Act 5 | XteSC | STEP | Yusupda, er wa tu kunuprapudi, Yesus wepra deipu neng karepu dinino, tenpu ngebo er si Ananias cap, er ner Sapira capdi sun yuk kuprei. Ada, sun peda, sun taleamrei tu ton yuk nengdi kunupi.

Acts 5

Ananias cap, er ner Sapira cap, sundi mok upu pepra, kuprei keca tep upu

1 Yusupda, er wa tu kunuprapudi, Yesus wepra deipu neng karepu dinino, tenpu ngebo er si Ananias cap, er ner Sapira capdi sun yuk kuprei. Ada, sun peda, sun taleamrei tu ton yuk nengdi kunupi. 2 Kunupipa, Ananiasdi atu tep karepmemei co bo dopropudi, dana tara bokra dopropu ngeda, Yesus erdi wepra deiamu neng tep, ‘Anengdi bokra putaramne nesala karepkameng’ tenen, karepu. Dana tara co boda inipu. Ananias akupu keca yuma, er nerdi kael kepmau.

3 Ananiasdi bokra keteneipu co bo konum karepu pangeda, Peterusdi Ananias tep pepu. “Ananiaso, Kain Jen Ngebo, ^{▼▼Kain Jen Ngebo pepu ngeda, ada isok-isok sun ila deiyo ngebo tep pepu. Tonda, lap pena upu nomor 13 dirume.} kan dipruai ila di wekra talepkeua deiki di, kan tu kunupra dopropmum co boda, dana tara bokra, ‘Ne mawa’ tenen, inipmumdi, Allah er Lek Sambala tep, mok upu pepmaremada, ware keca deiyo tep do? 4 Kan tu kapul men kunupmum taruda, kanyepu men taleamum do? Tonda, konum kunupmumdi dopropmum co boda, kan deiyo ngebo cadi, ‘Ange bokra ukupkamne, ange bokra ukupkamne,’ men tenepmum do? Ange yumada, kan pe kecapu cadi, kandi tenepmumtopu kupmatume. Dinino, ukutaruda mok pepmasereme. Amali kupmarem ngeda, warya deiki tenipmumdi akupmarem do? Kandi tali tuai nesala tep telel upu pepmarem guma. Allah tep telel upu pepmarem adano!” Peterusdi Ananias tep wenepudi pepu.

5 Upepupa, Ananias aupu gekepu dingeda, adipapu loktadepu. Loktadepka tep, akupu keca yuk neng kael kepidi lap pepipa, aupu gekenmai nesala yuma ila kware kupudi, buma teling pepu. 6 Ananias konum depupa, kaber nengdi yana er nong dopra lyom opkal di geteprapidi, geprap bura dubeidi peipi. 7 Gepra dubeidi peipmaidi, dakunmaipane, weneri ketengto, ada jam tiga atonun, konum kupkopda, Ananias er ner akupu keca men kael kepmauadi, mangkau pu Peterus kunmauai yana wekrou.

8 Wekroupa, Peterusdi aner Sapira tep asipterepu. “Kandi lap pepneo. Kan cap, Ananias cap, sun tu kunupra dopropmarerumdi, erdi ukupra karepmaner co boda, ukuprap akonum do, gum do?” pepra asipterepu. Asipterepupa, Sapiradi, “Teka, erdi karepmaker co bo ukuprap akonuma,” pepu. 9 Upepupa, Peterusdi tamupra aner tep pepu. “Sun butene di ware kupra, ‘Ange ukupteneme’ tenen, mali kupmarerumnya deiki di, Allah er Lek Sambala tep, kunupterepmarerum do? Adi, kan nenge depmaupa konum peipmang kaber neng, buplan damai konum yanmang adio. Kan peda, sundi dopra bura dubenkukenge,” Peterusdi pepu.

10 Peterusdi aupu penmauanen, sengpepu taruda, Sapira adipapu Peterus er yan damai loktapra depu. Depu pangeda, akaber nengdi wekra epidi, er nong dopra bura dubeidi, er nenge peipmaiya damaipu bena peipi. 11 Ayuma konum kupkopda, Yesus er teka tenepi neng yuma cap, akupu keca gekenmai neng yuma cap, kware weik kupupa, mambul kange doupmaidi, buma teling penapu kuramu.

