Amo 1 | XteSC | STEP | Amosda, Tekoa mutu ngebo kuramu. Tonda, Amosda domba peina ngebo kuramu. Ataruda, Israel yala nesala tep, deiyo ngebo kepra taleamu ngeboda, Yoas er mi Yerobeam kuramu. Tonda, ataru peda, Yehuda yala nesala tep, deiyo ngebo kepra taleamu ngebo, Raja Uzia kuramu. Ataruda, Allahdi, ‘Amosda tali domba peina ngebo kurur dinin, ne upu lap perbenkamre’ tenen, er upu peipupa, Amos gekepu. Amosdi aupu gekepra sekamu taruda, mutu longna ilange, kapul men embenmau taru neitamai, Raja Yerobeam cap, Raja Uzia capdi nimi deiyo neng kepra, amutu neitamai kurami nesala yuma taleamrei. Amos aupu gekepu taru di dipra, keteng tamun butene ton cap, mapi taru neitamaida, Allahdi ila mutu longna karepu. Karepu taru di, aupu peipu taruda, ila mutu longna kapul men embeu dinin, Allah er upu lap pena ngebo Amos, er kori yan jenek peipupa, gekepu. Ada, Israel nesala tep, amenda taru kupkamunge tep, ‘Lap pepkurume,’ pepra yan peipu.

Amos 1

Allah er upu lap peramu ngebo Amos tep, lap pepu upu

1 Amosda, Tekoa mutu ngebo kuramu. Tonda, Amosda domba peina ngebo kuramu. Ataruda, Israel yala nesala tep, deiyo ngebo kepra taleamu ngeboda, Yoas er mi Yerobeam kuramu. Tonda, ataru peda, Yehuda yala nesala tep, deiyo ngebo kepra taleamu ngebo, Raja Uzia kuramu. Ataruda, Allahdi, ‘Amosda tali domba peina ngebo kurur dinin, ne upu lap perbenkamre’ tenen, er upu peipupa, Amos gekepu. Amosdi aupu gekepra sekamu taruda, mutu longna ilange, kapul men embenmau taru neitamai, Raja Yerobeam cap, Raja Uzia capdi nimi deiyo neng kepra, amutu neitamai kurami nesala yuma taleamrei.

Amos aupu gekepu taru di dipra, keteng tamun butene ton cap, mapi taru neitamaida, Allahdi ila mutu longna karepu. Karepu taru di, aupu peipu taruda, ila mutu longna kapul men embeu dinin, Allah er upu lap pena ngebo Amos, er kori yan jenek peipupa, gekepu. Ada, Israel nesala tep, amenda taru kupkamunge tep, ‘Lap pepkurume,’ pepra yan peipu.

Israel yala nesala kurami mutu damai dinin, tali yuk-yuk dakurami yala nesala tep, Allahdi wenepkamunge tep, pepu upu

2 Allah er si Yahwehdi, angebo er Amos tep pepu upuda ake.

“Allah Yahwehdi Sion mutu deiki yaredi, ila upu pepkamre. Tonda, Sion mutu neitamai dinin, amutu kota sida Yerusalem mutu yaredi, er si eremna ati pumbon di ila upu peprepa anesala yuma gekepkamenge. Ila upu di konum pepre pangeda, mutmuta paramrenge yumada, pio telep kuramu dinin, adipapu gelal sepdara kolupropkamre. Sun domba peina deiyo nesaladi, ‘Amutuda telep mutu,’ tenerami ngeda, mali kupkamre ja. Tonda Karmel mutu pare mutmuta yumada, nunupredi kolupra sakamre,” peramu.

Allahdi Israel yala nesala kunung mutu neitamai dinin, dan-dana ila ati arum dopra kunung nesala tep, wenepkamra tep, pepu upu

3 Allah er si Yahwehdi upepu. “Sun Damsyik mutu nesaladi, tupa-tupa ila di mali kununga tep, tek sisi nedi, sun amutu nesala yuma tep, wenepra popkamne. Sun tep bicau tenenuna cadi, sun mali kun keca weik kurami ngeda, pumun taru di adipapu wenepra men poptamsi. Dinino, sun Damsyik mutu nesala dipapu, Gilead mutu nesala tep, ila tulum kuprepa, weika di ponunge.

Ukupmantoda nimidi, ‘Gandum du taikameng’ tenen, ikin keca dopra, gandum du deiki deipmengedi taingamengtopu, sun Damsyik nesaladi, ne mawa nesala Gilead mutu neitamai kunge nesala tep, ikin keca weik sun nong deiki derinunge. Atep, ne Allahdi Damsyik mutu kunge nesala yuma tep, wenepra popkamne. Ange men tapkamne,” peipu.

