Act 8 | XteSC | STEP | Stefanus popi taruda, tenpu ngebo er si Saulus meneng damai tekra dinmaudi, ‘Angebo popmangada, walito popmange,’ tenepu. Stefanus popya deiki di, atumi dipapu Yerusalem mutu neitamai dinin, teka tenena gum nengdi, Yesus tep teka teneramidi, bulupra wengami neng tep, sun nong deiki ikin keca weik derirami. Ukurami pangeda, sun teka tenerami nengdi, ‘Anengda poryasenung’ tenen, Yudea tara neitamai cap, Samaria mutu neitamai cap, sepdaro bei. Aneng sepdaro bei dinin, Yesus erdi wepra deipu neng, kum di dutara 11 nengda, men seprobei. Apu kurami.

Acts 8

Yesus teka tenepi nengda, teka tenena gum nengdi, ikin keca weik, sun nong deiki deriramya tep upu

1 Stefanus popi taruda, tenpu ngebo er si Saulus meneng damai tekra dinmaudi, ‘Angebo popmangada, walito popmange,’ tenepu.

Stefanus popya deiki di, atumi dipapu Yerusalem mutu neitamai dinin, teka tenena gum nengdi, Yesus tep teka teneramidi, bulupra wengami neng tep, sun nong deiki ikin keca weik derirami. Ukurami pangeda, sun teka tenerami nengdi, ‘Anengda poryasenung’ tenen, Yudea tara neitamai cap, Samaria mutu neitamai cap, sepdaro bei. Aneng sepdaro bei dinin, Yesus erdi wepra deipu neng, kum di dutara 11 nengda, men seprobei. Apu kurami. 2 Dinino, sun baidi tapi neng, Allah pediramu upu pio talepra kwiryepu kurami nengdi, Stefanus nong dopra peipi. Peipidi, sundi er tep, pio bicaue kupupa, mambul kange doupra engerami.

3 Ataru peda Saulusdi, ateka tenepi neng peda, sun nong cap, sun tenerami keca cap, peteremaminge yuma cap, ‘Sikke utopu buktapkamne,’ teneramu. Uteneramudi, akati-akati yuma wekrapudi, nimi pe, nerapu pe yuma dopra giprapudi, wenemna ati dongorbaramu. 4 Sun kware tep yuk-yuk karen mutu benami nengdi, sun benami mutu yuma Allah upu peterep embarami.

Pilipusda Samaria mutu peterep embeu upu

5 Ukuramipa, Pilipus er peda, Samaria mutu neitamai tenpu ati arum doramyai beudi, Allah wepra deiamu ngebo Mesiasda, ada Allahdi, ‘Yesusda teka tenena nesala lyepredi talepkamre’ tenen, wepra deiamu Mesias ngeboda, er upu tep peteremamu. 6 Ukuprap peteremamupa, sun amutu neng weik buluamipa, er upu peramupa, gekeraminge cap, tonda, er nimi men kupmanto keca, kunupsek peramu pel doramupa diramidi, ange deiki di er peteremamu upu pio moupra gekerami.

7 – 8 Isok-isok yuma nimi dipruai wekamudi taleamu nesalada, sun isok nimi dipruai udi gupra ila di ngolokra barami. Tonda, sun buru cap, yane cap yuma, meiyal seremu nesala cap, tonda, yo kwanen nesala cap, weike kwirye lepsising diramu. Pilipusdi anesala lepsising diramupa, sun telep kupipa awekami neng epidi, sun akati arum dorami nesalada, pio ila kange deipi.

Ker dona deiyo ngebo er si Simon tep upu

9 Uda tenpu ngebo, er sida Simon, akati arum doramyai neitamai kuramudi, ‘Ton taru nimi depkameng’ tenen, ker doramu. Ton taruda, nimi telep kuna tep, isok puto deiki di dinin, nimi men kupmanto pel ton, nimi kweteramu. Ukuramnga tep, Samaria mutu nesala yuma epidi, lukdaidi dung-dung pepidi buma teling pepu. Tonda Simondi, ‘Erda ila ngebo, tenepkamneng’ tenen, gemeramudi ila upu peramu. 10 Erdi er pe tep ila upu gemepra peramupa, amutu nesala ila neng pe, tali kan-kan neng pe yuma Simon tep moupra gekeramidi, pepi. “Mutu-mutu yuma kweiamu ngebo, pumun di er sida Ila Puto Ngebo peramupu ngeboda, Simon akonum kunmare,” tenepidi ila upu pepi.