Yesus wepra deiamu nengdi, nesala weik kweterami upu

12 Yesus wepra deiamu nengdi, amutu kurami nesala kan-kan di nimi men kupmanto keca cap, tonda yuk nesala epmengedi, ‘E Allahdi tek sisi pel donmasere, tenepkameng’ tenen, mambul pel cap dorami. Tonda, Yesus er teka tenepi neng yumadi, Allah upu gekena cap, upu sisingna cap tep wengami atolong sida, Salomo Kolonade tumi-tumi yuma bulupra wengami. 13 Yuk neng yumadi, Yesus teka tenepi neng tep, ‘E aneng telep neng,’ tenerami dipunen, Ananias cap, Sapira cap depmarei atep, kware kunmaua tep, ‘Yesus teka tenena neng sun damai bepedi kikiman men kunkamepe,’ tenerami. 14 Ton nesalada utenerami dinino, ton nesalada nimi pe, nerapu pe, Yesus tep teka tenepbaramidi, menop taru Yesus teka tenepi neng cap tapakbaramipa, Yesus teka tenerami neng gungda weik kupbaramu.

15 Yesus wepra deiamu nengdi, pio mambul pel doramya tep, amutu kurami nengdi, pu jeramne nesala doprapnedi, ati dana-dana doramidi, bisi neitamai yapra deiamyai deriryakarami. Ada, ‘Peterus er bisi batudi, pu jeramre nesala kikrosetudi, er kuki nun nong deiki bepsetuopda, adipapu kweteipsetue’ tenen, pu jeramne nesala sun ason toka man keca deiki deriryakarami. 16 Tonda, Yerusalem mutu neitamai dana-dana kurami nesaladi, pu jeramne nesala cap, isok dipruai wekamnedi taleamne nesala cap, ayuma bulupra aneng damai dekaramipa, aneng yuma kwetepra derirami.

Yesus wepra deipu neng, yuk nengdi sun nong deiki ikin keca derirami upu

17 Yahudi yala neng, sun Allah karena deiyo neng, ^{▼▼Allah ati karena deiyo nengda, Allah er si eremna ati pumbon pel dorami. Sun lap pena upuda, nomor 14 dinkurume.} sun ila deiyo ngebo cap, er melimna neng ada er tara neng cap, sun gungda Saduki neng kurami. Uda, Yesusdi wepra deiamu nengdi nimi men kupmanto keca, mambul pel doramya tep, anengdi yu kupupa, sun dipru wilimdirami. 18 Ukuramidi, Yesus wepra deiamu neng talepra ateng kouprapidi, amutu wenemna ati dongopi. 19 Wenemna ati dongopi dinin, alukunda neitamai di, Allah er im deiki melimna ngebo, malaikat tenpu yaudi, awenemna ati buplan paktapudi, aneng yuma doprapudi bura tara dubeu. 20 Dubeudi aupu pepu. “Sun Yahudi yala neng Allah tep karerbarumdi, er si eremna ati ^{▼▼Allah tep er si eremna ati tonda Allah tep karena atida, tenpu atipu. Akatida, Yerusalem mutu neitamai doramipa akwamu. Akatida, deiyo ukuprap. Ada Yahudi yala neng, sun mali kurami keca kunumna tep, sun gam keca poprapnedi, Allah karena tep, akati dekaramidi, kareryakarami. Ukuramidi, akati pumbonpu Allah er si eremami. Tonda, lap pena nomor 15 dirume.} damai bena tekrumudi, sun awekmange neng tep, Allahdi ukupu gam kuna deiyo keca karepkamsera tep upu yuma peterepkamarume. Tenpu upu pe men tapkamarume,” pepu.

21 Upepupa, dakunmaiyanen, konum bereku pangeda, Yahudi yala neng, sun Allah tep karerbaramidi, er si eremami ati bura tara wiami beilya wekrapidi, akati damai bena wekmai. Wekmaidi, Allah er im deiki melimna ngebo peipmautopu, awekmai neng tep, gonga kepra peteremai. Sun peteremai taruda, Yahudi yala neng, sun Allah karena tep deiyo neng, sun ila deiyo ngebo cap, er melimna neng cap bulupra wekidi, Israel nesala sun du yapu ^{▼▼Israel nesala sun du yapu – Israel neng, sun yala 12, yala yuk-yuk kurami. Ayala-ayala yuk-yuk ngeda, sun wisi neng ila kael keamidi, upu lepsikra derina neng kurami. Tonda, upu bongdina deiyo neng kurami. Israel nesala, sun ila nimi deiyo neng cap, Allah karena deiyo neng cap wekra, “Upu talepkupe,” pepne taruda, awisi neng cap, kikiman wengami. Israel nesala sun wisi neng, tonda sun du yapu perami nengda, anengpu dinin, Yahudi yala nesala sun upu bongdina deiyo neng, Sandeheren neng ton penupe.} yuma, ada Sandeheren neng, kongpepidi, tonda, sun amutara pel dona neng tep, aupu pepi. “Yesus wepra deiamu neng wenemna ati pumbon dongopmapa dopra deso,” pepra aneng dokotepi.