4 Upepu dingeda, aupu ton peipu. “Ange tep nengeda, ne Allahdi sun deiyo ngebo Raja Hazael, er ila ati kururai cap, er ati kikiman kunge nesala cap, sun deiki uku dokotepkamne. Tonda, nimi deiyo ngebo Raja Benhadaddi, ‘Nun podana nesaladi yana popsenung’ tenen, ila gel beilya wipra ongopdongomunge yumada, uku dokotepnepa, erdi domu ati yuma jepropkamre.

5 Tonda, Damsyik mutu wengban bisi buplan damai, gat keca er si besi beton di ketenepra deiami keca yumada, nedi urupra tapkamne. Ukupne dingeda, amutu di dipdongopra popbanedi, Awen mutu damai yuma popra gawal dakamne. Anesala yuma poptapkamne ja. Tonda, Bet-Eden mutu neitamai, ila nimi deiyo kepra bungrur ngebo, emas maca dorur ngeboda, poptapkamne.

Tonda, Siria mutu kunung nesala yuma peda, popra wenepnedi, karen mutu si, Kir mutu neng karepnepa, Kir mutu dubengedi, wenemna ati neitamai bena deipkamenge. Neda, Allah Yahwehdi upepra deipsene,” peipupa, Amosdi gekepu.

Filistin nesaladi, mali kun keca weik kuramipa, Allahdi wenepkamunge tep, pepu upu

6 Allah er si Yahwehdi aupu ton peipu. “Sun Gasa mutu nesaladi, tupa-tupa ila di mali kununga tep, tek sisi nedi, sun amutu nesala tep wenepra popkamne. Sun mali kurami ngeda kaukeamsidi, adipapu wenepra men poptamsi dinin, ukutaruda sun mali kun keca weik kuraminge tep, anesala wenepra popkamne. Anesala tep popkamne ngeda, pio tek sisi men tapkamne.

Deiyoda, sun Gasa nesaladi, ne mawa nesala popbisipidi, ateng koupra dubenamidi, dopra, yuk nesala kori co bo kunumami. Adubenami nesalada, sun Edom mutu neng tep, ‘Apopbisipmepudi doupra yapu nengda, kunupseso,’ pepipa, Edom mutu nesaladi ne mawa nesala tep kunumami. Konum Edom mutu nengdi kunupi dingeda, sun pel dona tep doupra, sun mutu dubenamya tep, sun Filistin yala nesala yuma wenepra popkamne.

7 Sundi ukuraminge tep nengeda, ne Allahdi uku dokotepnepa, Gasa mutu gel beilya wipra kunga deiyoida, uku jepra gawal dakamre. Tonda, sun Gasa mutu nengdi, ‘Nun podana nesala yana popsenung’ tenen, ila gel beilya wipra ongopdongomunge yumada, uku dokotepnepa, sundi domi ati yuma uku jepropkamre. 8 Tonda, Asdod mutu kunge nesala cap, Askelon mutu deiyo ngebo cap, sun nyapu yuma capda, nedi popra gawal dakamne ja. Ange konum kupne dingeda, Ekron mutu nesalada, dopra yukai dokotepkamne.

Ukupnedi nesala peda, wenepra popkamne. Popne dingeda, sun Filistin neng tupa gawal tapkamne. Ukupnepa, ton tupa akunkameng nesala yuma popra, gum kupra deipkamne. Neda, Allah Yahwehdi pepsene,” peipupa, Amosdi gekepu.

Tirus mutu nesaladi, mali weik kuramipa, Allahdi wenepkamunge tep, pepu upu

9 Allah er si Yahwehdi aupu ton peipu.

Sun Tirus mutu nesaladi, tupa-tupa ila mali kununga tep, tek sisi nedi, sun amutu nesala tep wenepra popkamne. Menop taru, sun mali kurami ngeda kaukeamsidi adipapu wenepra men poptapsi dinin, ukutaruda sun mali kun keca weik kuraminge tep, anesala yuma popkamne. Anesala popkamne ngeda, pio tek sisi men tapkamne. Deiyoda, sun Tirus mutu nesaladi, ne mawa nesala, Israel neng tep ateng kouprapidi, anesala doprapidi yuk karen mutu neng kori co bo kunumami.

