Act 3 | XteSC | STEP | Uda, amenda taru, Peterus cap, Yohanes cap, sintara keteng jam tigato kupupa, ada Yahudi yala neng bulupra, sun Allah mororami keteng kupka tep, sun abutene nengda, Yahudi yala neng, sun Allah tep karerbaramidi, er si eremna ati banmarei.

Acts 3

Peterusdi yo kwaneamu ngebo tep, kwetepu upu

1 Uda, amenda taru, Peterus cap, Yohanes cap, sintara keteng jam tigato kupupa, ada Yahudi yala neng bulupra, sun Allah mororami keteng kupka tep, sun abutene nengda, Yahudi yala neng, sun Allah tep karerbaramidi, er si eremna ati banmarei. 2 Uda, tenpu ngebo er deiami taru di yuma, yo kwaneamu ngebo kuramupa, sun yuk nengdi er baya deipra, Allah tep karerbarami ati buplan damai tumi-tumi yuma derirbarami. Abuplan sida, Urasin Telep Buplan perami. Allah er si eremna ati damai derirbaramipa, angebodi, ‘Sunda co bo tali karepkamneng’ tenen, sun akati wengbarami neng tep, pio moronapu kuramu.

Atumi-atumi yuma ukuramya tep, sun baya deipra baipane, Peterus cap, Yohanes cap, banmareiya damai kirikra banmaipa, angebodi Peterus cap, Yohanes cap epu.

3 Peterus cap, Yohanes cap, akati wekronkurei taruda, er epu dingeda, ‘Co bo karepkunereng’ tenen, moropu. 4 Moropu pangeda, Peterus cap, Yohanes cap menmena dipterepreidi, Peterusdi aupu pepu. “Nun dipterepseo!” pepu. 5 Upepka tep, angebodi, ‘Co bo karepkunerenga tepa’ tenen, abutene neng dinmau. 6 Dinmaupa, Peterusdi aupu pepu. “Gel uang utopu dinin, kunumna pio weik keca perak cap, emas ^{▼▼Emasda, gat keca dinin, kunumna weik keca kurure. Emas keca kael kemna tep, lap pena upu nomor 4 dirume.} cap, pio men kwapmaner dinin, akwapmaner keca puda, karepkukene. Nasaret deiami ngebo Yesus Kristus, er si puto deiki di tekra beo pepkene,” pepu.

7 Upepudi, angebo er dumsisi buru taleprap, tekra derinmau taruda, adipapu angebo er yane cap, er yan asuru cap, puto kupu. 8 Puto kupupa, angebo er pedipapu ereprap im kurukudi, er yane yanipra tali-tali embanapu kunmau. Embanapu kunmaudi, angebo cap, sun cap, Yahudi yala neng, sun Allah tep karerbaramidi, er si eremna ati damai beipa, erda tali-tali embana cap, kange deiprapudi merena cap kunmaudi, Allah si eremna tep, “Allahda er pio telepe,” pepra, Allah si eremnapu kunmau. 9 Ukunmaupane, abulupra wekmai neng yumadi, er embana cap, Allah si eremna cap kunmau keca epidi. 10 Epidi, dinmai dinin, nimi tenpu-tenpudi, ‘Angeboda, ada Urasin Telep Buplan damai bungamudi, co bo mororamu ngeboda, adano,’ tenenmaiyanen, kael kepi. Kael kepidi, Peterusdi angebo kwetepupa, angebo kupu keca epya tep, ‘Uo, angeda mambul weike’ tenen, lukdaidi, buma teling pepupa, tenimtonapu kunmai.

Peterusdi adinmai neng tep, pepu upu

11 Uda, aco bo mororamu ngebo kange deipudi, Peterus cap, Yohanes cap, sun nong talepra gispal donmau taruda, adinmai neng yuma, ‘Uo’ tenen, lukdaidi akunmaiyai sida, Salomo Atolong (Kolonade) ^{▼▼Salomo Kolonade perami ngeda, ada pumun taru Raja Salomodi akeca doamu. Yerusalem mutu neitamaida, Allah er si eremna cap, karena cap tep ati damai domu. Kolonade perami ngeda, er urasinda yambulanun, ati atolong utopu dinin, pio lyom weik cap, tonda pio telepnge doamu. Ada nimi bukmengedi upu sisingnai tep doamu. Tonda Salomo Kolonade lap pena upuda, nomor 5 dirume.} diryakanmaidi sepdaro yakanmai. 12 Diryakanmaipa, Peterus epu dingeda, aneng tep pepu.

