Act 7 | XteSC | STEP | Sandeheren neng yumadi Stefanus tep dipdolom pepmaipa, Yahudi yala neng sun Allah karena deiyo neng, sun ila deiyo ngebodi Stefanus tep pepu. “Sun anengdi apenmakeng upuda, tek do, telel do?” pepra asipterepu.

Acts 7

Stefanusdi, Sandeheren neng tep, pepu upu

1 Sandeheren neng yumadi Stefanus tep dipdolom pepmaipa, Yahudi yala neng sun Allah karena deiyo neng, sun ila deiyo ngebodi Stefanus tep pepu. “Sun anengdi apenmakeng upuda, tek do, telel do?” pepra asipterepu. 2 Asipterepupa, Stefanusdi tamupra pepu.

Ne nai yapu cap, ne kayapu cap, ne upu gekepneso! Nun apke Abrahamda, Haran mutu men yanamudi Propinsi Mesopotamia ^{▼▼Propinsi Mesopotamia perami ngeda ada ila pala mutu si tep perami. Atara neitamaida, mutu si ton Kaldea mutu kwamu. Tonda, Kaldea mutu kurami nesala tep Kaldea mutu nesala perami.} tarapu tup kuramu taruda, pio telep kupra Dirinpu Kurur Allahda, Abraham damai tengyau. 3 Tengyaudi aupu peipu.
‘Kan mutu sisa cap, kan mutu neng cap, yuma tapmemdi, nedi peterepkamken mutu benkamrume,’ pepu. (Kejadian 12:1)

4 Allahdi Abraham upeipka tep, Abrahamdi Kaldea nesala kurami mutu, Mesir tara tapra bisi mapbaramnganen, Haran mutu bena kuramu. Apu kuramupane, er nai depu pangeda, Allahdi, ‘Abraham amutu kunkamre’ tenen, dokotepupa, sun akunmarum mutu ayana kuramu. 5 Amutu konum yau pangeda, Allah er taleamu keca bokra, Abraham er kunkamu mutu tep, tenpu pe pio ton men karepu. Tu meteka dipu men karepu dinino, uda, Allahdi Abraham aupu peipu taruda, Abraham er mi tenpu pe men deiamu dinin, Allahdi Abraham tep aupu peipu. “Kandi amutu taleamemyanen, depmemnyopda, kandi deipkamrem nyapu cap, dadeipdanen benkameng nyapu cap, amutu talepkamenge,” Allahdi Abraham tep peipu. 6 Tonda Allahdi Abraham tep aupu ton cap pepu.
‘Kandi deipmempa, dadeipdanen baramenganen, deipkameng nyapuda, yuk mutu nengdi taleamenge mutu bengopda, sunda nimi bo neng utopu kunkamenge. Uda amutu taleamenge nengdi, kan nyapu talepmengedi, “Nun pel tali dopseso,” pepra pel dipmengedi, keteng tamun denge weik, 400 tahun deiki di, ikin keca weik sun nong deiki derinkamenge. 7 “Nun pel dopseso,” pepra pel dipkamenga deiyo nengda, nedi wenepra popkamne. Ukupne dingeda, Abraham kan nyapuda ormutu di dopra, abukmanem mutu tamupra yangedi, ne si erepkamnenge. Allahdi Abraham tep pepu.’ (Kejadian 15:13-14; Keluaran 3:12)

“Allahdi Abraham tep pepu upuda, ne Stefanusdi pepsene,” Stefanusdi pepu.

8 Stefanus upepu dingeda, aupu ton pepu.

Uda Allahdi Abraham tep, pepu.

