Act 6 | XteSC | STEP | Uda, Yesus upu gekepra teka tenepra dombarami neng weik kupbarami taru neitamai di, sun kan-kan di sun yuma Yahudi yala neng dinin, Yunani upu perami nengdi, Ibrani upu perami neng tep, mali kange doramidi deremami. Deiyoda, solu nerapu makuna tep, bokra tumi-tumi yuma karerami keca tep perami. “Ibrani yala solu nerapu karenung dinin, nun Yunani tara solu nerapu ton, men karesengedi yamdongosenunge,” peramidi deremdarami.

Acts 6

Yesus teka tenemi nengdi, solu nerapu melimna tep, yoneitam bari neng wepra deipi upu

1 Uda, Yesus upu gekepra teka tenepra dombarami neng weik kupbarami taru neitamai di, sun kan-kan di sun yuma Yahudi yala neng dinin, Yunani upu perami nengdi, Ibrani upu perami neng tep, mali kange doramidi deremami. Deiyoda, solu nerapu makuna tep, bokra tumi-tumi yuma karerami keca tep perami. “Ibrani yala solu nerapu karenung dinin, nun Yunani tara solu nerapu ton, men karesengedi yamdongosenunge,” peramidi deremdarami. 2 Sun deremdaramya tep, Yesusdi wepra dokotepupa, er upu dopra peterep embarami 12 nengdi, “Bulupso,” pepipa, Yesus upu teka tenepra dombarami neng yuma gekepidi, bulupra wekipa, aupu pepi. “Nun tenepmapada, ake. Solu nerapu makuna pelda, telep pel dinin, apelpu talepra dopmepyopda, Allah upu peteremna pel taptepe. Allah upu peteremna pel tamnada, pio mali. Ange men taptepe.

3 Atep, nun kayapu, sun konum kael keprum nengda, sun neitamai di yoneitam bari neng wepra deipkurume. Ada, Allah er Lek Sambala wekudi, sun dipruai dekpepupa, kwiryepu kupra kunge neng, sun upu pengenge cap, sun pel donge nge cap, telep-telep kupra kunge nengpu wepra deipkurume. Wepra deipmumpa, ‘Solu nerapu jen bokra karena pel donkameng’ tenen, sun deiyo neng keipkamepe. 4 Dinino, Yesusdi wepra deipseu nengda, nunda tenimtona gum di, Allah morona cap, Allah upu nimi meliprap peteremna cap, apelpu talepra donkamepe,” pepi.

5 Upepipa, awekmai neng, Yesus teka tenepi neng yumadi, ‘Ukupkamepe, pepmaseng upuda telepe pua,’ tenepidi, kange deipidi, nimi yoneitam bari wepra deipi. Ada, Stefanus wepra deipi. Stefanusda, Yesus tep pio tek sisi tenepudi, pel telep kupra doramu. Tonda Allah er Lek Sambala Stefanus dipru neitamai wekamudi, dekpemupa, kwiryepu kuramu. Tonda, nimi si Pilipus cap, Pokorus cap, Nikanor cap, Timon cap, Parmenas cap, ton Antiokia deiami ngebo, Nikolas cap wepra deipi. Nikolasda, Yahudi yala gum ngebo dinin, Yahudi yala neng, Allah tep gispal dorami keca, sun kurami keca yuma, Nikolas peda dopra kuramu. 6 Aneng konum wepra deipidi, Yesusdi wepra dokotepupa, er upu dopra peterep embarami neng, sun 12 neng, sun damai dubena deipi. Deipipa, adua belas (12) nengdi Allah moropidi, awepra deipi neng tep, sun giso deiki buru tang deipi. ^{▼▼Nimi giso deiki buru tang deriraminge tep, lap pena upu nomor 32 dirume.}

7 Uda, Allah upu pio peteremamipa, Yerusalem mutu kurami neng weik ton cap gekeramidi, teka teneprap tapakbaramidi, menmena sun gung weik kupbarami. Tonda, sun Yahudi yala neng, sun Allah tep karena deiyo neng kankan, ton nengda Yesus peteremamu upu, nimi lyemna tep kai telep upu gekeprapidi, teka tenepidi, nimi weik tapangamidi, Yesus er upu talepra dombarami.