Ne kayapu, sun Israel nesalao. Warya tep ange epmarumdi, lungdanmarum do? Nun puto cap, nun dumsisi kuna cap deiki di angebo men kwetepmaneme. Sundi, ‘Allah er dumsisipu kuretopu, sun pe kurenga deiki di, angebo kweteipmarengpa embanmare,’ tenenmaserum do? Atep, ‘Uo’ tenen, nun dinmaserumada, warya tep do?

13 Nun butene dipapu angebo men kwetepmaneme. Ange gum dinin, Abraham cap, Isak cap, Yakub cap, sun moupra taleami Allahda, ada nun apu yapu ^{▼▼Yahudi yala neng, sun apu yapu tep, lap pena upu nomor 20 dirume.} yuma taleami Allahda, er upupu gekepra, er pelpu melipra kunupsek perur ngebo Yesus konum erepra deipu. Sunda, ‘Nun deiyo nengdi Yesus popkameng’ tenen, Yesus dopra aneng tep konum tali kareprume. Konum kareprum pangeda, Pilatusda, ‘Yesus tali loptapkamne’ tenen, konum tenipu dinin sundi, ‘Gume poipseo,’ teneprumdi, Yesus dopra Pilatus damai duberumdi taprume.

14 Yesusda, Dumsisi Kurur Ngebodi, ^{▼▼Dumsisi Kurur Ngebo perami ngeda, Yesusda, pio teleppu kuramudi, mali keca tenpunge peda men kuramnga tep, aupu ‘Dumsisi Kurur Ngebo’ pepra, Yesus tep perami. Tonda, aupu perami ngeda, ‘Allahdi dokoteprepa, nimi lyepkamser ngebo, pio dumsisipu kunkamre,’ teneramidi perami. Tonda, lap pena upu nomor 6 cap, Kisah Para Rasul 22:14 cap dirume.} Allah er upu pio telep kuprappu gekepra doramudi, mali kuna pio gum di, Allah er pelpu doramu dinin, sundi er tep taprumdi, “Nimi pon ngeboda, Barsabas ^{▼▼Barsabasda, Yesus sengdin co deiki popkoi taruda, er tep men loptapi dinin, Yahudi yala nengdi Pontus Pilatus tep, moropipa, nimi popu ngebo Barsabas loptapu dinin, Yesus tep nengeda, “Poipso,” peptapupa, popi. Tonda Lukas 23:18 dirume.} lopra karepseo,” pepra moroprume. 15 Sundi upu peiprumpa, gam kuna deiyo keca, pio telep keca kareserura deiyo ngebo, sun mali nengdi dopra popi. Sun popi dipunen, Allahdi angebo Yesus konum tamupra gam bukra deipu. Nunda, ayuma diramupu neng kunmape.

16 Uda, men di yane kwaneamu ngebo kael keamrumdi, ukupu epmarum ngeboda, Yesus er si teka tenepmaua deiki di kwetepmarpa, ukutaru puto kupmare. Ada, Yesus er si puto teka tenena deiki cap, tonda Yesusdi teka tenena deiyo keca kareserya deiki capdi, angebo er nong yuma kweteipmarpa, sun yuma epmarume. 17 Ne kayapu, ne kaele. Sun cap, sun du yapu cap, ‘Deiyo aca’ tenen, kael kemna gum di, sun yuma walwal di mali kuprume. 18 Walwal di kuprum dinino, Allahdi peipupa amenda kupkamu keca lap perami neng, nabi neng yumadi, ‘Allah er Mesias ngebo dokotepkamrada, kange mun keca weik kunkamre,’ pepra lap perami. Sundi Yesus tep mali kupmaruma deiki di, Allah aupu pediramutopu konum kupseu.

19 Ange tep nengeda, sun mali kurumu keca cap, sun dipru mali tenerumu keca cap taprumudi, Allah er tara keproprumupa, erdi sun mali kurumu keca yuma gum kupra deipkamsere. Ukupsere dingeda, Allahdi tali kange doun taru karepserepa, sun dipru dimpepra kurumupane, Allah puto sun dipruai karepkamsere. 20 Sun mali kurum keca yuma taprumdi, Allah er tara ka di ton tamupra kepropmumyopda, Allah weika di melimkamsere. Ada, tuai mutu ban-ban yuma neitamai di, nimi weik lyepredi, talenkamre ngebo, ada Mesias ngebo, Allahdi sun lyemna tep konum wepra deipseu ngeboda, doproipkamsere. Ada, Yesus er teppu pepsene.