“Kan cap kandi deipkamrem nyapu cap, dadeipdanen benkameng nyapu cap tep, pio telep kupra melimsenedi, telep keca derinkamsene. Ukupkamna tep, ‘Kanda ukunkamrume’ tenen, bata deriramengtopu, Ne nyapu tep, den bam bol deiki tara sengkamrume,” pepu. Upepra, den bam bol deiki tarange sengna pel ^{▼▼Den bam bol deiki tara sengna pel tep, lap pena upu nomor 19 dirume. Tonda, pumun taru Allahdi, sun Israel nesala tep, “Ne mawa nesala kunkamruma cadi, peten kemna kuna tep nengeda, sun sal nyapu yumada, sun den bam bol deiki tara ngeda, sektapkamrume,” pepra deipupa, ukurami.} Allahdi Abraham tep karepu. Amenda taru, Abrahamdi Isak deipupa, ban bari tumi konum mapkopda, er mi den bam bol deikinge seku. Seku pangeda, kuramnganen, amenda taru, Isakdi er mi Yakub deipudi, er den bam bol deikinge seku. Tonda, Yakubdi Israel nesala nun apu yapu, ^{▼▼apu yapu Israel neng, sun apu yapu ila mambul 12 neng lap pena upuda, nomor 20 dirume.} ila mambul neng 12 neng deipudi, sun den bam bol peda sekamu.

9 Uda, nun ila mambul apu yapu, sun 12 nengdi, sun weit bo Yusup tep, yu kuramupa, sun dipru wilipra deriramidi, ‘Nun weitda, Mesir mutu nengdi angebo kunupmengedi, ^{▼▼angebo kunupmengedi – Menop taru, co bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kunge nesaladi sun isomka nesala tep, sun pel mesum dipapu pel dorami. Tonda, lap pena upuda, nomor 36 dirume.} sun pelpu tali donkamre’ tenen, yuk neng damai co bo kunupipa, anengdi Yusup dopra Mesir mutu dubei. Dubeipa, Yusup er ikin keca pio kuramu dinino, Allahdi Yusup pio meliamnga deiki di, Allahdi lyepra deipu. 10 Allahdi Yusup tep upu kwirye pen kecapu kareamupa, ila kael ngebo kuramudi, er upu peramunge cap, pel doramunge cap, telep-telep kuprappu kuramu. Allah meliamupa, Yusup telep kupra kuramnga deiki di, Mesir mutu ila nimi deiyo ngebo Firaun, ^{▼▼Firaun perami ngeda, ada Mesir mutu ila nimi deiyo neng yuma tep, asi perami. Sun Raja neng, ila deiyo neng, sun nimi si yuk-yuk karerami dinin, anengda pio ila neng tep, sun nimi si katuai men perami. Ada, nimi si sisa gum dinin, nun Ketengban nesaladi, nun nimi deiyo neng tep, “Nimi Deiyo Neng,” tonda “Elemre neng,” tonda “Presiden,” perameptopu, sun Mesir mutu nesaladi, sun ila nimi deiyo neng tep, “Firaun,” perami.} Yusup tep kange deriramu. Kange deriramudi, Firaun er taleamu keca yuma cap, Mesir mutu kwamu keca yuma cap, er ila ati pumbon pel dorami neng yuma cap, ‘Ila deiyo ngebo kepredi er dipu melipra talepkamre’ tenen, Firaundi Yusup dopra ereipupa, akeca-keca yuma er amutara kuramu.

11 Uda ukuramipane, amenda taru Mesir mutu cap, Kanaan mutu cap neitamai yuma, jen gum kupudi, jen pio putaramnga tep, amutu kurami nesala yuma ikin kange doupra kurami. Ukurami taruda, nun apu yapudi pio kalengami dinin, jen men dopra jepmanto kurami. 12 Ukuramipane, yuk nengdi “Mesir mutu jen akapmare,” pepipa, Yakub gekepudi, er nyapu, ‘Nun apu yapuda, Mesir mutu kunumbenkameng’ tenen, dokotepupa, kunumbei ngeda, ada menmena taru kunumbei. 13 Butene kunumbei taruda, Yusupdi er du yapudi, ‘Nun weit Yusup akurure,’ men tenemidi tali mankau di kurami dinin, Yusupdi er du yapu tep, “Neda Yusup kunune,” peprap, katuai lap pepu. Upepra lap pepka tep, Firaundi Yusup er du yapu cap, er nai cap, sun tara neng yuma cap tep kael kepu.

