Amo 2 | XteSC | STEP | Allah Yahwehdi aupu ton peipupa, Amosdi gekepu. Allah er si Yahwehdi aupu peipu. Sun Moab mutu nesaladi, tupa-tupa ila di mali kununga tep, tek sisi nedi, sun amutu nesala tep wenepra popkamne. Sun mali kunge keca kaukeamsidi, adipapu wenepra men poptapsi dinin, ukutaruda sun mali kun keca weik kuraminge tep, Moab nesala weika di wenepra popkamne. Anesala tep popkamne ngeda, pio tek sisi men tapkamne. Deiyoda, sun Moab mutu nesaladi, Edom mutu ila nimi deiyo kepra taleamu ngebo konum deamupapu, Moab nengdi, ‘Walito depupa peipi,’ tenepidi, er angebo peiaminge dakra tapidi, er yo dopra uku dongopipa, uku jeprapudi sikke daunge tep, ne Allahdi sun Moab mutu nesala yuma wenepra popkamne.

Amos 2

1 Allah Yahwehdi aupu ton peipupa, Amosdi gekepu. Allah er si Yahwehdi aupu peipu.

Sun Moab mutu nesaladi, tupa-tupa ila di mali kununga tep, tek sisi nedi, sun amutu nesala tep wenepra popkamne. Sun mali kunge keca kaukeamsidi, adipapu wenepra men poptapsi dinin, ukutaruda sun mali kun keca weik kuraminge tep, Moab nesala weika di wenepra popkamne. Anesala tep popkamne ngeda, pio tek sisi men tapkamne.

Deiyoda, sun Moab mutu nesaladi, Edom mutu ila nimi deiyo kepra taleamu ngebo konum deamupapu, Moab nengdi, ‘Walito depupa peipi,’ tenepidi, er angebo peiaminge dakra tapidi, er yo dopra uku dongopipa, uku jeprapudi sikke daunge tep, ne Allahdi sun Moab mutu nesala yuma wenepra popkamne.

2 Sundi mali weik kuraminge tep nengeda, ne Allahdi uku dokotepnepa, Moab mutu cap, Moab nesala cap, ukudi jepra gawal dakamre. Tonda, sun Keriot mutu nengdi, ‘Nun podana nesaladi yana popsenung’ tenen, ila gel beilya wipra ongopdongopinge yumada, uku dokotepnepa, sundi domi ati yuma, ukudi jepra gawal dakamre.

Tonda, Moab mutu kunung nesalada, tali dimpepra kuna gum dipapu, mali pepra, ngolongmangepapu, nedi sun popnepa depkamenge. Ada yuk nesaladi, sun mutu yana popkameng taruda, lelim weika di pena cap, tonda, lyom bung-bung pena, er sida terompet, lelim di peten pepkamre taru depkamenge. Alelim pepre taruda, mar podana gonga kepmengepa, Moab mutu nesalada, alelim gekepmenge taru dipapu depkamenge.

3 Moab mutu talepra, ila nimi deiyo ngebo kepra kuramu ngebo cap, tonda, er amutara pel deiyo yuk-yuk talepra, dopra kunung neng cap yumada, popra tapkamne. Sun Raja deiyo ngebo depkamre tarupu, er amutara deiyo neng peda, yuma depkamenge. Allahdi peipupa, Amos gekepu.

Yehuda yala nesaladi, mali weik kuramipa, Allahdi wenepkamunge tep, pepu upu

4 Allah Yahwehdi aupu ton dukdongopra peipupa, Amosdi gekepu.

“Sun Yehuda yala nesaladi, tupa-tupa ila di mali kununga tep, tek sisi nedi sun amutu kunge nesala tep, wenepra popkamne. Sun mali kurami keca kaukeamsidi, adipapu wenepra men poptapsi dinin, ukutaruda sun mali kun keca weik kuraminge tep, anesalada popkamne. Anesala tep popkamne ngeda, pio tek sisi men tapkamne. Deiyoda, sun Yehuda yala nesalada, ne Allah Yahwehdi, ‘Ange kunkamrume, angeda men kunkamrume,’ pepra deiamsi upu yuma, tapra yaniramidi, sunda tumi-tumi yuma konum pio malipu kununge.

Nedi, peiamsisi upu yumada, ‘Nun song’ tenen, tamnapu kuruma tep, tek sisi nedi wenepra popkamsene. Ada tali tep gume, sun co puna neng si eremami keca, ubo keca cap, nimidi petupra derinung keca cappu, si eremenga deiki di, mok upupu gekepra talenunge. Ne Allahdi peiamsinge ton men tenengedi, mali kun kecapu tenenunga tep, Yehuda yala nesala yuma wenepra popkamne.