Yahudi yala deiyo nengdi Stefanus tep derepidi, er nong talepra dopra bei upu

8 Allahdi Stefanus tep, pio kange deiamudi, weike meliamunge cap, er puto weika di Stefanus kareamunge cap, adeiki di Stefanus kuramu. Allah er puto weik Stefanus kareamnga tep, Stefanusdi nesala damai nimi men kupmanto keca, mambul pel cap, ‘Allah er puto pio weika di pel donmasere, tenepkameng’ tenen, lap pen pel, nimi men kupmanto pel doramu. 9 Apel doramu dinino, amenda taru, Yahudi yala neng Allah si eremami ati sida, Lipertini ^{▼▼Lipertini lap pena upuda, nomor 18 dirume.} neng perami ati wengami nengdi Stefanus er upu gonga kepra yanipi. Akati wengami nengda, Yahudi yala neng dinin, Kirene mutu cap, Aleksandia mutu cap, tonda propinsi Kilikia cap, propinsi Asia cap, atara nengdi er upu yanipidi upu weik penmai.

10 Stefanus er upu tek sisi peramupnen, anengdi balila kupidi, ‘Er upu yanipkamep’ tenen, gonga kepra piripterepi dinin, Allah er Lek Sambala Stefanus dipru neitamai kuramudi, puto weik kudiramudi, ila kael kemna deiyo keca meliamnga deiki di, Stefanus upu telep-teleppu peramupa, anengdi, er upu men bisipmanto kupi. 11 Atep, anengdi yuk neng damai bena iniprapidi, ‘Upepkurum, upepkurum,’ pepra upu moupya deiki di, ayuk nengdi Stefanus tep, “Musa sekeiamu upu cap, Allah cap tep, angebo Stefanus pio mali upu peramnga deiki di yanipupa, nun gekepmupke,” pepra tali lulupra deipi.

12 Upedanmai pangeda, sun penmai upu yuk neng gekepidi derepi. Ada, tali neng cap, Yahudi yala neng, sun upu bongdina deiyo neng cap, Musa sekamu mem upu peteremna deiyo neng cap, aneng yuma yu weik kupupa, upu koudanmai. Ukupidi, Stefanus taleprapidi, sun upu bongdina ila deiyo neng, ada Sandeheren perami nengda, sun damai bena deipi. 13 Tonda, aneng dipu, “Aupu-aupu yuma tali bena luluprap deipkurume,” pepipa, yuk neng konum gekepi pangeda, amok upu pepkamami neng dopra, Sandeheren neng damai dubei. Dubeipa, amok upu pepi nengdi pepi.

“Amali ngebo Stefanusda, nun mali kupe keca kunumna tep, Allah karenup ati, ^{▼▼Allah karena ati – Yahudi yala neng, sun Allah karena atida, sun Yahudi yala nengdi Allah si eremna pe, sun mali kurami keca kunumna tep, gam kure keca popnopda, Allah karena tep, akati, ila ati tenpu doami. Akatida, Yerusalem mutu doami. Tonda, lap pena upu nomor 15 dinkurume.} ada, Allahdi er si eremna tep wepra deipseu atida, angebo Stefanus pere upu deiki di yaniserure. Tonda, Allahdi, ‘Ukunkamrume, ange men kunkamrume,’ pepupa, Musadi sekeiamseu ^{▼▼Musa sengamu upu lap pena upuda, nomor 35 dirume.} mem upu tep, Stefanus pere upu deiki di yanisere. Angeda, pio men tamserure. Abutene keca tupa-tupa yaninapu kuserure.

14 Er pepupa gekepmupu upuda ake. Ada, ‘Nasaret mutu deiami ngebo Yesusdi nun mali kupe keca kunumna tep, Allah karepmepedi, er si eremnup atida uruptapkamre. Tonda, Allahdi peipupa, Musadi dopra peteremamupa, gekeramidi kupyakaramyanen, ukutaru nun peterepseipa, tupa kupe keca yumada, ange taprapmengedi, “Ukupunge yuk punupra dombenkameng” tenen, Yesusdi ketenepra deipkamsere,’ pepra, Stefanusdi aupu pepra peterepseupa, gekepmupke.” Mok upu pepi nengdi, aupu pepi.

15 Upepra aupu penmai taruda, Sandeheren neng, sun upu bongdina ati bukmai neng yumadi, Stefanus pio dipdolom pepmaipa, Stefanus er urasinda, Allah er im deiki melimna ngebo, malaikat urasin utopu kupupa, epi.