14 Ayuma konum kupkopda, Yusupdi, er nai cap, er tara neng yuma cap, ada denge weik 75 neng, ‘Ordi amutu yana kunkameng’ tenen, upu pepra deipupa, perbei. 15 Perbeipa, Yakub gekepudi Mesir mutu kwerepudi, amutupu kuramyanen, amenda taru er cap, nun apu yapu yuma cap deiami. 16 Yuma konum depra sengpepyopda, yuk nengdi, sun yo dopra Kanaan tara neitamai, Sekem mutu tamupra welepidi, Hamor yala neng taleami gel imirda, Abraham er co bo deiki di kunuamu gel imir, ^{▼▼gel imir – Agel imirda, Abraham er ner depmaupa peipmaua tep, er co bo deiki di kunupu gel imir.} agel imirpu derirbei. 17 Allahdi Abraham tep, “Tek sisi ukupkamkene. Nyapu weik karenkamkene,” peamutopu, ukupkamnga damai konum kupkopda, nun Israel yala nesala, Mesir mutu kurami nesalada, konum pio weik kupbaramidi, sun gung weik kurami.

18 Ukurami pangeda, Mesir mutu neitamaida, yuk ila nimi deiyo ngebo teku. Angebodi, Yusup tep akeca-keca yuma men kael keamu ngebo kuramu dinin, Mesir mutu sun ila nimi deiyo ngebo tekamudi amutu yuma taleamu. 19 Mesir mutu nimi deiyo ngebodi, nun apu yapu sun ukupu derirami nyapu ‘Depkameng’ tenepudi, “Sun nyapu bura tara deiptaprume,” peramnga deiki di, erdi nun apu yapu tep namamudi, sun nong deiki ikin keca weik deriramu. 20 Er aupu peramu taru neitamai di Musa deipipa, sal urasin telep mi kuramu. Allahdi ami kange deamu. Ware weneri deiki di er nin cap, er nai cap pio meliamreidi, kuramrei.

21 Ware weneri deiki di, ukuramreianen, Musa bura tara deiprei pangeda, Firaun er ner midi, Musa dopra er mi ketenepudi gwanamamu. 22 Gwanamamu taru yumada, Mesir mutu nesala ila kael keami keca yuma, Musa tep peteremamipa, ila kael kepbaramudi, er upu peramunge cap, er pel doramu keca yuma cap, ila puto deiki di kuramudi, pel telep kupra doramu.

23 Ukuramnganen, Musa keteng tamun denge weik 40 tahun konum wisi deipkopda, ‘Ne tara neng Israel nesala wareto kuprap kunung do?’ tenen, dirbeu. 24 Dirbeudi, bena dinmaupa, Mesir ngebodi Israel ngebo ponmaupa epudi, ‘Ne kabo nun Israel neng warya tep ponmar do?’ tenen, er melimna tep, Musadi Mesir ngebo kwa dakra poptapu. 25 Musa er tenepu ngeda ukuprap. Allahdi Israel nesala loptapra lyemna tep, ‘Musa er deiki di pel donmaserdi, Mesir mutu neitamai di lyepra dubenkamsere, tenepkamenge,’ tenepu dinin, sun Israel neng ange men tenepi.

26 Ange men tenepya tep, atumi mapmaiya bereku pangeda, Musa tali mankau embanmaudi, dinmaupa, Israel neng butene neng pangdanmareipa, epu. Epudi, ‘Sun butene neng podana gum di, telep kupra dimpepra kunkurunga’ tenen, aupu pepu. “Sun yala tenpu neng kuruma tep, warya putapserpa podanmarum do?” Musadi pepu. 27 Upepu dinin, aneng popdankureiya tep, gonga kepka deiyo ngebodi, Musa lokra dopudi, Musa tep pepu.