5 Sundi amali keca weik kuraminge tep nengeda, ne Allahdi uku dokotepnepa, Yehuda mutu cap, amutu kunge nesala cap, ukudi jepra gawal dakamre. Tonda, sun Yerusalem mutu nesaladi, ‘Nun podan nesaladi yana popsenung’ tenen, ila gel beilya wipra ongopdongominge yumada, uku dokotepnepa, abeilya cap, sundi domi ati yuma cap, uku jepropredi, gawal dakamre.” Allahdi peipupa, Amos gekepu.

Israel nesaladi, mali weik kuramipa, Allahdi wenepkamunge tep, pepu upu

6 Allah Yahwehdi aupu ton peipupa, Amosdi gekepu.

Sun Israel yala nesaladi, tupa-tupa ila mali kununga tep, tek sisi nedi, sun amutu nesala tep wenepra popkamne. Sun mali kurami ngeda kaukeamsidi, adipapu wenepra men poptapsi dinin, ukutaruda sun mali kun keca weik kuraminge tep, anesala popkamne. Anesala popkamne ngeda, pio tek sisi men tapkamne. Deiyoda, sun Israel nesaladi, pio dumsisi teleppu kunge nesala tep, ‘E nun kayape neng ake,’ tenena gum di, “Gume, anengda, nun pel donkamsenga tep, anesala ateng koupmengedi, dopra sun ati bena deipnepa, pel donkamsenge.

Sun kunumna tep nengeda, sundi kunumna weik keca, er si perak karepkamserume,” pepra dubanunge. Ange kununga utopu, akeca-keca yuma men kwapmarepapu, tali kan-kan kunge nesala peda utopu kupra, ‘Nun pel tali donkamseng’ tenen, ateng koupmengedi, dubena yuk neng tep, “Kunumna keca gum dinin, yantang kenengna keca, er si sandalpu karepsemumdi, anesala dopropkamrume,” pepra, kankan kunge nesala kunumnunge. Yuk nengdi akankan kunge nesala konum kunupmengopda, ikin pel dimnunge.

7 Tonda, nimidi, kalkal tu deiki yanipra baramengtopu, sun Israel nesaladi, kankan kunge nesala tep, ila ikin pel dipmengepa, pio kange mun kange doupra kununge. Ange utopu, pu jeramrepa puto bounpu kunge nesala tep nengeda, ‘Sun anengda dakwapye’ tenen, yanitamengedi, pio men melimnunge. Tonda, sun nai yapu cap, sun nyapu capdi, tenpu kaber ner kuramrepa, anerpu sun butene di bena dopra, nyangrerunge.

Amali keca yuma kununga deiki di, ne Allah lek ngebo, ne si mali kudinenunge. Sun mali kunge keca, yuk nesala ton epmengedi, ne Allah tep, “E, er mawa nesalada, pio mali kunge nesala cadi, sun nai Allah peda, utopu kurure,” pepra, ne si mali pepra yanimnenunge. Mali weik kununga cadi, nedi Israel nesala yuma wenepkamne.

8 Sun Israel nesalada, ware tali keca do yuma, akeca si eremna tep, yuk nengdi, ‘Gam keca popra, si eremnup keca karenkamep’ tenen, pala gel taplakra deriramengai yumada, akeca damai tali kange deipra manunge. Tonda, tali keca tep si eremna ati neitamai tali-tali mapembange taruda, upula dororami opkal deiki di manunge.

Ada, yuk nesala tep, co bo ke karepmengedi, ‘Aco bo tamupra karepkamseng’ tenen, “Sun telep opkal karepsemumpa, nun co bo tamupra karepsemumnyopda, aopkal tamupra karenkamsepe,” penung dinin, tek sisi tamupra men karenunge. Tonda, Allah, ne si eremna ati neitamai pel donge taruda, upula dororami co bo deiki di kunumami anggur me gwepra jenunge. Ukupra kununga deiki di, sundi ne Allah tep, si yanitamnenunge. Allahdi peipupa, Amos gekepu. Allahdi aupu peprapudi aupu ton pepu.

9 Uo sun Israel nesaladi, ne tep mali kudinerum dinin, ka di ton cap tenipetepso. Uo, ne nyapu Israel nesalao. Sun Amori mutu nesalada, pio ila-ila neng kurami. Sunda, cemara co ila di erepra neramre utopu kupra nerami neng dinin, nedi meliamsisa deiki di, sun Amori nesala tep popbisiprume. Tonda, pio gat co, er si Ter pentin co utopu kupra, puto pio weik nesala kurami dinin, nedi meliamsisa deiki, sun Israel nesaladi, Amori mutu nesala yuma popbisiprume.