22 Dokotepipa, anengdi wenemna ati pum bena dipterepidi men epya tep, ka tamupra Sandeheren neng kunmaiyai bena lap pepi. 23 “Wenemna atida, buplan dengne keca di dekdongopmaitopu kupmaua cap, uda, wenemna ati kalengna neng buplan damai tup kalekmaitopu kupmaua cap, epmape. Epmap dinino, buplan paktapra dipterepmapu dinin, tenpu ngebo pe men kunmange,” pepra lap pepi.

24 Lap pepipa, Yahudi yala neng sun Allah tep karerbarami ati kalengne neng, sun deiyo ngebo cap, Allah karena tep pel dopi neng, sun deiyo neng cap, apenmai upu gekepi dingeda, tenimtonapu kunmaidi, ‘Akonum kupmara tep amenda taru, ware keca ton kupkamsere do?’ tenenmai. 25 Tenenmaipane, yuk ngebodi sun kunmaiyai yana lap pepu. “Gekepneso, sundi wenemna ati dongopmarum nengda, nun Allah tep karenup ati damai tekra, awekmang neng tep peteremange,” pepu. 26 Upepu pangeda, Allah er si eremna ati kalengna neng, sun deiyo ngebo cap, er amutara pel dopra melimna neng cap, aneng peteremaiyai bena, aneng dopra, ka tamupra Sandeheren neng wekmai ati pumbon deriryai. Deriryai taruda, ‘Allah si eremna ati damai wekmai nengdi, Yesus wepra deipu neng peterenmange upuda telepe tenenunga cadi, aneng puto di dopropmepyopda, agekenmai nengdi gel dopra popsunung’ tenen, puto gum, bouna dipu dopra deyai.

27 Deyai dingeda, Allah karena tep deiyo neng, sun ila deiyo ngebodi Yesus wepra deiamu neng tep, ‘Wenepra asipterepkur’ tenen, Sandeheren neng damai deriryai. 28 Deriryaipa, adeiyo ngebodi pepu. “Nundi, ‘Yesus si deiki di ton cap men peteremkamrume,’ pepmupu ngeda, ada sundi ‘Peteremna gum di, talipu kunkamrum’ tenen, ila di weneprap pepmupu. Upepra wenepmupu dinin, sunda, pio tupa peteremnapu kunmarumpa, Yerusalem kunge nesala weik ton cap aupu gekenmange. Tonda, Yesus popi keca deiyo yumada, Sandeheren neng, sun nong deiki deipmepyopda, yuk nengdi, ‘Sandeheren neng Yesus popya deiyo nengda, aneng konuma, tenepkamseng’ tenen, tenepmaserumdi tupa peteremrum do?” pepu.

29 Upepupa, Peterus cap, Yesus wepra deiamu neng, yuk neng yuma capdi, tamupra pepi.

“Nunda, nimidi pesenung upu guma, Allah er dipu pesere upupu gekepra dombenkamepe. 30 Sun upu peipmaruma deiki di, yuk nengdi Yesus sengdin co deiki deipipa, popmai. Deiyoda sun ca. Ukuprum dinin, nun apu yapu taleamidi, si eremami Allahdi, aYesuspuda, tamupra gam bukra deipu. 31 Yesusda, Ila Nimi Deiyo Ngebo ^{▼▼Ila Nimi Deiyo Ngebo pepi ngeda, ada Allahdi Yesus tamupra gam bukra deipudi, akeca-keca deiki tara deipupa, erda ila puto weik kuredi, akeca-keca yuma talerure. Aupu lap pena tep, lap pena upu nomor 16 dirume.} kuna cap, nesala ban-ban yuma Lyemna Deiyo Ngebo ^{▼▼Nimi Lyemna Deiyo Ngebo – Lukasdi, Yesus tep tenepudi, aupu seku. Nimi Lyemna Deiyo Ngebo lap pena upuda, nomor 17 dirume.} kuna cap, ‘Ukunkamre’ tenen, Allahdi Yesus dopra, er dumsisi tara erepra deipu. Ada, Allahdi Yesus er pel dopka deiki di Israel nesala meliprepa, sun mali kunge keca taprapmengedi, amnyo karikrongepa, ‘Ne Allahdi sun mali kunge keca yuma gum kupra deipkamne’ tenen, Allahdi Yesus dopra, er dumsisi tara erepra deipu.

32 Nunda, Allahdi Yesus tamupra gam bukra deipu keca yuma diramupka deiki di, yuk neng tep, lap penupe. Tonda nun cap, Allah er Lek Sambala capdi, aupu lap penupe. Allah er upupu gekepra dombange nesala yumada, Allah er Lek Sambala, konum dokotepseua tep, teka tenepmengyopda, Allah er Lek Sambala kareserure.”