‘Nun upu lepsikra bongdina deiyo ngebo cap, nun talena deiyo ngebo cap tep, ware ngebodi erepra deipkeupa, yana apenmaserem do? 28 Tonda, ambutumi Mesir ngebo popmaumtopu, “Angebo peda popkun” tenen, putanmakerpa penmanerem do, pepu.’ Upepra angebodi Musa tep pepu. (Keluaran 2:14)

29 Upepupa, Musa apepu upu gekepu dingeda, ‘Ne tara nengdi popnenung’ tenen, kware kupka tep, amutu tapra, Midian mutu sepdaro beu. Midian mutu beuopda, nimi bo ngebo utopu kuramnganen, mi butene deipu.

30 Uda mi butenenge deipudi, apio ukuramyanen, keteng tamun denge weik, 40 tahun konum kupkopda, mutu si Sinai mutu damai, ada me pio gum di nimi men kuramyai kunmaupa, tenpu bo bum-bum keca tekamngai neitamai di, uku bu jenmaupa, Allah er im deiki melimna ngebo, malaikat auku bu kan-kan neitamai belepu. 31 Akeca uku bu jenmaupa, epu dingeda, aepu keca tep lukdaudi, buma teling pepu. Lukdaudi, ‘Angeda warya di kupre do?’ tenepudi, ‘Meneng damai benapnedi telep kupra dipterepkune’ tenen, bena dinmaupa, nun nai Allah, er upu penmaupa gekepu. 32 Er pepu upuda ake.
‘Kan apu yapu taleamidi, si eremami Allahda, ne kunune. Abraham cap, Isak cap, Yakub cap, sun taleamidi si eremami Allahda ne akunune, pepu.’ (Keluaran 3:6)

Upepupa, Musa gekepudi, kware weik kupupa, ‘Ton cap akeca men dipetepkune,’ tenepudi moropsemau. 33 Ange yuma ukupupa, nun nai Allahdi Musa tep pepu.
‘Kan sandal kwiripra tapo. Kan tekmaremaida, ne akunmana tep, pio telepai tepa. 34 Ne nyapu Israel nesala Mesir mutu kungepa, sun nong deiki ikin keca deringedi daramdongongada, ne tek sisi dinune. Tonda, sun ikin kange douamidi malye penge kecada ne gekepsidi, “Sun lyepkamne” tenen, kwereryanmane. Atep, ukutaruda, nedi tamupra Mesir mutu dokotepkamakene, pepu.’ (Keluaran 3:5-10)

Allahdi Musa tep pepu upuda, Stefanusdi sun Sandeheren neng tep lap pepu.

35 Upepudi Stefanusdi aupu ton cap dukdongopra pepu.

Uda aMusada, yuk ngebo gume. Sun Israel nengdi, “Nun upu lepsikra bongdina deiyo ngebo cap, nun talena deiyo ngebo cap tep, ware ngebodi erepra deipkeu do?” pepya deiki di yanipra tapi Musada, er pua. Allah er pedipapu Musa tep, Israel nesala, ‘Sun nimi deiyo ngebo cap, sun lortamna deiyo ngebo cap kunkamre’ tenen, Israel nesala damai dokotepu. Ada, Allah er im deiki melimna ngebo, bo bum-bum keca deiki uku bu jenmaua neitamai, upu pepka deiki, Allahdi Musa dokotepu.

36 Dokotepupa, Musadi Mesir mutu neitamai nimi men kupmanto pel cap, kunupsek pen pel doramnga deiki di, Israel nesaladi, ‘Uo, tek sisi Allahdi angebo deiki pel donmasere’ tenepi. Musadi anesala loptapra lyeprapudi, Mesir mutu neitamai di mepra baramupa dombarami. Baramidi, tonda Bi Laut Mokon damai cap, me gum tep nimi men kuramyai neitamai cap, keteng tamun denge weik 40 tahun deiki di, Musadi nimi men kupmanto keca, mambul pel dopbaramudi, Israel nesala Musa menepra baramupa dombarami. 37 Apenmasen Musada, er dipu Israel nesala tep aupu ton peipu.
‘Neda Allah er upu lap pena ngebo nabi kuramsitopu, Allah er upu lap penkamser ngebo, sun yala neng kan-kan di sun tep karepkamsere,’ Musadi pepu. (Ulangan 18:15)