11 Er men di isok puto deiki di nimi men kupmanto keca pel pio doramupa, sun epidi lukdaiya tep, er upu pio gekepra teka tenepra kurami. 12 Ukurami dinin, Pilipusdi, nimi lyemna upu peteremamupa, gekepidi teka tenepipa, nimi cap, nerapu cap, me dongoramu. Pilipusdi peteremamu upuda, ada Allahdi Yesus pel dopseua deiki di, nesala lyepseredi taleserur upu ^{▼▼Allah lyepseredi taleserur upu deiyoda ake. Ada, Yesusdi tuai mutu yana, ‘Tuai mutu kure keca talenkamne’ tenen, men yaue. Allahdi Yesus dokotepupa, yaua deiyoda, ‘Nimi teka tenepmengepa, sun dipru talenkamne. Talepnyopda, depmenge taruda, im deiki dubenkamne’ tenen, yaue. Bahasa Indonesia deiki di, Kerajaan Allah penunge. Tonda, lap pena upuda, nomor 23 dirume.} cap, Yesus Kristus si cap tep peteremamu. 13 Tonda, Simon peda, mali kuramu dinin, amalinge taprapudi teka tenepupa, Pilipusdi Simon me dongopu. Me dongopu pangeda, Simondi Pilipus embaramngai yuma, domembaramudi, ‘Er ware pel dopkamre do?’ tenen, dipdongopra embaramu. Dipdongopra embaramupa, Pilipusdi nimi men kupmanto keca, kunupsek peramu pel doramupa, epka deiki di, ‘Uo, angeda ila mambule,’ teneramudi lungdaramu.

14 Amenda taru, Yesus erdi wepra deipu neng, Yerusalem tup kurami nengda, “Samaria ^{▼▼Samaria mutu nengda, sun Yahudi yala nengdi, aneng tep, ‘Nun songe,’ pio tenerami.} mutu neng Allah upu teka tenepra konum dopropi,” pepipa, gekepidi Peterus cap, Yohanes cap wepra, Samaria mutu dokotepi. 15 Dokotepipa, sun abutene neng Samaria mutu neng damai yarei dingeda, sun Samaria mutu teka tenepi neng, ‘Allah er Lek Sambala dopropkung’ tenen, Allah moroprei. 16 Ukupreiya deiyoda, Allah er Lek Sambala amutu neng yana kapul men wekamnga tep, sun amutu nengda, ‘Nun nai Yesus er nyapu kunkameng’ tenen, Yesus er si deiki dipu me dongorami dinin, Allah er Lek Sambala kapul men dororami.

17 Ange tep nengeda, Peterus cap, Yohanes cap, sun buru tang sun Samaria mutu neng nong deiki deipreidi moroprei pangeda, Allah er Lek Sambala, aneng deiki yana wekupa sun dopropi. 18 Dopropipa, sun ayarei Rasul nengdi, sun buru tang aneng sun nong deiki deipreipa, Allah er Lek Sambala yana wekupa, Simon epudi, ‘Uo apelda, ne pedi kuptene’ tenen, co bo doprap Peterus cap, Yohanes cap tep, karepterepudi upepu. 19 “Sun ukupmaruma deiyo keca karepnerutumpa, ware neng do yuma, ne buru tang sun nong deiki deiptenyopda sun peda, Allah er Lek Sambala doproptenge. ‘Ukuptene’ tenen, moropsene,” pepu.

20 Upepupa, Peterusdi tamupra pepu. “Uo, kanda, Allah bicau teneseredi, erdi tali karerserur keca, er Lek Sambalada, kandi, ‘Co bo deiki di kunuptene,’ tenepmarema tep, kan depmempa, kan co bo yuma gum kupkamre ja. 21 Allah dinmakerai, kupmarempa, kan dipru mali kupmakera cadi, nun adonmap pelda, bokra karepkenemepa, kandi ton men pel doptume. 22 Kan mali kupmaremada, tapmemdi Allah moropkurume. 23 Kanda, nimi tep dipru wilipra deremrum ngebo kunmareme. Ukunmarempa, epmakendi kael kepmakena cadi, kan dipru pumbon mali tenepmaremada, Allahdi kan dipru mali kupkeu keca dopra, gum kupra deipkamker do? Gum do? Atep, Allah moroprume.” Peterusdi Simon tep pepu.

24 Upepupa, Simon tamupra pepu. “Uo, ‘Kan pepmanerem keca yuma men kupkamemere’ tenen, kandi ne tep Allah moropneo,” pepu. 25 Simon kuramu mutu Allah upu peteremamreianen, ‘Tamupra Yerusalem mutu benkamnem’ tenen, bisi mapbaramreidi, Samaria mutu neitamai nimi ati arum domyai ati-ati weik peterep baramrei. Ada, Yesus cap kikiman kurami taru di, sun diramrei keca cap, sun gekeramrei keca cap tep, ‘Yesusdi teka tenena neng lyepkamre,’ pepra er upu peterepra embaramrei.

