Kristus er upu cap, uda, Allahdi nesala yuma tep, lyepseredi, pio taleprap melimserur upu cap, er damai yakarami neng tep, peteremnapu kuramu.

Telepe, akonuma.

Ne Lukasdi acapu deipne.