38 Uda, nun apu yapu cap, ton yuk Israel nesala yuma cap, me gum tep nimi men kuramyai embarami taruda, aMusapu er cap sun kikiman kurami. Tonda, Allah er im deiki melimna ngebo, malaikat Sinai mutu deiki upu peipupa gekepudi, nun apu yapu tep sun upu bongdiramu ngeboda, Musa er pua. Tonda, Allahdi, ‘Anengda gam kuna deiyo keca karenkamne’ tenen, pio gam kuna deiyo upuda, Musadi nun karepkamseua tep, Allahdi peipupa, er im deiki melimna ngebo malaikatdi, Musa karepupa Musa dopropu.

39 Ukuramu dinino, nun apu yapuda, ‘Musa er pesere upuda pio men gekepkamepe’ tenen, dabal kupupa, er peramu upu pio men gekerami. Sun gekepmatenge dinin, Musa pio yaniramidi, sun tenerami ngeda, ake. Sun dipru neitamai di, ‘Uo, nunda Mesir mutu betepedi, Mesir mutu kuramuputopu, apu kuramtepe,’ tenerami. 40 Ukuramidi Harun tep aupu pepi.
‘Kandi isok-isok urasin utopu keca petupra deipsemempa, nun bisi benbenemna tep, sundi menepra bangepa, nun amenda dombenkamepe. Mesir mutu di dekaramseu ngebo, Musada, atali ngebo dimpepseuada, warya di kupu do? Dan cei kurur do? Nun walwale.’ (Keluaran 32:1)

41 Aupu pepi taruda, ada, nimi buru deiki di petupra deipnedi, er si eremna tep deriramengtopu, nun apu yapudi, sapi bisam mi urasin utopunge petupra deipi. ‘Akeca er si erepra gispal donkamep’ tenen, sun gam kuramu keca popra kareramidi, sun buru deiki dipu petupra deiami keca tep, ila kailya kaleprapidi, akeca si eremami.

42 Sun mali weik ukuramipa Allahdi, ‘Sun yuk dakunge,’ tenepudi, im deiki kuramre keca, keteng cap, ware cap, kwirye cap tep, ‘Akeca puda si erepkamenge’ tenen, kaukemdongoramudi, aneng tep tapu. Akurami keca yuma, Allah er upu lap perami neng, nabi nengdi sekrapidi pediramitopu akupmare. Sun sekami upuda ake.
‘Sun Israel nesalao, me gum tep, nimi men kuramyai keteng tamun denge weik 40 tahun deiki di embaramrum taruda, ne si erepra gispal dona tep, gam kuramu keca poramrumnge cap, telep keca tali kareamrumnge cap, ne tep dekaramnerum do? Gum do? Ne kangeda, ne tepapu men dekaramnerume.
43 Gume. Ne tep guma. Isok er si Molok ^{▼▼Molok perami ngeda, ada Amori mutu neitamai kurami nesala, sun si eremami isok si perami. ‘Isok er sida Molok, kange deipseredi melimkamser’ tenen, er karena tep, sun nyape popra uku dongorami. Ukuramitopu, Israel nesala peda, Allah teka tenena gum nesalada, tenpu-tenpu di, isok si Molok er si pepra eremami. Yuk isok er sida, Erefanda, ada ‘Ululkor talerur isokda er pua,’ teneramidi, asi Erefan eremami.} er mem ati tep, opkal tenda ati domrumnge cap, sun isok er si Erefan, er kwirye urasin utopu petupra deiprum keca cap, akeca butene ereprap deipembaramrumdi, si erepra embaramrume.
Ada, sundi ketenepra, “Si erepkamep” tenen, deipembaramrum keca tep pepne. Ukupra tali keca si erepra embaramruma tep, nedi pepnepa, yuk nengdi akunmarum mutu neitamai di bisbisa kapmengedi, sun dopra ateng koupmengedi, sun pe mutu Babel mutu dortara dubenkamsenge.’ (Amos 5:25-27)

“Allahdi sun Israel neng tep pepu upu konum pepsene.” Stefanusdi sun Sandeheren neng tep, Amos seku upu dopra lap pepupa gekenmai.