21 Menop taru di, Allah er kapul kupkamu keca lap perami neng, er upupu gekepra, er pelpu dopra, pio telep-telep kupra dorami nengda, sun nabi nengdi perami upu deiki di, Allahdi, ‘Akeca-keca pumun nge yuma tep, kange di punuprapnedi, ukupungepu ketenepra deipkamne,’ pediramu. Apediramunge kapul men kwamre taruda, Yesus im deikipu pio kuramyanen, apediramunge ketekepra derina taru damai konum kupyopda, Allahdi Yesus ka tamupra dokotepkamre. 22 Ange utopu, Musa peda upepke.
‘Neda Allah er upu lap pena ngebo kuramsitopu, Allah er upu lap penkamser ngebo, sun yala neng kan-kan di, Allahdi sun tep erepra deipkamsere. Ware upu do yuma, erdi sun tep penkamser upu yumada, moupra gekenkamrume. 23 Ware ngebo do, ware ner do yuma, angebodi pere upu men gekepra dopropmengopda, Allah er nyapu sun kan-kan di er upu men gekenung nesala dopra ponkamenge.’ (Ulangan 18:15, 18, 19)

24 Tek sisi Allah er upu lap peramu ngebo, nabi Samuel adinen, Allah er amenda kupkamu keca lap perami nengdi, peipdanen yakaramyanen lap perami neng, nabi neng yumadi, Allah erdi ketenepra deiamu ngebo, Mesias, ^{▼▼Mesias perami ngeda, ada nimi Lyemna Deiyo Ngebo tep perami. Ada Yesus tepa, yuk ngebo gume. Tonda, lap pena upu nomor 3 dirume.} ada Yesus er kunkamu taru tep, ‘Ukupkamre, ukupkamre,’ pepra lap pediramsei. 25 Tonda, Allahdi nun apu yapu cap, er upu lap perami nabi neng cap tep, er nyapu keipudi, “Ukupkamsene,” pediramu upuda, nun apu yapu cap, tonda sun ukutaru kurumu neng tep pediramseu. Allahdi er pediramu keca ukutaru konum pel donmarpa dinmarume. Allahdi Abraham tep ^{▼▼Allahdi Abraham tep pediramu upuda, Kejadian 22:18, tonda Kejadian 26:4 akwapmare. Allahdi Abraham aupu pediramu ngeda, weik kwamu dinin, tenpu ngeda ake. Ada, ‘Abrahamdi deiprepa dadeipdanen baramenganen, nesala weik kupkamenge. Sirya taruda, Abraham er yala nengdi Yesus deipkamenge’ tenen, pepra pediramu. ‘Nesala ban-ban yuma telep keca karepkamne,’ pepu ngeda, ‘Yesus yapi deiki di nesala ban-ban yuma lyepkamre’ tenen, peiamu.} pepu ngeda nedi pepkusene, pepu.
‘Kandi deipmempa, dadeipdanen baramenganen, deipmenge nyapu deiki di, nesala ban-ban yuma tep, telep keca yuma ketenepra deipsada karepkamsene.’ (Kejadian 22:18; 26:4)

Peterusdi Musa sekeiamu upu dopra pepu.

26 Peterus aupu pepudi aupu ton cap pepu. “Allahdi er Melimna Ngebo ^{▼▼Melimna Ngebo pepka domona upu deiyoda, ‘Yesusdi, nimi Lyemna Deiyo Ngebo kunkamre’ tenen, pepu. Tonda, lap pena upu nomor 7 dirume.} konum ketenepra deipkopda, ‘Yahudi yala neng ila di melipkamre’ tenen, sun damai menmena dokotepseu. Ada, ‘Sun yuk-yuk di sun mali keca tapra, amnyo karikra bengedi, Yesus teka tenenkameng’ tenen, dokotepseu. Tonda, ‘Yesusdi anesala dopra, Allah er tara tamupra derinkamser’ tenen, dokotepseu.” Peterusdi pepu.