Yesusdi wepra deiamu neng yumadi, sun Sandeheren neng tep aupu pepi.

33 Upepi pangeda, aupu gekenmai neng yumadi, yu weik kupupa, ‘Aneng popkamepe,’ tenepi. 34 Utenepi dinin, tenpu Farisi ^{▼▼Farisi perami nengda, Allahdi menop taru ‘Ukunkamrume, ange men kunkamrume,’ peramu upu, Musadi sekeiamu upu peteremna deiyo neng kurami. Aupuda ila di kael keami. Tonda, lap pena upu nomor 10 dinkurume.} ngebo, er sida Gamaliel, ada, amutu neng yuma gispal dorami ngeboda, Sandeheren neng wekmaiya neitamai di tekrapudi, yuk neng tep, “Yesus wepra deiamu neng dopra bura tara dubenaprumyanen, tamupra denkurume,” pepu. Gamalielda, Musa er sekeiamu upu peteremna deiyo ngebo kuramu. 35 Gamalieldi, “Bura tara dubeso,” pepkopda, akati tupa wekmai neng, Sandeheren neng wekmaiya tep, aupu pepu.

Ne kayapu, Israel nesala deiyo nengo. Aupu peteremna neng tep, ‘Ukupkupe,’ tenepmarum ngeda, moupra tenipetepso. Ada, ‘Mankau di mali kuprum’ tenen, pepsene.

36 Orketeng tamun kunmapu taru di, tenpu ngebo, er sida Teudas, erepra tekamudi, ‘Neda ila ngebo,’ peramupa, nimi denge weik 400 nengto, er upupu gekepra dombarami. Ukurami dinino, yuk nengdi Teudas popipa, er melipra dombarami neng yuma tep, ‘Beso,’ pepra enepra dokotepipa, bokra yuk-yukai bendopipa, sun kurami keca yuma gum kupu. 37 Teudas gum kupupa, amenda taru, Galilea tara ngebo, er sida Yudas, nimi si nukrap sekami taru di erepra teku. Erepra tekudi, er upu peramupa, nimi weik, ‘Amutu talesenung neng poprap bisipkamep’ tenen, bulumami. Uda yuk nengdi er pe popipa, er melipra dombarami neng yuma tep, enepra dokotepipa, bokra yuk-yukai bendopi.

38 Sun ukuraminge yuma gum kupka tep, ukutaru aupu peteremange neng tep, apepkusene. ‘Aneng popkamep’ tenen, warengna yapso! Anengda tali loptapso! Sun teka teneraminge cap, sun ukutaru kunmange nge cap, sun pe kange dipapu kuramenge dingeda, nong men kupkamre. 39 Dinino, sun akunge ngeda, Allah er puto deiki di kuramengopda, sundi aneng tep upu men sekdongoptume. Akunmange ngeda, Allah er puto deiki di kunmatenge teptoda, amenda taru, nun mankau di Allah tep yanipmanto kutepe. Ange moupra tenepkamrume. Gamalieldi aupu yuma pepu.

40 Gamalieldi aupu pepu pangeda, Sandeheren neng awekmayadi, ‘Er tek sisi penmasere,’ tenepi. Utenepidi, sun kongpepipa, Yesus wepra deiamu neng dopra, akati pum yana deipi pangeda, Sandeheren nengdi pepipa, yuk nengdi Yesus wepra deiamu neng tep balana di popi. Konum balana di popi pangeda, Sandeheren nengdi, Yesus wepra deiamu neng tep pepi. “Yesus si deiki di, ton cap men peteremkamrume,” pepra wenepidi loptapi.

41 Loptapipa, Yesus wepra deiamu neng Sandeheren neng wekmaiyai tapra, yukai bei dingeda, utenepi. E sun Sandeheren nengdi, ‘Yesus cap, Yesus er si capda, nun songe. Atep, aneng ponmape,’ tenepmasengdi balana di popmasenga tep nengeda, telepe pua. ‘Allahdi nun tep kange deipmasera tep, popmasenga peda, telepe pua,’ tenepidi kange deipra bei. 42 Tumi-tumi yuma Yahudi yala neng Allah tep karerbarami ati damai cap, sun pe ati yuk-yuk cap, peterepra embaramidi, aupu peteremai. “Allahdi, ‘Nesala lyepredi talepkamre’ tenen, wepra deiamu ngebo, Mesias ngeboda, ada Yesus er pua,” pepra kai telep upu peteremna cap, lap pena cap, men tamamidi, pio peteremnapu kurami.