44 Upepu dingeda, aupu ton pepu.

Uda, nun apu yapu me gum tep, nimi men kuramyai embarami taru yumada, Musadi mem upu gel pala deiki sekamu gelda, agel dopra ati pumbon deiami tenda ^{▼▼Tenda ati – Menop taruda, Israel nesaladi, Allah er si eremna tep, keana ati, opkal dodin ati, atau tenda ati deipembarami. Sun embarami mutu-mutu yuma, benkui taruda akati uruptapidi, yuk mutu bena dopembarami. Akati neitamaida Allah si eremami. Tonda, akati pumbon mambul keca ton derirami. Amenda taruda, Raja Salomodi ila gel ati ton, Yerusalem mutu neitamai domu. Tonda lap pena upu nomor 21 dirume.} atida kwamu. Akatida, Allahdi Musa tep, “Ne si eremna atida, ukuprap, ukuprap donkamrume,” peprap peterepudi, “Akati er urasinda ukupra kupkamre,” pepra, benbenepra peterepupa, Musadi akeca epka utopu, sun Israel nengdi akati opkal tenda ati domi. 45 Akatida, nun nai yapu sun apu yapudi domi atida, nun nai yapu karepipa dopropi. Konum dopropi dingeda, Yosuadi Israel nesala taleamu taruda, Allah er puto meliamnga deiki di, yuk-yuk mutu kurami nesala porbisiramidi, amutu-mutu yuma sun dororami. Ataru yuma Allah er opkal tenda ati doupra deipembarami. Adinin, ukuramyanen, Daud teku taru peda, akati amutu tupa kwamu.

46 Daudda, pio telep kuprappu kuramnga tep, Allahdi Daud tep kange deriramu. Dauddi, Yakub er taleamudi si eremamu Allahda, ‘Nedi Allah er si eremna ati telep kupra dopra deipkamne’ tenen, Allah tep moropu. 47 Daud upepra moropu dinin, Allah er si eremna ati domu ngeboda, Daud er mi Salomodi domu. 48 Dinino, Allah erda pio kwemdin ngebo, puto pio weik ngebo kuredi, akeca-keca deiki tara kurura cadi, nimidi donung ati pumbon men kurure. Ange tep nengeda, Allahdi peipupa, Allah er upu lap peramu ngebo nabi Yesayadi aupu pepra sekamu.
49 – 50 ‘Neda Allah kunune. Tuai Raja nengdi, ila bunga keca deiki bukmengedi, sun tara nesala talenungtopu, neda im deiki buknedi akeca-keca yuma talenune. Neda pio weik ngebo cadi, tuai mutu ban-ban yumada, ne yan beipye peingna tep, ne yan deipmantoaipu kupke. Atep, sundi ne tep, wareto ati dopkamnurum do? Allah nedi pepsene.
Tonda, ne buru deiki dipu, akeca-keca yuma men ketekeipsi do? Atep, ne beipye peingnai tep nengeda, dantoai dopnutumpa, ne beipye peikamne do? Ada men kupmanto pepsene.’ (Yesaya 66:1-2)

Allahdi pepupa, Yesayadi sekeipseu. Stefanusdi pepu.