Pilipusdi lap pepupa, Etiopia mutu ngebo teka tenepupa, Pilipusdi me dongopu upu

26 Amenda taru, im deiki Allah er kai melimna ngebo, malaikat tenpu Pilipus damai peryaudi, aupu pepu. “Kanda Yerusalem mutu di Gasa mutu bana tep, atara neitamai yapra deipi bisi, ada bupu weik kuredi, me gum tep nimi men kunungai, amutu bisi, uberume,” pepu. 27 Upepupa, Pilipus gekepudi, gonga kepudi banmauanen, bisi neitamaida, Etiopia mutu ngebo men mepra banmaupane, Pilipus amenda beupa, epdarei. Angeboda, sun Etiopia mutu neng upu bongdina deiyo ner, er sida Kandes, aner er co bo cap, er bunga yuma capda, angebodi melipra talepra kuramu. 28 Angeboda, Yerusalem mutu benamudi, Allah si tali eremamnganen, er mutu tamupra banmauanen, er tu deiki embana keca ^{▼▼Tu deiki embarami kecalap pena upuda, nomor 24 dirume.} deiki bukmaudi, Allah er upu lap pena ngebo, nabi Yesaya sekamu buku penmau. 29 Penmaupa, Allah er Sambaladi Pilipus tep pepu. “Kanda atu deiki embanmar keca damai bememdi kikiman benkurume,” pepu.

30 Upepupa, Pilipus gekepudi atu deiki embana keca damai sepdaro beupa, Etiopia mutu ngebodi nabi Yesayadi sengamu buku penmaupa Pilipusdi gekepu. Gekepudi Pilipusdi asipterepu. “Kan penmarem upu ‘Deiyoda ake’ tenen, telep kupra kael kepmarum do, Gum do?” pepra asipetepu. 31 Upepupa, angebodi tamupra pepu. “Gume. Yuk ngebodi men lap pepnetuopda, ware kupra moupra kael keptene do? Atep, kan cap kikiman ne damaipu bungyayo,” pepu. 32 Angebo penmau upu, nabi Yesayadi sekeiamu upuda ake.
‘Sun domba popkungedi turya talepra baramengtopu, tonda, metek domba er potong toupkure taruda, er potong tourur ngebo damai dimpepra tengamretopu, angebo peda dimpepra kuramnga tep, upu tenpu ton cap men pepu.
33 Angebo er ali kupu taruda, telep upu wepra men pepra deipmemei. Ikin upupu pepra deipmemei. Sundi angebo popipa, konum depka tep, erdi deipupa dadeipdanen bange nengda, gum tep, ware nengdi lap peptenge do?’ (Yesaya 53:7-8)

34 Etiopia ngebo aupu penmaudi Pilipus tep asipterepu. “Kao, ne melipnememdi aupu deiyoda lape pepneo. Allah er upu lap pena tep, nabida ^{▼▼nabi Allahdi, ‘Ne upu cap, amenda kupkamu keca cap, nimi gekepkameng’ tenen, erdi wepra deiamu neng tep, er upu lap pepu pangeda, anengdi, yuk nesala yuma tep lap perbarami. Anengda ‘nabi neng’ penupe. Nabi neng, sun lap pena upuda, nomor 25 dirume.} adomon upu deiki di, aupu sekamu ngebodi ware ngebo tep sekamu do? Yuk ngebo tep sekamu do? Er pe tep sekamu do?” pepra asipterepu.

35 Asipterepupa, Pilipusdi angebo arup pepmau upu deiki di, gonga kepudi, adine dukdongopra kai telep upu, peterep banmau. Ada, ‘Yesusdi nimi lyepkamne’ tenen, yaua tep, aupu yuma peterep banmau.

36 Apio peterep banapu kunmauanen, bisai mokon deiamngai yareidi, angebodi pepu. “Mokon meneng damai deipka tep, adipapu me dongopnetum do? Ne tali ton kunkamne do, gum do?” pepu. 37 Upepupa, Pilipusdi pepu. “Kan kange tenena pio bongtona gum di, kan dipru neitamai di, Yesus tep teka tenepmem pangeda, me dongopketene.” Pilipus upepupa, aEtiopia ngebodi tamupra pepu. “Ne teka tenepmanada, Allah er Mi Sisada, Yesus Kristus er pua, tenepne,” pepu. 38 Upepupa, angebodi er bana melimna ngebo tep pepu. “Nun tu deiki embana keca dimpepra menengapu talepra teko,” pepu. Upepupa, menengapu bena talepra tekupa, Pilipus cap, aEtiopia ngebo cap, mokon neitamai bena tekreidi, Pilipusdi angebo me dongopu.

39 Pilipusdi angebo me dongopkopda, mokon neitamai di lukra bisi deiki tengbereipa, Allah er Lek Sambaladi Pilipus er nong menmena puto di dopropu. Dopropupa, Etiopia ngebodi Pilipus er nong ton cap men epu dinin, er kange deipudi, ka di tamupra bisi yopu banmau. 40 Angebo abisipu banmaupane, Pilipusda Asotus mutu adipapu belepra tengbeu. Belepra tengbeudi, yuk karen mutu sida, Asotus mutu, kai telep upu, ada ‘Yesusdi nimi lyepkamsere’ pepra peterepu. Peterepudi Kaisarea mutu benkamnga tep, bisi yo baramu taruda, abisi neitamai ati arum doramyai ati-ati weike kai telep upu, ada ‘Yesusdi nimi lyepkamsere’ pepra peterepra baramnganen, Kaisarea mutu beu.