Anesala yuma popra tamsi ngeda, men kael keprumdi luprorum do? Ukupmantoda, nimidi, du mouramre co, du yuma dakmengedi, co deiyo kwepmengedi, er yaten yuma palipmengepa, aco kouluramre. Kouluramretopu, Amori nesalada, puto weik nesala kurami dinin, nedi sun Amori yala nesala yuma portamamsi. Ada tali tep men kwamsi. Sun Israel nesala melimna tep kwamsipane, men kael kemamrume.

10 Tonda, sun Mesir mutu neitamai pio kange mun kange doupra kuramrumpane, ne dipapu lyepra dopramsisi. Ukupsidi, sun telep mutu bana tep, katuai mutu bisi duyanamsisi. Ada keteng tamun denge weik, empat puluh tahun deiki di, katuai mutu bisi pio kalekra melipyakaramsisipa, yakaramrume. Ukuramrumpane, nedi Amori yala nesala, sun talepra kurami mutu dalupra kareramsisipa, sun pe mutu utopu kupra, yan kuramrume. Angeda, nedi tek sisi sun melimna tep ukuramsi dinin, ange yumada, sundi tenepra men kael keprume.

11 Tonda nedi meliamsisi taru neitamaida, sun nyapu yuma neitamai, nedi bokrapsisidi, ton tara nengda, ‘Allah upu lap pena deiyo neng kunkameng’ tenen, wepra deiamsisi. Ton tara kaber nengda, ‘Amenda kupkamre keca lap pena deiyo neng, nabi kunkameng’ tenen, wepra deipyakaramsisi. Ton tara kaber nengda, ‘Ne Allah upu moupra gekepmengedi, pio dumsisi kungedi, ne pelpu donkamneng’ tenen, ereipsidi, keteneipyakaramsi. Apesene ngeda, tali pepsen do? Tek sisi kuramsisi do? Israel nesalao, ange yumada sundi moupra tenepmumdi, kael kepso. Neda sun nai bo Allah Yahwehdi pepsene. Allahdi peipupa Amos gekepu. Allahdi aupu ton pepu.

12 Ne Allahdi, ‘Ne upu moupra gekepmengedi, pio dumsisi kungedi, ne pelpu donkamneng’ tenen, wepra deipsisidi, erepra deipsi nengda, “Sun Nasir nengda, kange yawaramamre me jena meme,” peipsi. Dinino sun Israel yala nesaladi, ne wepra deiamsi neng tep, “Sunda, kange yawaramamre meda, tali lupra jepso,” peamruma deiki di jerami. Tonda, ‘Amenda kupkamre keca cap, Allah upu cap lap pena deiyo neng, nabi neng kunkameng’ tenen, wepra deiamsisi neng tep nengeda, sun Israel nesaladi, “Aupu yuma, nun kori lap pena gume. Aupuda, nun damai men lap peryakankamserume,” pepra, upu sengamrumpa, aupu men perami. Mambul upu peiamsisi ngeda, konum yaniptapmarume.

13 Atep ngeda ukutaru, nedi sun deiki ikin keca weik deipsenepa, aikin keca di darapdongopserepa, tu deikipu geipdongopkamrume. Ange utopu, ukupmantoda kuda bisamdi gipra, tu deiki embaramre keca, er sida kereta kuda, gandum pio weik dopra akeca pumbon ikin pio weika di deriramengepane, ikin kuprepa, akeca men benmanto kuramretopu, nedi sun tep wenepsenepa, sun peda ikin weik kunkamrume.

14 Tonda, markapang sepdara bare ngebo peda, adipapu men sepdaro benmanto kupkamre. Ange utopu, ila puto di kurami dinin, ataruda puto kurami nesala peda, puto gum kupkamre. Tonda, ila puto kurami jen talen neng peda, lyepra men deipdankamenge. Sun yuma puto bounpu kunkamrume.

15 Tonda, mar podana tep ila kael neng peda, adipapu jen men dopmanto kupkamenge. Tonda, menmena sepdara barameng nesala peda, adipapu sepdara men benmanto kupkamenge. Tonda, kuda bisam bali deiki bukra sepdara embaramenge nesala peda, sepdara men benmanto kupkamenge. Sun yumada, ikin weik kuprepa, men lyepdanmanto kupkamenge. Sun yuma ikin kecapu doropkamenge.

16 Ne Allahdi sun Israel nesala tep, wenepra popkamsen taruda, jen talen neng pio kwar men kurur neng yuma peda, sun jen ton pio men doupkamenge. Ada, sun kwar kuprepa, jen men doupmanga tep, ‘Uo’ tenen, jen tapmengedi, kange mun kange doupra sepdara bendopkamenge. Ada tali tep gume. Nedi sun Israel nesala tep, wenepkamsen taru konum kupre pangeda, tenpu ngebo peda ton, men dimpepra tekamenge. Sun yuma tapra benkamenge. Ange yumada, tek sisi ne sun deiyo ngebo Allah Yahwehdi pepsene. Allahdi pepupa, Amosdi gekepu.