51 Stefanusdi Yesayadi sekeiamu upu konum pepudi, aupu ton cap pepu.

Sun balila weik nesala kurume. Sun dipru cap, sun amul cap, Allahdi pesere upu pio men gekerume. Dipru mali nengpu tupa kurume! Sun apu yapudi mali kuramitopu, sun peda angepu tupa kurume. Ada, Allah er Lek Sambaladi peserepane, sun men gekepra dororumudi yanirume. 52 Allah er upu lap perami neng, nabi neng kurami taruda, sun apu yapudi tenpu pe ton, sun nong deiki ikin keca men derirami do? Gume, nabi-nabi neng yuma tep nengeda, ikin keca weik sun nong deiki deriramrume. Tonda, Allah er upu lap perami nengdi, “Dumsisi Kurur Ngebo yankamre,” pepra lap pedirami neng peda, sun apu yapudi popnapu kurami.

Uda ukutaruda, angebopu, Dumsisi Kurur Ngebo Yesus tep napraprumdi konum popmarume. 53 Tonda, sun Yahudi deiyo nengda, Allahdi, “Ukupkamrume, ange men kupkamrume,” pepra deiamu mem upuda, er im deiki melimna neng, malaikat nengdi dopra kareamsisi upuda, tali dopramrum dinin, ukutaru gekeprap men talerume.

Stefanusdi sun Yahudi yala neng, upu bongdina deiyo neng, sun Sandeheren neng awekmaidi gekenmai atep, aupu yuma pepu.

Yu nengdi gel dopra, Stefanus popi upu

54 Stefanusdi aupu yuma upepu pangeda, aneng gekepi. Gekepi dingeda, yu pio weik kupupa, ‘Uo, angebo poptepe’ tenen, er tep si kerenmai. 55 Dinino, Allah er Lek Sambala Stefanus er dipru wekamnga di, ataru dinikudi dekpepupa, Stefanusdi im alau tara erepra dinmaupa, Allah er ila dirine kupmaunge cap, Yesusda Allah er dumsisi tara tekmaunge cap epu. 56 Epu dingeda, aupu pepu. “Itara dipterepso! Im deiki wengepropmarpa, Allah er Mi Sisa, ada Nimi Mi Sisa Utopu Ngebo ^{▼▼Nimi Mi Sisa Utopu Ngebo perami ngeda, ada Allahdi, ‘Nimi tuai neng lyepkamre’ tenen, dokotepu ngebo, Mesias ngebo tep perami. Er Yesusda, im deiki di yau dinin, nimi nong utopu kupupa, yaue. Atep, Yesus tep ‘Nimi Mi Sisa Utopu Ngebo,’ perami. Tonda, buku Daniel aupu akapka tep, sun Israel nesaladi, ‘Ada nimi Lyemna Deiyo Ngebo’ tenen, konum kael keami. Tonda, lap pena upu nomor 22 dirume.} Allah er dumsisi tara tekmarpa, ne dinmane,” Stefanusdi pepu.

57 Upepupa, sun Sandeheren neng gekepi dingeda, sun buru di amul kinipdongopidi, ila upu kongpenmaidi, adipapu, sun yumadi sepdaro Stefanus bena talepdongopi. 58 Talepdongopidi, sun akati arum domyai, Yerusalem neitamai di, Stefanus talepra, gipdaro bura tara dubeidi, gel doprapidi, er nong bol deiki donmai. Donmai taruda, ton tara neng, asurupu dinmai nengda, ‘Gel dopra puto di dopkup’ tenen, sun deiki dongorami opkal kwiriprapidi, tenpu kaber ngebo, er sida Saulus, er yan damai deipi.

59 Sun Stefanus gel donmaidi tup ponmai taruda, Stefanusdi Allah tep moropu. “Ne nai Yesuso, kanda ne deiyo ngebo kurume. Ne sambala dopropneo,” pepu dingeda, sakapudi gutam tu dipdongopudi, ila upu di aupu pepu. “Naio, sun amali kunmange nge tep nengeda, ‘Kandi aneng men wenepra popkamrume’ tenen, moropkene,” pepu. Stefanus aupu pepu dingeda, adipapu depu. 60 Anengdi Stefanus ponmaipa depu taruda, Saulus meneng damai tekra dinmauadi, ‘E ada walito angebo popmange,’ tenepu.