Akunumami nengda, sun Edom mutu neng tep, “Ateng koupra duyanmape nesala kunupseso,” pemipa kunuamya tep, adeiki di, sun Tirus mutu nesaladi, sun Israel nesala tep, “E, nun kayape, sun Israel nesala cap, nun cap, podana gum dipapu, telep kupra kikiman kunkamepe,” pepra konum pedina upu peiamipane, sun Tirus nesaladi, aupu tapya tep, anesala yuma wenepra popkamne.

10 Sundi amali weik kuraminge tep nengeda, ne Allahdi uku dokotepnepa, Tirus mutu gel beilya wipra kunga deiyoida, ukudi jepra gawal dakamre. Tonda, sun Tirus mutu nengdi, ‘Nun podana nesala yana popsenung’ tenen, ila gel beilya wipra ongopdongomrumunge yuma cap, tonda sundi domi ati yumada uku dokotepnepa, ukudi jepropkamre.

Edom mutu nesaladi, mali weik kuramipa, Allahdi wenepkamunge tep, pepu upu

11 Allah er si Yahwehdi aupu pepu.

Sun Edom mutu nesaladi, tupa-tupa ila di mali kununga tep, tek sisi nedi, sun amutu nesala tep, wenepra popkamne. Menop taru, sun mali kurami ngeda kaukeamsidi, adipapu wenepra men poptapsi dinin, ukutaruda sun mali kun keca weik kuraminge tep, anesala popkamne. Anesala tep popkamne ngeda, pio tek sisi men tapkamne.

Deiyoda, sun Edom mutu nesaladi, sun meneng dam nesala, ne nyapu Israel neng weika di poramya tep, kwangdakra popkamne. Ada, sun kayapu sisa tep, bicau tenena gum dipapu, Israel nesala tepapu mar peramidi poramya tep, sun Edom nesala wenepra popkamne. Edom nengdi Israel nesala tep men kaukemamidi, pio yu kuramupa, tupa-tupa tenepnedi, poryakaraminge tep popkamne.

12 Sundi amali weik kuraminge tep nengeda, ne Allahdi uku dokotepnepa, mutu si Teman mutu ati cap, amutu kunge nesala cap, ukudi jepra gawal dakamre. Tonda, sun Bozra mutu nengdi, ‘Nun podana nesala yana popsenung’ tenen, ila gel beilya wipra ongopdongomunge yuma cap, sundi domi ati yuma cap, uku dokotepnepa, ukudi jepropkamre. Allahdi pepu.

Amon mutu nesaladi, mali weik kuramipa, Allahdi wenepkamunge tep, pepu upu

13 Allah er si Yahwehdi aupu ton peipu. “Sun Amon mutu nesaladi, tupa-tupa ila di mali kununga tep, tek sisi nedi, sun amutu nesala tep wenepra popkamne. Menop taru, sun mali ngeda kaukeamsidi, adipapu men wenepra poptapsi dinin, ukutaruda sun mali kun keca weik kuraminge tep, anesala popkamne. Anesala tep popkamne ngeda, pio tek sisi men tapkamne. Deiyoda, sun Amon mutu nesaladi, ‘Nun dipapu amutu yuma go weika di talepkamepe,’ teneramidi mar podan taruda, sundi Gileat mutu kurami nerapu, mumun douaminge cap, melo nyapu cap yuma popra tamaminge tep, kwangdakra popkamne.

14 Atep nengeda, ne Allahdi Raba mutu beilya wipya damai cap, ila lyom beilya wipra ongopdongopinge cap, uku dokotepnepa, jepropredi gum kupkamre. Tonda, sun Raba mutu nengdi, ‘Nun podana nesaladi yana popsenung’ tenen, ila gel beilya wipra ongopdongomunge yumada, uku dokotepnepa, sundi domi ati yuma ukudi jepropkamre. Ukupra anesala popkamne taruda, mar podan taru ila lelim peramretopu penmarepa gekepkamenge. Tonda, mar podan taruda, ue tenpu uku bu ding pepredi, jeramretopu kupkamre. Tonda, ila mungna puto di pung peprepa, ati cap, akeca-keca yuma cap, urupra gawal dangamretopu kupkamre.

15 Ukupne pangeda, amutu neitamai ila nimi deiyo kepra talenung neng, Raja-Raja yuma cap, tonda sun amutara ila pel deiyo yuk-yuk talepra, donung neng yuma capda, doprapnedi yuk mutu nesala karepnepa, ateng koupmengedi, yuk mutu derirbenkamenge. Neda, Allah Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} peipsene,” pepra Amos kori peipupa, Amosdi gekepu.